Chɛnɛsi 49:1-33
49 Mi Chekɔpu veelu puaa nduaa, mbo dimul nda aa: “La chuuŋgiaŋ naapilɛ, le mi dimul nya nyɛ nɔ le nya yɔŋnɔŋndo o chilaŋ* niŋndo.
2 Nya chuauwaa Chekɔpu wa, la chuuŋgiaŋ naapilɛ mi la yaŋ nilaŋ. La yaŋ ya Isɔluɛi finya nya nilaŋ.
3 “Lubɛŋ, num cho po ni tasoo ni. Num cho violɔɔ ni tasoo a kpaaya nuu o chua piaanduyɛi nii niŋ ni. A wa wana lebɛɛ bɛndu a wana kpaaya bɛndu.
4 Kɛ a sɔla niŋ batiuwaa le. Mɛɛ mɛŋma hunaŋ ma cho nuaa ma kandaŋ te yɛ, lende ŋ cho ni. Kanifuule, ma bii kɔllo ma hel o kpele finya numndo choo. A teleŋ koŋ, ma nɔɔliaa kpele nuu. A tonya kpeekpei, mbo hel o kpele nuu choo!
5 “Pɔmbɔɔ a bɛndoo Simiɔŋ nda Livai cho ni. Nduyɛ, le sɔŋgɔlaŋ mɛlioo nda toosiaa wolɔɔla ndala chɔulaŋ ni.
6 Maa fɛɛŋ bɛɛ I tosa chaŋyɛi a nda le fɔ! Maa diola nilaŋ la chiɛɛliaŋ a kunda ndaa le, kanifuule te a tuulu pɛ kɔl, waŋnda chieeya nda diu diu ni. Nduyɛ le kɔl nda kɛndɔɔ, nauwaa towaa nda kili nyɛsuaŋ ni.
7 Sendioo cho kɔl nda tuuwo choo, kanifuule o wɔu bɔɔ. Nduyɛ sendioo cho yolɛi ndɛi choo, kanifuule i tuulu bɔɔ. I cho nda puusiaa o tanda Chekɔpu wo niŋ, nduyɛ mi sɛŋi nda o Isɔluɛi niŋ.
8 “Kɛ num Chuda, pɔmbuaa numnda a bɛndaa numnda cho num saŋgala. Ba numndo cho wa yaamɔɔwaa numnda o ikɛsu. Nduyɛ puaa finya numnda cho num hunɔɔ wulaŋ beŋ.
9 Kpɔkuŋ* fɔŋndɔɔ Chuda cho ni. Po nuu, a fula niŋ ma kɔ del nyɛdiaa numndo choo ma de ndu, okoŋ ma kuɛŋnuŋ. O bɛmnuŋ, nduyɛ mbo siɛndiŋ puɛɛŋ maa kpɔkuŋ. O nɛɛnɛ bii yɛ kɔllo mbo kpeŋa kpɔkuŋndo?
10 Tinda lemasaa feŋaŋ niŋ Chuda le, nduyɛ tindaa feŋaŋ niŋ o peluŋ ndɔŋ bɛŋgu le, haaa mi Silɔɔ* hiŋ. Nduyɛ waŋnda kpou cho ndu diikɔŋ.
11 O cho sofɛlɛ ndɔɔ baa o yɔm makilepiiyo, nduyɛ mbo baa chuale sofɛlɛ ndɔɔ o yɔm makilepii kɛndɛ kɛndɔɔ. O cho nyɛla ndɔlaŋ tɔɔ o muɛiyaŋ niŋ, nduyɛ mbo tɔɔ doma ndɔɔ o muɛima kilepiiyaŋ niŋ.
12 Hɔltaŋ la cho ndu la diuwaa yɔɔ a muɛiyaŋ, nduyɛ mi chiŋndoŋ wa ndu ŋ humbu fo a milikiiyaŋ.*
13 “Sɛbulɔŋ cho wa ichali o pee mɛŋma ihɛllo kɔŋgɔ, naa dɛndɛla mamɛŋndaŋ la huŋ simndaŋ nda. Nduyɛ, pɛŋgula lɛŋnde ndɔleŋ la kua niŋ haaa ba Saidɔŋ ndo.
14 “Sofɛlɛ dialuŋ kalaa Isaka cho ni, mbo wa ihini bɔlɔla nda handu sofɛliaa o lakɔɔ laŋ la tiɔɔŋ tɛɛŋ.
15 O cho chɔ maa fondaŋ o cho pɛŋgioo wo cho fondaŋ kɛndɛ, nduyɛ maa lɛŋnde o cho niŋ ndeŋ le naŋ tau. O cho choŋgulaŋ tusi mbo chua wolɔɔlaŋ, nduyɛ mbo chɛl ma baŋ ndu le wali kala kalaa tosaa.
16 “Kaaleŋ le pilɛ o Isɔluɛi niŋ Daŋ cho ni, nduyɛ o cho hunɔɔ kɔɔsa a wanaa nduaa kpou.
