Chɛnɛsi 29:1-35
29 Okoŋ kɔɔli, mi Chekɔpu hiau lachi a kɔlaŋ. Mbo kua o wanaa wa o lɛŋndeŋ Ba Paaleŋ Le Chaŋ Ndo wa lo.
2 Mɛɛ o fuuluu loŋ, mbo cha sooŋ mamɛŋndo o pollo niŋ. Nduyɛ, saa wa ihini ikɛi kundalaŋ la yaa, kanifuule loŋ ndaa ke saa mɛŋndaŋ ni le ma kol. Nduyɛ, pou bɛndoo wa o kɛsiaa o sooŋ koŋ sondoo.
3 Te saa kpou ndaa chuuŋgiaŋ pɛ naapilɛ, a nyindu pou wa o sooŋndo sondoo wo, a ke saa mɛŋndaŋ a kol. Okoŋ kɔɔli, a miŋgi pouwo nyindɔɔ o sooŋndo sondoo.
4 Mi Chekɔpu nyuna nda aa: “Chaaŋaa niaa, kuɛɛnɛ nya fula yɛ?” Ma muli aa: “Haluaŋ naŋ fula ni.”
5 Mbo nyuna nda aa: “La sina pa Lebaŋ, po mama Nahɔɔ wo?” Ma muli aa: “Ei, ŋ sina ndu.”
6 Mbo nyuna nda vɛlɛ aa: “Baa o cho pa kɛndɛ?” Ma muli aa: “Ei, o cho kɛndɛ. Nuawɔ pɛŋ Luechɛɛ chua ndɔ hunɔɔ a saa!”
7 Mbo dimul nda aa: “Paaleŋ le cho wɔ tau. Nduyɛ, teleŋndo fuuluu wɔ le chɔluaa chuuŋgiaa naapilɛ le. La ke nda mɛŋndaŋ, mi la mal nda ma kuɛ diolaŋ.”
8 Kɛ ma dimul ndu aa: “Ŋ nɔ di miŋ tosa keŋ te. Mɛɛ mi chɔluaa chuuŋgiaŋ naapilɛ kpou, malaŋ naŋ faŋa pouwo o sooŋndo sondoo, miŋ ke nda mɛŋndaŋ ma kol.”
9 Chekɔpu lo suukaŋndo a nda, mi Luechɛɛ huŋ a saa finya ndɔ wa. Nduyɛ wana mandaa lasaa Luechɛɛ wa ni.
10 Mɛɛ Chekɔpu che Luechɛɛ, chua Lebaŋ bom ndɔ wo a saa finya ndɔ wa, o lepilɛ niŋ kpe mbo kɔ nyindu pou wa o sooŋ mamɛŋndo sondoo wo, mbo ke saa Lebaŋ nda mɛŋndaŋ ma kol.
11 Okoŋ mi Chekɔpu sɔsa Luechɛɛ kuuwo, mbo chaŋ tau nduyɛ mbo tusi mɛmiaŋ kpasu kpasu.
12 Mi Chekɔpu kandu Luechɛɛ tɛɛsiallo maa wanayɛi finya ndɔ ve o cho ni, nduyɛ maa Lubeka velu ndu ni. Okoŋ mi Luechɛɛ nyaanuŋ, mbo kɔ dounuŋ finya ndɔ kona.
13 Dimioo nuaa Lebaŋ tuei yooŋgoo a Chekɔpu po yema ndɔ wo okɔɔ, mbo mal a kiltaŋ mbo kua naa ndu chua. Okoŋ mbo demul ndu, mbo sɔsa ndu kuuwo, nduyɛ mbo kua a ndu o ndu lo chiɛiniŋ. Mi Chekɔpu kandu Lebaŋ konaa dounɔŋndo a nyɛ o nyɛ yɔŋnuŋ ndu okɔɔ.
14 Mi Lebaŋ dimul Chekɔpu aa: “Wanayɛi nii kpeekpei ŋ cho ni.”* Nduyɛ le paŋgei kpulukuu Chekɔpu wa ndu o bɛŋgu choo.
15 Mi Lebaŋ dimul vɛlɛ Chekɔpu aa: “Le mɛɛ ŋ cho wanayɛi nii yɛ, o bɛnda ma tosal la wali fondoo le. Dimul la, vɛɛnɛ ya paawa* yɛ num?”
16 Lebaŋ ndoo nɔ chuaa laanduaa a ŋiɔɔŋ. Kaasoŋnɔɔ ndoo nɔ diolaŋ ni aa Liya, nduyɛ pɔmbɔ ndɔ wa Luechɛɛ ni.
17 Liya ndoo niŋ lapi le.* Kɛ Luechɛɛ ndu, naŋɔɔ pila ndoo naŋ ni. Wanaa che ndu dɔɔ pɛ nyɔɔ hɛnaŋ num.
18 Chekɔpu ndoo nɔ niŋ kaala Luechɛɛ wo o kɔl. Le hei, mbo dimi aa: “I chɛl mi tosal num wallo le wɔsilaŋ la ŋɔmmɛu le Luechɛɛ chua num.”
