Chɔɔsuaa 10:1-43
10 Okoŋ, mi Adona-sidɛki, masaa le Chulusalɛm tuɛi maa Chɔɔsuaa bii Eyai mbo tɛɛmbuu ndu. Nduyɛ maa, mɛɛ o tɛɛmbuu Chɛluiko a masa wa loŋ ndo yɛ, lende koni o tɛɛmbuu Eyai a masa wa loŋ ndo ni. Mbo tuɛi vɛlɛ maa waŋnda Kibiɔŋ tosa kɔl nyuloo a Isɔluɛiya, ma chɛl nda le ma wa nda tɛɛŋ. Dimioo nuaa o tuei hei,
2 mi siooŋnde bii ndu. Kanifuule, chiee bɛndoo pila Kibiɔŋ wa ni. Mɛɛ chieeŋ bɛnduŋ lemasaŋ wa nuaa yɛ, lende o wa ni. Chioo hoo ndoo hiou Eyai poloŋ. Nduyɛ puaa wa loŋ nda kpou, kuubaa chɔuwa nda wa ni.
3 Le hei, mi Adona-sidɛki, masaa le Chulusalɛm yɔŋ yooŋgoo o Hoham ndo masaa le Hɛbulɔŋ, Piluam masaa le Chamuti, Chafiya masaa le Lakisi, a o Dɛbiluii lo masaa le Ɛkilɔŋ. Mbo dimul nda aa:
4 “La huŋ mala ya miŋ del Kibiɔŋ choo. Kanifuule, waŋnda Kibiɔŋ tosa chɛlaŋ kɔl nyuloo a Chɔɔsuaa vɛlɛ a Isɔluɛiya.”
5 Okoŋ, mi masaa ŋuɛɛnuaa Amɔluaitiiya haa, masaa le Chulusalɛm, masaa le Hɛbulɔŋ, masaa le Chamuti, masaa le Lakisi, a masaa le Ɛkilɔŋ, a chuuŋgiaŋ diompilɛ a puaa ndaa chɔuwa. Nduyɛ, ma kɔ balu Kibiɔŋ le chɔuwo.
6 Okoŋ, mi puaa Kibiɔŋ yɔŋ yooŋgoo o Chɔɔsuaa lo o dɔɔŋgɔɔ niŋ Kikaa. Ma dimul ndu aa: “Yandii, mal chiaa numnda le. Huŋ chɔ chɔ ma piŋi naa, nduyɛ ma mala naa! Kanifuule, masaa Amɔluaitiiyaa cho o pemboŋ choo wa kpou chuuŋgiaŋ le naa delɔɔ choo.”
7 Mi Chɔɔsuaa chaŋ Kikaa mbo kua nda puaa chɔuwa a kuubaa dialuŋ kalaa kpou.
8 Mi Chɛhowa dimul Chɔɔsuaa aa: “Yɔŋ isiooŋ le nda le. Kanifuule, I mal nda num o ba. Waŋndo o pilɛ bɛɛ nɔla niŋ mbo simul num te.”
9 Mɛɛ Chɔɔsuaa chɛŋ Kikaa, mbo lɔɔlu kɔlaŋ pii pii, okoŋ mbo kɔ woolu nda.
10 Mi Chɛhowa tosa ma yɔŋnuŋ pulaŋ pulaŋ mɛɛ nda che Isɔluɛiya. Nduyɛ, mi Isɔluɛiya diu nda tau tau Kibiɔŋ loŋ. Ma chua nda touwɔɔ, ma kua haaa o nɛi heelu Bɛti-hɔlɔŋ ndo. A lo kɔlaŋ a nda diuwo haaa ma fuuluu Asikaa a Makɛdaa di.
11 Mɛɛ nda wa Isɔluɛiya nyaanɔŋndo ma wa pembii Bɛti-hɔlɔŋ nde tolɔɔ, mi Chɛhowa tusi nda looŋ kpuŋgbaŋ bɛndoŋ choo. Miŋ lo nda diuwo haaa kɔ Asikaa. Nduyɛ pɛŋ, wanaa looŋ kpuŋgbaŋ diu wa ndaa hiou a wanaa Isɔluɛiya diu a mɔɔŋ faŋndoŋ nda.
12 O paale Chɛhowa pɛl Amɔluaitiiya waŋnda Isɔluɛi lachi leŋ choo, Chɔɔsuaa dimul Chɛhowa Isɔluɛiya o hɔl ni aa:
“Paaleŋ, sim Kibiɔŋ choo yi,Nduyɛ num paŋgei, sim o Kpoloŋndo* Aichalɔŋ choo!”
