Chɛluimaya 44:1-30
44 Yooŋgu Chɛluimaya sɔla le Chuuwa kpou a wa ichali o lɛŋnde Ichipi leŋ niŋ, Mikidɔɔ, Tapanɛsi, Nɔɔfi,* a lɛŋnde Patɔlɔsi leŋ ndo cho hoo ni. Mbo dimul nda aa:
2 “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘La che kpundɛ ya tusi Chulusalɛm choo a chieeŋ bɛndoŋ o Chuda niŋ kpou wo. Chiooŋ muŋ cho hau ŋ tambɛiyoŋ, wana o wana cho loŋ te.
3 Hei yɔŋnuŋ le sɔɔŋ dɛnɛ wɔɔŋ nda tosa le ya kɔllo tɛɛmbuuwo woŋ. A wa salalaŋ solioo ma biilu mɛlɛkaa cheleŋnda, mɛlɛkaa nda a finyaa ndaa mamaa sina le wa.
4 Mi hiau lachi a buɛiyaa niaa suaa le ya wa kpou yɔŋndo naa nda chua. Mi viam nda o nda lo lediiŋ diiŋ* ma dimul nda aa: “Yandii, la tosa suɛi wɔɔŋii ya tul hei leyɛ ve le.”
5 Kɛ a yeŋ nilaŋ ma mulul sɔɔŋ wɔɔŋ nda wa tosaa woŋ kɔɔ le. Kɛlɛŋgaa niŋ te ma pɛŋgi salalaŋ solioo o mɛlɛkaa cheleŋnda lo.
6 Le hei, mi chuiŋi kɔl ni tuuwo mbo luam chieeŋ bɛndoŋ Chuda a nɛila bɛndulaŋ Chulusalɛm, okoŋ miŋ tambu miŋ simnuŋ pɔmndaŋ, a mɛɛ ŋ cho hau nuaa yɛ.’
7 “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Le yɛɛ nya cho yɛ kpundɛ bɛndoo tusiŋndo choo? Keŋ cho tosa mi wana o wana sɔla tambei o Chuda niŋ, wana pɔnɔ ni, wana lanɔ ni, chuaambɔ ni, chɛlɛkpɛ ni, waŋndo o pilɛ bɛɛ lo niŋ yoomu le.
8 Le yɛɛnɛ nya cho yɛ ya kɔllo tɛɛmbuuwo a sɔɔŋ nya cho tosaa woŋ, mi la soli salalaŋ o mɛlɛkaa cho o lɛŋnde Ichipi leŋ niŋnda lo, naa nya kuɛ le challe wa? La cho tambei sɔla nduyɛ mi la simnuŋ nyɛ sendi a nyɛ mamaa o lɛŋnde niŋ kpou o chieeŋndo choo.
9 Baa la puɛɛnuŋ sɔɔŋ dɛnɛ wɔɔŋ finyaa nyaa mamaa, masaa nyaa o Chuda niŋ a laandaa ndaa, nyapila vɛlɛ a laandaa nyaa tosa o lɛŋnde Chuda leŋ niŋ a o nɛila bɛndulaŋ choo Chulusalɛm ndoŋ?
10 Haaa a paale hauleŋ ndeŋ, a tusiŋ ma nɔ siooŋii nii le. Kɛlɛŋgaa niŋ te ma kuɛ o sawala nilaŋ choo, la ya ke nda a finyaa ndaa mamaa laŋ.’
11 “Lelaŋ nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘I kɛɛsiaa le mi hiŋ a kpundɔɔ nda choo, mi tɛɛmbuu Chuda kpou.
12 Wanaa lo yoomu o Chuda niŋ ma kɛɛsiaa le kɔlaŋ challe o lɛŋnde Ichipi leŋ niŋnda, I cho tosa mi nda kpou sɔla tambei o lɛŋnde Ichipi leŋ niŋ. A cho piɔmndo sɔla a muɛi faŋnde vɛlɛ a yima bɛnduaŋ. Chuaambɔ ni, kaasoŋnɔ ni, wana bala fondo ni, wana sulaa ni, nda kpou cho piɔmndo sɔla a muɛi faŋnde, vɛlɛ a yima bɛnduaŋ. Sendioo cho nda wa choo nduyɛ mi siooŋnde bii waŋnda a nyɛ yɔŋnuŋ niŋ nda wo. A cho simnɔŋ nyɛ mamaa, nduyɛ sala ve niŋ nda choo le.
