Chɛnɛsi 4:1-26
4 Okoŋ mi Adam wa a Ifi laa ndɔ, mbo chua folioo,* mbo vialu Keŋ. Mɛɛ o velu ndu, mbo dimi aa: “Chɛhowa mala ya mi vialu wana pɔnɔɔ.”
2 Okoŋ kɔɔli, mbo vialu pɔmbɔ ndɔ, mbo ke ndu diolaŋ aa Ebɛl.
Mi Ebɛl simnuŋ wana mandaa lasaa, kɛ mi Keŋ simnuŋ wana wali yondoo.
3 Mɛɛ teleŋ tiŋ hiou, mi Keŋ huŋ a komɔɔla o sɔla o wali ndɔɔ niŋndaŋ, le salaa solioo o Chɛhowa lo.
4 Kɛ mi Ebɛl huŋ a saa tasiaa a tiŋ o saa nduaa tɛɛŋ, mbo soli nda salaa a chuɛima ndaŋ kpou. Mi Chɛhowa hini kɔl a Ebɛl vɛlɛ a sala ndɔɔ.
5 Kɛ o hini kɔl a Keŋ vɛlɛ a sala ndɔɔ le. Le hei, mi Keŋ mia kuu a tumboo, nduyɛ mbo tɛɛmbuu hɔlla.
6 Mi Chɛhowa nyuna Keŋ aa: “Le yɛɛnɛ ŋ mɛ yɛ nuaa kuu a tumboo, nduyɛ ma tɛɛmbuu hɔlla?
7 Te a siŋgaŋ pɛ ma tosa nyɛ cho o kɛndɔɔ wo, num bɛɛ I hini kɔl a num. Kɛ te a siŋgaŋ ma tosa nyɛ cho o kɛndɔɔ wo le, hakioo cho num mɛŋgɛlaa o dio, nduyɛ o yeema mbo nɔ num kpaayaa choo. Kɛ a nɔla ma nɔ ndu kpaayaa choo.”
8 Okoŋ kɔɔli, mi Keŋ dimul Ebɛl pɔmbɔ ndɔ aa: “Ŋ kɔ kelaa yondoo niŋ.” Mɛɛ nda kuɛ yondoo niŋ, mi Keŋ luaa Ebɛl pɔmbɔ ndɔ mbo dii ndu.
9 Mɛɛ teleŋ tiŋ hiou, mi Chɛhowa nyuna Keŋ aa: “Kuɛɛnɛ Ebɛl pɔmbɔ num cho yɛ?” Mi Keŋ muli aa: “I sina le. Baa ya cho wana manda pɔmbɔ nuu wo ni?”
10 Okoŋ mi Mɛlɛka nyuna ndu aa: “Yɛɛnɛ ŋ tosa yɛ hoo? Yaŋ nilaŋ! Kooma pɔmbɔ numndaŋ ma cho chaŋndo naa ya chua.
11 Lelaŋ, chɔŋ a paale hauleŋ ndeŋ, sendioo cho num choo. Nduyɛ, lɛŋnde ŋ dii pɔmbɔ num, mi le sɔɔsiaa kooma nduaŋ ndeŋ, I cho num touwɔɔ lechoo.
12 Nduyɛ o yɔŋ bɛɛ ma tosa wallo lechoo, nyɛ o nyɛ cho naŋɔɔ le. A cho simnɔŋ kaunanɔɔ, ma wa heeloo a tuusoo o lɛŋndeŋ choo.”
13 Okoŋ mi Keŋ dimul Chɛhowa aa: “Nyɛpalaa ŋ handu ya hoo choo le haki nuu wo hiou ya mayoomu.
14 A tou ya hau o lɛŋndeŋ choo, ma faŋaŋ ya num o hɔl. I cho simnɔŋ kaunanɔɔ, mi wa heeloo a tuusoo o lɛŋndeŋ choo. Wana o wana che ya pɛ, o cho ya diyɔɔ.”