13 Okoŋ, mi paaleŋ le sim yi. Nduyɛ paŋgei bɛɛ lo isisi haaa mi Isɔluɛiya miŋgul yaamɔɔwaa ndaa maa. Baa hei cho i poonyiaa o yau Chasilua wo niŋ te? Mi paaleŋ le sim yi o bolleŋ choo deŋ, nduyɛ mi le chua paaleŋ kpulukuu le del te.
14 Kani bɛɛ nyɛ yɔŋnuŋ paale leŋ ndo ndoo yɔŋnuŋ ndɔ le, le mi Chɛhowa yaŋ wanachioo nilaŋ maa paale leŋ. Nduyɛ, i yɔŋnuŋ vɛlɛ okoŋ kɔɔli le. Kanifuule, Chɛhowa wa chɔulabaa le Isɔluɛiya ni.
15 Okoŋ kɔɔli, mi Chɔɔsuaa nda Isɔluɛiya kpou miiŋgu o dɔɔŋgɔɔ niŋ Kikaa.
16 Kɛ nduyɛ, masaa ŋuɛɛnuaa haa ndaa nyaanuŋ niŋ, ma kɔ vioŋnuŋ o buuloo niŋ Makɛdaa.
17 Okoŋ, mi waŋnda dimul Chɔɔsuaa aa: “A saaluŋ masaa ŋuɛɛnuaa kaŋ a viaŋnaŋ o buuloo niŋ Makɛdaa.”
18 Mi Chɔɔsuaa dimi aa: “La pimbul pouta bɛndulaŋ o buuloo sondoo, okoŋ mi la kɛsi waŋnda loŋ le mɛŋgɛlaa.
19 Kɛ nya wanaa tuaa, la sim te. La hiou lachi a yaamɔɔwaa nyaa touwɔɔ mi la diu diu nda. La chɛl nda ma luɛi o chieeŋ ndaŋ niŋ te, kanifuule Chɛhowa Mɛlɛka nyaa chii nda malɔɔ nya o ba.”
20 Mi Chɔɔsuaa a Isɔluɛiya diu yaamɔɔwaa ndaa a hɔbɛi. Mɛɛ a nyaanuŋ ma kɔ luɛi o chieeŋ nɔ kpakila kala kalalaŋ niŋndoŋ nda ma lo. Ndoo lo chobe mi ndaa basu nda tɛɛ.
21 Mɛɛ nda chii, mi waŋnda kpou miiŋgu yɛlɛkɛlɛɛ o Chɔɔsuaa lo o dɔɔŋgɔɔ Makɛdaa. Wana pilɛ bɛɛ bii lɛ kɔllo mbo hol Isɔluɛiya sondoo le.
22 Okoŋ mi Chɔɔsuaa dimi aa: “La faŋa poutaŋ o buuloo sondoo, mi la chuu ya masaa ŋuɛɛnuaa kaŋ.”
23 Ma soli masaa haa o buuloo niŋ ma chuu ndu. Nda cho ni, masaa le Chulusalɛm, masaa le Hɛbulɔŋ, masaa le Chamuti, masaa le Lakisi, a masaa le Ɛkilɔŋ.
24 Mɛɛ nda hiŋ a nda o Chɔɔsuaa lo, mbo veelu puaa Isɔluɛi kpou. Mbo dimul wanaa wa puaa chɔuwa bolleŋ, ma kua a ndu latulu wa aa: “La sɔɔŋguu lachi nanuŋ. La nɛi masaa haa o ŋkɛsu.” Okoŋ ma kua, ma kɔ nɛi nda o ŋkɛsu.
25 Mi Chɔɔsuaa dimul nda aa: “La yɔŋ isiooŋ ɔɔ mi la nyiiya le. La nɔ kɔlta simulaalaŋ, mi la kendu ŋdial. Kanifuule, nuaa Chɛhowa cho tosa a yaamɔɔwaa nya cho chɔulabaa kpou wa ni.”
26 Okoŋ mi Chɔɔsuaa diu nda, mbo landu nda o yɔmnde i ŋuɛɛnu. Nduyɛ, a lo a landaa o yɔmii keŋ haaa mi paaleŋ le yɔŋguŋ.
27 Mɛɛ paaleŋ le del, mi Chɔɔsuaa dimi le ma tusi nda o yɔmnde choo, ma kɔ viou nda o buulu ndaa veŋnuŋ ndo niŋ. Ma handu pouta bɛndulaŋ o buulu koŋ sondoo. Haaa a paale hauleŋ ndeŋ, pouta laŋ la cho wɔ loŋ.
28 Mi Chɔɔsuaa bii chioo Makɛdaa o paale leŋ choo, mbo diu wanaa wa loŋ nda a muɛi faŋnde. Mbo dii masa wa loŋ ndo a wanaa wa o chiee koŋ niŋ nda, wana pilɛ bɛɛ o mɛi le. Mɛɛ o tosa a masaa Chɛluiko yɛ, lende koni o tosa a masaa Makɛdaa ni.