13 I cho wanaa cho ichali o lɛŋnde Ichipi leŋ niŋnda nyɛpalaa tusi choo, mɛɛ ya tusi Chulusalɛm nyɛpalaa choo a muɛi faŋnde, yima bɛnduaŋ, vɛlɛ a naala taŋ waŋnda laŋ yɛ.
14 Wanaa lo yoomu o Chuda niŋ ma kua le challe o lɛŋnde Ichipi leŋ niŋnda, a heluŋ niŋ kɛlɛŋgaa ma chinda le miiŋgoo o lɛŋnde Chuda leŋ niŋ te. A cho nɔ yeemɛi le miiŋgoo ma kɔ chal loŋ, kɛ a miiŋgu niŋ te, mɛɛ le wanaa pɔmbuaa hɛluŋ nda.’”
15 Puaa ndaa sina maa mi laandaa ndaa wa salalaŋ solioo o mɛlɛkaa cheleŋnda lo wa kpou, a laandaa ndaa wa isisi loŋ ma wa kunda bɛndoo wa kpou, vɛlɛ a wana o wana wa o lɛŋnde Ichipi leŋ niŋ a Patɔlɔsi, ma mulul Chɛluimaya aa:
16 “Ŋ cho lani yaŋɔɔ o nyɛ ŋ dimul naa o diola Chɛhowa laŋ niŋndo le.
17 Kɛ nyɛ o nyɛ naŋ dimi le tosaa, ŋ cho hiouwɔɔ lachi a ndu tosaa. Ŋ cho wa salalaŋ solioo o Masa Laandoo Choo Choo* lo, nduyɛ miŋ tala salala mamuɛilaŋ o ndu lo. Lende naa, finyaa naa mamaa, masaa naa, a laŋgbaa naa kalla tosa o chieeŋ naŋ bɛndoŋ niŋ Chuda a o nɛila bɛndulaŋ choo Chulusalɛm ni. A boondii keŋ, mi naŋ de nyɛdiaa* miŋ hini kɔl. Nduyɛ ŋ waŋnuŋ nyɛkɛndɛi, kpundɛ o kpundɛ komal naa le.
18 Kɛ chɔŋ a teleŋ naŋ pɛŋgi salalaŋ solioo o Masa Laandoo Choo Choo* lo wo, okoŋ miŋ pɛŋgi salala mamuɛilaŋ talaa o ndu lo wo, ŋ nɔ lɛ nyɛ o nyɛ le. Ŋ cho piɔmndo sɔlaa a muɛi faŋnde vɛlɛ a yiaaŋ.”
19 Mi waŋ laanduaa haa chɔɔlu dimi aa: “Piaandaa naa chɛl ni miŋ wa salalaŋ solioo o Masa Laandoo Choo Choo* lo. Nda chɛl ni miŋ wa salala mamuɛilaŋ talaa o ndu lo, a katolaŋ toosiaa o velaŋ ndɔɔ niŋ.”
20 Okoŋ mi Chɛluimaya dimul waŋnda kpou, puaa a laandaa ndaa, vɛlɛ a wanaa wa suɛi o ndu lo wa kpou aa:
21 “Salala nya, finyaa nyaa mamaa, masaa nyaa, laŋgbaa nyaa kalla a wanaa cho o lɛŋndeŋ niŋnda soli o chieeŋ bɛndoŋ niŋ Chuda a o nɛila bɛndulaŋ choo Chulusalɛm ndaŋ, Chɛhowa loonuŋ a laŋ nduyɛ mbo miŋgi kɔllo handɔɔ o laŋ choo.
22 O mɛɛlulaŋ kpɔŋ, mi Chɛhowa saŋga a nya biuwɔŋndo le sɔɔŋ dɛnɛ wɔɔŋ vɛlɛ a sɔɔŋ nɔɔlɛi nya tosa woŋ. Mi lɛŋnde nyaleŋ le simnuŋ nyɛ tambɛi, nyɛ sendi, nduyɛ mi siooŋnde bii waŋnda a nyɛ yɔŋnuŋ a leŋ ndo. Wana o wana cho ichali loŋ te, a mɛɛ i cho hau nuaa yɛ.
