Chɔɔsuaa 7:1-26
7 Kɛ mɛɛ Isɔluɛiya wa nyɔɔŋ tɛɛmbuuwo, a ve sakpo o nyɛ Mɛlɛka dimul nda wo tosaa niŋ te. Po pilɛ wa, diolaŋ aa Ekaŋ, po Kaami wo. Sabidi velu Kaami ni, mi Siluaa vialu Sabidi. Nda kpou o kaale Chuda leŋ choo nda fula ni. Kɛ mi Ekaŋ chua nyɛm muŋ nɔ le tambei sɔlaa woŋ ŋ tiŋ. Le hei, mi Chɛhowa duaunuŋ tumbe o kala kala a Isɔluɛiya.
2 Okoŋ, mi Chɔɔsuaa soli puaa naa nda wa Chɛluiko wa mbo viam nda Eyai. Chioo hoo ve levil a Bɛti-aviŋ te, nduyɛ Bɛtɛl ba paaleŋ le chaŋ ndo o wa ni. Mbo dimul nda aa: “La kɔ mi la mɛɛndaŋ lɛŋndeŋ.” Mi puaa haa kua, ma kɔ mɛɛndaŋ Eyai.
3 Mɛɛ nda miiŋgu naa Chɔɔsuaa chua, ma dimul ndu aa: “O cho waŋnda kpou le yeemaŋ le kɔlaŋ o chioo hoo le. Puaa le waalaŋ la tiɔɔŋ ɔɔ la yaa wa tuuleŋ le Eyai yomɔɔ. Saaŋgiaa waŋnda kpou le kɔlaŋ loŋ te. Kanifuule, wanaa cho loŋ nda a cho a bɔɔ le.”
4 Lelaŋ, puaa le 3,000 kuɛ loŋ ni. Kɛ mi puaa Eyai kɔ yom nda ma nyaanuŋ.
5 Mi puaa Eyai dii puaa 36. Ma chua nda touwɔɔ o dio kpaki chioo ma tual pembei a nda haaa ma fuuluu Siɛbaluim* di. A wa kɔlaŋ a nda diu diu wo o nɛi. Mi kɔltaŋ la laasiaŋ waŋnda niŋ kpou, nduyɛ mi siooŋii bɛnduei bii nda.*
6 Okoŋ, mi Chɔɔsuaa sɛɛsiaŋ nyɛlaŋ lekɔɔ, mbo hini o kuumbaŋ Kɔfu Chɛhowa wo lachi haaa mi paaleŋ le del. Mi waŋ banaa Isɔluɛiya bɛɛ tosa lende. Nduyɛ, a wa chundoo kɔndɔɔ ma duaunuŋ o lebol.
7 Mi Chɔɔsuaa dimi aa: “Ee Chɛhowa, Mɛlɛka Kpuluŋguma Bɛndoo, le yɛɛnɛ ŋ chɛllɛ miŋ taŋ Chɔɔdaŋ ndaŋ, le ma mal naa Amɔluaitiiya o ba ma diu diu naa? Ndoo bɛnda bɔɔ mi naŋ loŋnuŋ Chɔɔdaŋ leeloo.*
8 Mal la haki, Oo Chɛhowa, kɛ mi yɛɛ kpeekpei ya dimi yɛ mɛɛ Isɔluɛiya nyaanuŋ niŋ nuaa yaamɔɔwaa ndaa yɛ?
9 Te Kenanaitiiya a wanaa cho o lɛŋndeŋ ndeŋ niŋnda kpou tuei pɛ a hei okɔɔ, a cho naa hunɔɔ chiŋalaŋ ma basu naa tɛɛ o chieeŋndo choo. Yɛɛ kpeekpei ŋ cho yɛ niŋ tosa le diola numnda tɔɔmalaŋ?”
10 Mi Chɛhowa mulul Chɔɔsuaa aa: “Chɔŋ! Le yɛɛ ŋ cho yɛ ihini lende o kuumbaŋ?
11 Isɔluɛiya tosa hakioo. A faŋaŋ o kpema ya yii a nda wo choo. A chua nyɛm muŋ nɔ le tambei sɔlaa woŋ ŋ tiŋ. A chiimbuu muŋ ma viaŋ muŋ kpiŋ o nyɛm ndaŋ tɛɛŋ.
12 Lelaŋ, Isɔluɛiya tiu lɛ ba ma simul yaamɔɔwaa ndaa le. A cho wa yaamɔɔwaa ndaa nyaanɔŋndo, kanifuule nda bɛɛ simnuŋ wanaa nɔ le tambei sɔlaa wa. Le mi wa niŋ a nya latulu, mɛɛ mi la soli nyɛ nɔ le tambei sɔlaa wo nya tɛɛŋ, mi la tɛɛmbuu ndu.
13 Chɔŋ ma dindi waŋnda! Dimul nda aa, ‘La dindi nyapila siɔdii. Kanifuule, nyɛ Chɛhowa, Mɛlɛka Isɔluɛiya dimi wo cho hoo ni: “Nya waŋnda Isɔluɛi, nyɛ nɔ le tambei sɔlaa wo cho nya tɛɛŋ. Te la feŋa ndu nya tɛɛŋ te, la nɔla niŋ mi la simul yaamɔɔwaa nyaa le.
