Chɔɔsuaa 2:1-24
2 Chɔɔsuaa po Nuŋ ndo lo Sitim, mbo viam suaŋsuaŋnda a ŋiɔɔŋ. Mbo dimul nda aa: “La kɔ mi la mɛɛndaŋ lɛŋndeŋ, taama taama Chɛluiko.” Mɛɛ nda fuuluu, ma luɛi o chiɛi wana lanɔ suundɛi pilɛ niŋ diolaŋ aa Luehabi, nduyɛ ma wa loŋ.
2 Mi waŋndo kɔ dimul masaa Chɛluiko aa: “Puaa Isɔluɛiya hiŋ naŋ chuɛllɛŋ le lɛŋndeŋ mɛɛndaŋndo.”
3 Okoŋ, mi masaa Chɛluiko yɔŋ diomndeŋ naa Luehabi chua aa: “Soli puaa hiŋ ma wa o numndo chiɛiniŋ nda, kanifuule suaŋsuaŋnda nda cho ni, nduyɛ a hiŋ le lɛŋndeŋ kpou mɛɛndaŋndo.”
4 Kɛ mi chuaa hoo viaŋ nda. Okoŋ mbo dimi aa: “Tonya, mi puaa huŋ o ya lo, kɛ I sina ba nda fula le.
5 Nduyɛ mɛɛ nyumndaŋ ma tol, a teleŋ nda huŋ le dio kpaki chioo kindaa wo kinɛi, ma fulaŋ, ma kuaŋnuŋ. I sina ba nda kuɛ le. Kɛ te la keleŋa nda pɛ tolɔɔ kɔɔli, la cho nda biyɔɔ.”
6 (Kɛ nduyɛ, Luehabi ndoo chii niŋ nda heelu o chiɛiyo choo, mbo viaŋ nda o tɔlɔɔ filakisii wa o yɛɛmbaa a kpɔŋndaŋ o chiɛi koŋ choo wo tɛɛŋ.)
7 Okoŋ, mi puaa masaa vem nda a tisa nda kɔɔli. Ma kua ba Chɔɔdaŋ ndo, naa waŋnda taŋ nda. Nduyɛ, dimioo nuaa mi puaa tisa nda kaŋ kɔɔli wa fula, ma kinda dio kpakioo.
8 Tuupa mi suaŋsuaŋnda haa hini le luaŋ, mi Luehabi hel naa nda wa o chiɛiyo choo wa.
9 Mbo dimul nda aa: “I sina maa Chɛhowa cho nya lɛŋndeŋ ndeŋ ke, nduyɛ siooŋii nyɛi bii naa kpou. Kɔltaŋ la laasiaŋ wanaa cho o lɛŋndeŋ ndeŋ niŋnda kpou le nya.
10 Kanifuule teleŋ nya fula Ichipi wo, miŋ tuɛi a mɛɛ Chɛhowa veeliaa Pee Siaŋa Mɛŋma Ihɛllo yɛ. Nduyɛ miŋ tuɛi vɛlɛ nyɛ nya tosal masaa ŋiɔɔŋaa Amɔluaitiiya wo, Saihɔŋ nda Ɔku, masaa nya tɛɛmbuu o Chɔɔdaŋ ndaŋ leeloo* wa.
11 Mɛɛ naŋ tuei a hei okɔɔ, mi kɔltaŋ la laasiaŋ* naa, nduyɛ wana o wana ndoo nɔ lɛ kɔl simulaa le nya chɔulabaa le. Kanifuule Chɛhowa Mɛlɛka nyaa, ndu cho Mɛlɛka o choo choo niŋ a o lɛŋndeŋ choo ni.
12 Lelaŋ a yandii, la mɛnaŋ o Chɛhowa lo maa, mɛɛ ya chɔm nya kaala lo lechoo wo yɛ, lende nya bɛɛ cho yuŋgu finya nuu kaala lo lechoo wo chɔm ni. Nduyɛ, la ke ya tamaselii tosa mi laalaŋ nya wo.
