Chɛnɛsi 47:1-31
47 Okoŋ mi Choosɛ kɔ dimul Felo aa: “Finya nuu a bɛndaa niaa mal o lɛŋnde Kenaŋ ndeŋ niŋ ma huŋ chal Koosiɛŋ. Nduyɛ, a hiŋ a chɔluaa ndaa vɛlɛ a nyɛ o nyɛ nda nɔ.”
2 Mbo chua bɛndaa nduaa a ŋuɛɛnu, mbo kua a nda naa Felo chua, le ma chiikaŋ nda ndaa.
3 Mi Felo nyuna bɛndaa nduaa aa: “Wali yɛɛ nya tosa yɛ?” Ma mulul Felo aa: “Chɔluaa buɛiyaa numnda manda ni. Nduyɛ finyaa naa mamaa bɛɛ, chɔluaa ndaa manda ni.”
4 Okoŋ ma dimul Felo aa: “Yima bɛnduaŋ ma del o lɛŋnde Kenaŋ ndeŋ niŋ, nduyɛ ŋ nɔ bil o bil le chɔluaa naa le. Lelaŋ naŋ hiŋ le challe o lɛŋndeŋ ndeŋ niŋ ni. A yandii, chɛl naa miŋ chal o tanda Koosiɛŋ ndo niŋ.”
5 Mi Felo dimul Choosɛ aa: “Sumialii num finya num a bɛndaa numnda hiŋ ni.
6 Nduyɛ lɛŋnde Ichipi leŋ kpou, le num le cho ni. Lelaŋ, tosa mi finya num a bɛndaa numnda chal o fondaŋ kɛndɛ kɛndɔɔ o lɛŋndeŋ ndeŋ niŋ. A chal o lɛŋnde Koosiɛŋ ndeŋ niŋ. Nduyɛ te a saaluŋ pɛ wanaa chaa chɔluaa mandaa nyɛkɛndɛiya nda tɛɛŋ, a handu nda chɔluaa niaa chilaŋ.”
7 Okoŋ, mi Choosɛ kua a Chekɔpu finya ndɔ naa Felo chua, le ma chiikaŋ nda ndu. Nduyɛ, mi Chekɔpu duau Felo sala.
8 Mi Felo nyuna ndu aa: “Vɛɛnɛ ŋ chii yɛ niŋ wɔsilaŋ?”
9 Mi Chekɔpu mulul Felo aa: “Wɔsilaŋ 130 ya chii niŋ ni. Nduyɛ o laŋ niŋ kpou, I wa heeloo a tuusoo. Wɔsila kala kalalaŋ pila la wa laŋ le ya ni. Kɛ wɔsila finyaa niaa mamaa chii o heeloo a tuusoo niŋndaŋ la hiou poloŋ a la nilaŋ.”
10 Okoŋ kɔɔli, mi Chekɔpu duau Felo sala, mbo kuaŋnuŋ.
11 Mi Choosɛ tosa mɛɛ Felo dimul ndu yɛ. Mbo ke finya ndɔ a bɛndaa nduaa fondaŋ kɛndɛ kɛndɔɔ o lɛŋnde Ichipi leŋ niŋ, o tanda Luamɛsi wo niŋ le ma chal loŋ.
12 Nduyɛ Choosɛ wa hiouwɔɔ lachi a finya ndɔ, bɛndaa nduaa vɛlɛ a wana o wana wa o yuŋgu finya ndɔ wo niŋ nyɛdiaa* kioo, mɛɛ o kɛ kɛ ndoo nɔ chuauwa yɛ.
13 Nduyɛ nyɛdiaa* kɛ kɛ ve o lɛŋnde Ichipi leŋ niŋ a o lɛŋnde Kenaŋ ndeŋ niŋ te, kanifuule yiaaŋ ma wa hiouwɔɔ lachi a pɛŋgɛlaŋndo. Mi waŋnda o lɛŋnde Ichipi leŋ niŋ a o lɛŋnde Kenaŋ ndeŋ niŋ saŋga tau a yiaaŋ.
14 Choosɛ wa hiouwɔɔ lachi a kaniŋ* wa o lɛŋnde Ichipi leŋ niŋ a o lɛŋnde Kenaŋ ndeŋ niŋndoŋ kpou biu biuwo wanaa wa hunɔɔ nyɛdiaa piondɔɔ wa o laba, okoŋ mbo kua a kaniŋ muŋ o chiɛi Felo wo niŋ.
15 Mɛɛ teleŋ tiŋ hiou, mi kaniŋ wa o lɛŋnde Ichipi leŋ niŋ a o lɛŋnde Kenaŋ ndeŋ niŋndoŋ kpou chuu. Okoŋ, mi Ichipiaŋnda kandu hunɔɔ naa Choosɛ chua, ma dimul ndu aa: “Ke naa nyɛdiaa! Baa ma lo naa nuaa miŋ vi a yiaaŋ le mɛɛ kaniŋ naŋ chuu yɛ?”
16 Mi Choosɛ dimul nda aa: “Te kanioŋ chuu nya pɛ o laba, mɛɛ la yɔŋgu chɔluaa nyaa, okoŋ mi ke nya nyɛdiaa sɔŋgɔ chɔluaa kaŋ.”
