Chɛnɛsi 18:1-33
18 Okoŋ kɔɔli, mi Chɛhowa fula Ebilaham o hɔl, naa o wa o yɔmii bɛnduii Mamilue ve tɛɛŋ nda. A teleŋ koŋ, o wa ichali o tɛndii ndɔɔ sondoo a paale kala kala leŋ.
2 Mɛɛ o chua hɔlla, mbo cha puaa a yaa isisi, nduyɛ tiŋ pɔmbɔ wa nda tɛɛŋ. Mɛɛ o che nda, mbo chaŋ a kiltaŋ naa o wa o tɛndii ndɔɔ sondoo wa, mbo kua nda lachi. Okoŋ, mbo kɔ baŋ wulaŋ lɛŋ.
3 Mbo dimi aa: “A yandii Chɛhowa,* te I cho pɛ wana sɔvɛ num o hɔl, mɛɛ hiaunuŋ buɛi numndo lende le.
4 A yandii, ŋ chuu wɔ nya mɛŋnde pɔmbɔ le peloŋ pulɔɔ. Okoŋ, mi la chal o yɔmndo bɛŋgu.
5 Mɛɛ nya hiŋ o ya buɛi nyaa lo yɛ, I chuu wɔ nya beediiyo* mi la de, le mi la sɔla yoomuaŋ.* Okoŋ, mi la kuɛ naa nya cho laŋ nda.” Ma dimi aa: “Bala tiɔɔŋ. Tosa mɛɛ ŋ dimi yɛ.”
6 Mi Ebilaham kua chɔ chɔ naa Sela chua o tɛndiiyo, mbo dimul ndu aa: “Tuu kpeyaŋ kɛndɛ kɛndɔɔ kambɛiyo le yaa* chɔ chɔ ma linda, okoŋ ma toosiaa beediiyo.”
7 Okoŋ kɔɔli, mi Ebilaham nyaanuŋ naa chɔluaa nduaa wa wa, mbo bii nau towa fɔŋndɔ kɛndɛ kɛndɔɔ. Mbo ke buɛi ndɔɔ, mbo kɔ toosiaa ndu chɔ chɔ.
8 Okoŋ mbo chua bɔtɛiyaŋ,* milikiiyaŋ,* a nau towa fɔŋndɔ o toosiaa koŋ ndo, mbo kɛsi nyɛdiaa koŋ nda lachi. Nduyɛ mɛɛ nda wa nyɛdiaa dioo o yɔmndo bɛŋgu, mi Ebilaham sim nda ikɛi.
9 Ma nyuna ndu aa: “Kuɛɛnɛ Sela laa num cho yɛ?” Mbo muli aa: “O cho o tɛndiiyo niŋ.”
10 Mi wana pilɛ o nda tɛɛŋ hiau lachi a suɛi aa: “Nyilasiaŋ a teleŋ waa nuaa, I cho miiŋgu naa num chua, nduyɛ Sela laa num cho poo violɔɔ.” Sela wa o dio tɛndiiyo sondoo poo amakɔɔ, mbo wa nilaŋ yaŋɔɔ.
11 Ebilaham nda Sela ndaa yuuwa niŋ tau. Sela ndoo hiou niŋ teleŋ vialaa.*
12 Okoŋ mi Sela kandu ndupila mamnɔŋndo. Mbo dimi aa: “I cho niŋ o yuuwɛi, nduyɛ masanɔ nuu bɛɛ cho niŋ o yuuwɛi. Baa ya nɔla vɛlɛ ni mi velu?”
13 Okoŋ mi Chɛhowa nyuna Ebilaham aa: “Le yɛɛnɛ Sela mam yɛ mbo dimi aa, ‘Baa ya cho niŋ hoo o yuuwɛiyo kpeekpei nɔla vɛlɛ ni mi velu?’
14 Yɛɛnɛ kpeekpei cho yɛ mi Chɛhowa bumba ndu tosa? Nyilasiaŋ a teleŋ waa nuaa I cho miiŋgu naa num chua, nduyɛ Sela cho poo violɔɔ.”
15 Kɛ mi Sela viinuŋ, mbo dimi aa, “I mem te!” Kanifuule siooŋnde wa ndu. Le hei, mi Mɛlɛka dimi aa: “A tonya, ma mam.”
16 Mɛɛ puaa haa chɛŋ le kɔŋndaŋ, mi Ebilaham kua nda liilaa. Nduyɛ mɛɛ nda siɛndi hɔlla, ma cha Sodɔm.
17 Mi Chɛhowa nyuna aa: “Baa I nɔ pa mi viŋ Ebilaham nyɛ ya kɛɛsiaa le tosaa wo?
18 Nduyɛ pɛŋ, chuauwaa mamaa Ebilaham nda cho kui ma simnuŋ kaale bɛndu, nduyɛ mi le nɔ kpaayaa tau tau. Kaalaŋ o chieeŋndo choo kpou, la cho hunɔɔ salaa sɔla* sanaa o ndu niŋ.
19 Ya hɛli ndu ni, le halikpeŋ mbo pɛɛku puaa nduaa a chuauwaa nduaa mamaa le ma tosa nyɛ cho o kɛndɔɔ, nduyɛ mbo wa sakpo ya Chɛhowa o hɔl lo. Hei cho tosa ni, mi ya Chɛhowa peelu buŋgɛi ya chuel Ebilaham nde.”