13 La chiindiaa finya nuu, kala nuu, chuauwaa ndaa, a wana o wana nda nɔ. La piŋi naa piɔmndo o ba.”
14 Okoŋ, mi puaa haa dimul ndu aa: “Ŋ cho a bɛɛndiaŋ le miŋ vi le nya. Te la chɔɔmuu nyɛ naŋ hiŋ tosaa wo le, ŋ cho num kaala lo lechoo wo chɔm nduyɛ miŋ miŋgul num kɛndɛi ŋ tosal naa ve, te Chɛhowa ke naa pɛ lɛŋndeŋ ndeŋ.”
15 Okoŋ kɔɔli, mbo tusi nda o yooleŋ, o wundɛiyo.* Kanifuule, chiɛi ndɔɔ wa o chiŋaa a kpaki chioo. Nduyɛ pɛŋ, o kpaki chioo choo kpeekpei o wa ni.
16 Okoŋ mbo dimul nda aa: “La kɔ o fondaŋ ŋpemboo, mi la kɔ vioŋnuŋ loŋ le palɛi i yaa, yɔŋii wanaa cho nya nuuviaa wa saaluŋ nya. Te a miiŋgu naŋ pɛ, la kuɛŋnuŋ niko.”
17 Mi puaa haa dimul ndu aa: “Ŋ chuel num buŋgɛi miŋ mɛnaŋ po. Nduyɛ ŋ yeema mi tɔɔyaŋ wa naa choo le.
18 Lelaŋ, te ŋ hiŋ pɛ o lɛŋndeŋ ndeŋ niŋ, baa yoole cho leŋ le kpeendaa a kɛi siaŋaa leŋ o wundɛi ŋ tusi naa hoo wo. Huŋ a finya num, kala num, yemaa numnda, a wana o wana cho o yuŋgu finya numndo niŋ o chiɛiyo hoo niŋ.
19 Te wana o wana fula o numndo chiɛiniŋ pɛ mbo kuɛ o bɛɛ, kooma nduaŋ ma cho wa ndupila o lebol, nduyɛ tɔɔyaŋ cho naa wa choo le. Kɛ wanaa cho wa chiɛiniŋ nda o pilɛ bɛɛ nyɛ yɔŋnuŋ pɛ, mɛɛ kooma nduaŋ ma cho wa naa o lebol.
20 Kɛ te a chɔɔmuu pɛ nyɛ naŋ hiŋ tosaa wo, mɛɛ tɔɔyaŋ cho naa wa choo le buŋgɛi naŋ chuel num miŋ mɛnaŋ nde le.”
21 Mbo muli aa: “Maa I yɔŋnuŋ a mɛɛ nya dimi yɛ fɔ.”
Okoŋ, mbo mal nda ma kuaŋnuŋ. Okoŋ kɔɔli, mbo baa yoole siaŋale leŋ o wundɛiyo.
22 Mi suaŋsuaŋnda haa kua o fondaŋ ŋpemboo, ma wa loŋ le palɛi i yaa, haaa mi wanaa wa nda nuuviaa wa miiŋgu. A wa nda nuuviaa o nɛilaŋ kpou, kɛ a seeluŋ nda le.
23 Mi puaa ŋiɔɔŋnda haa faŋaŋ o fondaŋ ŋpembu koŋ, ma taŋ pioo, okoŋ ma kua naa Chɔɔsuaa po Nuŋ ndo chua. Nduyɛ nyɛ o nyɛ yɔŋnuŋ nda, ma dounuŋ ndu kona.
24 Ma dimul Chɔɔsuaa aa: “Chɛhowa chii naa lɛŋnde leŋ kpou ke. Nduyɛ pɛŋ, wanaa cho loŋ nda kpou cho a siooŋii nɛi.”
Tɛɛsiaalaŋ
^ Koŋ cho ni, ba paaleŋ le chaŋ ndo.
^ Hibuluiye, “mi kɔltaŋ la teŋga naa.”
^ Ɔɔ “finɛteloo.”
