Chɛnɛsi 45:1-28
45 Choosɛ ndoo nɔla lɛ mbo bii kɔl ndɔɔ buɛiyaa nduaa kpou o hɔl te. Le hei, mbo dimul nda aa: “Nya kpou la faŋaŋ ya ikɛi!” Nduyɛ bɛndaa nduaa a pɔmbɔ ndɔ kinɛi wa niŋ loŋ ni, mi Choosɛ koma chɔɔmuŋ nda.
2 Okoŋ, mbo kandu chaŋndo choo choo kpeleŋ. Nduyɛ, mi Ichipiaŋnda a wanaa wa o chiɛi Felo wo niŋnda tuɛi ndu chaŋndo.
3 O mɛɛlulaŋ kpɔŋ, mi Choosɛ dimul bɛndaa nduaa a pɔmbɔ ndɔ aa: “Ya cho Choosɛ ni. Baa finya nuu cho wɔ pa yoomu?” Kɛ bakoo bɛɛ a nɔla ma soo le, kanifuule kɔndɔfillo wa nda a ndu okɔɔ.
4 Okoŋ, mi Choosɛ dimul bɛndaa nduaa a pɔmbɔ ndɔ aa: “A yandii, la sɔɔŋguu ya ikɛi.” Ma sɔɔŋguu ndu ikɛi.
Mbo dimul nda aa: “Ya cho Choosɛ pɔmbɔ nya ni, o nya pisi o Ichipi niŋndo.
5 Kɛ la tambu kɔl te. Nduyɛ, la biinaŋ tɔɔyaŋ le mɛɛ nya pisi ya nanuŋ yɛ le, kanifuule Mɛlɛka yɔŋ ya pɔɔ nya lachi ni, le yoomulaŋ piŋioo.
6 Chɔŋ a teleŋ yima bɛnduaŋ ma del lo, wɔsilaŋ tiɔɔŋ ndɔɔ naŋ cho niŋ hoo niŋ ni, nduyɛ o lo wɔ wɔsilaŋ la ŋuɛɛnu. O wɔsila laŋ niŋ bɛɛ, waŋnda ve niŋ chiɔɔŋ tosa ɔɔ ma kou le.
7 Mɛlɛka yɔŋ ya pɔɔ nya lachi ni, le halikpeŋ mi wanaa lo yoomu o nya tɛɛŋ nda hiou lachi a waa achal o lɛŋndeŋ niŋ. Nduyɛ o nɛiyo hoo choo, Mɛlɛka tiuba mbo piŋi nya o nɛi kɔndɔfili niŋ, la vi le.
8 Lelaŋ, o cho nya le yɔŋ ya nanuŋ te, kɛ Mɛlɛka tonyaa yɔŋ ya nanuŋ ni, le halikpeŋ mbo siiŋguu ya wana silaa bɛndoo* le Felo. Nduyɛ, mbo tosa mi wa chiɛi ndɔɔ kpou chilaŋ vɛlɛ a lɛŋnde Ichipi leŋ kpou.
9 “Lelaŋ, la miiŋgu chɔ chɔ naa finya nuu chua mi la kɔ dimul ndu aa, ‘Nyɛ Choosɛ po num dimi wo cho hoo ni: “Mɛlɛka yulu ya iso le mi wa lɛŋnde Ichipi leŋ kpou chilaŋ. Huŋ naa ya chua. Duaunuŋ tamala le.
10 Te a hiŋ pɛ, num ni, puaa numnda ni, puaa num aa mamaa ni, chɔluaa numnda kpou, a nyɛ o nyɛ ŋ nɔ, la huŋ wa ya ikɛi o tanda Koosiɛŋ ndo niŋ.
11 Nduyɛ, num ni, yuŋgu numndo ni, a nyɛ o nyɛ ŋ nɔ, I cho wa nya nyɛdiaa kioo loŋ, yɔŋii nyɛ o nyɛ chuu nya o ba fo, kanifuule yima bɛnduaŋ ma lo wɔ le wɔsilaŋ la ŋuɛɛnu.”’
12 Nya a Bɛŋjamiŋ pɔmbɔ ni che niko kpendekele maa ya Choosɛ kpeekpei cho suɛi o nya lo ni.
13 Lelaŋ, la kɔ dimul finya nuu a bɛɛle bɛndule ya sɔla o lɛŋnde Ichipi leŋ niŋ kpou leŋ okɔɔ, vɛlɛ a nyɛ o nyɛ nya che. La kɔ chɔ chɔ mi la kɔ huŋ a finya nuu nanuŋ.”