15 Mi Chɛhowa dimul ndu aa: “Le sabu koŋ, wana o wana dii num Keŋ pɛ, I cho ndu maa miŋgul bɛmbɔɔ le ŋɔmmɛu.”
Le hei, mi Chɛhowa kɛsi tamasioo le Keŋ maa wana o wana chɔ ndu bɛɛ, o nɔ mbo dii ndu le.
16 Mi Keŋ faŋaŋ Chɛhowa o hɔl, mbo kɔ chalnuŋ o lɛŋnde Nɔdi leŋ* niŋ Idɛŋ ba paaleŋ le chaŋ ndo.
17 Okoŋ, mi Keŋ wa a laa ndɔ mbo chua folioo,* mbo vialu poo ma ke ndu diolaŋ aa Inɔki. Mi Keŋ taŋgul chiee bɛndoo, mbo ke chiee koŋ diola po ndɔɔ Inɔki.
18 Okoŋ kɔɔli, mi Inɔki vialu poo mbo ke ndu diolaŋ aa Iluadi. Mi Iluadi vialu Mɛhuchayɛɛ, mi Mɛhuchayɛɛ vialu Mɛtusiayɛɛ, nduyɛ mi Mɛtusiayɛɛ vialu Lamɛki.
19 Mi Lamɛki chua laanduaa a ŋiɔɔŋ. Lanɔ tasoo ndoo nɔ diolaŋ ni aa Ada, o diiŋ ndɔɔ diolaŋ aa Siila.
20 Mi Ada vialu poo diolaŋ aa Chebal. Chebal wa wana tasoo le luaŋ o tɛndiilaŋ niŋ ni, nduyɛ mi ndoo manda vɛlɛ chɔluaa.
21 Pɔmbɔ ndɔ ndoo nɔ diolaŋ ni aa Chuba. Chuba wa wana tasoo ni le towaa lɔɔ a sɛŋndeŋ hɔŋndo.
22 Mi Siila bɛɛ vialu poo, mbo ke ndu diolaŋ aa Tubaa-keŋ. Sumnɔɔ o wa ni, nduyɛ mi ndoo toosiaa nyɛm walloŋ a chiliŋnde vɛlɛ a chiliŋii siaŋɛi.* Tubaa-keŋ yema ndɔ wa Naama ni.
23 Okoŋ, mi Lamɛki dimul laandaa nduaa Ada nda Siila diomndaŋ ndaŋ aa:
“La yaŋ ya nilaŋ, nya laanduaa Lamɛki wa,La yaŋ nilaŋ o nyɛ ya cho dimioo wo:
Mi dii poo le mɛɛ o boli ya yɛ,A tonya, mi dii po feleŋgɔnɔ koŋ le mɛɛ o lɔɔ ya yɛ.
24 Te a miŋgul pɛ wana cho Keŋ diyɔɔ wo maa bɛmbɔɔ le 7,Mɛɛ wana o wana dii pɛ Lamɛki, bɛmbɔɔ 77 nda cho ndu maa miŋgul ni.”
25 Mi Adam wa vɛlɛ a laa ndɔ, mbo vilul ndu poo. Okoŋ mbo ke ndu diolaŋ aa Sɛti,* kanifuule mbo dimi aa, “Mɛlɛka ke ya* vɛlɛ po* cheleŋ sɔŋgɔ Ebɛl lo, le mɛɛ Keŋ dii ndu yɛ.”
26 Mi Sɛti bɛɛ vialu poo, mbo ke ndu diolaŋ aa Inɔɔsi. A boondii keŋ waŋnda kandu diola Chɛhowa laŋ veeloo ni.
Tɛɛsiaalaŋ
^ Ɔɔ “yollo.”
^ Koŋ cho ni, lɛŋnde isumial teŋ.
^ Ɔɔ “yollo.”
^ Ɔɔ “kapaa.”
^ Diolaŋ ndaŋ la sim, “Suei Yulɔɔ ɔɔ Kɛsioo ɔɔ Bɛɛndiaa.”
^ Ɔɔ “hɛlul la.”
^ Hibuluiye, “kulle.”
