Daaniɛɛ 12:1-13
12 “A teleŋ koŋ, Maikɛɛ* cho lasisi. Ndu cho kiilanɔ bɛndu cho simndaŋ le wanaa numnda* wo ni. Nduyɛ nyɛpalaa wa niŋ a boondii keŋ ndo, chɔŋ a teleŋ kaaleŋ le kilaŋ ndo haaa a teleŋ nyɛpalaa koŋ, nyɛpalaa waa lende yɔŋnuŋ ndɔ le. A teleŋ koŋ, wanaa numnda cho hiɔlɔŋ, wana o wana diola ndɔlaŋ la cho la poonyiaa o yauwo niŋ.
2 Wanaa bɔɔbɔɔ cho o luaŋ o puuloo bɛŋgu wa cho hunɔɔ tiondɔɔ. Apum cho sɔla yoomu fafɛɛŋndo, mi apum sɔla siɔmbulaŋ vɛlɛ a bɛɛla tambɛilaŋ le fɛɛŋ a fɛɛŋ.
3 “Wanaa nɔ sinapɛŋgoo wa cho wa diondɔɔ mɛɛ nyɛ teŋgaa diandu nuaa o halaa niŋ yɛ. Wanaa cho wanaa bɔɔbɔɔ malaa le nɛi sakpoo tolɔɔ kɔɔli wa cho wa maa looŋ le fɛɛŋ a fɛɛŋ.
4 “Kɛ num Daaniɛɛ, kɛsi diomndaŋ ndaŋ ma veŋ ndaŋ kpiŋ. Kinda yauwo hoo haaa a teleŋ mɛɛlaa. Wanaa bɔɔbɔɔ cho wa heeloo a tuusoo,* kɛ kɔl kalu kpeekpeiyo cho wa o hɔbɛi.”
5 Okoŋ, mɛɛ ya Daaniɛɛ heelu hɔlla, mi cha wanaa ŋiɔɔŋaa cheleŋ isisi loŋ. Waŋndo o pilɛ wa o pioo kɔŋgɔ kpeŋgei i pilɛ, mi o pilɔɔ wa o kɔŋgɔɔ o pilɔɔ.
6 Mi o pilɛ nyuna wana wa o nyɛla humbulaŋ niŋ mbo wa o mɛŋndaŋ choo wo aa: “Vɛɛ kpɛ teleŋndo cho yɛ viouwɔɔ le mi sɔɔŋ kɔndɔfiliŋ bɛndoŋ muŋ fuuluu o mɛɛlulaŋ?”
7 Okoŋ, mi wana wa o nyɛla humbulaŋ niŋ mbo wa o mɛŋndaŋ choo wo heelu ba kɛndɔɔ a ba miallo choo choo, nduyɛ mi tuɛi mbo mɛnaŋ o wana cho le fɛɛŋ a fɛɛŋ ndo lo aa: “O cho lo haaa mi teleŋ Mɛlɛka kɛɛsiaa wo fuuluu, teleŋnda o kɛɛsiaa laŋ, vɛlɛ a teleŋndo tɛndaa tɛɛŋ.* Dimioo nuaa mi teleŋ nda cho kpaaya wanaa diandaa tɛɛmbuu wo fuuluu o mɛɛlulaŋ, sɔɔŋ muŋ kpou cho fuuluu o mɛɛlula ndɔlaŋ.”
8 Kɛ ya ya, mi tuɛi sɔɔŋ muŋ, kɛ I bii muŋ bila le. Lelaŋ mi nyuna aa: “Oo masanɔ nuu, yɛɛ wa yɛ niŋ fulamakɔɔlioo le sɔɔŋ muŋ kpou?”
9 Okoŋ mbo dimi aa: “Kɔ Daaniɛɛ, kanifuule diomndaŋ ndaŋ la nɔ mi la wa la viaŋaa. Kinda laŋ kpiŋ haaa a teleŋ mɛɛlaa.
10 Wanaa bɔɔbɔɔ cho ndapila dindi, ma simnuŋ a diandaa fo fo, nduyɛ ma keeku o tofaa bɛŋgu. Wanaa dɛnɛ wɔɔŋnda cho wa sɔɔŋ dɛnɛ wɔɔŋndoŋ tosaa. Wana dɛnɛ wɔɔŋndo o pilɛ bɛɛ bii niŋ sɔɔŋ bila le. Kɛ wanaa nɔ sinapɛŋgoo wa cho sɔɔŋ biyɔɔ bila.
11 “Chɔŋ a teleŋ nda faŋa sala nda soli teleŋ o teleŋ ndo, ma miŋgi nyɛ nɔɔlɛi tɛɛmbuu nyɔɔŋ ndo o fondaŋ ndɔɔ wo, o cho chua palɛi 1,290.
12 “Kɔl kɛndɔɔ cho le wana cho lo chumndo haaa mi palɛi 1,335 fuuluu wo!
13 “Kɛ num, hiou lachi a kɔlaŋ haaa o mɛɛlulaŋ. A cho pɛŋgi, kɛ te palɛi fuuluu pɛ o mɛɛlulaŋ, a cho chɔnɔŋ ma sɔla fondaŋ numndo.”
Tɛɛsiaalaŋ
^ Diolaŋ ndaŋ la sim, “Nɛɛ Cho yɛ Maa Mɛlɛka?”
^ Hibuluiye, “chuauwaa wanaa numnda.”
^ Ɔɔ “cho ndu tofa [koŋ cho ni, yauwo] nyɛkɛndɛi.”
^ Koŋ cho ni, teleŋndaŋ la yaa a tɛndaa tɛɛŋ.
