Chɛnɛsi 41:1-57
41 Mɛɛ wɔsilaŋ la hiou la tiɔɔŋ, mi Felo sɔl luaŋ, mbo wa isisi o Pioo Nail kɔŋgɔ.
2 O wa loŋ, mbo cha nauwaa chelulɛiyaa kɛndɛ kɛndiaa a ŋɔmmɛu, a wa fulaa o Pioo Nail niŋ, ma wa bil wa o pioo kɔŋgɔ wo dioo.
3 Okoŋ kɔɔli, mbo cha vɛlɛ nauwaa ŋɔmmɛu cheleŋ fulaa o Pioo Nail niŋ. A wa a wɔɔŋ wɔɔŋ, nduyɛ a wa a nyawɛi sɛɛŋ. Ma sim nauwaa chelulɛiya ikɛi, o Pioo Nail kɔŋgɔ.
4 Okoŋ, mi nauwaa wɔɔŋ wɔɔŋaa nyawɛiya kandu nauwaa ŋɔmmɛuwaa chelulɛiyaa kɛndɛ kɛndiaa dioo. Nduyɛ, mi Felo tiandu o luaŋ.
5 Okoŋ kɔɔli, mbo miiŋgu vɛlɛ o luaŋ, mbo sɔl lɔma cheleŋ. Mbo cha yasala ŋwitiilaŋ la ŋɔmmɛu fulaa o bɛŋgu ŋwitiiyo, nduyɛ la wa la kuamaa lɔpi lɔpi.
6 Okoŋ kɔɔli, mbo cha vɛlɛ yasala ŋwitiilaŋ la ŋɔmmɛu fulaa o bɛŋgu ŋwitii cheleŋ. Kɛ la wa la nyamalɛi a hueiyii tuu fula ba paaleŋ le chaŋ ndo ve.
7 Okoŋ, mi yasala nyamalɛilaŋ la kandu yasala ŋɔmmɛula wa la kuamaa lɔpi lɔpi laŋ misi misioo. Okoŋ kɔɔli, mi Felo tiandu o luaŋ, mbo sina maa luaŋ o wa sɔllo ni.
8 Mɛɛ paaleŋ le sɛ, mi Felo luɛi o buulaŋ bɛndoo niŋ. Le hei, mbo yooŋgu le wanaa maŋgalaa a wanaa taasiaa kpou o Ichipi niŋ. Mi Felo chɔm nda lɔma o sɔl laŋ, kɛ wana o wana nɔla ndu maŋ tɛɛsial te.
9 Okoŋ, mi masa wanaa talal Felo muɛiyaŋ nda dimul Felo aa: “I chɔɔmuu wɔ hau hakila nilaŋ.
10 Paale pilɛ, mi Masaa Felo duaunuŋ tumbe a buɛiyaa nduaa. Mbo kɔ mal la o chiɛi manyumndo niŋ, o chiɛi wana bɛndu wanaa manda Masaa Felo wa niŋ, latulu a masa wanaa lum ndu beediiyo* wa.
11 Ichɔl pilɛ, mi naa ŋiɔɔŋ kpou sɔl luaŋ. Nduyɛ, wana o wana lɔma o sɔl laŋ maa nɔ tɛɛsiaa o ndɔɔ.
12 Laŋunɔ Hibuluinɔ pilɛ wa a naa latulu loŋ, buɛi masa wanaa manda numnda o cho ni. Mɛɛ naŋ chɔm ndu lɔma naŋ sɔl laŋ, mbo tɛɛsial naa nyɛ lɔma sɔlaama kɛ kɛ sim ndo.
13 Mi i yɔŋnuŋ mɛɛ o tɛɛsial naa maŋ yɛ. Ma miŋgi ya o wali nuu niŋ, kɛ ma landu poo o pilɔɔ.”
14 Okoŋ mi Felo yooŋgu le Choosɛ, ma kɔ soli ndu chɔ chɔ o chiɛi manyumndo* niŋ. Mbo sendi, nduyɛ mbo siŋga nyɛla wa ndu lekɔɔ laŋ, okoŋ mbo kua naa Felo chua.
15 Mi Felo dimul Choosɛ aa: “I sɔl luaŋ, kɛ wana o wana cho mbo tɛɛsial la maŋ te. Nduyɛ, I tuei maa te waŋndo dimul num pɛ lɔma o sɔl laŋ, a nɔla ma tɛɛsial ndu maŋ.”
