Daaniɛɛ 11:1-45
11 Okoŋ mbo dimi aa: “Wɔsi tase Daaliɔɔ fula Midiaa wo wa o masaleŋ choo wo, mi sim le ndu yoomuaŋ lueiyo nduyɛ mi mala ndu.
2 Tonyaa nyɛ ya cho num hunɔɔ dimul lo cho ni:
“Masaa a yaa cho hunɔɔ chɔnɔŋ o Paasiaa niŋ, nduyɛ o hiɔɔlu ndɔɔ cho sullo deŋgela mbo hiou a tuaa kpou. Teleŋ sul ndɔɔ cho tosa mbo sɔla kpaayaa tau wo, o cho tosa mi nyɛ o nyɛ simul masaleŋ Kilisi.
3 “Masa kpaaya bɛndoo cho hunɔɔ chɔnɔŋ, mbo wa o masaleŋ choo a kpaaya bɛndoo, nduyɛ mbo tosa nyɛ o nyɛ mɛɛ o yeema yɛ.
4 Kɛ te o simnuŋ pɛ masaa, a cho masale ndɔleŋ piɔlɔɔ ma piɔu leŋ o chieeŋndo choo o kpeŋguŋ hiɔɔluŋ hueiye fula o choo choo niŋndoŋ. Kɛ o ve niŋ wanaa fula o pulale ndɔleŋ choo wa le nda cho leŋ piɔu le, nduyɛ wana o wana nɔ niŋ kpaayaa maa ndu le. Kanifuule, a cho masale ndɔleŋ suŋgɔɔ ma ke wanaa cheleŋ.
5 “Laŋgbaa nduaa kalla o pilɛ, koŋ cho ni, masa cho ba tou wo wo, cho kpaayaa sɔla. Kɛ wana cheleŋ cho kpaayaa sɔla mbo hiou ndu. O cho wa o masaleŋ choo a kpaaya bɛndoo mbo hiou ndu poloŋ.
6 “Te wɔsilaŋ la hiou pɛ latiŋ, a cho chɛlaŋndo tosa. Chua laandu masa cho ba tou wo wo cho hunɔɔ naa masa cho ba luaŋ ndo wo chua le chɛlaŋ kpeekpeiyo tosaa. Kɛ chua laandoo hoo kpaaya ndɔɔ cho ndu hiɔlɔŋ, nduyɛ masaa bɛɛ mi kpaaya ndɔɔ hɛluŋ ndu. A cho chua laandoo hoo malɔɔ wanaa cheleŋ o ba, latulu a wanaa hiŋ a ndu wa, wana velu ndu wo, vɛlɛ a wana wa ndu kpaayaa kioo a teleŋ koŋ ndo.
7 Kɛ lɛuvii cho piɔl o puunduŋ ndɔŋ nde cho lasisi o foofo ndɔɔ.* O cho hunɔɔ o puaa chɔuwa lo, mbo huŋ chiŋalaŋ fondaŋnda kala kalala masa cho ba luaŋ ndo wo, mbo simul nda a sɔŋgɔɔ, okoŋ mbo yem nda.
8 Nduyɛ mɛlɛkaa ndaa, piɔmaa ndaa ŋchiliŋnda,* nyɛm ndaŋ kɛndɛ kɛndɛŋ nda toosiaa a kaniŋ humboŋ vɛlɛ a kooliiyoŋ ndoŋ, a wanaa nda bii ya, o cho lakɔŋnɔŋ a nda Ichipi. Le wɔsiŋ bɔɔbɔɔ, o cho wa landaŋ a masa cho ba luaŋ ndo wo.
