Chondii Sɔlɔmɔŋ Nde 2:1-17
2 “I cho ko maa bil lapeeŋgoo o lɛŋnde dɛŋgbɛleŋ niŋ,*Vɛlɛ a pɔmbiaŋ o kpoloŋndaŋ niŋ.”
2 “Mɛɛ pɔmbiaŋ ma wa nuaa o yɔɔŋ tɛɛŋ yɛ,Lende koni wana ya kaala wo cho chuaa laanduaa tɛɛŋ ni.”
3 “Mɛɛ yɔm apuiyo wa nuaa yɔmnde tɛɛŋ o bundɔɔ niŋ yɛ,Lende koni wana ya kaala wo cho puaa tɛɛŋ ni.
Yeemɛi cho ya bɔɔ le mi chal o wundule ndɔleŋ bɛŋgu,Nduyɛ kɔmnde ndɔleŋ le cho bɔɔ nyɛ yeelɛi le ya.
4 Mbo kua a ya o chiɛi dunyɛi wa wo,*Nduyɛ mi kaala ndɔɔ kumbu ya kpu maa kola.
5 Ke ya kato nda toosiaa a fikiima vesɛiyaŋ vɛlɛ a apuiyaŋ ndo,Le mi pɛŋgi nduyɛ mi sɔla yoomuaŋ.Dialloŋ cho ya ŋ vilɛi pɛ, kanifuule I choŋnuŋ o kaalaa niŋ yikpi.
6 Ba ndɔ miallo cho ya o bolleŋ bɛŋgu,Nduyɛ mi ba ndɔ kɛndɔɔ kɔmaŋ ya.
7 Nya chuaa laanduaa Chulusalɛm,La mɛnaŋ o ya lo a puuviaa vɛlɛ a kialaa cho yondoo niŋnda maa:
La kindiŋ le ya kaalaa tindioo ɔɔ kpeeŋiaa niŋ te, haaa mi che kaala kpeekpeiyo.
8 I cho tueiyɔɔ wana ya kaala wo hunɔɔ!
Nuawɔ ndu hunɔɔ!O cho pembuŋ bɛndoŋ helɔɔ, mbo wa huuloo o pembuŋ pɔmbɔŋ choo.
9 Wana ya kaala wo cho ko maa puuvɛ, nduyɛ mbo wa vɛlɛ maa kial fɔŋndɔ.
Nuaa ndu nda, mbo wa isisi o chiɛi naa,Nduyɛ mbo kindiŋ le nuaa o wundɛiyo,*Mbo keeliaa hɔlteŋ le nuaa o tɛɛŋgula cho o wundɛiyo laŋ.
10 Wana ya kaala wo cho suɛi, mbo dimul la aa:
‘Num ya kaala wo,Num naŋ hoo naŋɔɔ bɛndoo wo, huŋ kɔŋnuŋ.
11 Sialteŋ le hiou,
Piɔɔ kiolu, nduyɛ o cho lɛ sia le.
12 Boondii yɔmnde soli peeŋgelaŋ o lɛŋndeŋ niŋnde fuuluu.Boondii nda kili lɛuwuŋ makilepiiyaŋ nde fuuluu.Nduyɛ, ŋ cho chonduŋ piiŋnda soli woŋ tueiyɔɔ o lɛŋnde naaleŋ niŋ.
13 Kɔmnde tasele yɔm mafikiiyo diu.Tɔlɔɔ makilepiiyo soli peeŋgelaŋ, nduyɛ mi la wa chuŋ kɛndɔɔ.
Num wana ya kaala wo, chɔŋ ma hiŋ.
Num naŋ hoo naŋɔɔ bɛndoo wo, huŋ kɔŋnuŋ.
14 Oo piiŋ nuu, num choŋnuŋ hoo o poutaŋ tɛɛŋ,Ma toosiaa waaŋndeŋ o pembii feke fekei yo,I cha wɔ num, nduyɛ mi tuei diom numndo.Diom numndo naŋ bɔɔ tueiyɔɔ, nduyɛ kaalaa cho num o tiuwaa o lahɔl kpou.’”
15 “Biilul naa siifaa,Siifaa chuauwaa tɛɛmbuu kpelela makilepiilaŋ nda,Kanifuule, kpelela naala makilepiilaŋ la kandu yandɔɔ.”
16 “Ya nɔ wana ya kaala wo ni, nduyɛ ndu nɔ ya ni.
O cho saa mandaa o pɔmbiaŋ tɛɛŋ.
17 Oo wana ya kaala wo, tuupa mi hueiye kandu hɔŋndo nduyɛ mi wunduaŋ ma kuɛŋnuŋ,Miiŋgu chɔ chɔ ma keeku o pembuŋ piɔu naa tɛɛŋ ndoŋ* choo,Maa puuviaa ɔɔ kialaa fɔŋnduaa.
Tɛɛsiaalaŋ
^ Ɔɔ “lɛŋnde dɛŋgbɛleŋ o mɛŋma ihɛllaŋ ikɛi.”
^ Hibuluiye, “chiɛi mamuɛiyo.”
^ Ɔɔ “finɛteloo.”
^ Ɔɔ naapum, “pembuŋ cho feke feke woŋ.”
