Chowɛɛ 1:1-20
1 Yooŋgu Chɛhowa ke Chowɛɛ,* po Pɛtuɛɛ wo cho hoo ni:
2 “La yaŋ nilaŋ, nya waŋ banaa.Nduyɛ, nya wanaa cho vɛlɛ o lɛŋndeŋ* niŋnda kpou, la yaŋ nilaŋ.
Kani bɛɛ i waa ndoo yɔŋnuŋ niŋ o boondii nyɛi niŋ,Ɔɔ o boondii finyaa nyaa mamaa niŋ?
3 La dimul chuauwaa nyaa a ndi okɔɔ,Mi chuauwaa nyaa dimul chuauwaa ndaa a ndi okɔɔ,Nduyɛ mi chuauwaa ndaa kaŋ bɛɛ dimul chuauwaa nda cho hunɔɔ violɔɔ wa.
4 Nyɛ o nyɛ soonuaa tɛɛmbaa latɔluaa mɛi, soonuaa kunda bɛnduaa huŋ dio.Nyɛ o nyɛ soonuaa kunda bɛnduaa mɛi, soonuaa villɔ la bɔɔ le wa huŋ dio.Nduyɛ nyɛ o nyɛ soonuaa villɔ la bɔɔ le wa mɛi, soonuaa tɛɛmbaa cheleŋ chii dio.
5 Nya wanaa kolaa, la tiondu, nduyɛ mi la chaŋ!
Nya wanaa kolaa mamuɛi ya, la chaŋ chaŋ imɔnɔɔ.Kanifuule, a soli nya muɛima yeelɛiyaŋ o lasondo.
6 Puaa chɔuwaa kpaaya bɛnduaa huŋ del lɛŋnde nileŋ choo, nduyɛ a chuu chɔm te.
Chiŋndoŋ nda maa chiŋuŋ kpɔkuŋ.* Nduyɛ wana che nda yaalolaŋ pɛ, aa yaalola kpɔkuŋndo* ni.
7 A chii yɔm ni makilepiiyo dio paku, nduyɛ peeleŋ bɛɛ le lo o yɔm ni mafikiiyo choo le.A chii ndi boolaŋ sɛɛluu o kɔɔ,Ma mɛi ndi isisi lende a nyaandaŋ taŋgasaa.
8 La chaŋ mi la bii mɔnɛi mɛɛ yufuaanɔɔ* wounuŋ nuaa nyɛla labɛkilaŋ mbo wa chaŋndo yɛ,Te po nda cho challe o nɔɔ niŋndo* mɛi ndu pɛ.
9 Waŋnda cho lɛ lakɔ a sala tɔlɔɔ kullo, vɛlɛ a sala mamuɛiyo o chiɛi Chɛhowa wo niŋ te.Wanaa soliaa lasalaa, wanaa cho wallo le Chɛhowa wa cho mɔnɛi biyɔɔ.
10 Chiɔɔŋ tambu, nduyɛ nyɛ o nyɛ niŋ ndɛ o lɛŋndeŋ choo le.Tɔlɔɔlaŋ la tambu, a sɔla lɛ muɛima sɛnɛi le, a sɔla vɛlɛ machuɛi le.
11 Wanaa tosa wali ichiɔɔ wa cho a kɔlta tambɛilaŋ, mi wanaa tosa kpelela makilepiilaŋ nda wa chaŋndaŋ.Kanifuule, witiiyoŋ a baliiyoŋ tambu,A sɔla nyɛ o nyɛ o chiɔɔŋ ndaŋ niŋ te.
12 Yɔm makilepiiyo vesa.Pei yɔm mafikiiyo chiɛɛluŋ.
Yɔm pɔmɛkilanetiiyo, wauwo,* yɔm apullo,A yɔm o yɔm cho yondoo niŋ chuu vesa.A tonya, kɔl kɛndɛ waŋnda simnuŋ siɔmbulaŋ.
13 Nya wanaa soliaa lasalaa, la wounuŋ nyɛla labɛkilaŋ mi la bii mɔnɛi.Nya tosa wallo o bandu luamaa lasalaa wa, la chaŋ chaŋ imɔnɔɔ.
La huŋ o chiɛi Mɛlɛkaa mi la lɔl a nyɛla labɛkilaŋ lekɔɔ, nya wanaa tosa wallo le Mɛlɛka nuu wa.Kanifuule, waŋnda cho lɛ hunɔɔ a sala ŋkullo, vɛlɛ a sala mamuɛiyo o chiɛi Mɛlɛka nyaa le.
14 La yonda le sumndo. La veelu waŋnda le bɔŋaŋ teŋgeŋndo.
La chuuŋgiaa waŋ bɛnduaa, a waŋnda kpou o lɛŋndeŋ niŋ diompilɛ.La chuuŋgiaa nda o chiɛi Chɛhowa Mɛlɛka nyaa, nduyɛ mi la chaŋ o Chɛhowa lo le malaa.
15 Paale kpundɛ leŋ le cho hunɔɔ!
Paale Chɛhowa leŋ le cho niŋ kpɛɛluŋ.Mɛlɛka Kpaaya Kpou Kpou Wo cho hunɔɔ a paaleŋ ndeŋ ni, nduyɛ le wa niŋ paale nyɛ tambɛi bɛndu!
16 O cho naa o hɔl te nda huŋ chua nyɛdiaa naa kpou le?Nyaale naŋ duaunuŋ o chiɛi Mɛlɛka naa niŋndo bɛɛ cho lɛ le.
17 Kuluŋ tualaŋ vesaŋ o puuloo bɛŋgu.*
Chiɛila nda kɛsi nyɛdiaa laŋ la cho fondo.
Kondalaŋ la cho koombiaa, kanifuule kulloŋ vesaŋ sɛɛŋ.
18 Chɔluaa kɛsɛ bɛɛ cho chaŋndaŋ!
Nauwa cho heeloo a tuusoo i lamlam nde, le bil nda dia wo.
Nduyɛ, saa bɛɛ cho saŋgaa kpeekpei.
19 Oo Chɛhowa, o numndo ya cho muliŋ ni le malaa.Kanifuule, yiŋndeŋ le chii bil puiyaa cho o pollo niŋndo lomɔɔ.Nduyɛ, yɔmii cho yondoo niŋnde bɛɛ kpou i chuu ŋɔ.
20 Visiaa yonduaa bɛɛ, a yeema num malaa o ba.Kanifuule, peela pɔmbɔlaŋ kpou la velaŋ sɛɛŋ.Nduyɛ, yiŋndeŋ le chii bil puiyaa cho o pollo niŋndo lomɔɔ.”
Tɛɛsiaalaŋ
^ Diolaŋ ndaŋ la sim, “Chɛhowa Cho Mɛlɛka Ni.”
^ Ɔɔ “chieeŋndo.”
^ Ɔɔ “yalakana.”
^ Ɔɔ “yalakanaa.”
^ Ɔɔ “chua laandoo.”
^ Ɔɔ “pɔnɔɔ.”
^ Wau suuwo hoo, o lɛŋnde Palɛstaŋ ndeŋ niŋ wana saaluŋ ndu tau ni.
^ Ɔɔ “vesaŋ o siɔbuiyo ɔɔ peeloo bɛŋgu.”