14 Te paaleŋ le sɛ pɛ, la nɔ mi la chuuŋgiaŋ, okoŋ mi kaale kɛ kɛ le sim. Kaale Chɛhowa cho hɛli leŋ, le nɔ mi le sɔɔŋguu a yuŋgulaŋ. Yuŋgu Chɛhowa cho hɛli wo, o nɔ mbo sɔɔŋguu a chiɛilaŋ. Chiɛi Chɛhowa cho hɛli wo, puaa cho leniŋ nda nɔ ma sɔɔŋguu a pilɛŋ pilɛŋnda.
15 Wana nda cho mɛɛlu biyɔɔ a nyɛ ndoo nɔ le tambei sɔlaa wo o ba wo, a nɔ ma lom ndu a nyɛ o nyɛ o nɔ. Kanifuule, o faŋaŋ o kpema Chɛhowa yiiyo choo, nduyɛ mbo tosa suɛi lasiɔmbuei o Isɔluɛi niŋ.”’”
16 Diimandɔɔ, mi Chɔɔsuaa pena chɔnɔŋ puŋ, mbo chuuŋgiaa Isɔluɛiya kpede diompilɛ. Mi kaale kɛ kɛ le sɔɔŋguu, okoŋ ma hɛli Kaale Chuda leŋ.
17 Mbo tosa mi yuŋgula wa o kaale Chuda leŋ niŋndaŋ la sɔɔŋguu, okoŋ ma hɛli yuŋgu Siluaa wo. Mbo tosa vɛlɛ mi puaa wa o yuŋgu Siluaa wo niŋnda sɔɔŋguu, okoŋ ma hɛli Sabidi.
18 O mɛɛlulaŋ kpɔŋ, mbo tosa mi puaa wa o yuŋgu Sabidi wo niŋnda sɔɔŋguu, okoŋ ma hɛli Ekaŋ, po Kaami wo. Sabidi velu Kaami ni, mi Siluaa ndu vialu Sabidi. Nda kpou o kaale Chuda leŋ choo nda fula ni.
19 Mi Chɔɔsuaa dimul Ekaŋ aa: “Po nuu, yandii, ke Chɛhowa, Mɛlɛka Isɔluɛiya bɛɛleŋ, okoŋ ma chɔɔmuŋ o ndu lo. Yandii, dimul la nyɛ ŋ tosa wo. Viŋ ya ndu le.”
20 Mi Ekaŋ mulul Chɔɔsuaa aa: “A tonya, ya kpeekpei tosa hakioo a Chɛhowa, Mɛlɛka Isɔluɛiya ni. Nduyɛ, nyɛ ya tosa wo cho hoo ni.
21 Mɛɛ ya che doma kɛndɛ kɛndɔɔ fulaa Sianaa o nyɛm muŋ nɔ le tambei sɔlaa woŋ tɛɛŋ, a kaniŋ humboŋ lusullo siɛkɛlloŋ 200,* a kooliiyoŋ lusullo siɛkɛlloŋ 50, mi luɛi muŋ hɔlteŋ, nduyɛ mi chua muŋ. Ŋ cho ŋ viaŋaa lɛŋ o tɛndii nuu niŋ, a kanioŋ lebɛŋgu.”
22 Mi Chɔɔsuaa viam waŋnda chɔ chɔ ma nyaanuŋ o tɛndii ndɔɔ. Ma kɔ saaluŋ doma koŋ o viaŋaa o tɛndiiyo niŋ, a kanioŋ lebɛŋgu.
23 Ma chua nyɛm muŋ, ma huŋ a muŋ o Chɔɔsuaa lo, Isɔluɛiya kpou o hɔl. Nduyɛ ma kɛsi muŋ Chɛhowa lachi.
24 Mi Chɔɔsuaa a Isɔluɛiya kpou bii Ekaŋ, po Siluaa wo, a puaa nduaa, chuauwaa nduaa laanduaa, nauwaa nduaa, sofɛliaa nduaa, vɛlɛ a saa nduaa. Ma chua kaniŋ humbuŋ muŋ, doma koŋ, kooliŋ muŋ, tɛndii ndɔɔ, a nyɛ o nyɛ ndoo nɔ, ma kua a muŋ o Kpoloŋndo* Akɔɔ.
25 Mi Chɔɔsuaa dimi aa: “Le yɛɛnɛ ŋ tosa yɛ mi kpundɔɔ* huŋ naa choo? Chɛhowa bɛɛ cho num hau kpundɔɔ tusi choo.” Okoŋ, mi Isɔluɛiya vii vii ndu a yuŋgu ndɔɔ a poutaŋ, ma luam nda chilikɔ. Nda kpou ma vii vii nda a poutaŋ.
26 Ma chua poutaŋ, ma dii laŋ bembe bɛndoo ndu choo. Nduyɛ, la cho wɔ loŋ haaa a paale hauleŋ ndeŋ. Okoŋ, mi tumbe Chɛhowa ndoo dɔunuŋ ndo pɔlul. Le sabu koŋ fonda koŋ nɔ diolaŋ ni aa Kpoloŋndo Akɔɔ,* haaa a paale hauleŋ ndeŋ.
Tɛɛsiaalaŋ
^ Koŋ cho ni, naa nda kala poutaŋ nda.
^ Hibuluiye, “mi kɔltaŋ la teŋga waŋnda niŋ, nduyɛ mi la simnuŋ mɛɛ mɛŋndaŋ ma hiau nuaa yɛ.”
^ Koŋ cho ni, ba paaleŋ le chaŋ ndo.
^ Tofa Tɛɛsiaa B14.
^ Ɔɔ “Dɛŋgbɔɔ.”
^ Ɔɔ “sendioo.”
^ O sim, “Kpundɔɔ, Sendioo.”
