Chɛnɛsi 25:1-34
25 Okoŋ kɔɔli, mi Ebilaham chua lanɔ cheleŋ, diolaŋ aa Kɛtulua.
2 Nduyɛ mi Kɛtulua vilul ndu Similuaŋ, Chɔkisaŋ, Midaŋ, Midiaŋ, Isibaki, a Suaa.
3 Mi Chɔkisaŋ vialu Siɛba nda Dɛdaŋ.
Puaa Dɛdaŋ velu wa cho haa ni: Asiuluim, Lɛtusim, a Lɛyumim.
4 Puaa Midiaŋ velu wa cho haa ni: Efa, Ɛfa, Hanɔki, Abaida, a Ɛlidaa.
Haa kpou puaa mamaa Kɛtulua wa nda cho ni.
5 Okoŋ kɔɔli, mi Ebilaham ke Aase nyɛ o nyɛ ndoo nɔ.
6 Kɛ mbo chua nyɔɔŋ ŋtiŋ, mbo ke puaa laandaa nduaa pɔmbuaa vilul ndu wa. Ebilaham wa yoomu mbo faŋa nda Aase po ndɔ ikɛi, mbo yɔŋ nda o lɛŋndeŋ ba paaleŋ le chaŋ ndo.
7 Wɔsilaŋ 175 Ebilaham chii yoomu ni.
8 Ebilaham ndoo yuuwa niŋ kudɛɛ, nduyɛ mbo tuɛi yoomu ndɔɔ yeela. Okoŋ kɔɔli, mbo chua yoomuma ndɔma mɛɛlaŋ, mbo wu. Okoŋ, ma kumbu ndu maa finyaa nduaa mamaa.
9 Mi puaa nduaa, Aase nda Isimɛɛ kɔ kumbu ndu o buuloo niŋ Makipila o yondo Ɛfulɔŋ ndo niŋ, po Sohaa wo, Hitaitiinɔɔ. Nduyɛ, Mamilue ikɛi yondoo hoo cho ni.
10 Yondoo hoo Ebilaham ndoo pendu puaa Hɛɛti wa o ba ni. Nduyɛ, loŋ nda kumbu Ebilaham nda Sela laa ndɔ ni.
11 Mɛɛ Ebilaham vi, mi Mɛlɛka hiau lachi a Aase po ndɔ salaa dɔwɔɔ. Nduyɛ, Biaa-laha-luai ikɛi Aase wa ichali ni.
12 Bundɛi a Isimɛɛ okɔɔ cho hei ni, po Hakaa, chua Ichipiaŋnɔɔ vilul Ebilaham ndo. Nduyɛ, buɛi Sela wo o wa ni.
13 Diola puaa Isimɛɛ velu wa, a yuŋgula ndalaŋ kpɛ kpɛ la cho laŋ ni: Po ndɔ tasoo diolaŋ Nebayɔti. Mbo vialu vɛlɛ Kidaa, Adibɛɛ, Mibisam,
14 Misima, Dumaa, Masa,
15 Hadadi, Tɛma, Chɛtɔɔ, Nafisi, a Kɛdɛmaa.
16 Puaa Isimɛɛ wa cho haa ni, nduyɛ bolii layuŋguei 12 nda cho o buŋgaŋ ndaŋ niŋ ni. Sɔndɔkɔlta ndalaŋ a chieeŋ ndaŋ kpou, diola ndalaŋ la cho laŋ choo ni.
17 Wɔsilaŋ 137 Isimɛɛ chii yoomu ni. Okoŋ kɔɔli, mbo chua yoomuma ndɔma mɛɛlaŋ, mbo wu. Okoŋ, ma kumbu ndu maa finyaa nduaa mamaa.
18 Ma kɔ kila chaltaŋ chɔŋ Havila haaa kɔ Asiiliaa. Suɔɔ ikɛi Havila cho ni, nduyɛ mi Suɔɔ bɛɛ wa Ichipi ikɛi. Mbo kila chaltaŋ pɔmbuaa nduaa kpou ikɛi.*
19 Bundɛi a Aase, po Ebilaham ndo okɔɔ cho hei ni.
Ebilaham velu Aase ni.
20 Aase wa wɔsilaŋ 40 mbo chua Lubeka, chua Bɛtuɛɛ wo o nɔɔ niŋ. Nduyɛ Bɛtuɛɛ yɛ, Aluameyaŋnɔɔ o wa ni, fulaa Padaŋ-aluam. Lubeka, yema ndɔ wa Lebaŋ ni. Ndu bɛɛ Aluameyaŋnɔɔ o wa ni.
