Chɔɔsuaa 5:1-15
5 Mi masaa Amɔluaitiiya, a wa o Chɔɔdaŋ ndaŋ ba paaleŋ le del lo* wa, a masaa Kenanaitiiya, a wa o pee mɛŋma ihɛllo ikɛiya, tuɛi maa Chɛhowa veeliaa pioo Chɔɔdaŋ mi Isɔluɛiya kpou taŋ. Dimioo nuaa a tuei hei, mi kɔltaŋ la laasiaŋ* nda, nduyɛ mi siooŋnde bii nda kpou le Isɔluɛiya.
2 A boondii keŋ, mi Chɛhowa dimul Chɔɔsuaa aa: “Chua pouta kala kalalaŋ ma sɛl taŋ mɔɔŋ, ma hivi puaa Isɔluɛiya o chiɛi kɔɔli, le teleŋ diiŋ ndɔɔ.”
3 Okoŋ mi Chɔɔsuaa sial poutaŋ mɔɔŋ, nduyɛ mbo hivi puaa Isɔluɛiya o chiɛi kɔɔli Kibiyati-halalɔti.
4 Sabu Chɔɔsuaa hivi nda o chiɛi kɔɔli wo cho hoo ni: Puaa ndaa fula Ichipi ma suliŋ le chɔuwo wa kpou, ma kei wu nɛi tɛɛŋ o pollo niŋ.
5 Wanaa ndaa fula Ichipi wa kpou, ma sɔla hivi chiɛi kɔɔlioo. Kɛ wanaa nda kei violɔɔ nɛi tɛɛŋ o pollo niŋnda kinɛi, nda sɔla hivi chiɛi kɔɔli le.
6 Le wɔsilaŋ 40, Isɔluɛiya wa balɔɔ o pollo niŋ. A lo balɔɔ haaa mi kaaleŋ kpou le chuu, koŋ cho ni, puaa chɔuwaa fula Ichipi ma kɛɛ le Chɛhowa diikɔŋndo wa. Mi Chɛhowa mɛnaŋ maa, lɛŋnde ndu Chɛhowa mɛnaŋ o finyaa ndaa mamaa lo le naa kioo leŋ, fɛɛŋ bɛɛ a chi leŋ te. Lɛŋnde milikiiyaŋ* a liaaŋ ma cho taaliaa leniŋ ndeŋ.
7 Puaa ndaa o chɛl ni ma miiŋgu o fondaŋ ndaa. Puaa ndaa kaŋ Chɔɔsuaa hivi o chiɛi kɔɔli ni. Kanifuule, teleŋ nda wa o nɛi tɛɛŋ ndo, ndaa sɔla hivi chiɛi kɔɔli le.
8 Mɛɛ nda chii nda hivi o chiɛi kɔɔli kpou, a lo o dɔɔŋgɔ nda wa wo haaa ma siaŋgu.
9 Okoŋ mi Chɛhowa dimul Chɔɔsuaa aa: “I faŋa* hau siɔmbula wa nya le waŋnda Ichipi laŋ.” Lelaŋ nda veelu fondaŋ koŋ ni aa Kikaa* haaa a paale hauleŋ ndeŋ.
10 Mi Isɔluɛiya hiau lachi a waa o dɔɔŋgɔɔ niŋ Kikaa loŋ. Nduyɛ o paŋgii keŋ niŋ malɔ 14, ma bii Bɔŋaŋ Hiouwɔɔ Choo Wo a paale yɔŋgaŋndeŋ, o pollo niŋ Chɛluiko.
11 Mɛɛ nda chii Bɔŋaŋ Hiouwɔɔ Choo Wo biyɔɔ, diimandɔɔ, ma kandu nyɛdiaa wa o lɛŋnde leŋ niŋndo dioo. Ma dia beedii nɔ yiisii* leniŋ te wo, a nyɛm kuamaŋ nda tuɛi yoŋ o paale leŋ choo.
12 Nduyɛ mɛɛ nda de nyɛdiaa wa o lɛŋnde leŋ niŋndo o paale leŋ choo, mi manɛiyo kiolu. Isɔluɛiya ve lɛ manɛiyo sɔla le. Kɛ, ma kandu nyɛdiaa wa o lɛŋnde Kenaŋ ndeŋ niŋndo dioo o wɔsi koŋ niŋ.
13 Mɛɛ Chɔɔsuaa wa Chɛluiko ikɛi, mbo cha poo isisi ndu lachi a muɛi faŋnde ndu o ba. Mi Chɔɔsuaa kua o poo hoo lo, mbo nyuna ndu aa: “Baa kumbuii nɛi ŋ cho ni ɔɔ kumbuii yaamɔɔwaa naa?”
14 Okoŋ mi poo hoo dimi aa: “Sako. Ya cho masaa le puaa chɔuwaa Chɛhowa wa ni, lelaŋ ya hiŋ ni.” Mɛɛ Chɔɔsuaa tuei hei, mbo baŋ wulaŋ mbo fuuluu hɔlla lɛŋ. Mbo nyuna ndu aa: “Yɛɛnɛ ŋ yeema yɛ buɛi numndo dimullo masanɔ nuu?”
15 Mi masa puaa chɔuwa le Chɛhowa mulul Chɔɔsuaa aa: “Soliŋ kɔwɛilaŋ* o ŋpelu. Kanifuule, o fondaŋ diandaa ŋ sim ni.” Okoŋ, mi Chɔɔsuaa keleŋa kɔwɛilaŋ soli.
Tɛɛsiaalaŋ
^ Hibuluiye, “ba pee mɛŋma ihɛllo.”
^ Hibuluiye, “mi kɔltaŋ la teŋga nda.”
^ Ɔɔ “nɔnɔɔ.”
^ Hibuluiye, “pimbullo.”
^ O sim “Pimbullo, Nyɔɔ Pimbullo.”
^ Ɔɔ “bulu nɔ lɛvɛŋ.”
^ Ɔɔ “samtalaŋ.”
