Daaniɛɛ 1:1-21
1 Wɔsi yaa ndɔ Chɛhowakim masaa le Chuda wa o masaleŋ choo wo, mi Nɛbukanɛɛsa masaa le Babilɔŋ huŋ Chulusalɛm, mbo luei ndu o piŋndo niŋ.
2 Mɛɛ teleŋ tiŋ hiou, mi Chɛhowa mal Chɛhowakim masaa le Chuda ndu o ba, latulu a nyɛm laandoŋ ŋtiŋ ŋ wa o chiɛi Mɛlɛka tonyaa niŋndoŋ, mbo kuaŋnuŋ a muŋ o lɛŋnde Sianaa* leŋ niŋ o chiɛi mɛlɛka ndɔɔ. Nduyɛ, mbo kɔ kɛsi muŋ o fondaŋ nda kɛsi nyɛm baa kalaŋ o chiɛi* mɛlɛka ndɔɔ niŋndoŋ.
3 Okoŋ kɔɔli, mi masaa dimul Asipenaasi, wana bɛndu wanaa wa wallo o chiɛi lemasaa niŋnda le mbo hiŋ a Isɔluɛiya* a tiŋ, taama taama a fula o yuŋgu lemasaa a o pulale laŋgbaa kalla choo wa.
4 Puaa haa ndaa nɔ ma wa feleŋguaa* nɔ lenamta le wa, ma wa nyɛkɛndɛi o dialloŋ niŋ, ma nɔ taasioo, kɔl kaloo, a sinapɛŋgoo, nduyɛ mi ndaa wa wanaa ndaa nɔla wallo tosaa o chiɛi lemasaa niŋnda. Ndoo nɔ mbo pɛɛku nda suɛi maŋgalɛi Kaadiaŋnda vɛlɛ a mɛɛ wana poonyiaa ndi yɛ.
5 Le handɔɔ lechoo, mi masaa kɛɛsiaa nyɛdiaa a muɛima ndaa nɔ ma wa solioo o nyɛdiaa lemasaa niŋ, ma wa nda kioo lepaa o lepaa wo. Ndaa nɔ ma sɔla pɛɛkoo* le wɔsilaŋ la yaa. Nduyɛ te teleŋ koŋ ndoo chuu pɛ, ndaa kandu niko wallo tosaa le masaa.
6 Apum wa puaa haa tɛɛŋ, fulaa o kaale Chuda leŋ* niŋ. Nda cho ni: Daaniɛɛ,* Hananaya,* Misiayɛɛ,* a Asaluaya.*
7 Mi wana bɛndu wanaa wa wallo o chiɛi lemasaa niŋnda ke nda diolaŋ.* Mbo ke Daaniɛɛ diolaŋ aa Bɛtisiaasa, mbo ke Hananaya diolaŋ aa Siɛduaa, mbo ke Misiayɛɛ diolaŋ aa Misiaki, nduyɛ mbo ke Asaluaya diolaŋ aa Abɛniko.
8 Mi Daaniɛɛ kɛɛsiaŋ o kɔl maa o cho ndupila nɔɔliaa a nyɛdiaa lemasaa, ɔɔ a muɛima masaa kol laŋ te. Le hei, mbo nyuna Asipenaasi le mbo chɛl ndu mbo fafaŋ ndupila nɔɔliaa o nɛi koŋ choo.
9 Mi Mɛlɛka tonyaa tosa mi Asipenaasi chɔm Daaniɛɛ kɛndɛi nduyɛ mbo tuiinuŋ ndu inyiɛɛ.
10 Kɛ mi Asipenaasi dimul Daaniɛɛ aa: “Siooŋnde cho ya le masanɔ nuu, kanifuule ndu kɛɛsiaa nyɛdiaa nya nɔ mi la de wo, a muɛima nya nɔ mi la kol laŋ ni. Te o wa yɛ mbo che maa la cho nyɛkɛndɛi o dialloŋ niŋ maa chaaŋaa nyaa feleŋguaa* nya cho wɔsiŋ pilɔŋ nda le? La cho tosa mi yoomu nuu* luɛi o kpundɔɔ niŋ masaa lachi.”