9 Masa cho ba luaŋ ndo wo cho hunɔɔ masale masa cho ba tou wo leŋ chiŋalaŋ, kɛ o cho miiŋgu o lɛŋnde ndɔleŋ niŋ.
10 “Puaa nduaa* cho bɛɛndiaŋ le chɔuwo, ma chuuŋgiaa puaa chɔuwa faŋga bɛndoo. O cho sɔɔŋguu mbo basu nyɛ o nyɛ, mɛɛ mɛŋma koŋgiaŋ ma kuaŋnuŋ nuaa a nyɔɔ yɛ. Kɛ o cho miiŋgu mbo lo kɔlaŋ a chɔuwo haaa mbo fuuluu o fondaŋnda ndɔla kala kalalaŋ.
11 “Masaa ba tou wo cho tuulu kɔl ŋama ŋama, nduyɛ mbo kuɛ le sɔŋgɔɔ a ndu, koŋ cho ni, masaa ba luaŋ ndo. O cho faŋga bɛndoo chuuŋgiaa naapilɛ, kɛ ma mal faŋga koŋ masa koŋ o ba.
12 Nduyɛ ma kuɛŋnuŋ a faŋga bɛndu koŋ. Yoŋgaa cho ndu luɛiyɔɔ o kɔl, nduyɛ mbo tosa mi waŋnda waalaŋ o waalaŋ niŋ sɔla piɔmndo. Kɛ, o soliŋ niŋ foofo ndɔ kpaaya bɛndu koŋ kpeku le.
13 “Masaa ba luaŋ ndo cho miiŋgu mbo kɔ chɔɔlu faŋga bɛndoo chuuŋgiaa mbo hiou o tasoo. Te wɔsioŋ ŋtiŋ hiou pɛ, mi teleŋndaŋ la fuuluu o mɛɛlulaŋ, o cho hunɔɔ a faŋga bɛndoo vɛlɛ a nyɔɔŋ tau tau.
14 O teleŋnda laŋ niŋ, wanaa bɔɔbɔɔ cho chɔnɔŋ ma simul masaa ba tou wo.
“Wanaa mɛli sɔŋgɔlaŋ wanaa numnda tɛɛŋ nda,* a cho nda dɛɛniaa le ma tosa mi yilaŋnde hei peeluŋ, kɛ a cho bumba.*
15 “Masaa ba luaŋ ndo cho hunɔɔ mbo luei chioo o piŋndo niŋ, okoŋ mbo bii chiee nda taŋgul o kala kala wo. Puaa chɔuwaa masaa ba tou wo a puaa nduaa o hɛli wa cho chɔnɔŋ le sɔŋgɔ le, kanifuule a nɔ niŋ kpaaya o kpaaya le nda simul te.
16 Wana cho ndu hunɔɔ chiŋalaŋndo tosa niŋ nyɛ o hɛnaŋ ndo, nduyɛ wana o wana nɔla niŋ mbo sim ndu lachi le. O cho lasisi o Lɛŋnde Kɛndɛleŋ niŋ, nduyɛ o nɔ niŋ kpaayaa le waŋnda tɛɛmbuuwo.
17 O cho kɛɛsiaa a kɔl ndɔɔ kpou le mbo hiŋ a masale ndɔle kpaaya bɛndu leŋ, nduyɛ ma tosa chɛlaŋ kpeekpeiyo a ndu, okoŋ mbo tosa nyɛ. Kɛ chua laandu waŋ laanduaa ndu, a cho ndu malɔɔ ndu o ba mbo tɛɛmbuu ndu. Chuaa hoo sɔla niŋ batiuwaa le, nduyɛ o hiu niŋ lachi a waa le ndu le.
18 O cho hɔlla muli o kɔŋgɔla pee mɛŋma ihɛllo, nduyɛ mbo bii wanaa bɔɔbɔɔ. Wana bɛndu puaa chɔuwa o pum cho hunɔɔ, mbo huŋ tosa mi yoŋga o cho kiolɔɔ wo mɛɛlu. Wana bɛndoo hoo cho tosa mi yoŋga koŋ miiŋgu wana koŋ choo.
