Chɛnɛsi 30:1-43
30 Mɛɛ Luechɛɛ che maa o cho Chekɔpu chua vilul te, mbo kandu Liya bɛ ndɔ paŋalaa. Okoŋ mbo dimul Chekɔpu aa: “Ke ya chuauwa, te o cho koŋ te, I cho wu.”
2 Le hei, mi Chekɔpu duaunuŋ tumbe o kala kala a Luechɛɛ. Mbo nyuna ndu aa: “Baa ya cho Mɛlɛka ni le mi kuuna num chuauwa violɔɔ?”
3 Okoŋ mi Luechɛɛ dimul ndu aa: “Mɛɛ, a che buɛi ni laandoo Bilihaa. Hiviŋ ndu kɔɔli, le halikpeŋ mbo vilul la chuauwa, okoŋ mi ya bɛɛ sɔla chuauwa sanaa o ndu niŋ.”
4 Mi Luechɛɛ ke Chekɔpu Bilihaa le mbo wa laa ndɔ, nduyɛ mbo hiviŋ ndu kɔɔli.
5 Mi Bilihaa chua folioo,* okoŋ mbo vilul Chekɔpu poo.
6 Mi Luechɛɛ dimi aa: “Mɛlɛka suŋgu le ya mbo yaŋ piɛile nileŋ nilaŋ, nduyɛ mbo ke ya poo.” Le sabu koŋ o ke ndu diolaŋ ni aa Daŋ.*
7 Mi Bilihaa, buɛi Luechɛɛ wo chua vɛlɛ folioo, mbo vilul Chekɔpu po diiŋ ndɔɔ.
8 Mi Luechɛɛ dimi aa: “I chiŋalaŋ bɛ nuu chiŋalaŋndo pila a sɔŋgɔɔ, nduyɛ mi yam ndu!” Okoŋ mbo ke ndu diolaŋ aa Nafitalii.*
9 Mɛɛ Liya che maa o pɛŋgi chuauwa violɔɔ, mbo chua buɛi ndɔɔ Silipa mbo ke Chekɔpu le mbo wa laa ndɔ.
10 Mi Silipa, buɛi Liya wo vilul Chekɔpu poo.
11 Mi Liya dimi aa: “Nuawɔ se dɛnɛ kɛndɛ bɛndu!” Okoŋ mbo ke ndu diolaŋ aa Kaadi.*
12 Okoŋ kɔɔli, mi Silipa buɛi Liya wo vilul Chekɔpu po diiŋ ndɔɔ.
13 Mi Liya dimi aa: “I cho bɔɔ a kɔl kɛndɛ! Kanifuule, waŋ laanduaa cho dimi maa I cho a kɔl kɛndɛ.” Okoŋ mbo ke ndu diolaŋ aa Asia.*
14 Lubɛŋ lo balɔɔ yondoo niŋ a boondii nda kuau witiiyoŋ nde, mbo saaluŋ manduluiyaŋ* o pollo niŋ, mbo chuu Liya kala ndɔ. Okoŋ mi Luechɛɛ dimul Liya aa: “A yandii, ke ya manduluima po numndo chuu num ndaŋ ma tiŋ.”
15 Mi Liya nyuna ndu aa: “Baa a hini wɔ kɔl a pɔnɔ ni ŋ puu ya o ba wo le? Baa manduluima po nuu ŋ yeema vɛlɛ ni ma puu ya o ba?” Mi Luechɛɛ dimi aa: “Bala tiɔɔŋ. Mɛɛ la kɔ lɔl chuɛllɛŋ nya Chekɔpu sɔŋgɔ manduluima po numndo.”
16 Mɛɛ Chekɔpu wa fulaa o pollo niŋ a paale delaaleŋ, mi Liya kua ndu lachi, mbo dimul ndu aa: “Naa num cho lɔl chuɛllɛŋ ni, kanifuule I paawa* Luechɛɛ a manduluima po nuu le miŋ kɔ lɔl chuɛllɛŋ naa num.” Ichɔl koŋ, mi Chekɔpu wa a Liya.
