Chondii Sɔlɔmɔŋ Nde 4:1-16
4 “Num wana ya kaala wo, a naŋ bɔɔ!
A tonya, a naŋ bɔɔ!
Hɔltaŋ la cho num o kola waaŋgaa numndo bɛŋgu naŋ chaa hɔlta piiŋndo ni.
Yiiŋnde num naŋ chaa yiiŋii chuiŋnda ni,A cho tolɔɔ o pembuŋ Kiliaadi woŋ choo wa.
2 Chiŋuŋ numndo cho ŋ humbu fo fo,Naŋ chaa saa nda kili yiiŋnde sɛnɛi, ma pulu nda wa ni.A ŋiɔɔŋ ŋiɔɔŋ nda kpou kuam ni,Nduyɛ o pilɛ bɛɛ viikuu le.
3 Chɔchɔŋ numndoŋ cho ko maa kɛi siaŋaa,Nduyɛ sɔɔŋ ŋ dimi woŋ nɛŋi bɔɔ wana kɔl.
Kpaŋndoŋ cho num o kola waaŋgaa wo bɛŋgu,Naŋ chaa tɛndu lepɔmɛkilanetiiyo ni.
4 Kɛsii numnde cho ko naŋ chaa bandu vilɛi Deeve wo ni,O nda hɛɛnduu poutaŋ o lepula le ndu taŋgullo,Nduyɛ ma lɛɛnduu boola kala kalala puaa chɔuwa bii o laba laŋ waapilɛ o ndu wo,Boola tiu tiula puaa kpaayaa bɛnduaa bii o laba laŋ kpou.
5 Mɛɛma numndaŋ ma cho ko,Naŋ chaa puuviaa chuauwa a ŋiɔɔŋ ni,A dia pɔmbiaŋ nda.”
6 “Tuupa mi hueiye kandu hɔŋndo nduyɛ mi wunduaŋ ma kuɛŋnuŋ,I cho lakɔŋnɔŋ o pembii mɔɔ ve,A o pembii filaŋkiŋsɛŋ nde.”
7 “Num wana ya kaala wo, wana mɛɛndaŋ num pɛ kpou, a naŋ bɔɔ!A nɔ sɔŋ o sɔŋ te!
8 Faŋaŋ Lebanɔŋ miŋ kuɛŋnuŋ.Wana naŋ cho hunɔɔ challe o nɔɔ niŋndo, faŋaŋ Lebanɔŋ miŋ kuɛŋnuŋ.
Tol o pembii Amana ve choo,Pembii Sɛniɛɛ ve, a pembii Hɛmɔŋ nde,Naa bɛmɛlta kpɔkuŋnda* cho wa, a o pembuŋ tambilla cho woŋ.
9 Yema ni naŋ cho hunɔɔ challe o nɔɔ niŋndo, a kpeeŋiaa ya kɔl kaalaa niŋ.Nuaa ya le pilɛ kpe, ma kpeeŋiaa ya kɔl kaalaa niŋ kpou,Ma kpeeŋiaa ya kɔl kaalaa niŋ a yɔluɛi cho num o labolo ve.
10 Num yema ni naŋ cho hunɔɔ challe o nɔɔ niŋndo, nuawɔ se sɔɔŋ kɛndɛŋ bɛnduŋ ŋ dimi le ya kaalaa chɔmndo woŋ!
Sɔɔŋ kɛndɛŋ bɛnduŋ ŋ dimi le ya kaalaa chɔmndo woŋ ŋ bɛnda miŋ hiau muɛiyaŋ.Nduyɛ chuɛima ŋ suiinuŋ ndaŋ ma nɔ chuŋ kɛndɔɔ mbo hiau nyɛm chuŋ kɛndɛŋ nda duau o nyɛdiaa niŋndoŋ.
11 Num naŋ cho hunɔɔ challe o nɔɔ niŋndo, lɛma fula o waa niŋndaŋ ma cho taaliaŋndo o chɔchɔŋ numndoŋ.
Liaaŋ a milikiiyaŋ* ma cho o diɔɔmule numndeŋ bɛŋgu.Nduyɛ, nyɛla numndaŋ la cho chuŋ kɛndɔɔ naŋ chaa nyɛma chuŋ kɛndiaŋ Lebanɔŋ ni.
12 Num yema ni naŋ cho hunɔɔ challe o nɔɔ niŋndo, a cho ko maa kpele nda wou o kuŋgaa niŋndo,Kpele cho o baŋaa peŋ ndo, vɛlɛ a pee cho o baŋaa wo.
13 A cho ko maa kpele hɛnɛkɛ mapɔmɛkilanetiiyo,O nɔ komɔɔla kɛndɛ kɛndɛlaŋ, tɔlɔɔ hɛna wo, tɔlɔɔ naadi wo,
14 Bil lapeeŋgoo, keŋ,* a sinamɔŋ ndo.O nɔ vɛlɛ yɔmii chuŋ kɛndɛi suu o suu mɛɛ filaŋkiŋsɛŋ, mɔɔ, a aloo cho nuaa yɛ.Nduyɛ, yɔmii chuŋ kɛndɛ kɛndɛi cheleŋ cho vɛlɛ loŋ.
15 Kpele mamɛŋndo a sooŋ mamɛŋ kɛndɛ kɛndɔɔ ŋ cho ni,Mɛŋma fula Lebanɔŋ ndaŋ.
16 Hueiyii cho ba luaŋ ndo ve, tiondu.Nduyɛ hueiyii cho ba tou wo ve, huŋ.
Hɔŋ fɛ fɛ o kpele nuu niŋ.
Tosa mi chuŋ kɛndɛ ndɔɔ tiu silɔ.”
“Wana ya kaala wo huŋ o kpele ndɔɔ niŋ,Mbo de komɔɔla kɛndɛ kɛndɛla cho loŋ ndaŋ.”