19 Okoŋ o cho hɔlla muli o fondaŋnda kala kalalaŋ o lɛŋnde ndɔleŋ niŋ, mbo boŋ mbo del, nduyɛ a seeluŋ ndu niŋ te.
20 “Waŋndo cho miiŋgu o foofo ndɔɔ, o tosa ma biu biu waŋnda nyɔɔŋ o ba wo,* mbo keeku o masale ndɔle kɛndɛleŋ niŋ. Kɛ te palɛi tiŋ hiou pɛ, o cho piɔmndo sɔla, kɛ o ve niŋ o sɔŋgɔ niŋ te, kɛlɛŋgaa niŋ te o chɔuwo.
21 “Wana fondoo cho miiŋgu o foofo ndɔɔ, nduyɛ a ke niŋ ndu kpaaya lemasaa le. O cho hunɔɔ a teleŋ kɔl nyuloo,* okoŋ mbo soliŋ diomnda yeelɛilaŋ kpeku le masaleŋ biyɔɔ.
22 O cho tosa mi puaa chɔuwaa cho maa mɛŋma koŋgi bɛndu wa wa ndu o ba bɛŋgu. Nduyɛ o cho nda tɛɛmbuu, mbo dii vɛlɛ Simlachinɔ cho le kpemaa wo.
23 Le mɛɛ nda tosa chɛlaŋndo a ndu yɛ, o cho hiouwɔɔ lachi a nda huiyo, okoŋ mbo chɛŋ mi waŋnda kunda pɔmbɔɔ mala ndu mbo simnuŋ wana kpaaya bɛndu.
24 A teleŋ kɔl nyuloo,* o cho hunɔɔ o fondaŋnda sultaŋ la cho tau o tandaa niŋndo, okoŋ mbo tosa nyɛ finyaa nduaa a finyaa nduaa mamaa tosa bɛɛ le wo. O cho nyɔɔŋ puŋga mbo piɔu piɔu muŋ waŋnda. O cho kɛɛsiaala ndɔla wɔɔŋndaŋ soliŋ kpeku le fondaŋnda nda taŋgul la kala kala laŋ chiŋalaŋndo, kɛ le teleŋndo o pilɛ kpe o cho hei tosa ni.
25 “O cho kpaaya ndɔɔ chuuŋgiaa, nduyɛ mbo kɛɛsiaŋ o kɔl le masaa ba tou wo chiŋalaŋndo a puaa chɔuwa faŋga bɛndoo, nduyɛ masaa ba tou wo bɛɛ cho bɛɛndiaŋ le chɔuwo a puaa nduaa chɔuwaa kpaaya bɛnduaa cho tau tau wa. Le mɛɛ nda cho kɛɛsiaala wɔɔŋndaŋ tosa le ndu simullo yɛ, o sɔla niŋ batiuwaa le.
26 Wanaa cho nyɛdiaa ndɔ lemasaa dioo wa tosa niŋ ni mbo del.
“Kɛ puaa nduaa chɔuwa nda, a cho nda basɔɔ, nduyɛ ma diu diu a bɔɔbɔɔ.
27 “Kɛ masaa ŋiɔɔŋnda haa nda, a nɔ niŋ yiyaŋndo o lakɔl le sɔɔŋ wɔɔŋndoŋ tosaa. A cho wa ichali o tibii* pilɔɔ choo ma wa choolaŋ dimulaŋndo. Kɛ batiuwaa sɔlaŋ niŋ te, kanifuule mɛɛlulaŋ la cho hunɔɔ a teleŋ Mɛlɛka kɛɛsiaa wo.
28 “O cho miiŋgu o lɛŋnde ndɔleŋ niŋ a nyɔɔŋ ŋ hɔbɛi, nduyɛ mi kɔl ndɔɔ nyindu ndu le mbo simul kpema diandaa. O cho nyɛ tosa, nduyɛ mbo miiŋguŋ o lɛŋnde ndɔleŋ niŋ.
