Chondii Sɔlɔmɔŋ Nde 5:1-16
-
Wana mandaa lasaa (1a)
-
Chuaa laanduaa Chulusalɛm (1b)
-
‘La luɛinuŋ o kaalaa niŋ yikpi!’
-
-
Chua laandoo (2-8)
-
O chɔm lɔma o sɔl laŋ
-
-
Chuaa laanduaa Chulusalɛm (9)
-
“Vɛɛnɛ wana ŋ kaala wo cho yɛ o sɔvɛ mbo hiau wanaa acheleŋnda a kaala wa?”
-
-
Chua laandoo (10-16)
-
“Te o sim pɛ puaa waalaŋ tɔ tɛɛŋ, mbo waŋnuŋ teŋgeŋ” (10)
-
5 “I luɛi o kpele nuu niŋ,Num yema ni naŋ cho hunɔɔ challe o nɔɔ niŋndo.
I kendi mɔɔ a tɔlɔɔ ni chuŋ kɛndɔɔ.
I de lɛma niaŋ, ma fula o waa maliɔɔ niŋ ndaŋ.I kol muɛima niaŋ a milikiima* niaŋ.”
“Chaaŋaa niaa kaalaa, la dio!
La kol nduyɛ mi la luɛinuŋ o kaalaa niŋ yikpi, mɛɛ muɛiyaŋ ma bii wana nuaa yɛ!”
2 “I cho o malɔ, kɛ kɔl nuu lɔl te.
I cho wana ya kaala wo tueiyɔɔ dioo kundɔɔ!”
“Kumbul la dioo, num yema ni ya kaala wo,Piiŋ nuu, num nɔ hoo sɔŋ te wo!
Bolleŋ le liwa ya kpou a mɔmndo.Yiiŋii cho ya o lebolle kpou liwa o nyumndaŋ niŋ.”
3 “‘I chii doma ni vilɛiyo soli.
Baa I miŋgiŋ ndu vɛlɛ lekɔɔ?
I chii peloŋ pulɔɔ.
Baa I kɔ nɔɔliaa muŋ vɛlɛ?’
4 Wana ni kaalaa soli ba ndoo wou o tɛɛŋgu cho o dioo wo,Nduyɛ mi kɔllo laasiaŋ ya kpou a kaala bɛndu pɛ ya o kɔl le ndu wo.
5 Mɛɛ ya chɛŋ le wana ya kaala wo dioo kumbul lo,Mi chuɛima mɔɔ waŋ ma taaliaŋ ya o laba,Mi ma tual la o sooŋ,Haaa mi ma fuuluu o nyɛ wana saa le dioo kumbioo wo.
6 Mi kumbul wana ya kaala wo dioo,Kɛ ndoo muliŋ niŋ mbo kuaŋnuŋ.
Mi tambu kɔllo tau, mɛɛ o kuɛŋnuŋ.
Mi nuuviaa ndu, kɛ I seeluŋ ndu le.
Mi veelu ndu, kɛ o mulul la le.
7 Wanaa mɛŋgɛla chioo wa lo balɔɔ ma saaluŋ ya.
Ma luaa ya, nduyɛ ma boli ya.
Mi puaa wa mɛŋgɛlaa o kpakioo choo wa chua kola wa ya o sayiaŋ ndo* ma kuaŋnuŋ a ndu.
8 Nya chuaa laanduaa Chulusalɛm, la mɛnaŋ naa ya chua:
Te la chil la wana ya kaala wo pɛ,La dimul ndu maa I naa a kaala ndɔ cho ya o kɔllo.”
9 “Num wana lanɔ kɛndɛ kɛndɔɔ hoo waŋ laanduaa tɛɛŋ,Vɛɛnɛ wana ŋ kaala wo cho yɛ o sɔvɛ mbo hiau wanaa acheleŋnda a kaala wa?
Vɛɛ kpe wana ŋ kaala wo cho yɛ o sɔvɛ mbo hiau wanaa acheleŋnda a kaala wa,Ma huŋ naa lueiyo o sendioo hoo bɛŋgu?”
10 “Wana ya kaala wo naŋ bɔɔ, nduyɛ o choŋnuŋ nyɛkɛndɛi o dialloŋ niŋ.Te o sim pɛ puaa waalaŋ tɔ tɛɛŋ, mbo waŋnuŋ teŋgeŋ.
11 Bolle ndɔleŋ le naŋ wana che pɛ aa kooliiye ni, koolii kɛndɛ kɛndɛi.
Mɛɛ hueiye wa nuaa hɔŋndo mi siɔɔla waulaŋ la hiŋnuŋ yɛ, lende yiinde cho ndu o lebol ni.Nduyɛ i cho i tiŋi naŋ chaa basabasakuendoo ni.
12 Hɔltaŋ la cho ndu ko mɛɛ piiŋnda wa nuaa ichali o pioo ikɛi,Ma puluŋ o milikiiyaŋ* niŋ,Nduyɛ ma wa ichali o mɛŋma tiilaŋma cho ma piaa cha waŋ ikɛi yɛ.
13 Kpaŋuŋ ndɔŋ cho ko naŋ chaa kpele cho o piaa cha a nyɛm chuŋ kɛndɔŋ ndo,Mɛɛ fondaŋ filioŋ nɔ tɔlɔɔla chuŋ kɛndɛlaŋ ndo cho nuaa yɛ.
Chɔchɔŋ ndɔŋ cho ko naŋ chaa pɔmbiaŋ ni, nduyɛ mi chuɛima mɔɔ waŋ ma wa taaliaa o muŋ.
14 Bala ndɔlaŋ la cho ko maa nyɛm tiilaŋ nda toosiaa a kooliiye, ma kumbu muŋ a kilisoluɛiyo ni.
Dembe ndɔɔ cho niŋgilaa naŋ chaa chiŋii kamaa nda kumbu a pou safaluɛɛ wo ni.
15 Lɔlula ndɔlaŋ la cho ko maa suŋgbuma nda toosiaa a pou mabuu wo, ma wou maŋ o nyɛ nda toosiaa a koolii kɛndɛ kɛndɛi le maŋ simioo wo niŋ.
Wana che ndu naŋɔɔ pɛ naŋ chaa Lebanɔŋ ni, nduyɛ o cho o vilɛi naŋ chaa yɔmii sida ve ni.
16 Nyɛ yeelɛiyo pila sondo ndɔɔ cho ni,Nduyɛ I kaala nyɛ o nyɛ cho a ndu okɔɔ.
Wana ya kaala wo cho hoo ni, chuaa laanduaa Chulusalɛm, wana ya kaala wo cho hoo ni.”
