Daaniɛɛ 4:1-37
4 “Nyɛ Masaa Nɛbukanɛɛsa poonyial waŋnda, kaalaŋ a isɔɔ o isɔɔ maŋgalaa wa o lɛŋndeŋ choo wo cho hoo ni: Maa la wa o kɔl nyulu niŋ fɔ!
2 I cho a kɔl kɛndɛ le mi dimul nya sɔɔŋ kaamaŋ a sɔɔŋ kɔndɔfiliŋ Mɛlɛka Hiou Kpou Wo chɔm ya woŋ.
3 Kaamaala Mɛlɛka laŋ la cho la bɛndu, nduyɛ sɔɔŋ ndɔŋ kɔndɔfilloŋ nɔ bɔɔ kpaayaa! Masale ndɔleŋ, masale cho le fɛɛŋ a fɛɛŋ ndeŋ le cho ni, nduyɛ o cho wa o masaleŋ choo le fɛɛŋ a fɛɛŋ.
4 “Ya Nɛbukanɛɛsa, I waŋnuŋ hɛnɛkɛ o ya lo chiɛiniŋ, nduyɛ mi wa o sul nuu choo o chiɛi ni lemasaa niŋ.
5 Mi sɔl luaŋ, nduyɛ mi ma tosa mi siooŋnde bii ya. I wa ihini o kpele nuu choo, mi nyɛm ya che o yilaŋndoŋ niŋndoŋ luei ya siooŋnde tau tau.
6 Lelaŋ, mi viam waŋnda le ma dimul wanaa taasiaa kpou o Babilɔŋ niŋ le ma huŋ tɛɛsial la nyɛ lɔma sɔlaŋ maŋ ma sim ndo.
7 “A teleŋ koŋ, mi wanaa maŋgalaa, wanaa ŋwaŋ vilɛiya, Kaadiaŋnda,* a wanaa pɛɛku a looŋ okɔɔ wa huŋ naa ya chua. Mɛɛ ya dimul nda lɔma ya sɔl laŋ, wana o wana nɔla mbo tɛɛsiaa maŋ mi sina nyɛ ma sim ndo le.
8 O mɛɛlulaŋ kpɔŋ, ma huŋ a Daaniɛɛ mbo huŋ sim ya lachi. Ndu ndoo nɔ vɛlɛ diolaŋ ni aa Bɛtisiaasa, o diola mɛlɛka nuu la wa choo wo. Nyina mɛlɛkaa diandaa wa a ndu latulu, okoŋ mi dimul ndu lɔma sɔlaŋ maŋ:
9 “‘Oo Bɛtisiaasa, num cho bolleŋ le wanaa maŋgalaa wo, I sina maa nyina mɛlɛkaa diandaa cho a num latulu, nduyɛ suɛi viaŋnaŋ kɛ kɛ kindu a num te. Dimul la yilaŋuŋ ya che o lɔma sɔlaama niaŋ niŋndo, nduyɛ ma chɔm ya tɛɛsiaa ndɔɔ.
10 “‘I wa ihini o kpele nuu choo, mi cha yilaŋndoŋ. O yilaŋndoŋ muŋ niŋ, mi cha yɔmndo isisi o chieeŋndo tɛɛŋ, nduyɛ ndoo hiu ba a bandei.
11 Mi yɔmndo hoo hindu, mbo simnuŋ o bɛndu bɛndu, nduyɛ mbo bandu haaa mbo fuuluu o choo choo niŋ. Wanaa lo ba o ba fee o lɛŋndeŋ choo ma che ndu.
12 Yɔmndo hoo wa o puiyaa tɛɛ tɛɛ, nduyɛ komɔɔ pila ndoo kom ni. Nyɛdiaa wa lechoo le wana o wana. O wunduma nduaŋ bɛŋgu visiaa yonduaa ndaa huŋ hinilaŋ ni, nduyɛ o lɛuwuŋ ndɔŋ choo youwaa balu choo choo wa ndaa chal ni. O yɔmndo hoo nyaa yoomaa kpou ndaa sɔla nyɛdiaa ni.
