Chɔɔsuaa 14:1-15
14 Mi Isɔluɛiya bii vɛlɛ lɛŋnde Kenaŋ ndeŋ le mi le wa nyɛm kɛŋ ndaŋ. Okoŋ, mi Ɛlieesa wana soliaa lasalaa, a Chɔɔsuaa po Nuŋ ndo, a wanaa wa yuŋgula leboltaŋ o kaaye Isɔluɛi niŋ nda piɔu nda lɛŋndeŋ ndeŋ.
2 Kaalaŋ la ŋɔmahiɔɔlu a tɛndaa tɛɛŋ laa lo ni le lɛŋndeŋ sɔlaa. Nduyɛ, kooŋ nda wuu ni le kaalaŋ ndaŋ lɛŋndeŋ ndeŋ piɔuwo, mɛɛ Chɛhowa dimul Muuse yɛ.
3 Muuse ndoo chii niŋ kaalaŋ la tiɔɔŋ a tɛndaa tɛɛŋ lɛŋndeŋ ke Chɔɔdaŋ leeloo.* Kɛ Livaiya nda, Muuse ke nda lelɛŋ te.
4 Kaalaŋ la tiɔɔŋ la fula o pulale Choosɛ leŋ niŋ ni, Manaasɛ a Ifiluem. Livaiya nda, a sɔla lelɛŋ o lelɛŋ te. Chiooŋ kinɛi nda ke nda ni le ma chal loŋ. Nduyɛ ma ke nda vɛlɛ fondaa le chɔluaa ndaa mandaa a le nyɛm ndaŋ kɛsioo.
5 Mi Isɔluɛiya piɔu lɛŋndeŋ ndeŋ mɛɛ Chɛhowa dimul Muuse yɛ.
6 Okoŋ, mi puaa fula o kaale Chuda leŋ choo wa kua naa Chɔɔsuaa chua naa nda wa Kikaa wa. Mi Kelɛbi po Chɛfunɛ wo, o cho Kenɛsaitiinɔɔ wo dimul Chɔɔsuaa aa: “Boondii naŋ wa Kedɛsi-baniaa ve, mi Chɛhowa, Mɛlɛka tonyaa dimul Muuse buɛi ndɔ nyɛ a num okɔɔ vɛlɛ a ya. Nduyɛ, numpila bɛɛ sina nyɛ o dimi wo.
7 I wa wɔsilaŋ 40, mi Muuse buɛi Chɛhowa wo soli ya o Kedɛsi-baniaa niŋ, mbo viam ya suaŋsuaŋndeŋ o lɛŋndeŋ niŋ. Nduyɛ mi miiŋgu a kona tonyaa.
8 Mi che bɛɛ mi chaaŋaa niaa naŋ kuɛ latulu wa tosa mi siooŋnde bii waŋnda, kɛ mi tual Chɛhowa kɔɔli a kɔl nuu kpou.
9 Mi Muuse mɛnaŋ po o paale leŋ choo aa: ‘Le mɛɛ ŋ tol Chɛhowa Mɛlɛka nuu kɔɔli a kɔllo kpou yɛ, a cho lɛŋnde ŋ kela leniŋ ndeŋ sɔla mi le wa nyɛm kiɔɔŋ le num a puaa numnda lefafɛɛŋ.’
10 Isɔluɛiya wa wɔ balɔɔ o pollo niŋ mi Chɛhowa mel Muuse diomndeŋ ndeŋ a ya okɔɔ. Nyɛ o dimi wo del lɛŋ te. Chɛhowa lo ya mandaa o wɔsila 45 laŋ ndaŋ bɛŋgu mi wa wɔ hau yoomu. Nduyɛ wɔsilaŋ 85 ya cho niŋ hau nuaa ni.
11 I cho wɔ hau kpeŋkpeleŋ mɛɛ ya wa o paale Muuse vem ya leŋ choo yɛ. I nɔ wɔ yoomuaŋ le kɔlaŋ o chɔuwo a le walta cheleŋ tosaa maa paandu.
12 Lelaŋ, ke ya lɛŋnde ŋpembule Chɛhowa chuel la buŋgɛi paale leŋ ndeŋ. Mi che bɛɛ Anakimnda cho loŋ a mɛɛ numpila sina yɛ, nduyɛ maa chieeŋ ndaŋ bɛndoŋ nɔ kpakila kala kalalaŋ, kɛ I nɔ tiindaŋndo maa Chɛhowa cho ya mala mi tou nda, a mɛɛ Chɛhowa pila dimi yɛ.”
13 Okoŋ, mi Chɔɔsuaa duau Kelɛbi po Chɛfunɛ wo sala, mbo ke ndu Hɛbulɔŋ le mbo wa nyɛm kɛŋ ndɔŋ.
14 Lelaŋ, chɔŋ a teleŋ koŋ mbo huŋ bii a paale hauleŋ ndeŋ, Kelɛbi po Chɛfunɛ wo, o cho Kenɛsaitiinɔɔ wo, Hɛbulɔŋ cho nyɛm kɛŋ ndɔŋ ni. Kanifuule mbo tual Chɛhowa, Mɛlɛka Isɔluɛiya kɔɔli a kɔl ndɔɔ kpou.
15 Diola ndaa veelu Hɛbulɔŋ paandu laŋ la wa Kiliaati-aba ni (po tɔɔ bɛndoo pila Aba wa Anakimnda tɛɛŋ ni). Okoŋ, mi chɔuwo chuu o lɛŋndeŋ niŋ.
Tɛɛsiaalaŋ
^ Koŋ cho ni, ba paaleŋ le chaŋ ndo.
