Chɔɔsuaa 22:1-34
22 Okoŋ, mi Chɔɔsuaa veelu kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ,
2 mbo dimul nda aa: “Nyɛ o nyɛ Muuse, buɛi Chɛhowa wo dimul nya, la chii ndu tosa kpou. Nduyɛ ya bɛɛ, la tuei ya diom mi la tosa nyɛ o nyɛ ya dimul nya.
3 Haaa mbo huŋ bii a paale hauleŋ ndeŋ, la mel puaapiliaa nyaa le. Nduyɛ, nyɛ o nyɛ sawala Chɛhowa Mɛlɛka nyaa dimi le tosaa, mi la tosa.
4 Chɛhowa Mɛlɛka nyaa tosa mi puaapiliaa nyaa bɛɛ sɔla pɛŋgioo, a mɛɛ o chuel nda buŋgɛi yɛ. Lelaŋ, la nɔla mi la miiŋgu o la nya lo, o lɛŋnde Muuse buɛi Chɛhowa wo ke nya Chɔɔdaŋ leeloo* leŋ.
5 Kɛ te la kuɛ pɛ, sawala Muuse, buɛi Chɛhowa wo ke nya laŋ, la puɛɛnuŋ a laŋ te. La nɔ mi la kaala Chɛhowa Mɛlɛka nyaa, mi la wa kɔlaŋ o nɛila ndɔlaŋ choo, mi la bii sawala ndɔlaŋ, mi la lo ndu kɔɔli, nduyɛ mi la wa ndu piɛiyo a kɔl nyaa kpou vɛlɛ a yoomu nyaa kpou.”
6 Okoŋ mi Chɔɔsuaa duau nda sala mbo choŋguŋ nda, nduyɛ ma miiŋguŋ o tɛndiila ndalaŋ.
7 Muuse ndoo chii niŋ kaale Manaasɛ leŋ tɛndaa tɛɛŋ lɛŋndeŋ ke o buŋgɛi Baasiaŋ nde niŋ. Kɛ, Chɔɔsuaa siou kaaleŋ ndeŋ lɛŋndeŋ ke ni a puaapiliaa ndaa latulu, o Chɔɔdaŋ ndaŋ ba paaleŋ le del lo. Nduyɛ mɛɛ Chɔɔsuaa wa nda choŋgɔŋndo le ma miiŋgu o la nda lo, mbo duau nda sala,
8 mbo dimul nda aa: “La miiŋgu o la nya lo a sul bɛndu nya sɔla wo. La sɔla chɔluaa tau, kaniŋ humboŋ, kooliiyoŋ, chiliŋuŋ siaŋaŋ a chiliŋuŋ cheleŋndoŋ, a nyɛla chuɛɛnaŋ ndaŋ tau tau. La chua nyɛm nya kɔndu muŋ yaamɔɔwaa nyaa o ba woŋ, mi la piɔuwaŋ muŋ nya puaapiliaa nyaa.”
9 Okoŋ kɔɔli, mi kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ, a piɔuwaŋ nda Isɔluɛiya apiliaa naa nda wa Silɔɔ o lɛŋnde Kenaŋ ndeŋ niŋnda, ma miiŋgu o lɛŋnde Kiliaadi leŋ niŋ. Lɛŋndeŋ ndeŋ Chɛhowa ndoo dimul Muuse ni le mbo ke nda, nduyɛ ndaa chii niŋ chalta ndalaŋ kila loŋ.
10 Mɛɛ kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ a fuuluu o tanda Chɔɔdaŋ ndaŋ ma wa wo o lɛŋnde Kenaŋ ndeŋ niŋ, ma taŋgul bandu luamaa lasala bɛndu bɛndoo, o Chɔɔdaŋ ndaŋ ikɛi loŋ.
11 Okoŋ kɔɔli, mi Isɔluɛiya a piliaa tuɛi aa: “Kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ taŋgul bandu luamaa lasalaa o pɛŋgula lɛŋnde Kenaŋ ndeŋ o tanda Chɔɔdaŋ ndo niŋ, kpeŋgii Isɔluɛiya.”
12 Mɛɛ Isɔluɛiya haa tuei hei, mi nda kpou chuuŋgiaŋ Silɔɔ, le nda kɔlaŋ delɔɔ choo a chɔuwo.
13 Okoŋ, mi Isɔluɛiya viam Finihaasi, po Ɛlieesa wo wana soliaa lasalaa, o kaale Lubɛŋ ndeŋ, kaale Kaadi leŋ, a o kaale Manaasɛ leŋ tɛndaa tɛɛŋ ndo, o lɛŋnde Kiliaadi leŋ niŋ.