29 Okoŋ, mi Chɔɔsuaa nda Isɔluɛiya kpou chaŋ Makɛdaa ma kua Libina, ma kɔ del ndu choo a sɔŋgɔɔ.
30 Mi Chɛhowa mal vɛlɛ chioo hoo a masa wa loŋ ndo waŋnda Isɔluɛi o ba. Ma diu wanaa wa loŋ nda a mɔɔŋ faŋndoŋ, wana pilɛ bɛɛ a mɛi le. Mɛɛ nda tosa a masaa Chɛluiko yɛ, lende koni nda tosa a masa wa o chioo hoo niŋndo ni.
31 Mɛɛ Chɔɔsuaa nda Isɔluɛiya faŋaŋ Libina, ma kua Lakisi ma kila dɔɔŋgɔɔ loŋ. Okoŋ, ma del chioo hoo choo a sɔŋgɔɔ.
32 Mi Chɛhowa mal Lakisi waŋnda Isɔluɛi o ba, nduyɛ ma bii chioo hoo o paale diiŋ ndɔ leŋ choo. Ma dii wanaa wa loŋ nda kpou a mɔɔŋ faŋndoŋ, mɛɛ nda tosa a Libina yɛ.
33 Mi Holuam, masaa le Kiisa kua le waŋnda Lakisi chɔuwo malaa. Kɛ mi Chɔɔsuaa dii ndu a wanaa nduaa. Wana pilɛ bɛɛ lo le.
34 Okoŋ kɔɔli, mi Chɔɔsuaa nda waŋnda Isɔluɛi chaŋ Lakisi, ma kua Ɛkilɔŋ ma kila dɔɔŋgɔɔ loŋ. Okoŋ, ma del chioo hoo choo a sɔŋgɔɔ.
35 Ma bii chioo hoo o paale leŋ choo, ma diu wanaa wa loŋ nda kpou a mɔɔŋ faŋndoŋ, mɛɛ nda tosa a Lakisi yɛ.
36 Mi Chɔɔsuaa a waŋnda Isɔluɛi faŋaŋ Ɛkilɔŋ, ma kua Hɛbulɔŋ, okoŋ ma del chioo hoo choo a sɔŋgɔɔ.
37 Mɛɛ nda bii chioo hoo, ma dii masa wa loŋ ndo, wanaa wa o chioo niŋnda, a wanaa wa o chieeŋ balu woŋ niŋnda kpou a mɔɔŋ faŋndoŋ. Wana pilɛ bɛɛ a mɛi le. Ma tɛɛmbuu wanaa wa loŋ nda kpou, mɛɛ nda tosa a Ɛkilɔŋ yɛ.
38 O mɛɛlulaŋ kpɔŋ, mi Chɔɔsuaa nda Isɔluɛiya kpou muliŋ ma kua Dɛbiluii, okoŋ ma del chioo hoo choo a sɔŋgɔɔ.
39 Ma bii chioo, masa wa loŋ ndo, a chieeŋ balu ndu woŋ kpou. Nduyɛ, ma diu wanaa wa loŋ nda kpou a mɔɔŋ faŋndoŋ. Wana pilɛ bɛɛ a mɛi le. Mɛɛ Chɔɔsuaa tosa a Hɛbulɔŋ vɛlɛ a Libina yɛ, lende koni o tosa a Dɛbiluii ni. Nduyɛ, nyɛ o tosal masaa le Libina wo, ndu koni o tosal masaa le Dɛbiluii ni.
40 Mi Chɔɔsuaa bii lɛŋnde ŋpembuleŋ, tanda Nɛkɛbi* wo, tanda Siɛfila* wo, a lɛŋnde holnuŋ pembuŋ bɛndoŋ ndeŋ. Nduyɛ, mbo yam masaa wa loŋ nda. Mbo diu wanaa wa loŋ nda kpou, mɛɛ Chɛhowa, Mɛlɛka Isɔluɛiya dimi yɛ. Wana pilɛ bɛɛ o mɛi le.
41 Mi Chɔɔsuaa yam nda chɔŋ Kadɛsi-baniaa mbo kua Kaasa a o lɛŋnde Koosiɛŋ ndeŋ niŋ kpou, haaa Kibiɔŋ.
42 Mi Chɔɔsuaa yam masaa haa kpou o teleŋ pilɔɔ bɛŋgu, nduyɛ mbo bii lɛŋii ndɛi. Kanifuule, Chɛhowa, Mɛlɛka Isɔluɛiya wa chɔulabaa le Isɔluɛiya ni.
43 Okoŋ, mi Chɔɔsuaa miiŋgu a Isɔluɛiya kpou o dɔɔŋgɔɔ niŋ Kikaa.