17 Mi Mɛlɛka muli piɛile Liya leŋ, okoŋ mbo chua folioo, mbo vilul Chekɔpu po ŋuɛɛnu ndɔɔ.
18 Mi Liya dimi aa: “Mɛlɛka ke ya paawa nuu, kanifuule I chua buɛi nuu mi yɔŋgu pɔnɔ nuu.” Okoŋ mbo ke ndu diolaŋ aa Isaka.*
19 Mi Liya chua vɛlɛ folioo, mbo vilul Chekɔpu po ŋɔmpum ndɔɔ.
20 Okoŋ mi Liya dimi aa: “Mɛlɛka dɔu ya bɔɔ sala, a tonya, o dɔu ya bɔɔ sala. Suŋ suŋ niŋ, pɔnɔ nuu cho ya hɔlla mulul, kanifuule I vilul ndu puaa a ŋɔmpum.” Okoŋ mbo ke ndu diolaŋ aa Sɛbulɔŋ.*
21 Okoŋ kɔɔli, mbo vialu wana lanɔɔ, mbo ke ndu diolaŋ aa Daina.
22 O mɛɛlulaŋ kpɔŋ, mi Mɛlɛka mulul Luechɛɛ hɔlla, nduyɛ mbo tuɛi piɛile ndɔleŋ. Mbo tosa mbo chua folioo.*
23 Mɛɛ Luechɛɛ chua folioo, mbo vialu poo. Mbo dimi aa: “Mɛlɛka faŋa ya siɔmbulaŋ o hɔl!”
24 Mbo ke ndu diolaŋ aa Choosɛ.* Mbo dimi aa: “Chɛhowa chɔɔlu ya vɛlɛ po cheleŋ.”
25 Mɛɛ Luechɛɛ velu Choosɛ, mi Chekɔpu dimul Lebaŋ aa: “Mal la niko I miiŋguŋ o lɛŋnde nileŋ niŋ.
26 Ke ya laandaa niaa, a chuauwaa niaa ya tosal num wallo le nda wa mi kuɛŋnuŋ. Kanifuule, numpila sina mɛɛ kpɛ ya tosal num wallo yɛ.”
27 Okoŋ mi Lebaŋ dimul ndu aa: “A yandii, te I cho pɛ wana sɔvɛ num o hɔl, mɛɛ lo ya o bɛŋgu choo. Kanifuule, I che niŋ kpendekele* maa Chɛhowa cho ya salaa dɔwɔɔ sanaa a num.”
28 Mbo dimi vɛlɛ aa: “Chɔm ya mɛɛ ya nɔ le num paawaa yɛ, okoŋ mi paawa num.”
29 Mi Chekɔpu dimul ndu aa: “Numpila sina mɛɛ kpɛ ya tosal num wallo yɛ, nduyɛ a mɛɛ chɔluaa numnda kui ya o ba yɛ.
30 Tuupa mi huŋ num o bɛŋgu choo, num oo nɔ chɔluaa bɔɔ le. Kɛ suŋ suŋ niŋ, chɔluaa numnda kui tau tau, nduyɛ Chɛhowa dɔu num sala chɔŋ a teleŋ ya hiŋ naŋnuŋ ndo. Mɛɛ boondii kuɛɛ ya cho yɛ nyɛ tosa le yuŋgu nuu?”
31 Okoŋ, mi Lebaŋ nyuna ndu aa: “Yɛɛnɛ ya ke yɛ num?” Mi Chekɔpu muli aa: “A nɔ ma ke ya nyɛ o nyɛ le! Kɛ nyɔɔ o pilɛ kpe ya yeema num ni ma tosal la, okoŋ mi hiou lachi a chɔluaa numnda mandaa.
32 I cho hau balɔɔ chɔluaa numnda tɛɛŋ kpou. Saa kɛ kɛ cho o ponyɛi o saa laanduaa tɛɛŋ, a saa kɛ kɛ cho tiŋ o tiŋi o saa fɔŋnduaa piaanduaa tɛɛŋ, vɛlɛ a chuiŋ laandu kɛ kɛ cho o ponyɛi, hɛli nda ma dii nda naapilɛ. Chɔŋ hau kɔ kɛ, nda cho wa paawa nuu ni.
33 Nduyɛ te a hiŋ pɛ o chilaŋ niŋ le chɔluaa ŋ paawa ya wa mɛɛndaŋndo, a cho sina a sandii nii okɔɔ. Saa niaa a chuiŋaa niaa kpou, te a saaluŋ pɛ o kɛ kɛ mbo ve o ponyɛi ɔɔ mbo wa tiŋ o tiŋi le, mɛɛ viileŋ ya tosa ni.”
