Chɛluimaya 12:1-17
12 Oo Chɛhowa, wana sakpoo ŋ cho ni.Te I ŋɔɔchiaŋ pɛ naa num chua ɔɔ mi dɔu num isɔɔ lachi, o nɛi sakpoo choo ŋ bii ndi ni.
Kɛ le yɛɛnɛ wanaa dɛnɛ wɔɔŋnda cho yɛ batiuwaa sɔlaa?Nduyɛ le yɛɛ wanaa kaŋgalaa choŋnuŋ yɛ hɛnɛkɛ, a nɔ buulaŋ te?
2 Num tɔl nda ni, ma wul puundoŋ.
A hindu ma yɔŋgu kɔmndeŋ.
Ma soo a num okɔɔ, kɛ kɔlta ndalaŋ la* choŋnuŋ landaŋ a num.
3 Num Chɛhowa, a sina ya nyɛkɛndɛi nduyɛ a cho ya chɔɔ.A yaasiaa kɔl nuu, ma saaluŋ maa I yɔŋguŋ o numndo kpou.
Hɛli nda mɛɛ nda hɛli nuaa saa le nda diyɔɔ yɛ,Nduyɛ ma kɛsi nda le paale nda cho nda diu leŋ.
4 Le vɛɛ kpɛ lɛŋndeŋ le cho yɛ wa le vesɛi,Nduyɛ mi tɔlɔɔla cho lechoo laŋ kpou la vesa sɛɛŋ?
Le mɛɛ wanaa cho o lɛŋndeŋ ndeŋ niŋnda cho wanaa dɛnɛ wɔɔŋ yɛ,Visiaa yonduaa a youwa chuu wu kpou.
Kanifuule a dimi aa: “Mɛlɛka cho chɔ nyɛ cho naa hunɔɔ yɔŋnɔŋ ndo le.”
5 Te a saŋga wɔ pɛ a kiltaŋ nya wanaa cho kiltaŋ a ŋpelu wa,Vɛɛ ŋ nɔla yɛ niko ma nyaanuŋ nya wanaa cho kiltaŋ o suaa choo wa?
Naapum a cho waŋnɔŋ hɛnɛkɛ o lɛŋnde kɔl nyulu leŋ niŋ.Kɛ vɛɛ ŋ cho yɛ wa o yondo mɔndɔ mɔndɔ cho o Chɔɔdaŋ ndaŋ holnɔŋndo wo niŋ?
6 Hali wanayaŋ numndoŋ bɛɛ, ŋ nya fula yuŋgu pilɔɔ woŋ,A tosal num kaŋgalaa.
A soo sɔɔŋ wɔɔŋndoŋ a num okɔɔ.
Duau tiindaŋ o nda niŋ te,O yɔŋ bɛɛ ma dimul num sɔɔŋ yeelɛiyoŋ.
7 “I mal chiɛi nuu, mi kɛɛ nyɛm kɛŋ nuŋ.
I mal wana ya kaala wo yaamɔɔwaa nduaa o ba.
8 Nyɛm kɛŋ nuŋ simnuŋ maa kpɔkuŋ* cho yondoo niŋndo.
O cho ya pɛɛliaa choo.
Lelaŋ ya tul ndu leyɛ ni.
9 Nyɛm kɛŋ nuŋ simnuŋ maa you biyaa nɔ kɔɔle muuliaŋ ndeŋ ndo.Youwaa biyaa cheleŋnda balu ndu silɔ le ndu delɔɔ choo a sɔŋgɔɔ.
Nya visiaa biyaa yondoo niŋ kpou, la chuuŋgiaŋ naapilɛ,Mi la hiŋ le ndu dioo.
10 Wanaa mandaa lasaa bɔɔbɔɔ tɛɛmbuu kpele ni makilepiiyo,A niɔu niɔu buŋgɛi nii lelɛŋnde.
A tosa mi buŋgɛi nii kɛndɛ kɛndɛi simnuŋ pollo.
11 Le simnuŋ lɛŋnde tambɛi leŋ.
Le vesa sɛɛŋ,*Le simnuŋ pɔmndo ya o hɔl.
Lɛŋndeŋ kpou le simnuŋ pɔmndo,Kɛ wana o wana hendu bɛɛ kɔllo lechoo le.
12 Wanaa tɛɛmbaa fula ba o ba fee o pollo niŋ ma keeku o nɛila tambɛilaŋ ma huŋ.Kanifuule, muɛi faŋii Chɛhowa ve cho waŋnda diuwo ba o ba fee o lɛŋndeŋ niŋ.
Wana o wana* cho a kɔl nyulu le.
13 A saŋ witiiyoŋ, kɛ ma kuau yɔɔŋ.
A yɔɔkpiaa ndapila fondo fuu, kɛ tɔnɔ o tɔnɔ a sɔla le.
Siɔmbulaŋ la cho nda biyɔɔ le nyɛ nda kou wo,Kanifuule kɔl tuu Chɛhowa wo wa niŋ bɔɔ.”
14 Lɛŋnde wanaa niaa Isɔluɛi sɔla maa nyɛm kɛŋ nda leŋ, wanaa dɛnɛ wɔɔŋaa balu naa wa cho nda delɔɔ choo ma poonda leŋ. Lelaŋ, nyɛ Chɛhowa dimi a nda okɔɔ wo cho hoo ni: “I cho nda faŋa o lɛŋnde ndaleŋ niŋ, nduyɛ mi soli waŋnda Chuda nda tɛɛŋ.
15 Kɛ te I soli nda pɛ, I cho vɛlɛ nda tuiinɔŋ inyiɛɛ, mi miŋgi wana o wana o lɛŋnde ndɔleŋ niŋ pila mbo kɔ chua nyɛm kɛŋ ndɔŋ.”
16 “Te a pɛɛku pɛ le kaala wanaa niaa tolɔɔ kɔɔli, nduyɛ ma mɛnaŋ o diola nilaŋ niŋ, mɛɛ nda pɛɛku wanaa niaa le mɛnaŋndo o diola Baal laŋ niŋ yɛ, okoŋ ma dimi aa: ‘Mɛɛ i cho kpendekele maa Chɛhowa cho yoomu yɛ!’ Keŋ cho tosa mi chɛl nda ma wa wanaa niaa tɛɛŋ.
17 Kɛ te a kɛɛ pɛ le diikɔŋndo, I cho nda soli o lɛŋnde nda leŋ niŋ, mi tɛɛmbuu nda.” Ya Chɛhowa dimi lende ni.
Tɛɛsiaalaŋ
^ Hibuluiye, “kɔl keluŋ ndaŋ.”
^ Ɔɔ “yalakana.”
^ Ɔɔ naapum, “Le chaŋ.”
^ Hibuluiye, “Dialii kɛ kɛ.”
