Chɔɔsuaa 11:1-23
11 Dimioo nuaa mi Chabiŋ masaa le Hasɔɔ tuɛi a ndi okɔɔ, mbo yɔŋ yooŋgoo o masaa haa lo: Chobabi masaa le Madɔŋ, a masaa le Similɔŋ, a masaa le Akisiafi,
2 a masaa wa o lɛŋnde ŋpembuleŋ ba luaŋ ndo wa, haa o dɛŋgbɔɔ niŋ Kinɛluɛti ba tou wo, haa o tanda Siɛfila* wo niŋ, a haa o pembuŋ cho Dɔɔ woŋ holnɔŋndo, ba paaleŋ le del lo.
3 Mbo yɔŋ vɛlɛ le Kenanaitiiyaa wa ba paaleŋ le chaŋ ndo a ba paaleŋ le del lo wa, a kaala cho o lɛŋnde ŋpembuleŋ ndaŋ. Laŋ la yɔŋnuŋ ni maa, Amɔluaitiiya, Hitaitiiya, Pɛluisaitiiya, a Chɛbusaitiiya. Mbo yɔŋ vɛlɛ le Hivaitiiyaa wa o pembii Hɛmɔŋ Nde bɛŋgu, o lɛŋnde Misipɛ leŋ niŋnda.
4 Okoŋ, ma huŋ a puaa ndaa chɔuwa kpou. A wa a kuaŋnaŋ kɛ kɛ, mɛɛ siooŋnde wa nuaa o pee mɛŋma ihɛllo kɔŋgɔ yɛ. Suaa ndaa, a nyɛm nyaanaŋ suaa naŋndoŋ bɛɛ wa ŋ hɔbɛi.
5 Masaa haa kpou, ma chɛlaŋ le ma chuuŋgiaŋ diompilɛ. Okoŋ, ma huŋ kiolu dɔɔŋgɔɔ o pioo Mɛlɔm le Isɔluɛiya chɔulabaa.
6 Mi Chɛhowa dimul Chɔɔsuaa aa: “Yɔŋ isiooŋ le nda le. Kanifuule a teleŋ waa nuaa siɔdii, I cho nda kpou malɔɔ Isɔluɛiya o ba ma diu diu nda. La nɔ mi la kili suaa ndaa nyɛsuaŋ, nduyɛ mi la lom nyɛm ndaŋ nyaanaŋ suaa naŋndoŋ.”
7 Mi Chɔɔsuaa chua puaa nduaa chɔuwa ma kɔ woolu nda, ma del nda choo a sɔŋgɔɔ naa nda wa o pioo Mɛlɔm nda.
8 Mi Chɛhowa mal nda Isɔluɛiya o ba, ma yam nda. Ma chua nda touwɔɔ haaa ma fuuluu Saidɔŋ Bɛndoo a Mɛsiluɛfɔti-mɛm, a o Kpoloŋndo Misipɛ, ba paaleŋ le chaŋ ndo. Ma diu diu nda kpou, wana pilɛ bɛɛ a mɛi le.
9 Mi Chɔɔsuaa tosal nda mɛɛ Chɛhowa dimul ndu yɛ. Mbo kili suaa ndaa nyɛsuaŋ, nduyɛ mbo luam nyɛm ndaŋ nyaanaŋ suaa naŋndoŋ.
10 Okoŋ kɔɔli, mi Chɔɔsuaa miiŋgu pila mbo kɔ bii chioo Hasɔɔ, nduyɛ mbo dii masa wa loŋ ndo a muɛi faŋnde. Kanifuule, Hasɔɔ wa chiee lebollo le masɛi hei kpou ni.
11 Ma dii wanaa wa loŋ nda a mɔɔŋ faŋndoŋ, wana pilɛ bɛɛ a mɛi le. Okoŋ, ma mal chioo Hasɔɔ o yiŋ.
12 Mi Chɔɔsuaa bii chiooŋ muŋ kpou, nduyɛ mbo yam masaa wa loŋ nda. Mbo diu nda kpou a muɛi faŋnde, mɛɛ Muuse, buɛi Chɛhowa wo dimul ndu yɛ.
