Chɔɔsuaa 17:1-18
17 Mɛɛ nda wuu kooŋ, mi kaale Manaasɛ leŋ le sɔla lɛŋndeŋ le ndaleŋ. Kanifuule, Manaasɛ wa po tase Choosɛ wo ni. Kɛ Makaya, po tase Manaasɛ wo, o wa finyaa Kiliaadi wo, kuubanɔ chɔuwo o wa ni. Le hei, mbo sɔla buŋgɛi Kiliaadi ve a Baasiaŋ.
2 Ma wuu vɛlɛ kooŋ le yuŋgula fula o pulale Manaasɛ leŋ choo laŋ la pilɛ laŋ. Okoŋ mi puaa Abi-esa wa, puaa Hɛlɛki wa, puaa Asiluɛɛ wa, puaa Siɛkɛm nda, puaa Hɛfa wa, a puaa Siɛmida wa sɔla lɛŋndeŋ le ndaleŋ. Waŋ piaanduaa fula o pulale Manaasɛ, po Choosɛ wo choo wa cho haa ni a yuŋgula ndalaŋ.
3 Manaasɛ velu Makaya ni, mi Makaya vialu Kiliaadi, mi Kiliaadi vialu Hɛfa, mi Hɛfa vialu Sɛlofɛhadi. Kɛ Sɛlofɛhadi ndu, o vilu wana pɔnɔ le, mɛɛ waŋ laanduaa. Diola chuauwaa nduaa kaŋ la cho laŋ ni: Maala, Nuuwa, Hɔkila, Milika, a Tiɛsa.
4 Mi waŋ laanduaa haa komal Ɛlieesa, wana soliaa lasalaa, Chɔɔsuaa po Nuŋ ndo, a simlachiaa. Ma dimul nda aa: “Mi Chɛhowa dimul Muuse le mbo ke naa lɛŋndeŋ yemaa naa tɛɛŋ, le mi le wa nyɛm kɛŋ naŋ.” Okoŋ, ma ke nda lɛŋndeŋ wanayaŋ finya nda woŋ tɛɛŋ, mɛɛ Chɛhowa dimi yɛ.
5 O faŋaŋndɔ o lɛŋnde Manaasɛ sɔla Kiliaadi, a Baasiaŋ, Chɔɔdaŋ leeloo* leŋ kɔɔli, mbo sɔla vɛlɛ buŋgaŋ tɔ.
6 Kanifuule, ma ke chuauwaa laanduaa Manaasɛ wa lɛŋndeŋ, mɛɛ nda ke puaa nduaa yɛ koni. Nduyɛ lɛŋnde Kiliaadi leŋ kpou, le wanaa fula o pulale Manaasɛ leŋ choo wa a piliaa le wa niŋ ni.
7 Pɛŋgula lɛŋnde Manaasɛ sɔla leŋ la cho laŋ ni: Chɔŋ naa nda salu pɛŋgulaŋ nda Asia wa, mi la kua Mikimɛtati chiee, Siɛkɛm ikɛi. Nduyɛ mi la tuusu ba tou wo,* o lɛŋnde waŋnda Ɛŋ-Tapuaa.
8 Mi lɛŋnde Tapuaa leŋ le simnuŋ lɛŋnde Manaasɛ leŋ. Kɛ chioo Tapuaa naa pɛŋgula Manaasɛ laŋ la kei ya, le wanaa fula o pulale Ifiluem ndeŋ choo wa o wa ni.
9 Okoŋ, mi pɛŋgula ndɔlaŋ la tuusu mi la kua o Pioo Kanaa ba tou wo. Nduyɛ, mi pɛŋgula Manaasɛ laŋ la heelu o pioo hoo ba luaŋ ndo, mi la mɛɛlu o pee mɛŋma ihɛllo. Kɛ yuŋgu Ifiluem ndo, ndaa nɔ chiooŋ o buŋgɛi Manaasɛ ve niŋ.