14 Okoŋ, mbo kɔmaŋ Bɛŋjamiŋ pɔmbɔ ndɔ mbo chaŋ, nduyɛ mi Bɛŋjamiŋ bɛɛ chaŋ.
15 Mbo sɔsa bɛndaa nduaa kpou kuulaŋ, mbo kɔɔmiaŋ nda, nduyɛ mbo chaŋ. Okoŋ kɔɔli, mi bɛndaa nduaa duau baltaŋ a ndu.
16 Mi Felo a waŋnda o ndu lo chiɛiniŋ tuɛi yooŋgoo aa: “Choosɛ bɛndaa nduaa a pɔmbɔ ndɔ hiŋ!” Mi Felo a buɛiyaa nduaa kpou naŋ kɔl le hei tueiyɔɔ.
17 Okoŋ, mi Felo dimul Choosɛ aa: “Dimul bɛndaa numnda a pɔmbɔ num ma dovi wolɔɔlaŋ chɔluaa ndaa o lakɔɔ, ma miiŋgu o lɛŋnde Kenaŋ ndeŋ niŋ.
18 Okoŋ, ma kɔ chua finya nda a yuŋgula ndalaŋ, ma hiŋ naa ya chua nanuŋ. I cho nda nyɛm kɛndɛ kɛndɛŋ cho o lɛŋnde Ichipi leŋ niŋndoŋ ke, nduyɛ ma sɔla tɔnɔɔ o fondaŋnda kɛndɛ kɛndɛlaŋ o lɛŋndeŋ ndeŋ niŋ.
19 Nduyɛ, dimul nda vɛlɛ ma chua nyɛm nyaanaŋ cho o lɛŋnde Ichipi leŋ niŋndoŋ le chuauwaa ndaa a laandaa ndaa. Okoŋ, ma kɔ wou finya nda o nyɛ nyaanaŋndo o pilɛ niŋ, ma hiŋ nanuŋ.
20 A buulaŋ a nyɛm ndaŋ okɔɔ le, kanifuule nyɛm kɛndɔŋ o lɛŋnde Ichipi leŋ niŋ kpou, le nda ŋ cho ni.”
21 Mi Isɔluɛi puaa nduaa tosa mɛɛ nda dimul nda yɛ. Nduyɛ mi Choosɛ ke nda nyɛm nyaanaŋndoŋ mɛɛ Felo dimi yɛ. Okoŋ, mbo ke nda nyɛdiaa le ma kei dio nɛi tɛɛŋ.
22 Mbo ke bɛndaa nduaa o kɛ kɛ doma sɛnɛiyo o pilɛ. Kɛ Bɛŋjamiŋ ndu, mbo ke ndu kaniŋ humboŋ 300 vɛlɛ a domala sɛnɛilaŋ la ŋuɛɛnu.
23 Nyɛm o yɔŋ finya ndɔ woŋ cho muŋ ni: mbo dovi nyɛm kɛndɔŋ o Ichipi niŋ sofɛliaa tɔ o lakɔɔ, le ma yoo finya ndɔ. Okoŋ kɔɔli, mbo dovi vɛlɛ witiiyoŋ,* beediiyo,* a nyɛdiaa cheleŋ sofɛliaa laanduaa tɔ o lakɔɔ, le mi finya ndɔ waa kei dio nɛi tɛɛŋ te a wa hunɔɔ pɛ.
24 Okoŋ, mbo choŋguŋ bɛndaa nduaa. Mɛɛ nda wa kɔlaŋ, mbo dimul nda aa: “La kei sɛɛŋgiaŋ nɛi tɛɛŋ te.”
25 Okoŋ ma mal Ichipi, ma kua o lɛŋnde Kenaŋ ndeŋ niŋ naa Chekɔpu finya nda chua.
26 Ma dimul ndu aa: “Choosɛ cho wɔ yoomu. Ndu cho wana bɛndoo le lɛŋnde Ichipi leŋ kpou ni!” Kɛ kɔl yusa ndu le, kanifuule ndoo laalaŋ nyɛ nda wa dimioo wo le.
27 Kɛ mɛɛ nda hiou lachi a ndu dimullo nyɛ o nyɛ Choosɛ dimul nda, nduyɛ mbo cha nyɛm nyaanaŋ Choosɛ yɔŋ le ma kuɛ a ndu woŋ, mbo kandu nyaaloo dɔɔnɔŋndo.
28 Mi Isɔluɛi dimi aa: “Nyɛ ya tueiyo cho letuu! I laalaŋ niŋ kɛsɛ maa Choosɛ po ni cho wɔ yoomu! Mɛɛ mi kuɛ mi kɔ chɔ ndu tuupa mi vi!”
