Chɔɔsuaa 8:1-35
8 Okoŋ, mi Chɛhowa dimul Chɔɔsuaa aa: “Yɔŋ isiooŋ ɔɔ ma nyiiya le. Chua puaa chɔuwa kpou mi la kɔ del Eyai choo. Masaa Eyai ni, wanaa nduaa ni, chiee ndɔɔ ni a lɛŋnde ndɔleŋ kpou, I chii num malɔɔ o ba.
2 Tɛɛmbuu Eyai a masa cho loŋ ndo, mɛɛ ŋ tɛɛmbuu Chɛluiko a masa wa loŋ ndo yɛ. Kɛ te la wa chioo tɛɛmbuuwo pɛ, la puŋga nyɛm cho loŋ ndoŋ a chɔluaa le nyapila. Yɔŋ puaa chɔuwa a tiŋ ma kɔ vioŋnuŋ o chioo kɔɔli.”
3 Mi Chɔɔsuaa a puaa chɔuwa kpou kua le Eyai delɔɔ choo. Mbo hɛli kuubaa dialuŋ kalaa 30,000, mbo yɔŋ nda a nyumndaŋ.
4 Mbo dimul nda aa: “La kɔ mi la kɔ hini a viaŋnaŋnda o chioo kɔɔli. La kua levil a chioo le, nduyɛ nya kpou la nɔ mi la wa a bɛɛndiaŋ.
5 Ya a wanaa cho a ya latulu wa, ŋ cho sɔɔŋguu chioo ikɛi. Okoŋ, te a fula pɛ ma hinul naa maa o tasela ndɔ, ŋ cho muliŋ miŋ nyaanuŋ nda.
6 Te a tisa naa pɛ kɔɔli, ŋ cho nyaanɔŋ miŋ faŋa nda o chioo ikɛi. Kanifuule, a cho dimi aa, ‘Waŋnda haa nyaanuŋ naa lahau maa paandu.’ Nduyɛ ŋ cho nda nyaanɔŋ.
7 Te keŋ yɔŋnuŋ pɛ, la chɔŋ naa nya cho wa a viaŋnaŋ nda, mi la kɔ bii chioo. Chɛhowa Mɛlɛka nyaa cho nya ndu malɔɔ o ba.
8 Te la bii dɔɔ chioo pɛ, la mal ndu o yiŋ. La nɔ mi la tosa mɛɛ Chɛhowa dimi yɛ. Nyɛ nya nɔ le tosaa wo ya dimul nya hoo ni.”
9 Okoŋ, mi Chɔɔsuaa viam nda ma kua naa ndaa nɔ le vioŋnɔŋndo wa. Fondaŋ nda kɔ vioŋnuŋ ndo wa Bɛtɛl tɛɛŋ nda Eyai ni, Eyai ba paaleŋ le del lo. Kɛ mi Chɔɔsuaa ndu lɔl ichɔl koŋ a wanaa wa a ndu latulu wa.
10 Okoŋ kɔɔli, mi Chɔɔsuaa pena chɔnɔŋ puŋ mbo chuuŋgiaa* puaa chɔuwa. Mi ndu nda waŋ banaa Isɔluɛi sim nda lachi ma kua Eyai.
11 Mbo heelu a puaa chɔuwaa wa a ndu latulu wa kpou ma kua o chioo lachi, ma kɔ kiolu dɔɔŋgɔɔ Eyai ba luaŋ ndo. Kpoloŋndo wa nda tɛɛŋ a Eyai.
12 Kɛ nduyɛ, ndoo chua niŋ puaa chɔuwa 5,000 mbo viam nda le ma kɔ vioŋnuŋ Bɛtɛl tɛɛŋ nda Eyai, ba paaleŋ le del lo.
13 Mi puaa chɔuwa kunda bɛndoo kialu dɔɔŋgɔɔ o chioo ba luaŋ ndo. Nduyɛ, a kuɛ o chioo amakɔɔ le vioŋnɔŋndo wa, wa ba paaleŋ le del lo. Ichɔl koŋ, mi Chɔɔsuaa kua o kpoloŋndo* niŋ.
14 Dimioo nuaa masaa Eyai che hei, mbo pena chɔnɔŋ puŋ nda puaa wa o chioo niŋnda, ma kua o fondaa pum ba pollo cho wo le Isɔluɛiya chiŋalaŋndo. Kɛ o sina nuaa maa puaa chɔuwa apum wa a viaŋnaŋ o chioo kɔɔli le.
15 Mɛɛ puaa Eyai kɔ chiŋalaŋ nda, mi Chɔɔsuaa a wanaa wa a ndu latulu wa nyaanuŋ o nɛi kuɛ ba pollo wo.
16 Okoŋ, ma veelu wanaa lo o chioo niŋnda kpou le ma tisa nda kɔɔli. A lo Chɔɔsuaa waa kiltaŋ kɔɔli haaa ma kua landaŋ a chioo.
17 Wana pɔnɔɔ o pilɛ bɛɛ lo Eyai a Bɛtɛl mbo kɛɛ fula le kiltaŋ Isɔluɛiya kɔɔli le. Ma mɛi chioo lende kpalamandaŋ, ma tisa Isɔluɛiya kɔɔli.
18 Mi Chɛhowa dimul niko Chɔɔsuaa aa: “Siɛndi bal cho num o ba wo kpeŋgii Eyai cho ve, kanifuule I cho num chioo hoo malɔɔ o ba.” Okoŋ, mi Chɔɔsuaa siɛndi bal wa ndu o ba wo kpeŋgii chioo wa ve.