11 Kɛ mi Daaniɛɛ dimul wana Asipenaasi yulu iso le mbo wa ndu Daaniɛɛ, Hananaya, Misiayɛɛ, a Asaluaya hɔlteŋ ndo aa:
12 “Yandii, tofawɔ buɛiyaa numnda le palɛi tɔ, ma wa naa lamnda lapeelaŋ* kioo le dioo a mɛŋndaŋ le kolɔɔ,
13 okoŋ ma mɛɛndaŋ dialuŋ naŋ a dialuŋ feleŋguaa* cho nyɛdiaa lemasaa dioo wa, mi numpila kɛɛsiaa nyɛ ŋ cho tosa a buɛiyaa numnda wo a mɛɛ ŋ cho naa chɔ yɛ.”
14 Le hei mbo chɛl kɛɛsiaa ndaa, nduyɛ mbo tofa nda le palɛi tɔ.
15 Mɛɛ palɛi tɔ hiou, dialuŋ ndaŋ a kɛndiaa ndaa wa nyɛkɛndɛi mbo hiau feleŋguaa* wa nyɛdiaa lemasaa dioo wa kpou.
16 Le hei, mi wana wa nda hɔlteŋ ndo ndoo faŋa nyɛdiaa nda lemasaa a muɛiyaŋ, mi ndoo ke nda lamnda lapeelaŋ.
17 Nduyɛ mi Mɛlɛka tonyaa ke feleŋguaa* hiɔɔluaa haa kɔl kaloo, sinapɛŋgoo, a taasioo, le poonyiaa kɛ kɛ biyɔɔ bila. Nduyɛ, mbo ke Daaniɛɛ sinapɛŋgoo le yilaŋndoŋ a lɔma sɔlaama suu o suu biyɔɔ bila.
18 Mɛɛ teleŋ Masaa Nɛbukanɛɛsa kɛɛsiaa le ma kuɛ a nda o ndu lo wo fuuluu, mi Asipenaasi kua a nda naa ndu chua.
19 Mɛɛ masaa suukaŋ a nda, mbo cha maa wanaa wa o kunda koŋ niŋnda kpou, wana o wana ve maa Daaniɛɛ, Hananaya, Misiayɛɛ, a Asaluaya le. Okoŋ, ma hiau lachi a wallo tosaa le masaa.
20 Nyɛ o nyɛ masaa nyuna nda pɛ a taasioo vɛlɛ a sinapɛŋgoo okɔɔ, mi ndoo saaluŋ maa wanaa maŋgalaa a wanaa ŋwaŋ vilɛiyaa wa o masale ndɔleŋ bɛŋgu wa kpou, feleŋguaa haa ndaa bɛnda ma hiau nda bɛmbɔɔ tɔ.
21 Nduyɛ Daaniɛɛ lo loŋ haaa a wɔsi tase Sailɔɔ simnuŋ masaa wo.
Tɛɛsiaalaŋ
^ Koŋ cho ni, Babiloniaa.
^ Ɔɔ “maaŋ.”
^ Hibuluiye, “puaa Isɔluɛiya.”
^ Hibuluiye, “chuaambuaa.”
^ Ɔɔ naapum, “biyɔɔ kɛndɔɔ.”
^ Naapum diolaŋ ndaŋ la sim, “Nɛɛnɛ Cho Yɛ Maa Mɛlɛka?”
^ Diolaŋ ndaŋ la sim, “Chɛhowa Yɔŋgu Malaa.”
^ Diolaŋ ndaŋ la sim, “Chɛhowa Chɔm Nyiɛɛye.”
^ Diolaŋ ndaŋ la sim, “Mɛlɛka Cho Wana Ni Kialaa Ŋyamaa Ni.”
^ Hibuluiye, “puaa Chuda wa.”
^ Koŋ cho ni, diola Babiloniaŋnda.
^ Hibuluiye, “chuaambuaa.”
^ Hibuluiye, “bolle nileŋ.”
^ Diom maHibului nda soliŋ kpeku wo sim le tɔlɔɔla wana dia laŋ kpou.
^ Hibuluiye, “chuaambuaa.”
^ Hibuluiye, “chuaambuaa.”
^ Hibuluiye, “chuaambuaa.”
