Chowɛɛ 3:1-21
3 “O palɛi keŋ niŋ,Te I miŋgi pɛ wanaa wa o biyɔɔ niŋnda Chuda a Chulusalɛm,
2 I cho vɛlɛ lɛŋnde kpou chuuŋgiaa diompilɛ.Okoŋ, mi hiŋ a nda o Kpoloŋ* Chɛhosiafati* Wo niŋ.
Loŋ ya cho nda kɔɔsa ni,Le nyɛ nda tosal wanaa niaa a nyɛm niŋ kiɔɔŋ ndo, muŋ cho yɛ Isɔluɛiya ni.Ma sɛŋi nda o lɛŋnde niŋ kpou,Nduyɛ, ma piɔuviaŋ lɛŋnde nileŋ.
3 Ma wuu kooŋ le wanaa niaa piɔuviaŋndo.Mi ndaa pisi poombɔɔ le wana lanɔ tiamaa paawaa.*Nduyɛ, mi ndaa pisi chuaambɔɔ le muɛiyaŋ kolɔɔ.
4 Nya waŋnda Taaya, Saidɔŋ, a wana o wana cho o tanda Filiitiaa wo niŋ,Le yɛɛnɛ nya bɛɛ tosallɛ ya hei?
Baa nyɛ ya tosal nya ni mi la wa ya maa miŋgullo?
Te maa nya cho ya miŋgullo ni,Mɛɛ I cho lakɔ suŋ suŋ mi ya bɛɛ kɔ miŋgul nya ndu sɔŋgɔ koŋ.
5 Kanifuule, la chua kaniŋ niŋ humboŋ a kooliiyoŋ,Nduyɛ mi la kuaŋnuŋ a nyɛm niŋ baa kalaŋ sɔvɛ sɔviɔŋ o maaŋnda nyalaŋ niŋ.
6 La bii vɛlɛ waŋnda Chuda a Chulusalɛm mi la pisi nda Kilikiiya o ba,Le halikpeŋ ma kuɛ a nda landaŋ a lɛŋnde ndaleŋ.
7 Mi che ya kɔlaŋ le nda solioo wanaa nya pisi nda wa o ba,Nduyɛ mi miŋgul nya maa le nyɛ nya tosa wo.
8 I cho puaa nyaa a chuauwaa nyaa laanduaa pisi waŋnda Chuda o ba.Nduyɛ mi nda pisi nda puaa Siba o ba, lɛŋnde cho landaŋ a nya leŋ.Ya Chɛhowa pila dimi lende ni.
9 La dimul waŋnda kpou o lɛŋnde niŋ aa:
‘La bɛɛndiaŋ* le chɔuwo! La veelu puaa kpaayaa bɛnduaa!
La dimul puaa chɔuwa kpou le ma sɔɔŋguu ma kandu sɔŋgɔɔ!
10 La chɔu dɛndɛla nyala waalaŋ mɔɔŋ faŋndoŋ, nduyɛ mi la chɔu mɔɔŋ nya bɛɛndiaa tɔlɔɔlaŋ ndoŋ baltaŋ.
Wana kindu ŋdial te wo dimi aa: “I nɔ kpaayaa.”
11 Nya waŋnda o lɛŋii balu ve niŋ kpou, la chuuŋgiaŋ mi la maaliaŋ vellaa velle!’”
Oo Chɛhowa, yɔŋ kuubaa num aa kpaaya bɛnduaa o fondaŋ koŋ fɔ.
12 “La veelu lɛŋnde kpou mi i hiŋ o Kpoloŋ* Chɛhosiafati Wo niŋ.Loŋ ya cho wa ichali ni mi kɔɔsa a lɛŋii balu ve kpou.
13 La chua wɔlɔtɔɔ, kanifuule teleŋ kuauwaa fuuluu.
Kilepiiyaŋ ma cho ma piaa o doola,* lelaŋ la tol le maŋ nɛiyo.
Muɛiyaŋ ma pɛ o sooŋndo niŋ mi ma wa choŋndo. Dɛnɛ wɔɔŋ ndaa bɛɛ pɛ mbo choŋ.
14 Waŋnda cho faŋga bɛndu bɛndoo o kpoloŋ* kɔɔsɔɔ.Paale Chɛhowa leŋ le cho niŋ kpɛɛluŋ le waŋnda yamɛi kilullo o kpoloŋ* kɔɔsɔɔ.
15 Paaleŋ a paŋgei cho piimiaa kpilo,Nduyɛ mi looŋ bɛɛ yɔŋnuŋ yim yim.
16 Chɛhowa cho pɛɛliaa o Saayɔŋ niŋ.O cho deŋi choo choo o Chulusalɛm niŋ.
Choo choo a lɛŋndeŋ le cho hiilɔŋ.Kɛ Chɛhowa cho simnɔŋ naa viaŋnaŋnda le wanaa nduaa.Ndu cho wa naa viaŋnaŋaa kala kalaa le Isɔluɛi ni.
17 La cho sina maa ya cho Chɛhowa Mɛlɛka nyaa ni. Nduyɛ maa, ya cho ichali Saayɔŋ ni, pembii nii diandɛi.
Chulusalɛm cho simnɔŋ fondaŋ diandaa,Nduyɛ mialla* keeku lɛ niŋ loŋ kposoŋ te.
18 O paale leŋ choo, muɛima yeelɛiyaŋ ma cho wa tolɔɔ o pembuŋ bɛndoŋ mi ma deli tue tue.Milikiiyaŋ* ma cho wa taaliaa o pembuŋ pɔmbɔŋ choo.Peela pɔmbɔlaŋ kpou o Chuda niŋ la cho piɔ cha a mɛŋndaŋ.
Mɛŋndaŋ ma cho piɔl o chiɛi Chɛhowa wo mi ma simnuŋ pioo,Nduyɛ, mi pee koŋ kuɛ o Kpoloŋ Yɔmii Akeesiaa Ve.
19 Kɛ Ichipi ndu cho lo fondo,Mi Idɔm simnuŋ pollo, naa nyɛ o nyɛ ve niŋ te wa.Kanifuule, a chiee waŋnda Chuda biyɔɔ le,Nduyɛ, ma dii wanaa tosa isɔɔ o isɔɔ le wa o lɛŋnde leŋ niŋ.
20 Kɛ waŋnda cho wa Chuda le teleŋ o teleŋ.Nduyɛ, mi yuŋgulaŋ o yuŋgulaŋ niŋ la hiou lachi a waa Chulusalɛm.
21 Mi che bɛɛ tɔɔyaŋ kooma wanaa nda diu wa ma cho nda o lebol, kɛ I cho nda malɔɔ haki.Nduyɛ ya Chɛhowa pila cho wa o Saayɔŋ niŋ ni.”
Tɛɛsiaalaŋ
^ Ɔɔ “dɛŋgbɛ.”
^ O sim “Chɛhowa cho wana kialaa ŋyamaa ni.”
^ Ɔɔ “salaa.”
^ Ɔɔ “dindiŋ.”
^ Ɔɔ “dɛŋgbɛ.”
^ Ɔɔ “yindɛiyo.”
^ Ɔɔ “dɛŋgbɛ.”
^ Ɔɔ “dɛŋgbɛ.”
^ Ɔɔ “wanaa lekaa wa.”
^ Ɔɔ “nɔnɔɔ.”