16 Mi Choosɛ dimul Felo aa: “I nɔla maŋ tɛɛsiaa a ba ni le. Kɛ, Mɛlɛka pila cho num dimul yooŋgu o nɔ le numndo.”
17 Okoŋ mi Felo dimul Choosɛ aa: “Mɛɛ ya sɔl luaŋ, mi wa isisi o Pioo Nail kɔŋgɔ.
18 I wa loŋ, mi cha nauwaa chelulɛiyaa kɛndɛ kɛndiaa a ŋɔmmɛu, a wa fulaa o Pioo Nail niŋ, ma wa bil wa o pioo kɔŋgɔ wo dioo.
19 Mi cha vɛlɛ nauwaa cheleŋ a ŋɔmmɛu fulaa o Pioo Nail niŋ. A wa a wɔɔŋ wɔɔŋ, nduyɛ a wa a nyawɛi sɛɛŋ. Kani bɛɛ I chi wɔ nauwaa wɔɔŋ waa nuaa o lɛŋnde Ichipi leŋ niŋ kpou le.
20 Nduyɛ, mi nauwaa nyawɛiya kandu nauwaa chelulɛi ŋɔmmɛuwaa tasiaa fula wa dioo.
21 Kɛ mɛɛ nda chii nda dio, wana o wana ndoo sina bɛɛ pɛŋ maa a de nda le, kanifuule a wa a wɔɔŋ wɔɔŋ mɛɛ nda wa o tasela ndɔ yɛ. Okoŋ, mi tiandu o luaŋ.
22 “Okoŋ kɔɔli, mi sɔl vɛlɛ lɔma cheleŋ. Mi cha yasala ŋwitiilaŋ la ŋɔmmɛu fulaa o bɛŋgu ŋwitiiyo. Nduyɛ, la wa la kuamaa lɔpi lɔpi.
23 Mi cha vɛlɛ yasala ŋwitiila cheleŋ la ŋɔmmɛu fulaa o bɛŋgu ŋwitiiyo, kɛ la wa la nyamalɛi a hueiyii tuu fula ba paaleŋ le chaŋ ndo ve.
24 Okoŋ, mi yasala nyamalɛilaŋ la kandu yasala ŋɔmmɛula wa la kuamaa lɔpi lɔpi laŋ misi misioo. Le hei, mi dimul wanaa maŋgalaa lɔmasɔlaŋ maŋ, kɛ wana o wana nɔla ya maŋ tɛɛsial te.”
25 Okoŋ mi Choosɛ dimul Felo aa: “Lɔma yɛ yɛ ma ŋ sɔl laŋ, nyɔɔ o pilɛ kpe ma sim ni. Mɛlɛka tonyaa chii Felo chɔm nyɛ o cho hunɔɔ tosa wo.
26 Nauwaa ŋɔmmɛuwaa kɛndɛ kɛndiaa ŋ che wa, a sim le wɔsilaŋ la ŋɔmmɛu. Nduyɛ, yasala ŋɔmmɛula ŋ che mi la wa la kuamaa lɔpi lɔpi laŋ, la sim le wɔsilaŋ la ŋɔmmɛu. Lɔma yɛ yɛ ma ŋ sɔl laŋ, nyɔɔ o pilɛ kpe ma sim ni.
27 Nauwaa ŋɔmmɛuwaa wɔɔŋ wɔɔŋ ŋ che fulaa, nduyɛ ma wa a nyawɛi ya, a sim le wɔsilaŋ la ŋɔmmɛu. Yasala ŋɔmmɛula ŋwitii hueiyii fula ba paaleŋ le chaŋ ndo ve i nyamaliaa laŋ, la sim le yima bɛnduaŋ wɔsilaŋ la ŋɔmmɛu.
28 A mɛɛ ya dimul num yɛ masanɔ nuu, nyɛ Mɛlɛka tonyaa kɛɛsiaa le tosaa wo o chɔm num ni, Felo.
29 “Le wɔsilaŋ la ŋɔmmɛu, nyɛdiaa cho wa o hɔbɛi o lɛŋnde Ichipi leŋ niŋ kpou.
30 Kɛ okoŋ kɔɔli, yima bɛnduaŋ ma cho delɔɔ o lɛŋndeŋ niŋ le wɔsilaŋ la ŋɔmmɛu. Nduyɛ, waŋnda cho puɛɛnɔŋ a boondii nyɛdiaa wa o hɔbɛi o lɛŋnde Ichipi leŋ niŋnde. Yiaaŋ ma cho lɛŋndeŋ sɔɔsiaa.
31 Yima bɛnduaŋ maŋ ma cho tosa mi waŋnda puɛɛnuŋ a boondii nyɛdiaa wa o hɔbɛi o lɛŋndeŋ niŋnde, kanifuule yima maŋ ma wɔu niŋ bɔɔ.