17 Daŋ wa maa kɛu wɔɔŋ wɔɔŋ cho o nɛiyo daŋgala wo, o lɔwa sofɛlɔɔ tɔndii kɔɔliei, mi wana cho kɔlaŋ a ndu wo del amakɔɔ wo.
18 Oo Chɛhowa, I cho chum le ma piŋi ya.
19 “Kaadi ndu, wanaa del waŋnda choo o nɛilaŋ nda cho ndu delɔɔ choo. Kɛ o cho nda mululaŋ, nduyɛ mbo tisa nda kɔɔli.
20 “Asia nɔ niŋ nyɛdiaa* o hɔbɛi. Nduyɛ, o cho wa nyɛdiaa bɛnda le masaa wo yɔŋgoo.
21 “Kial laandu mɛsɛlɛiyo Nafitalii cho ni. Nduyɛ diomnda taasilaŋ la fula ndu o sondo ni.
22 “Choosɛ cho lɛuvii fula o yɔm kuamaa wo ni, yɔm kuamaa cho o pioo kɔŋgɔ, o lɛuwuŋ ndɔŋ pɛŋgɛlaŋ o kpakioo choo wo.
23 Kɛ mi wanaa wuu chiŋuaŋ nda del ndu choo, nduyɛ ma via ndu a maŋ. Ma hiau vɛlɛ lachi a ndu yɛleŋ tullo.
24 Kɛ a koŋ kpou, chiɔule ndɔleŋ le wa ndu o ba. Nduyɛ bala ndɔlaŋ la wa la kala poŋ, le chiŋuaŋ wuuwo chɔ chɔ. Wana kpaaya bɛndu mala Chekɔpu wo tosa hei ni, wana mandaa lasaa, pouwo le Isɔluɛi.
25 O Mɛlɛka finya nya wo lo o* fula ni, nduyɛ o cho nya mala. O cho latulu a Mɛlɛka Kpaaya Kpou Kpou Wo. O cho nya salaa dɔwɔɔ a salala fula o choo choo niŋndaŋ, vɛlɛ a salala fula o lɛŋndeŋ bɛŋgu laŋ. O cho nya salaa dɔwɔɔ mi la sɔla chɔluaa a chuauwa tau tau.
26 Salala finya numndaŋ la cho wa filioŋ, mbo hiou salala pembuŋ bɛnduŋ cho le fɛɛŋ a fɛɛŋ ndoŋ, vɛlɛ a salala nyɛm kɛndɛŋ cho o pemboŋ choo woŋ. Salalaŋ ndaŋ la cho wa Choosɛ choo. La cho wa o mɔsil lemasa wana sɔla hɛlioo bɛndaa nduaa tɛɛŋ ndo choo.
27 “Bɛŋjamiŋ cho hiouwɔɔ lachi a yaamɔɔwaa nduaa sɛɛsiaa, mɛɛ tiwollo tosa yɛ. Te paaleŋ le sɛ pɛ, o cho nyɛ o dii yo dio, nduyɛ ichɔllo, mbo piɔu nyɛm o puŋga woŋ.”
28 O haa niŋ kaala 12 ndaŋ Isɔluɛi la fula ni. Nduyɛ mɛɛ finya nda wa nda salaa dɔwɔɔ, nyɛ o dimul nda wo wa hoo ni. Mbo duau wana o wana sala o nɔ mbo sɔla wo.
29 Okoŋ kɔɔli, mbo dimul nda aa: “I cho suŋ wu. Nduyɛ te I vi pɛ, la kumbu ya naa nda kumbu finyaa niaa mamaa wa, o buulu cho o yondo Ɛfulɔŋ, Hitaitiinɔɔ wo niŋ.
30 Buuloo hoo cho o yondoo Makipila, Mamilue lachi o lɛŋnde Kenaŋ ndeŋ niŋ. Yondoo hoo Ebilaham pendu Ɛfulɔŋ, Hitaitiinɔɔ o ba ni, le waa wanaa nduaa vilɛiya kumbɔɔ.
31 Loŋ nda kumbu Ebilaham nda Sela laa ndɔ ni. Loŋ nda kumbu Aase nda Lubeka laa ndɔ ni. Nduyɛ loŋ ya kumbu Liya ni.
32 Puaa Hɛɛti wa o ba o pendu yondo koŋ a buulu cho leniŋ ndo ni.”
33 Mɛɛ Chekɔpu chii puaa nduaa sɔɔŋ muŋ kpou dimul, mbo heelu peluŋ ndɔŋ o kpele, mbo chua yoomuma ndɔma mɛɛlaŋ. Okoŋ mbo wu, ma kumbu ndu maa finyaa nduaa mamaa.
Tɛɛsiaalaŋ
^ Hibuluiye, “palɛi mɛɛlɛi.”
^ Ɔɔ “yalakana.”
^ O sim, “Wana Nɔ Ndu Wo.”
^ Ɔɔ “nɔnɔɔ.”
^ Hibuluiye, “beediiyo ɔɔ buloo.”
^ Koŋ cho ni, Choosɛ.
