Chondii Sɔlɔmɔŋ Nde 3:1-11
3 “Mɛɛ ya hini o kpele nuu choo ichɔl,Mi yiyaŋ a wana ya kaala wo.
Mi nuuviaa ndu, kɛ I seeluŋ ndu le.
2 I cho chɔnɔŋ mi balu o chiee bɛndoo niŋ,O nɛila bɛndulaŋ choo a o luŋndaŋ,Le mi nuuviaa wana ya kaala wo.
Mi nuuviaa ndu, kɛ I seeluŋ ndu le.
3 Wanaa mɛŋgɛla chioo wa lo balɔɔ ma saaluŋ ya.
Mi nyuna nda aa, ‘Mi la cha pa wana ya kaala wo?’
4 Mɛɛ ya hiou dɔɔ nda,Mi saaluŋ wana ya kaala wo.
Mi bii ndu kpiŋ, I mel ndu mbo kuɛ le,Haaa mi huŋ a ndu o kala nuu lo chiɛiniŋ,Mi luɛi a ndu o lumui wana velu ya wo niŋ di.
5 Nya chuaa laanduaa Chulusalɛm,La mɛnaŋ o ya lo a puuviaa vɛlɛ a kialaa cho yondoo niŋnda maa:
La kindiŋ le ya kaalaa tindioo ɔɔ kpeeŋiaa niŋ te, haaa mi che kaala kpeekpeiyo.”
6 “Yɛɛnɛ cho yɛ hoo hunɔɔ o pollo niŋ maa kumii kpuŋgba,Mi chuɛima chuŋ kɛndɛ kɛndɛma mɔɔ waŋ a filaŋkiŋsɛŋ wa chuŋndo leniŋ,Nduyɛ mi pɔu chuŋ kɛndɛ kɛndɛ wanaa leyulaa huŋ ndo kpou wa chuŋndo leniŋ?”
7 “Kpeŋgbei* fɔɔndiɔŋ fɔɔndiɔŋ* Sɔlɔmɔŋ ndo cho koŋ ni.
Laŋgbaa dialuŋ kalaa bele ŋɔmpum,O puaa Isɔluɛi tɛɛŋ balu ndu silɔ.
8 Nda kpou nɔ mɔɔŋ faŋndoŋ o laba,Mi nda kpou sɔla pɛɛkoo le chɔuwo.O kɛ kɛ fee saiyaŋ muɛi nduɛi faŋnde,Le masaa mandaa ichɔl, yɔŋii kpundɔɔ komal ndu.”
9 “Kpeŋgbei lemasa fɔɔdiɔŋ fɔɔdiɔŋ* Sɔlɔmɔŋ ndo cho koŋ ni.A yɔmii Lebanɔŋ nde o toosiaa ndu ni le ndupila.
10 Mbo toosiaa suŋgbuma nduaŋ a kanii humbuei,Nduyɛ mbo toosiaa naa sɛɛŋaŋnda a kooliiye.
Mbo toosiaa naa chalaa a kola yim yimndo.Mi chuaa laanduaa Chulusalɛm toosiaa ndu leniŋ nyɛkɛndɛ kɛndɛi,O nɛi kaalaa niŋ.”
11 “Chuaa laanduaa Saayɔŋ, la chɔŋ mi la kuɛ.La kɔ tofa Masaa Sɔlɔmɔŋ,Mɛɛ o wounuŋ mɔsil ndɔ nɔ kɛsiaa,*O paale ndɔle nɔ kɛsiaa leŋ choo yɛ,O kala ndɔ toosiaa le ndu, le paale ndɔle kɔl kɛndɛleŋ ndo.”
Tɛɛsiaalaŋ
^ Ɔɔ “Kpɛŋɛ.”
^ Kpeŋgbeiyo hoo ndaa soliŋ kpeku ni le kɔlaŋ a wanaa bɛnduaa. Nduyɛ, ndoo nɔ nyɔɔ lechoo maa yindɔ.
^ Kpeŋgbeiyo hoo ndaa soliŋ kpeku ni le kɔlaŋ a wanaa bɛnduaa. Nduyɛ, ndoo nɔ nyɔɔ lechoo maa yindɔ.
^ Ɔɔ “yɔlɔŋ nda toosiaa a bil lapeeŋgoo woŋ.”