17 Mi waŋnda kandu hunɔɔ a chɔluaa ndaa naa Choosɛ chua. Ma huŋ a suaa ndaa, saa, chuiŋnda, nauwa, a sofɛliaa naa Choosɛ chua. Nduyɛ, mbo wa nda nyɛdiaa kioo sɔŋgɔ chɔluaa ndaa kaŋ. Choosɛ lo nda nyɛdiaa kioo lende o wɔsi koŋ niŋ haaa mi chɔluaa ndaa chuu paku.
18 Mɛɛ wɔsi koŋ hiou, ma kandu hunɔɔ naa Choosɛ chua wɔsioo o pilɔɔ, ma dimul ndu aa: “Masanɔ naa, ŋ cho num suɛi hei viŋ te. Kaniŋ naŋ a chɔluaa naa kpou, ŋ chii num ke. Lelaŋ, ŋ nɔ lɛ hau nyɛ o nyɛ le masanɔ naa le, mɛɛ dialuŋ naŋ a lɛŋii nɛi.
19 Baa ma lo naa nuaa miŋ vi a yiaaŋ, nduyɛ mi lɛŋii nɛi loŋnuŋ fondo fuu? Naapila ni, lɛŋii nɛi ni, piondu naa a nyɛdiaa miŋ simnuŋ chiaa le Felo, nduyɛ mi lɛŋii nɛi wa le ndu. Ke naa yɛiye miŋ tosa chiɔɔŋ, yɔŋii naŋ wu a yiaaŋ, nduyɛ mi lɛŋii nɛi loŋnuŋ fondo fuu.”
20 Okoŋ, mi Choosɛ piinduu lɛŋii Ichipiaŋnda kpou le Felo. Kanifuule, mi Ichipiaŋnda o kɛ kɛ pisi yondo ndɔɔ le mɛɛ yima bɛnduaŋ ma wa o lɛŋndeŋ niŋ yɛ. Okoŋ, mi lɛŋii ndɛi wa le Felo.
21 Wanaa wa o sɔndɔkɔltaŋ o Ichipi niŋ kpou wa, mi Choosɛ heelu nda o chieeŋ bɛndoŋ niŋ.
22 Lɛŋii wanaa soliaa lasalaa kinɛi Choosɛ pindu le ni, kanifuule Felo ndoo ke nda nyɛdiaa ni. Nduyɛ nyɛdiaa koŋ ndaa tiindaŋ ni. Le sabu koŋ nda pisi lɛŋii ndɛi le ni.
23 Mi Choosɛ dimul waŋnda aa: “Nya ni, yondola nyalaŋ ni, I chii nya hau piondɔɔ le Felo. La che yɛiye le mi la tosa chiɔɔŋ.
24 Te la kou pɛ, la piɔu kundalaŋ la ŋuɛɛnu, mi la ke Felo kundaa o pilɛ. Okoŋ mi kundala hiɔɔlu laŋ la wa le yɛiye a nyɛdiaa le nyapila, wanaa cho o nya lo chiɛiniŋ nda vɛlɛ a chuauwaa nyaa.”
25 Okoŋ ma dimi aa: “A piŋi yoomula naalaŋ. Lelaŋ a yandii, chɛl naa miŋ simnuŋ chiaa le Felo.”
26 Okoŋ, mi Choosɛ duau sawaa o lɛŋnde Ichipi leŋ niŋ kpou maa Felo nɔ o ŋuɛɛnu ndɔɔ ni. Nduyɛ haaa a paale hauleŋ ndeŋ, sawa koŋ cho wɔ. Lɛŋii wanaa soliaa lasalaa kinɛi ve le Felo le ni.
27 Mi Isɔluɛiya hiau lachi a challe Koosiɛŋ o lɛŋnde Ichipi leŋ niŋ. Ma sɔla nyɔɔŋ, ma vialu chuauwa, nduyɛ ma kui loŋ tau tau.
28 Wɔsilaŋ 17 Chekɔpu chii o lɛŋnde Ichipi leŋ niŋ ni. Nduyɛ kpou kpou, Chekɔpu chii wɔsilaŋ 147.
29 Teleŋndo wa niŋ fuuluuwo le mi Isɔluɛi vi. Le hei, mbo veelu Choosɛ po ndɔ, mbo dimul ndu aa: “A yandii, wou ba numndo o lɔlu nuu bɛŋgu, ma mɛnaŋ po maa a cho ya kaala lo lechoo wo chɔm, nduyɛ ma lo o lediom. A yandii, kumbu ya o lɛŋnde Ichipi leŋ niŋ te.
30 Te I vi pɛ,* la soli ya o lɛŋnde Ichipi leŋ niŋ, mi la kɔ kumbu ya o sɛi nda kumbu finyaa niaa mamaa wo niŋ.” Okoŋ mi Choosɛ dimi aa: “I cho tosa mɛɛ ŋ dimi yɛ.”
31 Mi Isɔluɛi dimul ndu aa: “Mɛnaŋ.” Mi Choosɛ mɛnaŋ. Okoŋ, mi Isɔluɛi tundu bolleŋ o kpele ndɔɔ bolleŋ.
Tɛɛsiaalaŋ
^ Hibuluiye, “beediiyo ɔɔ buloo.”
^ Hibuluiye, “beediiyo ɔɔ buloo.”
^ Ɔɔ “woliŋ.”
^ Hibuluiye, “hini pɛ latulu a finyaa niaa.”