13 Kɛ nduyɛ, chieeŋ wa ŋ taŋgulaa o bembelaŋ choo woŋ kinɛi, Isɔluɛiya lum muŋ te. Mɛɛ Hasɔɔ mi Chɔɔsuaa luam.
14 Mi Isɔluɛiya puŋga nyɛm wa o chiooŋ muŋ niŋndoŋ kpou a chɔluaa le ndapila. Kɛ waŋnda chieeya nda, ma lo nda diuwo a mɔɔŋ faŋndoŋ haaa ma chii nda paku. Wana pilɛ bɛɛ a mɛi le.
15 Mɛɛ Chɛhowa dimul buɛi ndɔɔ Muuse le tosaa yɛ, lende koni Muuse dimul Chɔɔsuaa ni, nduyɛ mi Chɔɔsuaa tosa lende. Nyɛ o nyɛ Chɛhowa dimul Muuse le tosaa, o pilɛ bɛɛ Chɔɔsuaa mɛi kɔɔli le.
16 Mi Chɔɔsuaa bii lɛŋndeŋ ndeŋ kpou, lɛŋnde ŋpembuleŋ, tanda Nɛkɛbi* wo, lɛŋnde Koosiɛŋ ndeŋ kpou, tanda Siɛfila wo, tanda Aluaba* wo, lɛŋnde ŋpembuleŋ Isɔluɛi, vɛlɛ a tanda Siɛfila cho loŋ ndo,
17 chɔŋ o Pembii Halaki Ve kumbuii Sɛyaa ve, haaa mbo kua Baal-kadi o Kpoloŋndo Lebanɔŋ, o Pembii Hɛmɔŋ Nde bɛŋgu. Masa o masa wa loŋ, mbo yam nda nduyɛ mbo diu nda.
18 Mi Chɔɔsuaa chua teleŋndo tau le sɔŋgɔɔ a masaa haa kpou.
19 O fula o Hivaitiiyaa wa Kibiɔŋ nda kɔɔli, chiee kɛ kɛ hiŋ mbo tosa kɔl nyuloo a Isɔluɛiya le. Chieeŋ tɔɔŋ kpou, ma yam muŋ a chɔuwo.
20 Chɛhowa chɛl ni mi yoŋgaa luɛi nda o lakɔl ma chiŋalaŋ Isɔluɛiya a sɔŋgɔɔ, le halikpeŋ mbo tɛɛmbuu nda, inyiɛɛ bɛɛ o tuiinuŋ nda le. Ndaa nɔ ma basu nda tɛɛ, mɛɛ Chɛhowa dimul Muuse yɛ.
21 A teleŋ koŋ, mi Chɔɔsuaa basu Anakimnda, a wa ichali o lɛŋnde ŋpembuleŋ nda. Haa Hɛbulɔŋ, Dɛbiluii, Anabi, a haa o lɛŋnde ŋpembuleŋ Chuda a Isɔluɛi kpou, mbo basu nda tɛɛ a chieeŋ ndaŋ.
22 O lɛŋnde Isɔluɛi leŋ niŋ kpou, Anakimnɔɔ o pilɛ bɛɛ lo le, mɛɛ o Kaasa niŋ, Kaati, a o Asidɔɔ niŋ ma lo.
23 Mi Chɔɔsuaa yam lɛŋnde leŋ kpou, mɛɛ Chɛhowa chuel Muuse buŋgɛi yɛ. Mbo ke leŋ Isɔluɛiya le mi le wa nyɛm kiɔɔŋ le nda. Nduyɛ, ma piɔu leŋ mɛɛ kaale kɛ kɛ lee nɔ le sɔlaa yɛ. Okoŋ, mi chɔuwo chuu o lɛŋndeŋ niŋ.