32 Bɛmbɔɔ le diiŋ Felo sɔl luaŋ maŋ ni, kanifuule Mɛlɛka tonyaa kɛɛsiaa le hei kpou tosaa ni. Nduyɛ, Mɛlɛka tonyaa cho suŋ tosa mi i yɔŋnuŋ.
33 “Lelaŋ, Felo nuuviaa wana nɔ kɔl kaloo a taasiaa wo, mbo ke ndu kpaayaa lɛŋnde Ichipi leŋ kpou choo.
34 Felo nɔ mbo tosa nyɛ. O hɛli simlachiaa o lɛŋndeŋ niŋ, okoŋ ma chua o ŋuɛɛnu ndɔɔ o tɔlɔɔla waŋnda choo, boondii nyɛdiaa cho wa o hɔbɛi o lɛŋnde Ichipi leŋ niŋ le wɔsilaŋ la ŋɔmmɛu ve.
35 Nyɛdiaa nda cho koŋ waŋnda biu biu o laba o wɔsila kɛndɛla cho hunɔɔ laŋ niŋ kpou wo, a chuuŋgiaa ndu o chieeŋ bɛndoŋ niŋ, mbo wa o kɛsiaa loŋ. Nduyɛ, le Felo nyɛdiaa koŋ cho wa ni.
36 Boondii yima bɛnduaŋ ma cho wa o lɛŋnde Ichipi leŋ niŋ le wɔsilaŋ la ŋɔmmɛu ve, nyɛdiaa koŋ wa niŋ yɔŋgɔŋndo o lɛŋndeŋ niŋ ni, le halikpeŋ waŋnda chuu a yiaaŋ te.”
37 Mi Felo a buɛiyaa nduaa kpou naŋ kɔl a kɛɛsiaa hoo.
38 Okoŋ, mi Felo dimul buɛiyaa nduaa aa: “Nyina Mɛlɛkaa cho poo hoo choo. Baa ŋ nɔla pa miŋ saaluŋ wana cheleŋ maa ndu?”
39 Mi Felo dimul Choosɛ aa: “Mɛɛ Mɛlɛka tosa ma sina sɔɔŋ muŋ kpou yɛ, wana o wana cheleŋ cho mbo nɔ kɔl kaloo a taasioo maa num te.
40 Lelaŋ, num cho wa chiɛi nuu chilaŋ ni. Nduyɛ wanaa niaa kpou, nyɛ o nyɛ ŋ dimul nda pɛ le tosaa, a cho num diikɔŋ. Ya kinɛi cho num hiouwɔɔ kpaayaa ni, kanifuule ya cho masaa ni.”
41 Mi Felo chɔɔlu Choosɛ dimul aa: “I handu num lɛŋnde Ichipi leŋ kpou bolleŋ.”
42 Okoŋ, mi Felo soliŋ kelɛi* nduɛi o iso,* mbo wou Choosɛ o iso. Mbo wou ndu nyɛla feŋgbɛla kɛndɛ kɛndɛlaŋ, mbo wou vɛlɛ ndu yɔlɔŋ ŋkooliiyoŋ o labolo.
43 Okoŋ kɔɔli, mbo tosa mi Choosɛ chal o nyɛ ndɔ nyaanaŋ diiŋ ndɔ lemasa suaa naŋndo niŋ, ma wa balɔɔ a ndu. Nduyɛ, waŋnda wa kɔlaŋ a ndu dimioo lachi aa, “Avilɛki.”* Mɛɛ nuaa Felo handu Choosɛ lɛŋnde Ichipi leŋ kpou bolleŋ ni.
44 Mi Felo chɔɔlu Choosɛ dimul aa: “Ya cho Felo ni. Kɛ te o cho ma chɛl te, wana o wana nɔ di mbo tosa nyɛ* o lɛŋnde Ichipi leŋ niŋ kpou le.”
45 Okoŋ kɔɔli, mi Felo ke Choosɛ diolaŋ aa Safɛnati-paniaa. Nduyɛ mbo ke ndu Asinati, chua Pɔtifilua wo, wana soliaa lasalaa o Ɔŋ* niŋ le mbo wa laa ndɔ. Okoŋ mi Choosɛ kandu chilaŋ chuaa* o lɛŋnde Ichipi leŋ niŋ.
46 Choosɛ wa wɔsilaŋ 30 mbo kandu wallo le Felo, masaa le Ichipi.
Okoŋ mi Choosɛ mɛi Felo, mbo kɔ balu o lɛŋnde Ichipi leŋ niŋ kpou.
