Daaniɛɛ 10:1-21
10 Wɔsi yaa ndɔ Sailɔɔ masaa le Paasiaa wa o masaleŋ choo wo, mi Daaniɛɛ, o nda veelu vɛlɛ aa Bɛtisiaasa wo cha yilaŋnde. Yooŋgoo hoo wa tonya, nduyɛ a chɔulaba bɛndu bɛndoo okɔɔ o wa ni. Ma ke ndu sinapɛŋgoo a nyɛ o che hoo wo okɔɔ, nduyɛ mbo bii yooŋgoo bila.
2 A teleŋ koŋ, mi ya Daaniɛɛ bii mɔnɛi le lɔɔlaŋ la yaa kpulukuu.
3 O lɔɔla yaa laŋ ndaŋ bɛŋgu, I di nyɛdiaa sɔvɛ le, I di ŋvisi le, I kol muɛima le, nduyɛ I suiinuŋ machuɛi le.
4 O paŋgii tasei niŋ malɔ 24, I wa isisi o pee bɛndoo Tikili* kɔŋgɔ.
5 Mɛɛ ya heelu hɔlla, mi cha poo a nyɛla humbulaŋ ndu lekɔɔ, nduyɛ yaule ŋkooliile nda toosiaa Yufaasi leŋ le wa ndu o chaŋ.
6 Dialuŋ ndɔŋ wa maa pou kilisoluɛi, hɔlaa nduaa maa nyɛ ŋualalɛi ŋualalɛi, hɔlta ndɔlaŋ maa tɛŋgɛ leyiŋ, bala ndɔlaŋ a peluŋ ndɔŋ maa chiliŋii siaŋɛi kpɔlɔkɛiye,* nduyɛ wanaa tuei ndu diomndo pɛ, naŋ chaa waŋnda faŋga bɛndoo wa suɛi ni.
7 Ya Daaniɛɛ kinɛi che yilaŋnde hei ni, puaa wa a ya latulu wa chi yilaŋnde hei le. Kɛ mi siooŋii bɛnduei bii nda, ma nyaanuŋ ma kɔ vioŋnuŋ.
8 Okoŋ, mi lo yapilɛ kpeele. Mɛɛ ya che yilaŋii bɛnduei hei, mi yoomuaŋ ma chuu ya fo, mi hɔlaa niaa siŋgaŋ ya kpou, nduyɛ yaa nɔ lɛ kpaaya o kpaaya le.
9 Okoŋ, mi tuɛi ndu suɛi. Mɛɛ ya tuei ndu suɛi, mi del a hɔlla a kuumbaa lɛŋ, mi hiaunuŋ o luaŋ.
10 Kɛ mi baa pilaŋ ya, mbo hiiluu ya le mi baŋ bala nilaŋ a wulaŋ le mi chɛŋ.
11 Okoŋ kɔɔli, mbo dimul la aa:
“Oo Daaniɛɛ, num wana sɔvɛ sɔviɔɔ hoo, yaŋ nilaŋ ma tuei nyɛ ya nɔ le num dimullo wo. Chɔŋ niko ma sim, kanifuule naa num chua nda vem ya ni.”
Mɛɛ o dimul la hei, mi sim a nyiiyaa kpa kpa.
12 Okoŋ mbo dimul la aa: “Oo Daaniɛɛ, siooŋii bii num te, kanifuule piɛile numnde le tueinuŋ chɔŋ a teleŋ tase ŋ handu kɔllo le sɔɔŋ biyɔɔ bila, ma tusiŋ Mɛlɛka numndo o hɔl lo. Nduyɛ le saboo hoo ya hiŋ naa num chua ni.
13 Mi kiilanɔ cho le masaleŋ Paasiaa wo kuuna ya hiouwɔɔ le palɛi 21. Kɛ mi Maikɛɛ* kiilanɔɔ o pilɛ o kiilaa hiou kpou wa tɛɛŋ* huŋ le ya malaa. Loŋ ya wa ni masaa Paasiaa ikɛi.
14 I hiŋ le mi tosa ma bii bila nyɛ cho wanaa numndaŋ yɔŋnɔŋ o palɛi mɛɛlɛi niŋndo. Kanifuule yilaŋnde hei, a nyɛ cho hunɔɔ yɔŋnɔŋ o chilaŋ niŋndo okɔɔ i cho ni.”
15 Mɛɛ o dimul la diomndaŋ ndaŋ, mi naŋgu hɔlla lɛŋ nduyɛ I nɔla mi soo nyɛ o nyɛ le.
16 Mi wana wa koŋ maa wanachiee wo pilaŋ ya chɔchɔŋ, okoŋ mi kumbi sondoo mi dimul wana wa ya isisi lachi wo aa: “Masanɔ nuu, le yilaŋii ya che hei ve ya cho nyiiyaa nuaa ni, nduyɛ I nɔ lɛ kpaaya o kpaaya le.
17 Lelaŋ, vɛɛnɛ buɛi numndo nɔla yɛ suukaŋndo a num masanɔ nuu? Kanifuule kpaaya o kpaaya I nɔ lɛ le, nduyɛ yoomuaŋ bɛɛ I cho lɛ maŋ nɔla chua le.”
18 Mi wana wa hoo maa wanachiee wo pilaŋ ya vɛlɛ, mbo luei ya yoomuaŋ.
19 Mbo dimi aa: “Num wana sɔvɛ sɔviɔɔ hoo, siooŋii bii num te. Maa wa o kɔl nyulu niŋ fɔ! Nɔ dialuŋ kalaŋ. Num nɔ dialuŋ kalaŋ suee.” Mɛɛ o wa suɛi naa ya chua, mi sɔla vɛlɛ kpaayaa. Mi dimi aa: “Soo masanɔ nuu, kanifuule a luei ya yoomuaŋ.”
20 Okoŋ mbo nyuna aa: “A sina le sabu ya hiŋ ndo? I cho niko miiŋgu, mi kɔ sɔŋga a kiilanɔɔ le Paasiaa. Nduyɛ te I faŋaŋ dɔɔ pɛ, kiilanɔɔ le Kilisi cho hunɔɔ.
21 Kɛ a koŋ kpou, I cho num sɔɔŋ cho ŋ poonyiaa o yau tonyaa niŋndoŋ dimul. Wana o wana cho ya toolu o sɔɔŋ muŋ niŋ te, mɛɛ Maikɛɛ, kiilanɔ numndo.
Tɛɛsiaalaŋ
^ Hibuluiye, “Hidikɛɛ.”
^ Ɔɔ “kapa kpɔlɔkɛiyo.”
^ Diolaŋ ndaŋ la sim, “Nɛɛnɛ Cho yɛ Maa Mɛlɛka?”
^ Ɔɔ “kiilanɔɔ o kiilaa tasiaa tɛɛŋ.”
