Chondii Sɔlɔmɔŋ Nde 6:1-13
6 “Num wana lanɔ naŋ hoo naŋɔɔ bɛndoo waŋ laanduaa tɛɛŋ ndo,Kuɛɛnɛ wana ŋ kaala wo kuɛ yɛ?
Nɛɛ kuɛɛ o bii yɛ le miiŋgɔŋndo?
Ŋ yeema miŋ mala num ndu nuuviaa.”
2 “Wana ya kaala wo kuɛŋnuŋ o kpele ndɔɔ niŋ,Naa yɔmii chuŋ kɛndɛ kɛndɛi cho i hɔbɛi ya,Le saa nduaa mandaa o kpele koŋ niŋ,Nduyɛ mbo keenduu pɔmbiaŋ.
3 Wana ya kaala wo nɔ ya ni,Nduyɛ ya nɔ wana ya kaala wo ni.
O cho saa mandaa o pɔmbiaŋ tɛɛŋ.”
4 “Wana ya kaala wo, a naŋ bɔɔ naŋ chaa Tiɛɛsa* ni.Wana che num naŋɔɔ pɛ aa Chulusalɛm ni.Naŋɔɔ numndo cho ko mɛɛ puaa chɔuwa chuuŋgiaŋ nuaa le chɔuwo yɛ.
5 Faŋa ya hɔlte numndeŋ choo.Kanifuule te a nua ya pɛ, kɔllo laasiaŋ ya kpou.
Yiiŋii numnde cho ko naŋ chaa chuiŋaa kundaa ni,A cho pembii Kiliaadi ve tolɔɔ wa.
6 Chiŋuŋ numndo cho ŋ humbu fo fo,Naŋ chaa saa kundaa nda pulu wa ni.A ŋiɔɔŋ ŋiɔɔŋ nda kpou kuam ni,Nduyɛ o pilɛ bɛɛ viikuu le.
7 Kpaŋndoŋ cho num o kola waaŋgaa wo bɛŋgu,Naŋ chaa tɛndu lepɔmɛkilanetiiyo ni.
8 O yɔŋ bɛɛ mi laanduaa masaa wa 60,Mi laandaa nduaa pɔmbuaa wa 80,Nduyɛ mi waŋ laanduaa feleŋguaa wa a hɔbɛi a chuu chɔm te,
9 Kɛ o pilɛ kpe cho piiŋ nuu ni, o nɔ sɔŋ te wo.
Wana teŋgeŋndo o cho le kala ndɔ ni.
Nduyɛ wana velu ndu wo, ndu o hiou kaala kpou.
Te chuaa laanduaa che ndu pɛ, ma dimi sɔɔŋ kɛndɔŋ a ndu okɔɔ.Nduyɛ, mi laanduaa masaa a laandaa nduaa pɔmbuaa saŋgala ndu.
10 ‘Nɛɛ cho yɛ koŋ mbo wa wolioo naŋ chaa mɛɛ paaleŋ le fula idii yɛ ni,Mbo wa o kɛndɛ kɛndɛ naŋ chaa paŋgii tiilaŋnde ni?Nɛɛ cho yɛ koŋ mbo waŋnuŋ walaŋ naŋ chaa nyɛ teŋgaa lepalaa ni,Mi naŋɔɔ ndɔɔ wa mɛɛ puaa chɔuwa chuuŋgiaŋ nuaa o kola ndaa ikɛi yɛ?’”
11 “Mi kua o kpele yɔmii kuamɛi niŋ,Le mi che i sɛnɛi cho hindɔɔ o kpoloŋndo niŋnde,*Te yɔmii makilepiiye i peŋ,Ɔɔ te yɔmii pɔmɛkilanetiiye soli peeŋgelaŋ.
12 Tuupa mi sina a ndi okɔɔ,Mi yeemɛi ya nɔ le nyɔɔŋ muŋ chɔɔ ve,Kua a ya naa laŋgbaa niaa kalla nyɛm ndaŋ nyaanaŋ suaa naŋndoŋ cho wa.”
13 “Miiŋgu naŋnuŋ, miiŋgu naŋnuŋ, Oo chuaambɔ Sulamaitiinɔɔ!
Miiŋgu naŋnuŋ, miiŋgu naŋnuŋ,Le miŋ huŋ chɔɔlu naŋɔɔ numndo tofa!”
“Le yɛɛ nya yeema yɛ chuaambɔɔ Sulamaitiinɔɔ hoo tofaa?”
“O cho ko naŋ chaa kundalaŋ latiɔɔŋ la sim yolaŋ* ni!”
Tɛɛsiaalaŋ
^ Ɔɔ “Chiee Bɛndu Kɛndɛ Kɛndɔɔ.”
^ Ɔɔ “fondaŋ mɛŋndaŋ ma piɔl o kpoloŋndo niŋndo.”
^ Ɔɔ “yola Mahanɛm ndaŋ.”
