Chɔɔsuaa 23:1-16
23 Mi palɛi bɔɔbɔɔ hiau chɔŋ a teleŋ Chɛhowa piŋi Isɔluɛiya yaamɔɔwaa balu nda wa o ba, mbo tosa ma sɔla pɛŋgioo o lɛŋndeŋ niŋndo. Chɔɔsuaa bɛɛ ndoo nɔ niŋ wɔsilaŋ tau, nduyɛ ndoo yuuwa niŋ.
2 Okoŋ, mi Chɔɔsuaa veelu Isɔluɛiya kpou naapilɛ, waŋ bɛnduaa, wanaa lebolla, wanaa kialaa ŋyamaa, a simlachiaa mbo dimul nda aa: “I nɔ niŋ wɔsilaŋ tau, nduyɛ I yuuwa niŋ.
3 Nyapila che a lehɔl pɛɛŋ nyɛ Chɛhowa Mɛlɛka nyaa tosa a kaalaŋ ndaŋ kpou le nya wo. Kanifuule, Chɛhowa Mɛlɛka nyaa kpeekpei wa sɔŋgɔɔ le nya ni.
4 Kaala wa o lɛŋndeŋ ndeŋ niŋndaŋ kpou, chɔŋ o Chɔɔdaŋ ndaŋ kɔ o Pee Bɛndu Mɛŋma Ihɛllo* ba paaleŋ le del lo, ŋ chii laŋ yomɔɔ. Nduyɛ, I wuu kooŋ, mi piɔu kaala nyalaŋ lɛŋnde ndaleŋ. Mi che bɛɛ waŋnda apum cho wɔ o lɛŋndeŋ ndeŋ niŋ, kɛ le nya le cho ni.
5 Chɛhowa Mɛlɛka nyaa wa waŋnda haa piɔlɔɔ nya lachi ni, mbo tuau nda kpou le nya. Nduyɛ mi la chua lɛŋnde ndaleŋ, a mɛɛ Chɛhowa Mɛlɛka nyaa chuel nya buŋgɛi yɛ.
6 “La nɔ niko kɔl simulaa, mi la tosa nyɛ o nyɛ cho o poonyiaa o yau laSawa Muuse wo niŋ. Nduyɛ la faŋaŋ lechoo mi la kuɛ o ba kɛndɔɔ choo ɔɔ o ba miallo choo le.
7 Wanaa lo nya tɛɛŋ o kaaye hei niŋnda bɛɛ, la muuliaŋ a nda le. La nɔ pɛŋ mi la veelu diola mɛlɛkaa ndaa le, kɛlɛŋgaa niŋ te mi la mɛnaŋ a nda. Nduyɛ, la nɔ mi la tunduŋ mi la sooluu nda le.
8 Kɛ mɛɛ nya lo Chɛhowa Mɛlɛka nyaa kɔɔli haaa huŋ bii a paale hauleŋ ndeŋ yɛ, la hiou lachi a ndu waa kɔɔli lende.
9 Chɛhowa cho wa lɛŋii kpaayɛi bɛnduei touwɔɔ nya lachi. Kanifuule, haaa huŋ bii a paale hauleŋ ndeŋ, waŋndo o pilɛ bɛɛ nɔla wɔ mbo simul nya le.
10 Wana pilɛ nya tɛɛŋ cho nɔla mbo tou waŋnda waapilɛ, kanifuule Chɛhowa Mɛlɛka nyaa cho chɔulabaa le nya ni, a mɛɛ o chuel nya buŋgɛi yɛ.
11 Lelaŋ, la hiou lachi a Chɛhowa Mɛlɛka nyaa kaalaa. Keŋ cho tosa mi la wa nyapila mandaa teleŋ o teleŋ.
12 “Kɛ nduyɛ, te la muliŋ pɛ mi la holnuŋ wanaa lo o kaalaŋ ndaŋ niŋnda, okoŋ mi la wa challe o nɔlaŋ niŋ nya ndaa, nduyɛ mi la wa sɔɔŋ tosaa kpɔlɔkpɔlɔ a nda,
13 mɛɛ la sina pɛŋgu maa Chɛhowa Mɛlɛka nyaa hiu niŋ lachi a nda touwɔɔ le nya le. Nda wa niŋ yaŋɔɔleŋ le nya ni. Nduyɛ nyɛ nɛiyaa nda wa niŋ nya lueiyo wo, o wa niŋ ko mɛɛ nda wa nuaa waŋndo kɔɔ lɔɔ a kpatooleŋ ɔɔ mi yuɛi luɛi ndu o lehɔl lɛ. Lende nya lo niŋ ni haaa mi la chuu paku o lɛŋnde kɛndɛle Chɛhowa Mɛlɛka nyaa ke nya leŋ ndeŋ niŋ.
14 “Nyapila cho chɔɔ maa I cho niŋ o piɔmndo hɔlndɔ. Nduyɛ la sina a kɔlta nyalaŋ kpou vɛlɛ a yoomula* nyalaŋ kpou maa, sɔɔŋ kɛndɛŋ Chɛhowa Mɛlɛka nyaa chuel nya buŋgɛi yoŋ, i pilɛ bɛɛ lo le peelɔŋndo le. Muŋ kpou peeluŋ le nya, i pilɛ bɛɛ del lɛŋ te.
15 Kɛ la kɛsiŋ o kɔl maa, mɛɛ sɔɔŋ kɛndɛŋ Chɛhowa Mɛlɛka nyaa chuel nya buŋgɛi yoŋ peeluŋ kpou le nya yɛ, lende koni Chɛhowa cho tosa ni mi kpundɛla o dimi laŋ kpou* la hiŋ nya choo. Nduyɛ mi ndu Chɛhowa Mɛlɛka nyaa o chii nya paku, o lɛŋnde kɛndɛle o ke nya leŋ ndeŋ niŋ.
16 Te la tɛɛmbuu pɛ kpema Chɛhowa Mɛlɛka nyaa yii a nya wo nduyɛ mi la muliŋ mɛlɛkaa cheleŋnda sooluuwo, Chɛhowa cho tumbe dɔɔnɔŋ a nya o kala kala. Nduyɛ nyɔɔ viu niŋ bɛɛ le, mi la chuu paku o lɛŋnde kɛndɛle o ke nya leŋ ndeŋ niŋ.”