13 “‘I wa ihini o kpele nuu choo, mi cha kiilanɔ diandaa Mɛlɛkaa o yilaŋndoŋ muŋ niŋ, o wa chɔnɔŋndo choo choo mbo wa tolɔɔ lɛŋ.
14 Mbo dimi choo choo kpeleŋ aa: “La kioŋ yɔmndo hoo, mi la kili kili lɛuwuŋ ndɔŋ, mi la chiɛɛluu pei nduɛi, nduyɛ mi la sɛŋi kɔmnde ndɔleŋ, le mi visiaa cho lebɛŋgu wa a youwaa cho o lɛuwuŋ ndɔŋ choo wa nyaanuŋ.
15 La mal chiyii nduɛi a puunduŋ ndɔŋ ŋ luɛiyaa lɛŋ, kɛ mi la yii ndi a chiliŋnde vɛlɛ a chiliŋii siaŋɛi,* mi la mal ndi lende a puunduŋ ndɔŋ ŋ luɛiyaa lɛŋ o billo niŋ yondoo niŋ. Mɔm cho chɔnɔŋndo choo choo wo wa chiiye hei liiviaa, nduyɛ mi i wa yondoo niŋ latulu nda visiaa yonduaa cho o lɛŋndeŋ choo wa.
16 Kɔl iwana chieeyaa fula chiiye hei niŋ, mi kɔl ivisiyaa miiŋgu ndi niŋ. La mal ndi lende haaa mi teleŋndaŋ la ŋɔmmɛu hiou ndi choo.
17 Nyɛ kiilaa Mɛlɛkaa yonda wo cho hoo ni, nduyɛ yamɛi kiilaa diandaa kelu ve cho hei ni, le halikpeŋ mi wanaa cho o chieeŋndo choo wa sina maa Mɛlɛka Hiou Kpou Wo cho masaa le masale waŋnda chieeya ni. Wana o wana o yeema pɛ, ndu o ke masaleŋ ni. Hali wana waŋnda chi bɛɛ o sɔvɛ le wo, mbo siiŋguu ndu masaa.”
18 “‘Lɔma ya Masaa Nɛbukanɛɛsa sɔl laŋ ma cho maŋ ni. Lelaŋ num Bɛtisiaasa, tɛɛsial la nyɛ ma sim ndo. Wanaa taasiaa o masale nileŋ niŋ kpou, a bumba ya tɛɛsiallo nyɛ lɔma sɔlaŋ maŋ ma sim ndo. Kɛ num a nɔla ma tɛɛsiaa maŋ, kanifuule nyina mɛlɛkaa diandaa cho a num latulu.’
19 “A teleŋ koŋ, mi Daaniɛɛ o ndaa veelu vɛlɛ aa Bɛtisiaasa wo mei doŋ, nduyɛ mi nyɛ o wa yiyaŋndo choo wo luei ndu siooŋnde.
“Mi masaa dimi aa, ‘Bɛtisiaasa, lɔma sɔlaŋ maŋ a tɛɛsiaa ndɔɔ tosa mi siooŋnde bii num te.’
“Mi Bɛtisiaasa muli aa, ‘Oo masanɔ nuu, maa lɔma sɔlaŋ maŋ ma wa le wanaa tul num leyɛ wa, nduyɛ mi tɛɛsiaa ndɔɔ peeluŋ a yaamɔɔwaa numnda.
20 “‘Yɔm ŋ che hoo mbo hindu mbo simnuŋ o bɛndu bɛndu, mbo wa o kala poŋ, mbo bandu haaa mbo fuuluu o choo choo niŋ, nduyɛ wanaa lo ba o ba fee o lɛŋndeŋ choo ma che ndu wo,
21 yɔm wa hoo o puiyaa tɛɛ tɛɛ, nduyɛ mbo kuam komɔɔ pila, mbo nɔ nyɛdiaa le wana o wana, mi visiaa yonduaa ndaa huŋ hinilaŋ o wunduma nduaŋ bɛŋgu, nduyɛ mi youwaa balu o choo choo niŋnda ndaa chal o lɛuwuŋ ndɔŋ choo wo,
22 fallo masaa, num sim le yɔmndo hoo ni. Kanifuule a simnuŋ o bɛndu, ma simnuŋ wana kpaaya bɛndu, nduyɛ mi tɔɔmayɛi numnde fuuluu o choo choo niŋ di, mi masale numndeŋ le pɛŋgɛlaŋ ba o ba fee o lɛŋndeŋ choo.