20 Okoŋ mi Chɛhowa dimi aa: “I tuei chaŋnda waŋnda cho a Sodɔm vɛlɛ a Komoolua okɔɔ laŋ. Nduyɛ, hakila ndalaŋ la hiu waa.
21 I cho tolɔɔ mi kɔ chɔ te chaŋnda ya cho tueiyɔɔ a nda okɔɔ laŋ la cho pɛ tonya. Te o cho lende le, I cho sina.”
22 Okoŋ, mi puaa mal ma kua ba Sodɔm ndo, kɛ mi Chɛhowa lo latulu a Ebilaham.
23 Mi Ebilaham sɔɔŋguu Mɛlɛka ikɛi, mbo nyuna ndu aa: “Baa ma tɛɛmbuu pa wana cho sakpo wo a wana dɛnɛ wɔɔŋndo latulu?
24 Te o yɔŋ yɛ mi wanaa cho sakpo wa ŋwaŋ 50 wa o chiee koŋ niŋ? Baa ma tɛɛmbuu nda, a mel chiee koŋ haki le ŋwaŋ 50 kaŋ te?
25 Pesiŋ bɛɛ a tosa suɛi waa nuaa, le wana cho sakpo wo diyɔɔ a wana dɛnɛ wɔɔŋndo latulu, okoŋ mi wana cho sakpo wo a wana dɛnɛ wɔɔŋndo sɔla paawa pilɔɔ le! Pesiŋ bɛɛ a tosa keŋ te. Baa Wana Kialaa Ŋyamaa le chieeŋndo kpou tosa nyɛ cho o kɛndɔɔ wo le?”
26 Okoŋ mi Chɛhowa dimi aa: “Te I saaluŋ pɛ wanaa cho sakpo wa ŋwaŋ 50 o Sodɔm niŋ, I cho chiee koŋ kpou hakioo malɔɔ le sabu ndaa.”
27 Mi Ebilaham dimi vɛlɛ aa: “Mi che bɛɛ chundoo a pultaŋ ya cho ni, kɛ a yandii Chɛhowa, chɛl la vɛlɛ mi soo o numndo.
28 Kɛ te o yɔŋ yɛ mi wanaa ŋuɛɛnu faŋaŋ o ŋwaŋ 50 cho sakpo wa choo? Baa ma tɛɛmbuu pa chioo kpou le wanaa ŋuɛɛnuaa kaŋ?” Mi Mɛlɛka muli aa: “Te I saaluŋ pɛ ŋwaŋ 45, I tɛɛmbuu ndu le.”
29 Kɛ mi Ebilaham suaa vɛlɛ naa Mɛlɛka chua, mbo nyuna ndu aa: “Kɛ te o yɔŋ yɛ maa ŋwaŋ 40 ŋ saaluŋ loŋ ni?” Mi Mɛlɛka muli aa: “Le ŋwaŋ 40 kaŋ, I tɛɛmbuu ndu le.”
30 Kɛ mbo dimi vɛlɛ aa: “A yandii Chɛhowa, duaunuŋ tumbe a ya le, kɛ chɛl la mi hiou lachi a suɛi. Te o yɔŋ yɛ maa ŋwaŋ 30 ŋ saaluŋ loŋ ni?” Mi Mɛlɛka muli aa: “Le ŋwaŋ 30 kaŋ, I tɛɛmbuu ndu le.”
31 Kɛ mbo dimi vɛlɛ aa: “A yandii Chɛhowa, chɛl la mi soo vɛlɛ o numndo. Te o yɔŋ yɛ maa ŋwaŋ 20 ŋ saaluŋ loŋ ni?” Mi Mɛlɛka muli aa: “Le ŋwaŋ 20 kaŋ, I tɛɛmbuu ndu le.”
32 O mɛɛlulaŋ kpɔŋ, mi Ebilaham dimi aa: “A yandii Chɛhowa, duaunuŋ tumbe a ya le, kɛ chɛl la mi soo niŋ lepilɛ kpe. Te o yɔŋ yɛ maa ŋwaŋ tɔ kinɛi ŋ saaluŋ loŋ ni?” Mi Mɛlɛka muli aa: “Te I saaluŋ pɛ ŋwaŋ tɔ, I tɛɛmbuu ndu le.”
33 Mɛɛ Chɛhowa chii suukaŋndo nda Ebilaham, mbo kuaŋnuŋ, okoŋ mi Ebilaham miiŋguŋ o ndu lo.
Tɛɛsiaalaŋ
^ O maalikɛinɔɔ lo Ebilaham wa suɛi nanuŋ ni. Mbo veelu ndu aa “Chɛhowa” kanifuule Chɛhowa vem maalikɛinɔ koŋ ni.
^ Ɔɔ “buloo.”
^ Hibuluiye, “mi la simul kɔl.”
^ Hibuluiye, “siaa le yaa.” Tofa Tɛɛsiaa B14.
^ Ɔɔ “bɛɛloo.”
^ Ɔɔ “nɔnɔɔ.”
^ Hibuluiye, “nɛi waŋ laanduaa le Sela ndoo kiolu niŋ.”
^ Ɔɔ “salaa sɔla le ndapila.”