29 “Te teleŋ Mɛlɛka kɛɛsiaa wo fuuluu pɛ, o cho miiŋgu mbo huŋ simul masaa ba tou wo. Kɛ teleŋndo hoo ve niŋ maa o tasoo le,
30 kanifuule dɛndɛlaŋ Kitim la cho hunɔɔ ndu chiŋalaŋ, okoŋ ma tusi ndu siɔmbulaŋ.
“O cho miiŋgu mbo kɔ tusi kɔl ndɔ tuuwo kpema diandaa choo, nduyɛ mbo tosa nyɛ. O cho miiŋgu pila mbo handu kɔllo wanaa cho kpema diandaa malɔɔ wa choo.
31 Nduyɛ puaa chɔuwa cho chɔnɔŋ o ndu lo ma tɛɛmbuu chiɛi Mɛlɛkaa, fondaŋ nda taŋgul o kala kala wo, nduyɛ ma faŋa sala nda soli teleŋ o teleŋ ndo.
“Okoŋ, a cho nyɛ nɔɔlɛi tɛɛmbuu nyɔɔŋ ndo simi o fondaŋ koŋ.
32 “Wanaa cho sɔɔŋ dɛnɛ wɔɔŋndoŋ tosaa le kpemaa simullo wa, o cho sɔɔŋ yeelɛiyoŋ soliŋ kpeku le mbo tosa nda ma mal tonyaa. Kɛ wanaa sina Mɛlɛka ndaa wa cho batiuwaa sɔla, okoŋ ma tosa nyɛ.
33 Wanaa nɔ sina pɛŋgoo waŋnda tɛɛŋ nda cho tosa mi wanaa bɔɔbɔɔ bii sɔɔŋ bila. Le palɛi i pum, a cho tosa mi a bɔɔbɔɔ boŋi. Apum cho wu a muɛi faŋnde, apum a yiŋndeŋ, a cho lakɔ a apum o biyɔɔ niŋ, nduyɛ ma del apum choo.
34 Kɛ a tosa pɛ ma boŋ, a sɔla niŋ mala pɔmbɔ. A cho diomnda yeelɛilaŋ soliŋ kpeku, le ma tosa mi wanaa bɔɔbɔɔ tol nda kɔɔli.
35 Nduyɛ wanaa nɔ haa sinapɛŋgoo wa apum cho boŋ, le halikpeŋ ma dɔu waŋnda o tofaa bɛŋgu le nda dindioo, nduyɛ ma simnuŋ a diandaa fo fo haaa a teleŋ mɛɛlaa. Kanifuule, hei cho yɔŋnɔŋ a teleŋ Mɛlɛka kɛɛsiaa wo.
36 “Masaa cho tosa nyɛ o yeema wo, mbo kelu yoŋgaa, okoŋ mbo heeluŋ mɛlɛka kɛ kɛ choo, nduyɛ mbo dimi sɔɔŋ kɔndɔfilloŋ a Mɛlɛka hiou mɛlɛkaa kpou wo okɔɔ le ndu simullo. O cho lo batiuwaa sɔlaa haaa mi kɔl ndɔ tuuwo fuuluu o mɛɛlulaŋ, kanifuule nyɛ kɛɛsiaŋ ndo nɔ mbo yɔŋnuŋ.
37 O chɔm niŋ lebɛɛ le Mɛlɛka finyaa nduaa le, kɛlɛŋgaa niŋ te mbo chɔm bɛɛleŋ le yeemɛi waŋ laanduaa ɔɔ mɛlɛka cheleŋ. Kɛ o cho chuaŋnɔŋ, mbo heeluŋ wana o wana choo.
38 O cho saŋgalaa yɔŋgu o mɛlɛka fondaŋnda kala kalaa lo, mɛlɛka finyaa nduaa ndaa sina le wo. O cho ndu bɛɛleŋ ke a kooliiyoŋ, kaniŋ humboŋ, pouta baa kala laŋ, a nyɛm sɔvɛ sɔviɔŋ.
