Daaniɛɛ 5:1-31
5 Mi Masaa Bɛlsiaasa tosa dunyɛi bɛnduei le laŋgbaa nduaa kalla waapilɛ, nduyɛ mbo wa nda muɛiyaŋ kolɔɔ o hɔl.
2 Mɛɛ muɛiyaŋ ma bii Bɛlsiaasa, mbo dimi le ma kɔ huŋ a taalala nda toosiaa a kooliiyoŋ vɛlɛ a kaniŋ humboŋ ndaŋ, la Nɛbukanɛɛsa finya ndɔ chua o chiɛi Mɛlɛkaa niŋ Chulusalɛm ndaŋ, le mi ndu masaa, laŋgbaa nduaa kalla, laandaa nduaa pɔmbuaa, a laandaa nduaa cheleŋnda kol muɛiyaŋ leniŋ.
3 Okoŋ, ma kɔ huŋ a taalala ŋkooliila nda chua o chiɛi Mɛlɛkaa niŋ Chulusalɛm ndaŋ. Nduyɛ mi masaa, laŋgbaa nduaa kalla, laandaa nduaa pɔmbuaa, a laandaa nduaa cheleŋnda wa muɛiyaŋ kolɔɔ leniŋ.
4 Mɛɛ nda kol muɛiyaŋ, ma saŋgala mɛlɛkaa nda toosiaa a kooliiye, kanii humbuei, chiliŋii siaŋɛi,* chiliŋnde, yɔmndo, vɛlɛ a pouwo wa.
5 A teleŋ koŋ kpeekpei, mi ba wanachioo fula a sooŋ, mbo kandu poonyiaa o chiɛi lemasa wa o yikpaa wo. Lambuiyo wa o kɛsiaa kpeŋgei i pilɛi, nduyɛ masaa wa ba wa hoo poonyiaa wo chɔɔ.
6 Mi hɔlaa masaa siŋgaŋ, mi nyɛ o wa yiyaŋndo choo wo tosa mi siooŋii bɛnduei bii ndu, nduyɛ mi chaŋnda a wulaŋ la kandu ndu nyiiyaa pia pia.
7 Mi masaa veelu choo choo kpeleŋ le ma kɔ veelu wanaa ŋwaŋ vilɛiya, Kaadiaŋnda,* a wanaa pɛɛku a looŋ okɔɔ wa. Mi masaa dimul wanaa taasiaa o Babilɔŋ niŋ aa: “Wana o wana veelu pɛ diomndaŋ o poonyiaa hoo nduyɛ mbo chɔm ya tɛɛsiaa ndɔɔ, I cho tosa ma wou ndu nyɛla yim yim ndaŋ, ma wou ndu yɔlɔŋ nda toosiaa a kooliiye woŋ o labolo, nduyɛ ndu cho simnɔŋ wana yaa ndɔɔ o masaleŋ niŋ ni.”
8 Okoŋ mi wanaa taasiaa kpou huŋ naa masaa chua, kɛ wana o wana nɔla mbo veelu diomndaŋ o poonyiaa hoo, ɔɔ mbo chɔm masaa tɛɛsiaa ndɔɔ le.
9 Le hei, mi siooŋnde chɔɔlu Masaa Bɛlsiaasa biyɔɔ, mi hɔlla siŋgaŋ ndu kpou, nduyɛ mi laŋgbaa nduaa kalla yɔŋnuŋ pulaŋ pulaŋ.
10 Mɛɛ kalaa masaa* tuei masaa a laŋgbaa nduaa kalla suukaŋndo, mbo luɛi o chiɛi nda wa dunyɛi biyɔɔ wo niŋ. Mbo kɔ dimul masaa aa: “Oo fallo masaa, maa viou naa choo fɔ! Chɛl mi sɔɔŋ ŋ cho yiyaŋndo choo woŋ luei num siooŋnde le, kɛlɛŋgaa niŋ te mi hɔlaa numnda siŋgaŋ.
11 Laŋunɔ* pilɛ cho o masale numndeŋ niŋ, nyina mɛlɛkaa diandaa cho a ndu latulu. O boondii finya numnde niŋ, ndoo nɔ nyɛ teŋgaa, sinapɛŋgoo, a taasioo maa taasi mɛlɛkaa. Mi Masaa Nɛbukanɛɛsa finya num yulu ndu iso le mbo wa wanaa maŋgalaa, wanaa ŋwaŋ vilɛiya, Kaadiaŋnda,* a wanaa pɛɛku a looŋ okɔɔ wa bolleŋ. Lende finya num tosa ni fallo masaa.
12 Kanifuule Daaniɛɛ, o masaa ndoo ke diolaŋ aa Bɛtisiaasa wo, ndoo nɔ kɔl kaloo a taasi teŋgeŋndo. Ndoo nɔ sinapɛŋgoo le lɔma sɔlaŋ a sɔɔŋ kaamaŋ tɛɛsiaa, vɛlɛ a bahawɛila kala kalalaŋ solioo.* Lelaŋ veelu Daaniɛɛ, o cho num tɛɛsiaa ndɔɔ chɔm.”
