Chɔɔsuaa 6:1-27
6 A teleŋ koŋ, mi waŋnda Chɛluiko kiindiaa chiee ndaa kpaŋ kpaŋ le Isɔluɛiya. Wana ndoo luei le, wana ndoo fula le.
2 Okoŋ mi Chɛhowa dimul Chɔɔsuaa aa: “I mal num Chɛluiko o ba, masa cho loŋ ndo, vɛlɛ a kuubaa dialuŋ kalaa cho loŋ nda.
3 Nya puaa chɔuwa kinɛi, la nɔ mi la balu chioo le pilɛ o paaleŋ niŋ. La nɔ mi la tosa hei le palɛi i ŋɔmpum.
4 Hɛli wanaa soliaa lasalaa a ŋɔmmɛu, ma chua bululaŋ* la ŋɔmmɛu, ma wa kɔlaŋ a laŋ hɔŋndo Kɔfoo lachi. Kɛ o paale ŋɔmmɛu leŋ choo, la nɔ mi la balu chioo bɛmbɔɔ le ŋɔmmɛu, nduyɛ mi wanaa soliaa lasalaa hɔŋ bululaŋ.
5 Te la tuei dɔɔ pɛ ma hɔŋ bululaŋ, waŋnda kpou nɔ ma deŋi choo choo kpeleŋ le chɔuwo. Okoŋ, kpaki chioo cho komba wɔlɔwɔlɔ. Nduyɛ, waŋnda nɔ ma kuɛ ma kɔ bii chioo. Wana o wana nɔ mbo kuɛ ndu lachi sakpo.”
6 Okoŋ, mi Chɔɔsuaa po Nuŋ ndo veelu wanaa soliaa lasalaa diompilɛ. Mbo dimul nda aa: “La chua kɔfu kpemaa. Nduyɛ, wanaa soliaa lasalaa a ŋɔmmɛu nɔ ma chua bululaŋ la ŋɔmmɛu ma wa kɔlaŋ Kɔfu Chɛhowa wo lachi.”
7 Mbo dimul vɛlɛ waŋnda aa: “La kɔ mi la kɔ balu chioo. Nduyɛ, puaa chɔuwa nɔ ma wa Kɔfu Chɛhowa wo lachi.”
8 Mi waŋnda tosa mɛɛ Chɔɔsuaa dimul nda yɛ. Mi wanaa soliaa lasalaa a ŋɔmmɛu chua bululaŋ la ŋɔmmɛu, ma wa kɔlaŋ a laŋ hɔŋndo Chɛhowa lachi. Nduyɛ wanaa soliaa lasalaa a piliaa, a wa kɔlaŋ a kɔfu kpema Chɛhowa wo nda amakɔɔ.
9 Puaa chɔuwa, kundaa o pilɛ wa kɔlaŋ wanaa soliaa lasalaa wa bululaŋ hɔŋndo wa lachi. A wa kɔlaŋ a laŋ hɔŋndo kpeekpei, nduyɛ puaa chɔuwa kundaa o pilɔɔ wa kɔlaŋ Kɔfoo amakɔɔ le ndu mandaa.
10 Chɔɔsuaa ndoo dimul niŋ waŋnda aa: “La deŋi le, nduyɛ yuunɛɛ bɛɛ a tuɛi nya diom te. Haaa mi paale leŋ le fuuluu, la nɔ mi la soo le. Mɛɛ mi dimul nya aa, ‘La deŋi!’ Okoŋ mi la deŋi niko.”
11 Okoŋ, mbo tosa ma balu chioo a Kɔfu Chɛhowa wo le pilɛ. Mɛɛ nda chii balɔɔ, ma miiŋgu o dɔɔŋgɔɔ niŋ, ma kɔ lɔl loŋ.
12 Diimandɔɔ, mi Chɔɔsuaa pena chɔnɔŋ puŋ. Nduyɛ mi wanaa soliaa lasalaa chua Kɔfu Chɛhowa wo.
13 Wanaa soliaa lasalaa ŋɔmmɛu wa haa, a wa kɔlaŋ tuŋ a bulula ŋɔmmɛu laŋ hɔŋndo Kɔfu Chɛhowa wo lachi. Puaa chɔuwa a tiŋ wa nda kɔlaŋ lachi, nduyɛ a piliaa wa kɔlaŋ Kɔfu Chɛhowa wo amakɔɔ le ndu mandaa. Bululaŋ la wa hɔŋnɔŋndo kpeekpei.
14 O paale diiŋ ndɔ leŋ choo, ma balu vɛlɛ chioo le pilɛ, okoŋ ma miiŋgu o dɔɔŋgɔɔ. Ma tosa hei le palɛi i ŋɔmpum.
15 O paale ŋɔmmɛu leŋ choo, mɛɛ paaleŋ le sɛ dɔɔ, ma pena chɔnɔŋ puŋ. Nduyɛ ma balu chioo maa paandu bɛmbɔɔ le ŋɔmmɛu. Kɛ o paale leŋ choo kinɛi nda balu le ŋɔmmɛu ni.