39 O cho nyɛ tosa le mbo chiŋalaŋ fondaŋnda nda taŋgul la kala kalalaŋ, a mɛlɛka o sina le wo. Wana o wana ke ndu bɛɛleŋ pɛ, o cho nda saŋgala tau tau, nduyɛ mbo siiŋguu nda masaa wanaa bɔɔbɔɔ choo. O cho wa waŋnda lɛŋndeŋ kioo, te a paawa* pɛ nyɛ kpeekpei yeemaŋ ndo.
40 “O teleŋ mɛɛlaa niŋ, masaa ba tou wo cho chɔnɔŋ le nyiindaŋndo nda masaa ba luaŋ ndo. Nduyɛ masaa ba luaŋ ndo bɛɛ cho chuuŋgiaa nyɛm nyaanaŋ suaa naŋndoŋ, wanaa nyaanuŋ suaa wa, a dɛndɛla mamɛŋnda bɔɔbɔɔ le ndu simullo. Nduyɛ o cho luɛiyɔɔ o lɛŋnde niŋ mbo basu ndi mɛɛ mɛŋma koŋgi bɛnduaŋ ma basu nuaa nyɔɔŋ yɛ.
41 O cho luɛiyɔɔ o Lɛŋnde Kɛndɛleŋ niŋ, nduyɛ mi lɛŋii bɔɔbɔɔ sɔla tambei. Kɛ lɛŋii cho ndu hiɔlɔŋ o ba ve cho hei ni: Idɔm, Mowaabi, a fondaŋ sɔvɛ sɔvɛ Amɔnaitiiya.
42 O cho hiouwɔɔ lachi a ba ndɔɔ siɛndioo le lɛŋii cheleŋnde chiŋalaŋndo. Kɛ Ichipi ndu, o nɔla niŋ mbo hɛluŋ te.
43 O cho wa masaa nyɛm baa kalaŋ cho ŋ viaŋaa Ichipi woŋ kpou choo, muŋ cho yɛ kooliiyoŋ, kaniŋ humboŋ, a nyɛm sɔvɛ sɔvɛŋ cheleŋ ni. Nduyɛ, Liibiaŋnda a Itoopiaŋnda cho nda tolɔɔ kɔɔli.
44 “Kɛ kona cho chɔnɔŋ ba paaleŋ le chaŋ ndo a ba luaŋ ndo wo cho ndu paaliaŋ. Hei cho tosa mbo kuɛ a kɔl tuu bɛndu bɛndoo mbo tɛɛmbuu wanaa bɔɔbɔɔ.
45 Nduyɛ o cho tɛndiila ndɔla lemasalaŋ kindɔɔ pee bɛndu mɛŋma ihɛllo a pembii diandɛi Lɛŋnde Kɛndɛleŋ tɛɛŋ. Kɛ o mɛɛlulaŋ kpɔŋ, mi mɛɛlula ndɔlaŋ la fuuluu, nduyɛ wana o wana ve niŋ le ndu mala le.
Tɛɛsiaalaŋ
^ Naapum a cho suɛi a masa cho ba tou wo wo.
^ Ɔɔ “piɔmaa nda toosiaa a chiliŋii teeŋgiɛi ya.”
^ Naapum a cho suɛi a masa cho ba luaŋ ndo wo.
^ Ɔɔ “Puaa wanaa del waŋnda choo wanaa numnda tɛɛŋ nda.”
^ Hibuluiye, “a cho boŋ.”
^ “Wana tosa ma biu biu waŋnda nyɔɔŋ o ba wo,” naapum o wa paawaa ɔɔ muloo, ɔɔ wana baŋ waŋnda le wallo wo.
^ Ɔɔ naapum, “a teleŋ waŋnda ve niŋ kɔl te wo.”
^ Ɔɔ naapum, “A teleŋ waŋnda ve niŋ kɔl te wo.”
^ Ɔɔ “tabali.”
^ Ɔɔ “sala.”