10 Ifiluem ndoo nɔ lɛŋnde wa ba tou wo leŋ ni, mi Manaasɛ ndu nɔ leŋ ba luaŋ ndo. Pee mɛŋma ihɛllo wa pɛŋgula Manaasɛ laŋ ni, nduyɛ ma salu vɛlɛ pɛŋgulaŋ ba luaŋ ndo nda Asia. Kɛ ba paaleŋ le chaŋ ndo ndu, nda Isaka salu pɛŋgulaŋ ni.
11 Mi Manaasɛ sɔla vɛlɛ chieeŋ bɛndoŋ o buŋgɛi Isaka a Asia ve niŋ. Nduyɛ wanaa wa o chieeŋ muŋ niŋnda a chieeŋ balu muŋ ndoŋ kpou, ndu ndoo nɔ ni. Chieeŋ muŋ cho muŋ ni: Bɛti-siaŋ, Ibiliam, Dɔɔ, Ɛŋ-dɔɔ, Taanaki, a Mɛkidɔɔ. Tandala ŋpembulaŋ la wa la yaa o chiooŋ muŋ tɛɛŋ.
12 Kɛ wanaa fula o pulale Manaasɛ leŋ choo wa nɔla ma chua chiooŋ muŋ te. Kanifuule, mi Kenanaitiiya kasa o lɛŋndeŋ ndeŋ niŋ.
13 Mɛɛ Isɔluɛiya sɔla kpaayaa, ma siiŋguu Kenanaitiiya haa chiaa. Kɛ a soli nda kpou o lɛŋnde leŋ niŋ te.
14 Mi wanaa fula o pulale Choosɛ leŋ choo wa nyuna Chɔɔsuaa aa: “Vɛ naa lɛŋndeŋ kilullo buŋgɛi i pilɛ kpe? Faŋgaa pila naŋ cho ni, nduyɛ Chɛhowa bii naa niŋ salaa dɔwɔɔ haaa a paale hauleŋ ndeŋ.”
15 Mi Chɔɔsuaa mulul nda aa: “Mɛɛ nya kui mi la wa faŋga yɛ, la kɔ o lɛŋnde Pɛluisaitiiya a Luɛfem nda, mi la kɔ piɔl bundɛ cho loŋ ndo le nyapila. Kanifuule, la dimi maa lɛŋnde ŋpembuleŋ Ifiluem le cho le bɔɔ le nya le.”
16 Kɛ mi wanaa fula o pulale Choosɛ leŋ choo wa dimi aa: “Lɛŋnde ŋpembule leŋ le cho le bɔɔ le naa le. Nduyɛ Kenanaitiiyaa cho o kpoloŋndo* niŋnda kpou, haa Bɛti-siaŋ a chieeŋ balu nda woŋ, a haa o Kpoloŋndo* Chɛsiluɛɛ, a nɔ nyɛm nyaanaŋ suaa naŋndoŋ le chɔuwo. Nduyɛ, mɔɔŋ cho o peluŋ nyɛm nyaanaŋ ndoŋ muŋ.”
17 Okoŋ, mi Chɔɔsuaa dimul wanaa fula o pulale Choosɛ leŋ choo wa, nda cho yɛ kaale Ifiluem ndeŋ a kaale Manaasɛ leŋ ni aa: “La cho faŋga tau, nduyɛ la nɔ kpaayaa. Lelaŋ, o bɛnda mi la sɔla buŋgɛi i pilɛ kpe le.
18 Lɛŋnde ŋpembuleŋ bɛɛ, le nya le cho wa ni. Mi che bɛɛ bundɔɔ cho loŋ ni, kɛ la nɔla mi la pɛl ndu, mbo timbulaŋ a lɛŋnde nyaleŋ. Kenanaitiiyaa kpaaya bɛnduaa cho bɛɛ kaŋ loŋ, ma nɔ nyɛm nyaanaŋ suaa naŋndoŋ a mɔɔŋ o peluŋ nyɛm nyaanaŋ muŋ nda, la nɔla mi la tou nda.”
Tɛɛsiaalaŋ
^ Koŋ cho ni, ba paaleŋ le chaŋ ndo.
^ Hibuluiye, “o ba kɛndɔɔ choo.”
^ Ɔɔ “dɛŋgbɔɔ.”
^ Ɔɔ “Dɛŋgbɔɔ.”