14 Ma soli vɛlɛ simlachiaa ŋwaŋ tɔ le ma kuɛ a ndu latulu. O Isɔluɛiyaa cho waalaŋ o waalaŋ niŋnda tɛɛŋ, simlachinɔɔ o pilɛ nda hɛli o kaale kɛ kɛ niŋ ni. Nduyɛ nda kpou, bolii layuŋguei nda wa ni.
15 Mɛɛ nda komal kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ o lɛŋnde Kiliaadi leŋ niŋ, ma dimul nda aa:
16 “Nyɛ wanaa Chɛhowa wa kpou dimi wo cho hoo ni: ‘La vɛ mi la tosa yɔŋ wɔɔŋ waa nuaa, mi la kɛɛ loo o lediom o Mɛlɛka Isɔluɛiya lo? La faŋaŋ Chɛhowa kɔɔli, mi la taŋgul bandu luamaa lasalaa le nyapila, nduyɛ mi la simul Chɛhowa.
17 Baa yɔŋ wɔɔŋ naŋ tosa Piɔɔ wo cho letuu le? Haaa mbo huŋ bii a paale hauleŋ ndeŋ, ŋ dindi wɔ naapila le, mi che bɛɛ mi kpundɔɔ komal wanaa Chɛhowa wa a teleŋ koŋ.
18 Baa la puɛɛnuŋ bɛɛ a nyɛ yɔŋnuŋ koŋ ndo mi la yeema vɛlɛ hau Chɛhowa malɔɔ? Te la simul pɛ Chɛhowa paale hauleŋ ndeŋ, o cho vɛlɛ siɔdii tumbe dɔɔnɔŋ a Isɔluɛiya kpou.
19 Te la yiyaŋ pɛ maa lɛŋnde nda ke nya leŋ le cho le nɔɔlɛi, mɛɛ la taŋ o lɛŋnde Chɛhowa leŋ niŋ, naa tɛndii Chɛhowa wo cho wa, miŋ kɔ waŋnuŋ ndoŋ naa nyaa. Chɛhowa Mɛlɛka naa nɔ niŋ bandu luamaa lasalaa. La taŋgul lɛ bandu luamaa lasala cheleŋ le Chɛhowa simullo, okoŋ mi la tosa mi naa bɛɛ simul ndu le.
20 Lɔɔ Ekaŋ, po Siluaa wo kɛɛ Mɛlɛka diom, mbo chua nyɛm ndaa nɔ ma tɛɛmbuu woŋ ndo, baa o cho Isɔluɛiya kpou le sɔla dɛnɛ palaa le nyɛ o tosa koŋ ndo le? Nduyɛ, o cho pɛŋ ndupilɛ le sɔla piɔmndo le yɔŋ ndɔ wɔɔŋndo le.’”
21 Okoŋ, mi kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ, mulul yuŋgula leboltaŋ le Isɔluɛiyaa cho waalaŋ o waalaŋ niŋnda aa:
22 “Chɛhowa, Mɛlɛka hiou mɛlɛkaa kpou wo! Chɛhowa Mɛlɛka hiou mɛlɛkaa kpou wo! ndu sina, nduyɛ waŋnda Isɔluɛi bɛɛ cho sina. Te simullo naŋ simul Chɛhowa ni nduyɛ miŋ faŋaŋ ndu kɔɔli, la mal naa haki paale hauleŋ ndeŋ te.
23 Te ŋ taŋgul pɛ bandu luamaa lasalaa le salala luamaa laŋ solioo lechoo, salala tɔlɔɔla kultaŋ, a salala kɔl nyulu laŋ le miŋ faŋaŋ Chɛhowa kɔɔli, mɛɛ Chɛhowa tusi naa nyɛpalaa choo.
24 Le sabu cheleŋ pɔ naŋ taŋgul bandoo hoo ni. Buulaŋndo naŋ wa ni miŋ dimi aa, ‘O chilaŋ niŋ, puaa nyaa cho hunɔɔ puaa naa dimul aa: “Yɛɛ nya sina yɛ a Chɛhowa, Mɛlɛka Isɔluɛiya okɔɔ?
25 Nya wanaa fula o kaale Lubɛŋ ndeŋ a o kaale Kaadi leŋ choo wa, Chɔɔdaŋ ndaŋ ma cho pɛŋgula Chɛhowa handu naa tɛɛŋ naa nyaa laŋ ni. La nɔ pɛl o pɛl o Chɛhowa piɛiyo niŋ te.” Okoŋ mi chuauwaa nyaa kuuna chuauwaa naa Chɛhowa piɛiyo.’
26 “Lelaŋ miŋ dimi aa, ‘La ŋ tosaŋ isɔɔ. Ŋ taŋguluŋ bandu luamaa lasalaa. O cho le salala luamaa laŋ ɔɔ salala cheleŋ solioo lechoo le.
