Chɔɔsuaa 4:1-24
-
Poutaŋ ndaŋ la cho wa maa tamasi (1-24)
4 Dimioo nuaa waŋnda Isɔluɛi kpou chii Chɔɔdaŋ ndaŋ taŋɔɔ, mi Chɛhowa dimul Chɔɔsuaa aa:
2 “Hɛli puaa 12 waŋnda tɛɛŋ, lekaa o lekaa waŋndo o pilɛ.
3 Nduyɛ ma dimul nda aa: ‘La chua poutaŋ 12 o pee kɔllo Chɔɔdaŋ, naa wanaa soliaa lasalaa sim nda, mi la kɔ kɛsi laŋ naa nya cho malɔ wa.’”
4 Mi Chɔɔsuaa veelu puaa 12 o hɛli Isɔluɛiya tɛɛŋ nda, lekaa o lekaa waŋndo o pilɛ.
5 Okoŋ mbo dimul nda aa: “La hiou Kɔfu Chɛhowa Mɛlɛka nyaa lachi o pee kɔllo Chɔɔdaŋ, mi wana o wana chua pouwo o pilɛ o choŋgu. Poutaŋ ndaŋ la nɔ mi la wa mɛɛ kaaye Isɔluɛi cho yɛ,
6 le mi la wa maa tamasi le nya. Te chuauwaa nyaa huŋ nyuna nya pɛ aa, ‘Le yɛɛnɛ nya kɛsi yɛ poutaŋ ndaŋ?’
7 la dimul nda aa: ‘Le mɛɛ Chɔɔdaŋ ndaŋ ma pɛŋgi hiouwɔɔ kɔfu kpema Chɛhowa wo lachi yɛ. Mɛɛ nda hiŋ le ndu tɛɛŋguuwo, mi mɛŋndaŋ ma pɛŋgi hiouwɔɔ. Poutaŋ ndaŋ la cho wa le waŋnda Isɔluɛi loonɔŋndo le fɛɛŋ a fɛɛŋ.’”
8 Okoŋ, mi Isɔluɛiya tosa mɛɛ Chɔɔsuaa dimul nda yɛ. Ma chua poutaŋ 12 o pee kɔllo Chɔɔdaŋ, mɛɛ Chɛhowa dimul Chɔɔsuaa yɛ. Ma chua pouwo o pilɛ le kaale kɛ kɛ o Isɔluɛi niŋ. Ma kua a laŋ naa ndaa nɔ le luaŋ ichɔl koŋ nda, ma kɛsi laŋ loŋ.
9 Mi Chɔɔsuaa bɛɛ dii poutaŋ 12 o pee kɔllo Chɔɔdaŋ, naa wanaa soliaa lasalaa wa kɔlaŋ a kɔfu kpemaa wa sim nda. Nduyɛ haaa a paale hauleŋ ndeŋ, pouta laŋ la cho wɔ loŋ.
10 Wanaa soliaa lasalaa wa kɔlaŋ a Kɔfoo hoo wa lo isisi o pee kɔllo Chɔɔdaŋ, haaa mi waŋnda tosa nyɛ o nyɛ Chɛhowa dimul Chɔɔsuaa. Nduyɛ mi hei chɛlaŋ a nyɛ Muuse ndoo dimul Chɔɔsuaa wo. A teleŋ koŋ kpou, waŋnda wa taŋɔɔ chɔ chɔ.
11 Dimioo nuaa waŋnda chuu taŋɔɔ kpou, mi wanaa soliaa lasalaa taŋ a Kɔfu Chɛhowa wo waŋnda kpou o hɔl.
12 Nduyɛ kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ wa a bɛɛndiaŋ le chɔuwo, ma taŋ Isɔluɛiyaa tuaa lachi, a mɛɛ Muuse ndoo dimul nda yɛ.
13 Puaa chɔuwa le 40,000 wa a bɛɛndiaŋ a nyɛm chɔuwoŋ o laba le chɔuwo ni, ma taŋ Chɛhowa lachi o pollo niŋ Chɛluiko.
14 O paale leŋ choo, mi Chɛhowa tosa mi Chɔɔsuaa simnuŋ wana bɛndoo Isɔluɛiya kpou o hɔl. Nduyɛ haaa a piɔm ndɔɔ, ma ke ndu bɛɛle yiŋgoloŋndeŋ,* mɛɛ ndaa nɔ bɛɛle yiŋgoloŋndeŋ le Muuse yɛ.
15 Okoŋ, mi Chɛhowa dimul Chɔɔsuaa aa:
16 “Dimul wanaa soliaa lasalaa cho kɔlaŋ a kɔfu laSawaa* wa ma fula o pioo Chɔɔdaŋ.”
17 Okoŋ mi Chɔɔsuaa dimul wanaa soliaa lasalaa aa: “La fula o pioo Chɔɔdaŋ.”
18 Mi wanaa soliaa lasalaa wa kɔlaŋ a kɔfu kpema Chɛhowa wo wa fula o pee kɔllo Chɔɔdaŋ. Dimioo nuaa a nɛi o lɛŋnde vesɛileŋ choo, mi Chɔɔdaŋ ndaŋ ma kandu vɛlɛ hiouwɔɔ. Mi ma pia, mi ma hel o kɔŋgɔlaŋ maa paandu.
19 O paŋgii tasei niŋ malɔ tɔ nda faŋaŋ o pioo Chɔɔdaŋ ni, ma huŋ kiolu dɔɔŋgɔɔ Kikaa o pɛŋgulaŋ a Chɛluiko ba paaleŋ le chaŋ ndo.
20 Pouta 12 nda chua bɛɛ o pioo Chɔɔdaŋ ndaŋ, mi Chɔɔsuaa dii laŋ Kikaa.
21 Okoŋ mbo dimul Isɔluɛiya aa: “Te chuauwaa nyaa huŋ nyuna nya pɛ o chilaŋ niŋ aa, ‘Yɛɛnɛ poutaŋ ndaŋ la sim yɛ?’
22 la tɛɛsial nda aa: ‘O lɛŋnde vesɛileŋ choo Isɔluɛiya taŋ pioo Chɔɔdaŋ ni.
23 Mi Chɛhowa Mɛlɛka nyaa veeliaa pioo nda lachi, haaa mi wana o wana taŋ. Mɛɛ Chɛhowa Mɛlɛka nyaa veeliaa Pee Siaŋa Mɛŋma Ihɛllo naa lachi haaa miŋ taŋ yɛ, lende koni o tosa a pioo Chɔɔdaŋ ni.
24 Mi Chɛhowa tosa hei, le halikpeŋ mi waŋnda kpou o chieeŋndo choo sina mɛɛ o cho wana kpaaya bɛndu yɛ. Nduyɛ le mi nya bɛɛ nɔ siooŋii Chɛhowa Mɛlɛka nyaa le teleŋ o teleŋ.’”