19 Dimioo nuaa o siɛndi baa, mi puaa chɔuwaa wa a viaŋnaŋ nda fula a kiltaŋ ma kɔ bii chioo. Mɛɛ nda hel dɔɔ chiee, ma mal chioo o yiŋ.
20 Mɛɛ puaa Eyai muliŋ, ma cha kumnde helɔɔ chiee tukpe tukpe, nduyɛ ndaa nɔla lɛ ma nyaanuŋ ba o ba le. Okoŋ, mi Isɔluɛiyaa wa kiltaŋ ba pollo wa mululaŋ wanaa wa nda touwɔɔ wa.
21 Mɛɛ Chɔɔsuaa a Isɔluɛiya kpou che maa puaa wa a viaŋnaŋ nda bii chioo, nduyɛ ma cha kumnde helɔɔ tukpe tukpe, ma muliŋ ma chiŋalaŋ puaa Eyai.
22 Mi puaa bii chioo wa bɛɛ huŋ nda lachi. Okoŋ, mi waŋnda Isɔluɛi luei niko puaa Eyai o piŋndo niŋ, haa wa kpeŋgei hei, mi a piliaa wa kpeŋgei i pilɛi. Isɔluɛiya lo nda diuwo haaa wana pilɛ bɛɛ lo le, kɛlɛŋgaa niŋ te mi wana hɛluŋ.
23 Kɛ ma bii masaa Eyai ma huŋ a ndu o Chɔɔsuaa lo.
24 Mɛɛ Isɔluɛiya chii waŋnda Eyai diyɔɔ kpou a mɔɔŋ faŋndoŋ naa nda nyaanuŋ nda kɔɔli o pollo niŋnda, nda kpou ma miiŋgu Eyai chiee pila. Okoŋ, ma kɔ siou vɛlɛ wanaa lo loŋ nda diu diu.
25 Wanaa nda diu paale leŋ nda, wana pɔnɔ ni, wana lanɔ ni, a wa 12,000, waŋnda Eyai kpou.
26 Mɛɛ Chɔɔsuaa siɛndi bal wa ndu o ba wo, baa lo ndu choo choo lende haaa ma chii waŋnda Eyai kpou tɛɛmbuu.
27 Kɛ mi Isɔluɛiya chua chɔluaa a nyɛm wa o chioo niŋndoŋ le ndapila, a mɛɛ Chɛhowa dimul Chɔɔsuaa yɛ.
28 Okoŋ, mi Chɔɔsuaa mal Eyai o yiŋ, mbo simnuŋ bembelaŋ. Nduyɛ haaa a paale hauleŋ ndeŋ, o cho wɔ lende.
29 Mbo landu masaa Eyai o yɔmndo haaa a paale yɔŋgaŋndeŋ. Mɛɛ paaleŋ le hiŋ le delɔɔ, mi Chɔɔsuaa viam waŋnda le ma kɔ tusi dialuŋ ndɔŋ o yɔm koŋ choo. Okoŋ, ma kɔ mal muŋ o dio kpaki chioo nduyɛ ma dii poutaŋ ndu choo bembe bɛndoo. Pouta laŋ la cho wɔ loŋ haaa a paale hauleŋ ndeŋ.
30 Okoŋ, mi Chɔɔsuaa taŋgul bandu luamaa lasalaa o Pembii Ɛba Ve choo le Chɛhowa, Mɛlɛka Isɔluɛiya.
31 Ma taŋgul ndu mɛɛ Muuse buɛi Chɛhowa wo dimul Isɔluɛiya yɛ, nduyɛ a mɛɛ i cho i poonyiaa o yau laSawa Muuse wo niŋ yɛ aa: “Bandu luamaa lasalaa nɔ mbo taŋguluŋ a pouta kpulukuu laŋ. Nduyɛ a nɔ ma sɛl taŋ a ichiliŋ te.” Ma soli salala luamaa laŋ a salala kɔl nyulu laŋ o Chɛhowa lo o bandoo hoo choo.
32 Okoŋ, sawala Muuse ndoo poonyiaa Isɔluɛiya o hɔl laŋ, mi Chɔɔsuaa miŋgi laŋ poonyiaa o poutaŋ choo loŋ.
33 Mi waŋnda Isɔluɛi kpou, wanaa ndaa banaa, simlachiaa, a wanaa kialaa ŋyamaa piɔuwaŋ tɛɛŋ, ma sim o kpeŋguŋ Kɔfoo vellaa velle. A wa isisi wanaa soliaa lasalaa fula o kaale Livai leŋ choo, ma wa kɔlaŋ a kɔfu kpema Chɛhowa wo wa lachi. Mialaa wa Isɔluɛiya tɛɛŋ nda bɛɛ wa isisi loŋ a nda latulu. Kundaa o pilɛ wa isisi o Pembii Kɛluisim Nde, mi o pilɔɔ sim o Pembii Ɛba Ve (mɛɛ Muuse buɛi Chɛhowa wo ndoo dimi yɛ), le waŋnda Isɔluɛi salaa dɔwɔɔ.
34 Okoŋ, mbo veelu diomndaŋ choo choo kpeleŋ o yau laSawaa niŋ a sendilaŋ vɛlɛ a salalaŋ okɔɔ kpou, mɛɛ o mɛɛ la cho la poonyiaa leniŋ yɛ.
35 Nyɛ o nyɛ Muuse ndoo dimi, mi Chɔɔsuaa veelu diomndaŋ choo choo kpeleŋ Isɔluɛiya kpou o hɔl. Diomndo o pilɛ bɛɛ o mɛi kɔɔli le. Waŋ laanduaa, chuaambuaa, a mialaa wa nda tɛɛŋ nda kpou wa loŋ.