23 Le mɛɛ nya soli salalaŋ ndaŋ nduyɛ mi la tosa hakioo a Chɛhowa, mi la kɛɛ le Chɛhowa diikɔŋndo, la tul sawala ndɔlaŋ a nyɛ o nyɛ o dimul nya wo kɔɔli le yɛ, kpundɔɔ hoo tol nya choo ni, a mɛɛ i cho hau nuaa yɛ.”
24 Mi Chɛluimaya hiau lachi a suɛi o waŋnda lo a o waŋ laanduaa lo kpou aa: “La tuei nyɛ Chɛhowa dimi wo nya waŋnda Chuda, a cho haa o lɛŋnde Ichipi leŋ niŋnda.
25 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Nyɛ nya a laandaa nyaa dimi wo, ndu nya tosa ni. Kanifuule mi la dimi aa: “Ŋ cho hiouwɔɔ lachi a buŋgaŋ naŋ chua le salalaŋ solioo o Masa Laandoo Choo Choo* lo, nduyɛ a salala mamuɛilaŋ talaa o ndu lo woŋ peelu.” Nya waŋ laanduaa haa, la cho tosa nyɛ nya dimi le tosaa wo.’
26 “Lelaŋ la tuei nyɛ Chɛhowa dimi wo, nya waŋnda Chuda kpou, nya cho o lɛŋnde Ichipi leŋ niŋnda. Chɛhowa dimi aa: ‘“La cho buŋgaŋ chuaa mi la dimi aa, ‘Te Chɛhowa, Mɛlɛka Kpuluŋguma Bɛndoo cho pɛ yoomu!’ Kɛ I mɛnaŋ po a diola nila tɔɔmalaŋ maa wana o wana fula Chuda, o soliŋ lɛ diola nilaŋ kpeku le buŋgaŋ chuaa le.
27 Suŋ suŋ niŋ, I nɔ nda hɔlteŋ choo, o cho le mi chuu nda suɛi kɛndɛ le, kɛ le mi tusi nda kpundɔɔ choo. Wanaa fula Chuda ma wa ichali o lɛŋnde Ichipi leŋ niŋnda kpou, a cho lo tambei sɔlaa a muɛi faŋnde vɛlɛ a yima bɛnduaŋ haaa ma chuu paku.
28 Waŋnda nyɛɛmbɔ koni cho muɛi faŋnde hiɔlɔŋ ni ma mal lɛŋnde Ichipi leŋ, ma miiŋgu o lɛŋnde Chuda leŋ niŋ. Okoŋ wanaa lo yoomu o lɛŋnde Chuda leŋ niŋ ma kɔ chal o lɛŋnde Ichipi leŋ niŋnda kpou cho sina wana dimi tonyaa wo, te ya ni ɔɔ nda ni!”’”
29 “Chɛhowa dimi aa, ‘Tamasioo cho hoo ni, le nyɛpalaa ya tusi niŋ nya choo o lɛŋndeŋ ndeŋ niŋndo, le mi la sina maa kpundɛ ya dimi le nya tusioo choo wo, o nɔ le yɔŋnɔŋndo.
30 Nyɛ Chɛhowa dimi wo cho hoo ni: “I cho Feloo Hɔfilua, masaa le Ichipi malɔɔ yaamɔɔwaa nduaa o ba, a cho nɛilaŋ nuuviaa le ndu diyɔɔ wa, mɛɛ ya mal Sɛdikaya masaa le Chuda, Nɛbukanɛɛsa,* masaa le Babilɔŋ o wa yaamɔɔnɔ ndɔɔ, nduyɛ mbo wa nɛilaŋ nuuviaa le ndu diyɔɔ wo o ba yɛ.”’”
Tɛɛsiaalaŋ
^ Ɔɔ “Mɛmfisi.”
^ Hibuluiye, “I wa chɔnɔŋndo idii puŋ mi viam nda.”
^ Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
^ Hibuluiye, “beediiyo ɔɔ buloo.”
^ Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
^ Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
^ Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
^ Hibuluiye, “Nɛbukadɛlɛsa.” Nɛi cheleŋ le laŋ poonyiaa.
