Chɔɔsuaa 20:1-9
-
Chieeŋ viaŋnaŋndoŋ (1-9)
20 Okoŋ, mi Chɛhowa dimul Chɔɔsuaa aa:
2 “Dimul Isɔluɛiya maa a hɛli chieeŋ viaŋnaŋ yaa dimul Muuse a muŋ okɔɔ woŋ.
3 Okoŋ, te sulɛi hɛluŋ pɛ waŋndo mbo dii wanachioo, wana koŋ nyaanuŋ loŋ. O chieeŋ muŋ niŋ wana sulɛi hɛluŋ ndo nɔ ni mbo kɔ vioŋnuŋ, yɔŋii wana miŋgiaa maa* dii ndu.
4 O nɔ mbo nyaanuŋ o chiooŋ muŋ i pilɛ, mbo kɔ sim o dio kpaki chioo. Okoŋ, mbo dimul bɛnduaa cho o chiee koŋ niŋnda nyɛ yɔŋnuŋ ndo. Te o chii nda kona dounɔŋ pɛ, a nɔ ma chɛl ndu le mbo wa chiee loŋ, nduyɛ ma ke ndu fondaa le mbo wa loŋ nda ndaa.
5 Te wana miŋgiaa maa nyaanuŋ ndu pɛ kɔɔli le ndu maa miŋgullo, bɛnduaa chieeyaa kaŋ nɔ ma mal wana sulɛi hɛluŋ koŋ ndo ndu o ba le. Kanifuule, sulɛi hɛluŋ ndu ni* mbo dii chaaŋ ndɔ wanachioo. Nduyɛ, ndoo tul ndu paandu leyɛ le.
6 O nɔ mbo wa o chiee koŋ niŋ haaa ma simi ndu waŋnda o hɔl le kɔɔsɔɔ. Nduyɛ te a chii pɛ, o nɔ mbo lo loŋ haaa mi masa wanaa soliaa lasala cho wa a teleŋ koŋ ndo vi. Okoŋ, wana sulɛi hɛluŋ mbo nyaanuŋ ndo nɔla niko mbo miiŋgu o ndu lo chiee, nduyɛ mbo kuɛ o chiɛi ndɔɔ.”
7 Le hei, ma hɛli chieeŋ teŋgeŋ ndoŋ.* Muŋ cho ni: Kedɛɛsi o Kalili niŋ o lɛŋnde ŋpembuleŋ Nafitalii, Siɛkɛm o lɛŋnde ŋpembuleŋ Ifiluem, a Kiliaati-aba, koŋ cho ni, Hɛbulɔŋ o lɛŋnde ŋpembuleŋ Chuda.
8 O Chɔɔdaŋ ndaŋ leeloo, Chɛluiko ba paaleŋ le chaŋ ndo, chieeŋ nda hɛli woŋ cho muŋ ni: O buŋgɛi kaale Lubɛŋ ndeŋ niŋ, ma hɛli Bɛsa, chiee cho o pollo niŋ o pembei choo wo.* O buŋgɛi kaale Kaadi leŋ niŋ, ma hɛli Luamɔti, chiee cho Kiliaadi wo. O buŋgɛi kaale Manaasɛ leŋ niŋ, ma hɛli Kolaŋ, chiee cho Baasiaŋ ndo.
9 Chieeŋ viaŋnaŋ nda hɛli woŋ wa muŋ ni, le Isɔluɛiya a mialaa wa nda tɛɛŋ nda. Te sulɛi ndii hɛluŋ pɛ waŋndo mbo dii wanachioo, ndoo nɔ mbo nyaanuŋ o chieeŋ muŋ niŋ i pilɛ, yɔŋii wana miŋgiaa maa dii ndu, tuupa ma kɔɔsa ndu waŋnda o hɔl.
Tɛɛsiaalaŋ
^ Ɔɔ “wanayɛi kpɛɛluŋ wana nda diiyo.”
^ Ɔɔ “o ve kɔl te.”
^ Ɔɔ “chieeŋ diandaŋ.”
^ Ɔɔ “lɛŋnde dɛŋgbɛleŋ o pembei choo.”