23 “‘Okoŋ kɔɔli, mi masaa cha kiilanɔ diandaa Mɛlɛkaa, o wa chɔnɔŋndo o choo choo niŋ mbo wa tolɔɔ lɛŋ. Mbo wa dimioo aa: “La kioŋ yɔmndo hoo mi la tɛɛmbuu ndu. Kɛ la mal chiyii nduɛi a puunduŋ ndɔŋ ŋ luɛiyaa lɛŋ, mi la yii ndi a chiliŋnde vɛlɛ a chiliŋii siaŋɛi, mi la mal ndi lende a puunduŋ ndɔŋ ŋ luɛiyaa lɛŋ o billo niŋ yondoo niŋ. Mɔm cho chɔnɔŋndo choo choo wo wa ndi liiviaa, nduyɛ mi i wa nda visiaa yonduaa cho o chieeŋndo choo wa latulu yondoo niŋ, haaa mi teleŋndaŋ la ŋɔmmɛu hiou ndi choo.”
24 Tɛɛsiaa ndɔɔ cho hoo ni fallo masaa, nduyɛ Mɛlɛka Hiou Kpou Wo kɛɛsiaa ni le mi hei yɔŋnuŋ a masanɔ nuu.
25 A cho num soli waŋnda chieeya tɛɛŋ, ma kɔ wa yondoo niŋ nya visiaa yonduaa latulu, nduyɛ billo ŋ cho wa dioo ni mɛɛ nauwaa towaa dia nuaa billo yɛ. Mɔm chaŋ choo choo wo cho num wa liiviaa, nduyɛ mi teleŋndaŋ la ŋɔmmɛu hiou num choo, haaa ma sina maa Mɛlɛka Hiou Kpou Wo cho masaa le masale waŋnda chieeya ni, nduyɛ maa wana o wana o yeema pɛ, ndu o ke masaleŋ ni.
26 “‘Kɛ le mɛɛ nda dimi maa a mal chiyii yɔmndo hoo a puunduŋ ndɔŋ ŋ luɛiyaa lɛŋ yɛ, masale numndeŋ le cho num vɛlɛ miiŋgu o ba, te a sina pɛ maa Mɛlɛka cho o choo choo niŋndo cho masaa ni.
27 Lelaŋ fallo masaa, yandii chɛl sila ya cho num kioo wo. Mulul yɔŋnda numnda wɔɔŋndaŋ kɔɔ, ma tosa nyɛ cho o kɛndɔɔ wo, nduyɛ ma mal dɛnɛ wɔɔŋ ŋ cho tosaa wo, okoŋ ma tuiinuŋ wanaa bala fonduaa inyiɛɛ. Kɛlɛŋgaa dɔɔ a cho hiouwɔɔ lachi a waa yoomu o sul numndo choo o kɔl nyulu niŋ.’”
28 Mi sɔɔŋ muŋ kpou yɔŋnuŋ Masaa Nɛbukanɛɛsa.
29 Mɛɛ paŋgoŋ tɔ a ŋ muuŋ hiou okoŋ kɔɔli, mi masaa wa balɔɔ o chiɛi ndɔ lemasaa choo Babilɔŋ.
30 O wa dimioo aa: “O cho Babilɔŋ Bɛndoo le cho hoo le, o ya taŋgul a kpaaya ni bɛndoo vɛlɛ a yoomuma niaŋ le mbo wa chiee lemasaa, nduyɛ mbo saŋgala tɔɔmayɛi nii yo le?”
