Chɛnɛsi 16:1-16
-
Hakaa nda Isimɛɛ (1-16)
16 Seluai, lanɔɔ Ebilam ndoo vilul ndu ŋchuau le. Kɛ Seluai ndoo nɔ buɛi laandu Ichipiaŋnɔɔ diolaŋ aa Hakaa.
2 Le hei, mi Seluai dimul Ebilam aa: “A yandii, yaŋ ya nilaŋ! Chɛhowa kuuna ya chuauwa violɔɔ. Lelaŋ a yandii, hiviŋ buɛi ni laandoo kɔɔli. Naapum I cho chuauwa sɔla sanaa o ndu niŋ.” Okoŋ, mi Ebilam yaŋ Seluai nilaŋ.
3 Mɛɛ Ebilam chii wɔsilaŋ tɔ o lɛŋnde Kenaŋ ndeŋ niŋ, okoŋ kɔɔli, mi Seluai laa ndɔ chua buɛi ndɔ laandoo Hakaa, mbo ke Ebilam pɔnɔ ndɔ le mbo wa laa ndɔ.
4 Okoŋ, mi Ebilam hiviŋ Hakaa kɔɔli, nduyɛ mbo chua folioo.* Mɛɛ o sina maa o chua folioo, mbo kandu masanɔ ndɔɔ tɛɛndaŋndo.
5 Le hei, mi Seluai dimul Ebilam aa: “Num tosa ni mi buɛi ni laandoo wa ya mɔnɛi hei lueiyo. Ya chua ndu ni mi ke num,* kɛ mɛɛ o sina maa o cho a folioo, mbo kandu ya tɛɛndaŋndo. Maa Chɛhowa kiolu naa yamɛi tɛɛŋ naa num.”
6 Okoŋ mi Ebilam dimul Seluai aa: “Num nɔ kpaayaa buɛi numndo choo ni. Lelaŋ, nyɛ o nyɛ ŋ yiyaŋ pɛ maa o bɛnda, tosa.” Okoŋ mi Seluai tusi Hakaa siɔmbulaŋ, mbo nyaanuŋ.
7 Okoŋ kɔɔli, mi maalikɛinɔ Chɛhowa wo saaluŋ Hakaa o sooŋ mamɛŋndo o yondo pollo niŋ. Nduyɛ sooŋ mamɛŋndo hoo wa o nɛi kuɛ Suɔɔ wo.
8 Mi maalikɛinɔɔ nyuna ndu aa: “Hakaa, buɛi Seluai yo, kuɛɛnɛ ŋ chɛŋ yɛ, nduyɛ kuɛɛnɛ ŋ cho yɛ laŋ?” Mi Hakaa muli aa: “Masanɔ nuu Seluai ya cho nyaanɔŋndo ni.”
9 Okoŋ, mi maalikɛinɔ Chɛhowa wo dimul ndu aa: “Miiŋgu o masanɔ numndo lo, nduyɛ ma kɔ tusiŋ ndu o ba bɛŋgu.”
10 Mi maalikɛinɔ Chɛhowa wo dimi aa: “I cho tosa mi chuauwaa numnda* kui tau tau, wana nɔla niŋ nda chɔm te.”
11 Mi maalikɛinɔ Chɛhowa wo dimi vɛlɛ aa: “A folioo ŋ cho nuaa ni, nduyɛ a cho hunɔɔ poo violɔɔ ma ke ndu diolaŋ aa Isimɛɛ,* kanifuule Chɛhowa tuei chaŋ ŋ cho wo.
12 O cho simnɔŋ maa sofɛlɛ yondo. O cho hunɔɔ wana o wana simul, nduyɛ mi wana o wana simul ndu. O cho pɔmbuaa nduaa kpou faŋaŋ ikɛi, mbo kila chaltaŋ a ba ndɔ.”*
13 Okoŋ, mbo veelu diola Chɛhowa laŋ, wana wa suɛi o ndu lo wo. Mbo dimi aa: “Num cho Mɛlɛka cha wo ni.” Nduyɛ mbo dimi aa: “Baa Mɛlɛka cha ya wo pa ya che ni?”
14 Le sabu koŋ nda veelu sooŋ mamɛŋ koŋ ni aa, Biaa-laha-luai.* (Kedɛsi a Biluɛdi tɛɛŋ sooŋndo hoo cho ni.)
15 Okoŋ, mi Hakaa vilul Ebilam poo, nduyɛ mi Ebilam ke po Hakaa velu wo diolaŋ aa Isimɛɛ.
16 Ebilam wa wɔsilaŋ 86 mi Hakaa vilul ndu Isimɛɛ.
Tɛɛsiaalaŋ
^ Ɔɔ “yollo.”
^ Hibuluiye, “suaa ndu num o ibuŋ.”
^ Hibuluiye, “kulle.”
^ Diolaŋ ndaŋ la sim, “Mɛlɛka Tuei.”
^ Ɔɔ naapum, “yɛletulaaleŋ le wa ndu niŋ tɛɛŋ nda pɔmbuaa nduaa kpou.”
^ O sim, “Sooŋ Wana Cho Yoomu Mbo Cha Ya Wo.”