34 Mi Lebaŋ dimi aa: “Keŋ bɛnda bɔɔ! I chɛl nyɛ ŋ dimi wo.”
35 O paale leŋ choo, mi Lebaŋ hɛli chuiŋaa piaanduaa kɛ kɛ ndaa nɔ tindiaŋ a chuiŋaa laanduaa wa a ponyɛiya, vɛlɛ a saa fɔŋnduaa wa tiŋ a tiŋi, nduyɛ ma nɔ poŋgaŋ humboŋ nda kpou, mbo ke puaa nduaa le ma manda.
36 Okoŋ kɔɔli, mi Lebaŋ faŋa chɔluaa kaŋ Chekɔpu ikɛi, mbo kuaŋnuŋ a nda landaŋ le kɔla tiŋ palɛi yaa. Nduyɛ chɔluaa lo loŋ le Lebaŋ nda, mi Chekɔpu koma lo nda mandaa.
37 Okoŋ, mi Chekɔpu kialu lɛuwuŋ yɔm sitoluɛɛ wo, yɔm amɔŋ ndo, a yɔm pilanɛɛ wo, mbo peeŋguu ndi o fondaŋndaŋ lapum, nduyɛ mi buŋgaŋ humboŋ fula wakpa.
38 Mbo kɛsi lɛuwuŋ yɔmii o peeŋguu keŋ nde o fondaŋnda nda dou chɔluaa mɛŋndaŋ ndaŋ lachi. Nduyɛ o yɔmii keŋ lachi chɔluaa ndaa huŋ helɔɔ ni, a boondii nda huŋ kolɔɔ ve.
39 Te chɔluaa haa ndaa hel pɛ lɛuwuŋ yɔmnde hei lachi, a kom chuauwaa nɔ tindiaŋ nda, a ponyɛiya, a chuauwaa nɔ poŋgaŋ nda.
40 Okoŋ mi Chekɔpu piɔu saa fɔŋnduaa. Mbo chua chɔluaa nɔ tindiaŋ nda, a chɔluaa wa tiŋ a tiŋi wa kpou, mbo kɛsi nda chɔluaa Lebaŋ nda lachi. Okoŋ kɔɔli, mbo piɔu chɔluaa nduaa tɛɛŋ a chɔluaa Lebaŋ nda, yɔŋii nda muuliaŋ.
41 Teleŋ o teleŋ chɔluaa chelulɛiya ndaa wa pɛ helɔɔ, Chekɔpu chua lɛuwuŋ yɔmii o toosiaa keŋ nde, o kɛsi nda lachi o fondaŋnda ndaa dou chɔluaa mɛŋndaŋ ndaŋ, le ma wa yɔmii keŋ tofaa te a wa pɛ helɔɔ.
42 Kɛ te chɔluaa nyawɛiya ndaa wa pɛ helɔɔ, Chekɔpu ndoo kɛsi lɛuwuŋ yɔmii keŋ loŋ te. Le hei, chɔluaa nyawɛiya kinɛi, Lebaŋ ndoo nɔ nda ni. Kɛ a chelulɛiya kpou, Chekɔpu ndoo nɔ nda ni.
43 Nduyɛ, mi Chekɔpu sul sullo pila. Mbo sɔla chɔluaa tau tau, buɛiyaa piaanduaa a buɛiyaa laanduaa, nyɔɔmiaa, vɛlɛ a sofɛliaa.
Tɛɛsiaalaŋ
^ Ɔɔ “yollo.”
^ Diolaŋ ndaŋ la sim, “Yamɛi.”
^ Diolaŋ ndaŋ la sim, “Sɔŋgɔla Nilaŋ.”
^ Diolaŋ ndaŋ la sim, “Dɛnɛ Kɛndɔɔ.”
^ Diolaŋ ndaŋ la sim, “Kɔl Kɛndɔɔ.”
^ Komɔɔ yɔmndo hoo waŋ laanduaa ndaa dia ni, kanifuule ndaa yiyaŋ maa te a de ndu pɛ, o mala nda a chua folioo.
^ Ɔɔ “sala.”
^ Diolaŋ ndaŋ la sim, “Ndu Cho Paawaa Ni.”
^ Diolaŋ ndaŋ la sim, “Hɔlla Mulioo.”
^ Hibuluiye, “mi Mɛlɛka tuɛi piɛile ndɔleŋ, nduyɛ mbo kumbi ndu demboo.”
^ Veelu biŋgioo le Chosifiya. Diolaŋ ndaŋ la sim, “Maa Chɛhowa Chɔɔlu.”
^ Hibuluiye, “vem yawaa.”