16 Mɛɛ nda chii bɛmbɛ le ŋɔmmɛu wo, mi wanaa soliaa lasalaa hɔŋ bululaŋ. Nduyɛ mi Chɔɔsuaa dimul waŋnda aa: “La deŋi, kanifuule Chɛhowa chii nya chioo malɔɔ o ba!
17 Chioo hoo a nyɛ o nyɛ cho leniŋ, o nɔ mbo sɔla tambei. Chɛhowa nɔ muŋ kpou ni. Mɛɛ le Luehabi wana lanɔ suundɛi koŋ, a wanaa cho latulu a ndu chiɛiniŋ nda mi la mɛi yoomu. Kanifuule, ndu veŋ wanaa naŋ vem nda ni.
18 Kɛ la mandaŋ a nyɛm nɔ le tambei sɔlaa woŋ, yɔŋii nya luɛi muŋ hɔlteŋ mi la chua. Okoŋ mi la hiŋ a kpundɔɔ* Isɔluɛiya choo, mi nda bɛɛ sɔla tambei.
19 Kɛ kaniŋ humboŋ, kooliiyoŋ, nyɛm nda toosiaa a chiliŋuŋ siaŋaŋ vɛlɛ a chiliŋuŋ cheleŋ ndoŋ, nyɛm cho ŋ diandaa le Chɛhowa woŋ ŋ cho ni. La nɔ mi la kuɛ a muŋ naa nda kɛsi nyɛm baa kalaŋ o chiɛi Chɛhowa wo niŋnda.”
20 Mɛɛ nda hɔŋ bululaŋ, mi waŋnda deŋi choo choo kpeleŋ. Dimioo nuaa waŋnda tuei bululaŋ, ma deŋi choo choo kpeleŋ le chɔuwo, mi kpakioo komba wɔlɔwɔlɔ. Okoŋ, mi waŋnda hel chiee sakpo ma kɔ bii chioo.
21 Ma tɛɛmbuu nyɛ o nyɛ wa loŋ. Wana pɔnɔ ni, wana lanɔ ni, feleŋgɔnɔ ni, bɛndu yuu ni, nau ni, saa ni, a sofɛliaa kpou, ma diu nda paku a mɔɔŋ faŋndoŋ.
22 Mi Chɔɔsuaa dimul puaa suaŋsuaŋaa ŋiɔɔŋaa mɛɛndaŋ lɛŋndeŋ nda aa: “La kɔ o chiɛi wana lanɔ suundɛi koŋ niŋ mi la hiŋ a ndu a wanaa o nɔ wa kpou, a mɛɛ nya mɛnaŋ o ndu lo yɛ.”
23 Mi suaŋsuaŋaa feleŋguaa kaŋ kua ma kɔ huŋ a Luehabi, finya ndɔ, kala ndɔ, yemaa nduaa, a wana o wana o nɔ. Ma soli yuŋgu ndɔɔ kpou, okoŋ ma kua a nda yɛlɛkɛlɛɛ o dɔɔŋgɔ Isɔluɛiya wa wo ikɛi.
24 Okoŋ, ma mal chioo o yiŋ mi nyɛ o nyɛ wa leniŋ ŋua. Kɛ kaniŋ humboŋ, kooliiyoŋ, nyɛm nda toosiaa a chiliŋuŋ siaŋaŋ vɛlɛ a chiliŋuŋ cheleŋ ndoŋ, ma kua a muŋ naa nda kɛsi nyɛm baa kalaŋ o chiɛi Chɛhowa wo niŋnda.
25 Kɛ mi Chɔɔsuaa mɛi Luehabi wana lanɔ suundɛiyo, yuŋgu finya ndɔ wo, vɛlɛ a wanaa nduaa kpou yoomu. Nduyɛ haaa a paale hauleŋ ndeŋ o cho wɔ Isɔluɛi, kanifuule ndu veŋ wanaa Chɔɔsuaa vem suaŋsuaŋndeŋ Chɛluiko wa ni.
26 A teleŋ koŋ, mi Chɔɔsuaa luei sendioo hoo* aa: “Wana o wana chɛŋ pɛ le chioo Chɛluiko miŋgioo taŋgullo, sendioo cho wa ndu choo Chɛhowa o hɔl. Wana koŋ po ndɔ tasoo cho wu, te o kila pɛ chiyii chioo hoo. Nduyɛ po ndɔ mɛɛlaa cho wu, te o wou pɛ diolaŋ.”
27 Chɛhowa wa a Chɔɔsuaa latulu, nduyɛ mi tɔɔ ndɔɔ tiu ba o ba fee o chieeŋndo choo.