21 Mi Aase hiau lachi a Chɛhowa nyɔɔloo le Lubeka laa ndɔ, kanifuule ndoo vilu le. Okoŋ mi Chɛhowa muli piɛile ndɔleŋ, nduyɛ mbo tosa mi Lubeka laa ndɔ chua folioo.*
22 Nduyɛ mi puaa ŋiɔɔŋaa wa ndu o dembe wa kandu sɔŋgɔɔ. Okoŋ mbo dimi aa: “Te o yɔŋ pɛ maa nuaa i cho ni, mɛɛ le sabu yɛɛ ya cho yɛ yoomu?” Le hei, mbo nyuna Chɛhowa a ndi okɔɔ.
23 Mi Chɛhowa dimul ndu aa: “Kaalaŋ la tiɔɔŋ la cho num o dembe ni. Nduyɛ, waŋnda a ŋiɔɔŋ cho num fula o dembe, okoŋ ma piɔuviaŋ. Kaaleŋ lepilɛ le cho hiouwɔɔ lepilɛ leŋ kpaayaa, nduyɛ po num tasoo cho wa pɔmbɔ ndɔ o ba bɛŋgu.”
24 Mɛɛ teleŋ ndɔ vialaa fuuluu, pɛnduaa wa ndu o dembe ni.
25 Po tase o velu wo wa o siaŋa, nduyɛ yiiŋnde wa ndu i tiuwaa lekɔɔ silɔ, maa doma nda toosiaa a yiiŋii visioo wo. Okoŋ ma ke ndu diolaŋ aa Iisɔ.*
26 Mɛɛ nda wa pɔmbɔ ndɔ violɔɔ, mbo saa Iisɔ tɔndii kɔɔliei. Okoŋ mbo ke ndu diolaŋ aa Chekɔpu.* Aase wa wɔsilaŋ 60 mi Lubeka vialu nda.
27 Mɛɛ nda sul, mi Iisɔ simnuŋ doosunɔ kɛndɛ kɛndɛ, wana ndoo kaala yondoo wo. Kɛ Chekɔpu ndu, wana tɔɔyaŋ ve choo le wo o wa ni. Nduyɛ, teleŋ o teleŋ o tɛndiilaŋ niŋ o waŋnuŋ ni.
28 Aase ndoo kaala Iisɔ le nyɛmahilu ndoo chuu ndu mbo dia wo. Kɛ Lubeka ndu, Chekɔpu ndoo kaala ni.
29 Paale pilɛ, Chekɔpu wa kawuŋ lindaŋ yauwo, mi Iisɔ fula yondoo niŋ o saŋgɛiyo yɔkɔɔ.
30 Okoŋ mi Iisɔ dimul Chekɔpu aa: “Ke ya kawuŋ siaŋaŋ ŋ cho muŋ yauwo woŋ chɔ chɔ, kanifuule yiaaŋ ma cho ya bɔɔ nɛiyo!”* Le saboo hoo nda ke ndu diolaŋ ni aa Idɔm.*
31 Kɛ mi Chekɔpu dimul ndu aa: “Pisi ya fɛlɛŋ di ŋ nɔ maa po tase wo o ba!”
32 Mi Iisɔ dimi vɛlɛ aa: “Piɔmndo ya cho nuaa ni! Tɔnɔ yɛɛ kpeekpei ya cho yɛ sɔla o di ya nɔ maa po tase wo niŋ?”
33 Mi Chekɔpu dimi vɛlɛ aa: “Bala tiɔɔŋ, kɛ mɛnaŋ ndɔ fɛlɛŋ!” Okoŋ mbo mɛnaŋ, nduyɛ mbo pisi di o nɔ maa po tase wo Chekɔpu o ba.
34 Okoŋ kɔɔli, mi Chekɔpu ke Iisɔ beediiyo* a kawuŋ lindaŋ, mbo dia nduyɛ mbo kol. Mɛɛ o chii dio, mbo chaŋ mbo kuaŋnuŋ. Mɛɛ nuaa Iisɔ looku di ndoo nɔ maa po tase wo chua nyɛ fondo fuu ni.
Tɛɛsiaalaŋ
^ Ɔɔ naapum, “yɛletulaaleŋ le wa ndu niŋ tɛɛŋ nda pɔmbuaa nduaa kpou.”
^ Ɔɔ “yollo.”
^ Diolaŋ ndaŋ la sim, “Wana iYiiŋndo.”
^ Diolaŋ ndaŋ la sim, “Wana Saa Tɔndii Kɔɔlieiyo ɔɔ Wana Chua Foofo Pilaa a Kaka Wo.”
^ Ɔɔ “I cho o saŋgɛi yɔkɔɔ.”
^ Diolaŋ ndaŋ la sim, “Nyɛ Siaŋaa.”
^ Ɔɔ “buloo.”
