Chɛnɛsi 40:1-23
40 Okoŋ kɔɔli, mi masa wanaa talal masaa Ichipi muɛiyaŋ nda, a masa wanaa lum ndu beediiyo* wa tɛɛmbuu masaa Ichipi kɔllo.
2 Le hei, mi Felo duaunuŋ tumbe tau a buɛiyaa nduaa ŋiɔɔŋnda haa.
3 Mbo kɔ mal nda o chiɛi manyumndo niŋ, o chiɛi wana bɛndu wanaa manda masaa wa niŋ. Nduyɛ, loŋ Choosɛ wa o biyɔɔ niŋ ni.
4 Okoŋ, mi wana bɛndu wanaa manda masaa wa dimul Choosɛ le mbo wa nda malaa. Nduyɛ, ma viau o chiɛi manyum koŋ niŋ le teleŋ tiŋ.*
5 Ichɔl pilɛ, mi masa wanaa tala muɛiyaŋ nda, a masa wanaa luam beediiyo le masaa Ichipi wa, o kɛ kɛ sɔl luaŋ o chiɛi manyumndo niŋ. Nduyɛ lɔma sɔlaama kɛ kɛ maa nɔ tɛɛsiaa ndɔɔ.
6 Diimandɔɔ, mɛɛ Choosɛ luɛi naa nda wa wa, mbo cha maa a cho a kɔlta tambɛilaŋ.
7 Okoŋ, mbo nyuna buɛiyaa Felo wa, a wa o biyɔɔ niŋ o chiɛi masanɔ ndɔɔ niŋnda aa: “La vɛ hau hɔlla yiiyo nuaa?”
8 Ma mulul ndu aa: “Naa ŋiɔɔŋ kpou sɔl luaŋ, kɛ ŋ nɔ wana tɛɛsial naa maŋ te.” Mi Choosɛ dimul nda aa: “Baa o cho Mɛlɛka le cho wana tɛɛsiaa lɔma sɔlaŋ ndo le? A yandii, la dimullɔ ya lɔma nya sɔl laŋ.”
9 Mi masa wanaa tala muɛiyaŋ nda chɔm Choosɛ lɔma o sɔl laŋ. Mbo dimul ndu aa: “O lɔma ya sɔl laŋ niŋ, mi cha yɔm makilepiiyo ya lachi.
10 Yɔm makilepiiyo hoo ndoo nɔ lɛuwoŋ ŋgaa. Nduyɛ mi lɛuwoŋ muŋ pui, miŋ yandu, miŋ kuam kilepiiyaŋ kpɔŋjɔlaŋ, okoŋ mi ma diu.
11 Taala Felo wo wa ya o ba, mi kendi kilepiima maŋ, mi wayiaa maŋ o taala ndɔɔ niŋ, mi ke ndu.”
12 Okoŋ, mi Choosɛ dimul ndu aa: “Lɔma ŋ sɔl laŋ, tɛɛsiaa ndɔɔ cho hoo ni: Lɛuwuŋ ŋgaa woŋ sim le palɛi i yaa.
13 O palɛi i yaa bɛŋgu, Felo cho num soli* mbo miŋgi num o foofo numndo. A cho wa ndu muɛiyaŋ talallo, mɛɛ num oo tosa paandu yɛ.
14 Nduyɛ te sɔɔŋ kɔ bɛnda pɛ a num, yandii loonuŋ a ya. Chɔm ya kaala lo lechoo wo ma soo o Felo lo a ya okɔɔ, le halikpeŋ mbo soli ya nanuŋ.
15 O kpeekpei niŋ, o lɛŋnde Hibului leŋ niŋ nda bii ya ni ma huŋ a ya nanuŋ. Nduyɛ nanuŋ bɛɛ, I tosa suɛi wɔɔŋ o suɛi wɔɔŋ nda nɔ ma dɔu ya o chiɛi manyum niŋ te.”*
16 Mɛɛ masa wanaa luam beediiyo wa che maa nyɛ Choosɛ tɛɛsiaa wo bɛnda, mbo dimul ndu aa: “Ya bɛɛ o lɔma ya sɔl laŋ niŋ, kambɛilaŋ la wa ya o lebol la yaa a beedii humboo leniŋ.
17 Nduyɛ, beediila yɛ yɛlaŋ la wa o kambɛi wa lechoo wo niŋ le Felo, mi youwa wa laŋ dioo ya o lebol.”
18 Mi Choosɛ dimul ndu aa: “Lɔma ŋ sɔl laŋ, tɛɛsiaa ndɔɔ cho hoo ni: Kambɛila yaa laŋ la sim le palɛi i yaa.
19 O palɛi i yaa bɛŋgu, Felo cho num bolleŋ kiolɔɔ, okoŋ mbo landu num o yɔmndo choo, mi youwa de dialuŋ numndoŋ.”
20 Nduyɛ, Felo ndoo nɔ dunyɛi paale ndɔle vialaŋndeŋ o paale yaa ndɔleŋ choo. Le hei, mbo toosiaa nyɛdiaa le buɛiyaa nduaa kpou. Okoŋ, mbo soli* masa wanaa tala muɛiyaŋ nda, a masa wanaa luam beediiyo wa buɛiyaa nduaa o hɔl.
21 Mi Felo miŋgi masa wanaa tala muɛiyaŋ nda o foofo ndɔɔ, nduyɛ mbo hiau lachi a ndu muɛiyaŋ talallo.
22 Kɛ mbo landu masa wanaa luam beediiyo wa o yɔmndo choo, mɛɛ Choosɛ tɛɛsial nda yɛ.
23 Kɛ masa wanaa tala muɛiyaŋ nda loonuŋ a Choosɛ okɔɔ le. Mbo puɛɛnuŋ a ndu okɔɔ pɔli.
Tɛɛsiaalaŋ
^ Ɔɔ “buloo.”
^ Hibuluiye, “palɛi i tiŋ.”
^ Hibuluiye, “heelu bolleŋ.”
^ Hibuluiye, “o sooŋndo niŋ.”
^ Hibuluiye, “heelu bolleŋ.”