31 Masaa lo suɛi hei dimioo, mi diomndo fula o choo choo niŋ mbo dimi aa: “Oo Masaa Nɛbukanɛɛsa, le num yooŋgoo hoo cho ni, ‘Masale numndeŋ le hɛluŋ num,
32 nduyɛ a hiŋ faŋaŋndo waŋnda chieeya tɛɛŋ, ma kɔ wa yondoo niŋ nya visiaa yonduaa latulu. Billo ŋ cho wa dioo ni mɛɛ nauwaa towaa dia nuaa billo yɛ, nduyɛ mi teleŋndaŋ la ŋɔmmɛu hiou num choo, haaa ma sina maa Mɛlɛka Hiou Kpou Wo cho masaa le masale waŋnda chieeya ni, nduyɛ maa wana o wana o yeema pɛ, ndu o ke masaleŋ ni.’”
33 A boondii keŋ, mi diomndaŋ ndaŋ la peeluŋ a Nɛbukanɛɛsa. Ma soli ndu waŋnda chieeya tɛɛŋ, mbo kandu billo dioo mɛɛ nauwaa towaa a dia nuaa billo yɛ. Mɔm wa fulaa choo choo wo wa dialuŋ ndɔŋ liiviaa, okoŋ mi yiiŋii nduɛi bandu naŋ chaa bɔɔla koviaa ni, nduyɛ mi yɛmbɛŋ ndɔŋ bandu naŋ chaa yɛmbɛŋ youwa ni.
34 “Mɛɛ teleŋ koŋ fuuluu o mɛɛlulaŋ, mi ya Nɛbukanɛɛsa heelu hɔlla choo choo, mi miiŋgu vɛlɛ kɔl kalu nuu sɔla. Okoŋ mi saŋgala Mɛlɛka Hiou Kpou Wo, nduyɛ mi ke wana cho yoomu le fɛɛŋ a fɛɛŋ ndo bɛɛleŋ, kanifuule masaleŋ ndɔleŋ, masale cho le fɛɛŋ a fɛɛŋ ndeŋ le cho ni, nduyɛ o cho wa o masaleŋ choo le fɛɛŋ a fɛɛŋ.
35 Wanaa cho o lɛŋndeŋ choo wa kpou, a cho nyɛ o nyɛ le ndu le. Nyɛ o yeema wo, ndu o tosa a maalikɛiyaa cho o choo choo niŋnda ni, vɛlɛ a waŋnda chieeyaa cho o lɛŋndeŋ choo wa. Nduyɛ wana o wana nɔla mbo kuuna ndu le, kɛlɛŋgaa niŋ te mi wana nyuna ndu aa, ‘Le yɛɛ ŋ tosa yɛ hei?’
36 “A teleŋ koŋ, mi miŋgi vɛlɛ kɔl kalu nuu sɔla, okoŋ mi naŋɔɔ nuu, masale nileŋ, tɔɔmayɛi nii, a bɛɛle nileŋ le miiŋgu ya o ba. Mi wanaa niaa bɛnduaa a laŋgbaa niaa kalla kandu ya vɛlɛ nyunaa le sɔɔŋ. Mi miiŋgu vɛlɛ o masale nileŋ choo, nduyɛ mi chɔɔlu vɛlɛ kpaayaa sɔla tau.
37 “Ya Nɛbukanɛɛsa, I cho niŋ suŋ suŋ Masa cho o choo choo niŋndo saŋgalaa, mi lisa ndu, nduyɛ mi ke ndu bɛɛleŋ. Kanifuule, walta ndɔlaŋ kpou la cho walta tonya, nɛila ndɔlaŋ la cho sakpo, nduyɛ mbo tusi wanaa heeluŋ nda siɔmbulaŋ.”
Tɛɛsiaalaŋ
^ Koŋ cho ni, kunda wanaa chaa walta nyinaa wɔɔŋnda wa a wanaa pɛɛku a looŋ okɔɔ wa.
^ Ɔɔ “kapaa.”