19 Okoŋ mi Lebaŋ dimi aa: “Yɔŋii ya ke ndu wana pɔnɔ cheleŋ yɛ, o bɛnda mi ke num ndu. Wa ya o bɛŋgu choo.”
20 Mi Chekɔpu tosa wallo wɔsilaŋ la ŋɔmmɛu le Luechɛɛ. Kɛ le mɛɛ ndoo kaala ndu yɛ, wɔsila laŋ la wa ko ndu o hɔl maa palɛi biŋgi.
21 Okoŋ mi Chekɔpu dimul Lebaŋ aa: “Ke ya laa nuu mi hiviŋ ndu kɔɔli, kanifuule teleŋ naŋ chɛlaŋ choo wo chuu.”
22 Le hei, mi Lebaŋ chuuŋgiaa wanaa wa loŋ nda kpou, mbo tosa dunyɛi.
23 Kɛ ichɔl koŋ, mbo chua Liya chua ndɔ mbo you Chekɔpu le mbo hiviŋ ndu kɔɔli.
24 Okoŋ kɔɔli, mi Lebaŋ chua vɛlɛ Silipa buɛi ndɔ laandoo mbo ke Liya chua ndɔ, le mbo wa buɛi ndɔɔ.
25 Idiiyo, mi Chekɔpu saaluŋ maa Liya o hiviŋ kɔɔli ni. Mbo nyuna Lebaŋ aa: “Le yɛɛnɛ ŋ tosallɛ ya hei? Baa o cho le Luechɛɛ le ya tosal num wallo le? Le yɛɛnɛ ŋ hui yɛ ya?”
26 Mi Lebaŋ mulul ndu aa: “O naamu naa niŋ, ŋ kɛsi chuaambɔɔ o nɔɔ bɛ ndɔ tase le.
27 La siou niko lɔɔ hoo nya chuaa hoo latulu, mi ke num chua nuu o pilɔɔ ma tosal la vɛlɛ wallo le wɔsilaŋ la ŋɔmmɛu.”
28 Mi Chekɔpu chɛl, nduyɛ mbo siou lɔɔ koŋ latulu nda Liya. Okoŋ kɔɔli, mi Lebaŋ ke ndu vɛlɛ Luechɛɛ chua ndɔ le mbo wa laa ndɔ.
29 Nduyɛ, mi Lebaŋ chua buɛi ndɔ laandoo Bilihaa, mbo ke Luechɛɛ chua ndɔ le mbo wa buɛi ndɔɔ.
30 Okoŋ mi Chekɔpu hiviŋ Luechɛɛ kɔɔli, nduyɛ mbo kaala ndu tau mbo hiau Liya. Mi Chekɔpu tosal vɛlɛ Lebaŋ wallo le wɔsilaŋ la ŋɔmmɛu.
31 Mɛɛ Chɛhowa che maa Chekɔpu kaala Liya le,* mbo tosa mi Liya chua folioo.* Kɛ Luechɛɛ ndu, ndoo vilu le.
32 Mi Liya chua folioo* mbo vialu poo. Mbo ke ndu diolaŋ aa Lubɛŋ.* Mbo dimi aa: “Chɛhowa che kɔl ni tambɛiyo. Nduyɛ suŋ suŋ niŋ, pɔnɔ nuu cho ya kandɔɔ kaalaa chɔmndo.”
33 Mi Liya chua vɛlɛ folioo mbo vialu poo. Mbo ke ndu diolaŋ aa Simiɔŋ.* Mbo dimi aa: “Chɛhowa yaŋ ya nilaŋ, le mɛɛ pɔnɔ nuu kaala ya le yɛ. Lelaŋ o ke ya vɛlɛ hoo ni.”
34 Mi Liya chua vɛlɛ folioo mbo vialu poo. Mbo ke ndu diolaŋ aa Livai.* Mbo dimi aa: “Suŋ suŋ niŋ, pɔnɔ nuu cho ya holnɔŋ, kanifuule I vilul ndu puaa a yaa.”
35 Okoŋ kɔɔli, mbo chua vɛlɛ folioo mbo vialu poo. Mbo ke ndu diolaŋ aa Chuda.* Mbo dimi aa: “O laŋ niŋ, I cho Chɛhowa saŋgala.” Okoŋ mbo pɛŋgi violɔɔ.
Tɛɛsiaalaŋ
^ Ɔɔ “kooma piliaŋ naŋ cho ni.”
^ Ɔɔ “sala.”
^ Hibuluiye, “Hɔlta Liya laŋ la wa tafulaa.”
^ Hibuluiye, “tul ndu leyɛ.”
^ Ɔɔ “yollo.” Hibuluiye, “mbo kumbi ndu demboo.”
^ Ɔɔ “yollo.”
^ Diolaŋ ndaŋ la sim, “Tofawɔ Poo.”
^ Diolaŋ ndaŋ la sim, “Tueiyɔɔ.”
^ Diolaŋ ndaŋ la sim, “Mɔɔsaŋndo.”
^ Diolaŋ ndaŋ la sim, “Saŋgalaa ɔɔ Nyɛ Cho le Saŋgalaa Wo.”