27 Kɛ, le mbo wa maa lesei naa nyaa tɛɛŋ a chuauwaa naŋ cho mɛiya. Nduyɛ maa naa bɛɛ cho hiouwɔɔ lachi a Chɛhowa piɛiyo, miŋ wa salala luamaa laŋ, salala kɔl nyulu laŋ, a salala cheleŋ solioo ndu lachi. Okoŋ, chuauwaa nyaa dimul lɛ niŋ chuauwaa naa o chilaŋ niŋ aa: “La nɔ pɛl o pɛl o Chɛhowa piɛiyo niŋ te” le.’
28 Lelaŋ naŋ yiyaŋ ni maa, ‘O chilaŋ niŋ, te o yɔŋ pɛ ma dimul naa lende ɔɔ chuauwaa naŋ cho mɛiya, okoŋ ŋ dimi aa: “La tofawɔ bandu luamaa lasala finyaa naa mamaa taŋgullo. Nyɛpilɔɔ kpe o cho a bandu luamaa lasala Chɛhowa wo ni. O cho le salala luamaa laŋ ɔɔ salala cheleŋ solioo le nda taŋgul ndu le. Kɛ le mbo wa maa lesei naa nyaa tɛɛŋ.”’
29 Ŋ yeema pɛŋ mi yiyaŋ koŋ hiŋ naa o kɔl le Chɛhowa simullo, miŋ faŋaŋ Chɛhowa kɔɔli paale hauleŋ ndeŋ te. Chɛhowa Mɛlɛka naa nɔ bandu luamaa lasalaa o tɛndii ndɔɔ lachi le salala luamaa laŋ, salala tɔlɔɔla kultaŋ, a salala cheleŋ. Lelaŋ, ŋ bii lɛ kɔllo miŋ taŋgul bandu luamaa lasala cheleŋ, le sala kɛ kɛ solioo le!”
30 Mi Finihaasi wana soliaa lasalaa, a simlachiaa kuɛ a ndu latulu ma wa yuŋgula leboltaŋ le Isɔluɛiyaa cho waalaŋ o waalaŋ niŋnda naŋ kɔl tau, mɛɛ nda tuei nyɛ wanaa fula o kaale Lubɛŋ ndeŋ, kaale Kaadi leŋ, a kaale Manaasɛ leŋ choo wa dimi wo.
31 Okoŋ, mi Finihaasi po Ɛlieesa wo, wana soliaa lasalaa, dimul wanaa fula o kaale Lubɛŋ ndeŋ, kaale Kaadi leŋ, a o kaale Manaasɛ leŋ choo wa aa: “Ŋ sina niŋ hau kɛsɛ maa Chɛhowa cho a naa latulu. Kanifuule, ŋ che niŋ kpendekele maa o cho yɔŋ wɔɔŋ te nya tosa mi la faŋaŋ Chɛhowa kɔɔli le. La piŋi Isɔluɛiya Chɛhowa o ba.”
32 Okoŋ, mi Finihaasi po Ɛlieesa wo, wana soliaa lasalaa, a simlachiaa haa mɛi wanaa fula o kaale Lubɛŋ ndeŋ a o kaale Kaadi leŋ choo wa o lɛŋnde Kiliaadi leŋ niŋ, ma miiŋguŋ o lɛŋnde Kenaŋ ndeŋ niŋ. Nduyɛ, ma kɔ dounuŋ Isɔluɛiyaa tuaa kona.
33 Mɛɛ Isɔluɛiya haa tuei konaa hoo, mi nda bɛɛ naŋ kɔl tau, ma saŋgala Mɛlɛka. Kɛɛsiaa nda wa le ma kɔ del kaale Lubɛŋ ndeŋ a kaale Kaadi leŋ choo a chɔuwo, ma tɛɛmbuu lɛŋnde ndaleŋ ndo, a suu lɛ a ndi okɔɔ le.
34 Okoŋ, mi wanaa fula o kaale Lubɛŋ ndeŋ a o kaale Kaadi leŋ choo wa ke bandu luamaa lasalaa* hoo diolaŋ. Kanifuule ma dimi aa, “Seiyo o cho naa nyaa tɛɛŋ ni maa Chɛhowa cho Mɛlɛka tonyaa ni.”
Tɛɛsiaalaŋ
^ Koŋ cho ni, ba paaleŋ le chaŋ ndo.
^ A mɛɛ naŋ che o bolle Baabui leŋ ndeŋ niŋ yɛ, naapum diola nda ke bandu luamaa lasalaa hoo laŋ la wa ni aa, Seiyo.
