Chondii Sɔlɔmɔŋ Nde 1:1-17
-
Chondii Sɔlɔmɔŋ nde (1)
-
Chua laandoo (2-7)
-
Chuaa laanduaa Chulusalɛm (8)
-
Masaa (9-11)
-
“Ŋ cho num nyɛm nɛŋi num ndoŋ toosial a kooliiye” (11)
-
-
Chua laandoo (12-14)
-
‘Wana ya kaala wo cho ko maa chuɛima chuŋ kɛndɛma mɔɔ waŋ bɔlɔɔ cha’ (13)
-
-
Wana mandaa lasaa (15)
-
“Num ya kaala hoo wo, a naŋ bɔɔ”
-
-
Chua laandoo (16, 17)
-
“Num wana ya kaala wo, a naŋ bɔɔ” (16)
-
1 Chondii Sɔlɔmɔŋ nde, i hiou chondoŋ kpou naŋɔɔ ve:
2 “Maa sɔsa ya sondoo,Kanifuule, kaala ŋ chɔm ya wo bɛnda mbo hiau muɛiyaŋ.
3 Chuɛima ŋ suiinuŋ ndaŋ ma nɔ bɔɔ chuŋ kɛndɔɔ.
Diola numndaŋ la cho ko maa chuɛima kɛndɛ kɛndɛma nda tala waŋ.
Le sabu koŋ waŋ laanduaa feleŋguaa kaala num ni.
4 Saa ya,* miŋ nyaanuŋ.
Masaa kuɛ a ya o lumuila ndɔlaŋ niŋ di!
Ŋ dɔɔnuŋ nyaale nduyɛ miŋ wa a kɔl kɛndɛ.
Ŋ soo wɔ a sɔɔŋ chɔm kɛsɛ maa a kaala ya woŋ. Kaala ŋ nɔ le ya wo bɛnda mbo hiau muɛiyaŋ.
A tonya, a* kaala num bɔɔ.
5 Chuaa laanduaa Chulusalɛm, mi che bɛɛ I cho o tiŋi,* kɛ waŋnda kaala ya.I cho ko maa tɛndiilaŋ Kidaa, a kolala tɛndii Sɔlɔmɔŋ ndo.
6 La handu ya hɔlteŋ choo le mɛɛ ya piimiaa yɛ le.Kanifuule, paaleŋ le tosa ni mi wa nuaa.
Yemaa niaa dɔɔnuŋ tumbe a ya ni,Ma siiŋguu ya wana mandaa kpelela makilepiilaŋ,Kɛ I manda kpelela nila makilepiilaŋ te.
7 Dimullɔ ya, num ya kaala hoo tau wo,Kuɛɛnɛ ŋ kua yɛ a saa numnda le diolaŋ?Kuɛɛnɛ ŋ kua yɛ a nda le ma hini, te paaleŋ le kendu pɛ?
Le yɛɛnɛ mi wa balɔɔ o saa chaaŋaa numnda tɛɛŋ,Maa wana lanɔ kumbu hɔlaa nduaa a kola waaŋgaa wo wo?”*
8 “Num wana lanɔ hiou hoo waŋ laanduaa naŋɔɔ kpou wo,Te a sina le, kɔ ma tol saa kaŋ kɔɔli.Kɔ a chuiŋaa numnda le diolaŋ, o tɛndiila wanaa mandaa lasaa ikɛi.”
9 “Num ya kaala hoo wo, a cho ko maa so kɛndɛ kɛndɔɔ o nyɛm nyaanaŋ suaa naŋndoŋ tɛɛŋ, ŋ Feloo ndoo nɔ woŋ.
10 Kelaŋ ŋ wounuŋ ndoŋ tosa mi kpaŋndoŋ chɔɔlu num naŋɔɔ,Nduyɛ ma wounuŋ yɔɔwama kɛndɛ kɛndiaŋ o labolo.
11 Ŋ cho num nyɛm nɛŋi num ndoŋ toosial a kooliiye,Muuliaŋndo a kanii humbuei.”
12 “Mɛɛ masaa wa ichali o tibii* ndɔ tiilaŋndo,Mi chuɛima chuŋ kɛndɛma ya suunuŋ ndaŋ ma tiu chuŋndo silɔ.
13 Wana ya kaala wo cho ko maa chuɛima chuŋ kɛndɛma mɔɔ waŋ bɔlɔɔ cha,O lɔl la o mɛɛyaŋ tɛɛŋ ichɔl pii yo.
14 Wana ya kaala wo cho ko maa bil lapeeŋge hɛna wo,O cho o tɔlɔɔlaŋ niŋ Ɛŋ-kɛdi wo.”
15 “Num wana ya kaala wo, a naŋ bɔɔ!
A tonya, a naŋ bɔɔ! Wana che num hɔltaŋ pɛ aa hɔlta piiŋndo ni.”
16 “Num wana ya kaala wo, a naŋ bɔɔ! Nduyɛ te waŋndo che num dɔɔ pɛ nyɔɔ hɛnaŋ ndu.
Bil puiyaa kɛndɛ kɛndɔɔ cho kpele naa ni.
17 A yɔmii sida ve nda toosiaa suŋgbuma chiɛi naa* ni,Nduyɛ ma toosiaa yindɔ chiɛi naa a yɔmii chunipa ve.
Tɛɛsiaalaŋ
^ Hibuluiye, “Naŋ ya num o ibuŋ.”
^ Koŋ cho ni, waŋ laanduaa feleŋguaa.
^ Hibuluiye, “I piimiaa.”
^ Ɔɔ “kola waaŋgaa imɔnɔɔ wo.”
^ Ɔɔ “tabali.”
^ Ɔɔ “chiɛi naa bɛndoo.”