47 Wɔsila ŋɔmmɛula nyɛdiaa wa o hɔbɛi laŋ, tɔlɔɔlaŋ la wa naŋɔɔ tau tau o lɛŋndeŋ niŋ.
48 Wɔsila ŋɔmmɛula laŋ kpou, Choosɛ wa hiouwɔɔ lachi a nyɛdiaa chuuŋgiaa o lɛŋnde Ichipi leŋ niŋ, mbo kɛsi ndu o chieeŋ bɛndoŋ niŋ. O chiee bɛndu kɛ kɛ niŋ, o wa nyɛdiaa wa fulaa o chiɔɔŋ niŋ o tanda koŋ niŋndo kɛsioo loŋ.
49 Mi Choosɛ hiau lachi a nyɛdiaa chuuŋgiaa tau tau. Nduyɛ, mi nyɛdiaa kui mɛɛ siooŋnde wa nuaa o pee mɛŋma ihɛllo kɔŋgɔ yɛ. O mɛɛlulaŋ kpɔŋ, a ve lɛ ndu tuu le, kanifuule ndaa nɔla lɛ ndu tuu le.
50 Tuupa mi wɔsi yima bɛnduaŋ ma del lo fuuluu, mi Asinati, chua Pɔtifilua wo, wana soliaa lasalaa o Ɔŋ* niŋ vilul Choosɛ puaa a ŋiɔɔŋ.
51 Mi Choosɛ ke po ndɔ tasoo diolaŋ aa Manaasɛ.* Mbo dimi aa, “Mɛlɛka tosa mi puɛɛnuŋ a bahawɛila nilaŋ kpou, vɛlɛ a yeemɛi ya nɔ le yuŋgu finya nuu ve.”
52 Mbo ke o pilɔɔ diolaŋ aa Ifiluem.* Mbo dimi aa, “Mɛlɛka tosa mi kui o lɛŋnde ya wa mɔnɛi biyɔɔ leŋ niŋ.”
53 Okoŋ, mi wɔsila ŋɔmmɛula nyɛdiaa wa o hɔbɛi o lɛŋnde Ichipi leŋ niŋndaŋ la mɛɛlu.
54 Okoŋ kɔɔli, mi wɔsila ŋɔmmɛula yima bɛnduaŋ la kanduŋ, a mɛɛ Choosɛ ndoo dimi yɛ. Mi yima bɛnduaŋ ma tiu ba o ba fee o lɛŋnde niŋ, kɛ nyɛdiaa* wa ba o ba fee o lɛŋnde Ichipi leŋ niŋ.
55 O mɛɛlulaŋ kpɔŋ, mi yima bɛnduaŋ ma tiu o lɛŋnde Ichipi leŋ niŋ kpou. Okoŋ mi waŋnda kandu chaŋndo naa Felo chua le nyɛdiaa.* Mi Felo dimul waŋnda Ichipi kpou aa: “La kɔ o Choosɛ lo, nduyɛ nyɛ o nyɛ o dimul nya pɛ, la tosa.”
56 Mi yima bɛnduaŋ ma hiau lachi a waa ba o ba fee o chieeŋndo choo. Okoŋ mi Choosɛ kandu chiɛila ndoo kɛsi nyɛdiaa laŋ kpou kuumbuuwo, mbo pisi waŋnda Ichipi nyɛdiaa o ba. Kanifuule, yiaaŋ ma wa waŋnda saaŋgiaa kpeekpei o lɛŋnde Ichipi leŋ niŋ.
57 O fulawɔ okoŋ kɔɔli, waŋnda wa fulaa ba o ba fee, ma huŋ Choosɛ nyɛdiaa piondɔɔ o ba o lɛŋnde Ichipi leŋ niŋ, kanifuule yiaaŋ ma wa waŋnda saaŋgiaa kpeekpei o lɛŋndeŋ choo kpou.
Tɛɛsiaalaŋ
^ Ɔɔ “buloo.”
^ Hibuluiye, “sooŋndo.”
^ Koŋ cho ni, kelɛi nda tuula masaa ɔɔ wana sɔvɛ cheleŋ lechoo ve.
^ Hibuluiye, “ba.”
^ Naapum diomndo hoo nda soliŋ kpeku ni le waŋnda dimullo ma ke waŋndo bɛɛleŋ.
^ Hibuluiye, “mbo heelu ba ndɔɔ ɔɔ pelii nduɛi.”
^ Koŋ cho ni, Hɛlioopolisi.
^ Ɔɔ “balɔɔ.”
^ Koŋ cho ni, Hɛlioopolisi.
^ Diolaŋ ndaŋ la sim, “Wana Tosa Mi Waŋndo Puɛɛnuŋ Ndo.”
^ Diolaŋ ndaŋ la sim, “Kuiyo Tau Tau.”
^ Hibuluiye, “beediiyo ɔɔ buloo.”
^ Hibuluiye, “beediiyo ɔɔ buloo.”