13 Okoŋ, ma huŋ a Daaniɛɛ naa masaa chua. Mi masaa nyuna ndu aa: “Num cho Daaniɛɛ nda hiŋ o biyɔɔ niŋ fulaa Chuda wo ni? Num cho wana finya nuu, o wa masaa wo soli Chuda ni mbo huŋ a num?
14 I tuei a num okɔɔ maa nyina mɛlɛkaa cho a num latulu, nduyɛ maa a nɔ nyɛ teŋgaa, sinapɛŋgoo, vɛlɛ a taasi teŋgeŋndo.
15 A hiŋ a wanaa taasiaa vɛlɛ a wanaa ŋwaŋ vilɛiya naa ya chua, le ma veelu diomndaŋ o poonyiaa hoo nduyɛ ma chɔm ya tɛɛsiaa ndɔɔ, kɛ wana o wana nɔla mbo tɛɛsial la yooŋgoo hoo le.
16 Kɛ I tuei a num okɔɔ maa a nɔla ma tɛɛsiaa sɔɔŋ nduyɛ ma soli bahawɛila kala kalalaŋ.* Lelaŋ, te a nɔla pɛ ma veelu diomndaŋ o poonyiaa hoo nduyɛ ma chɔm ya tɛɛsiaa ndɔɔ, I cho tosa ma wou num nyɛla yim yim ndaŋ, ma wou num yɔlɔŋ nda toosiaa a kooliiye woŋ o labolo, nduyɛ ma wa wana yaa ndɔɔ o masaleŋ niŋ.”
17 Okoŋ mi Daaniɛɛ mulul masaa aa: “Kɛsi nyɛm numndoŋ ma ke wanaa cheleŋ. Kɛ num fallo masaa, I cho num poonyiaa hoo diomndaŋ veelul, nduyɛ mi chɔm num tɛɛsiaa ndɔɔ.
18 Num fallo masaa, mi Mɛlɛka Hiou Kpou Wo ke Nɛbukanɛɛsa finya num masaleŋ, kpaayaa, bɛɛleŋ, vɛlɛ a tɔɔmayɛi.
19 Le mɛɛ Mɛlɛka ke ndu kpaayaa yɛ, mi waŋnda kpou, kaalaŋ, vɛlɛ a isɔɔ o isɔɔ maŋgalaa ndaa nyiiya ndu lachi a siooŋnde. Wana o wana ndoo yeema pɛ o dii ɔɔ o mal num le ma wa yoomu. Nduyɛ, wana o wana ndoo yeema pɛ o heelu num tema ɔɔ o tusi num siɔmbulaŋ.
20 Kɛ mɛɛ kɔl yoŋgaa luɛi ndu niŋ nduyɛ mbo luɛi nilakalulaŋ, mbo kandu sɔɔŋ tosaa o nɛi heelaŋndo niŋ, mi keŋ tosa ma tusi ndu o kpeŋgbei* ndɔ lemasaa choo, nduyɛ mi bɛɛle ndɔleŋ le hialuŋ ndu.
21 Ma faŋa ndu waŋnda chieeya tɛɛŋ, nduyɛ nda sofɛliaa yonduaa wa niŋ naapilɛ ni. Billo ndoo dia ni mɛɛ nauwaa towaa dia nuaa billo yɛ. Mi mɔm wa fulaa choo choo wo wa dialuŋ ndɔŋ liiviaa haaa mbo sina maa Mɛlɛka Hiou Kpou Wo cho masaa le masale waŋnda chieeya ni, nduyɛ maa wana o wana o yeema pɛ, ndu o ke masaleŋ ni.
22 “Kɛ num Bɛlsiaasa, num cho po ndɔɔ wo, mi che bɛɛ ma sina a sɔɔŋ muŋ okɔɔ kpou, kɛ a tusiŋ te.
23 Ma simnuŋ wana heelaŋ, ma simul Masanɔ cho o choo choo niŋndo, ma dimi le ma kɔ huŋ a taalala nda chua o chiɛi ndɔɔ niŋndaŋ. Okoŋ mi num, laŋgbaa num aa kalla, laandaa num aa pɔmbuaa, a laandaa num aa cheleŋnda kol muɛiyaŋ o taalalaŋ ndaŋ niŋ, nduyɛ mi la saŋgala mɛlɛkaa nda toosiaa a kanii humbuei, kooliiye, chiliŋii siaŋɛi, chiliŋnde, yɔmndo, a pouwo wa. Mɛlɛkaa haa chi nyɛ o nyɛ le, a tui nyɛ o nyɛ le, nduyɛ a sina nyɛ o nyɛ le. Kɛ ma kɛɛ le Mɛlɛka nɔ kpaayaa yoomu numndo choo vɛlɛ a nyɛ o nyɛ ŋ tosa wo saŋgalaa.
24 Le saboo hoo Mɛlɛka yɔŋ baa ni, mbo huŋ poonyiaa diomndaŋ ndaŋ.
25 Nduyɛ diomnda poonyiaŋ ndaŋ la cho laŋ ni: MƐNƐ, MƐNƐ, TIKƐL, a PAASIŊ.
26 “Diomndaŋ ndaŋ, tɛɛsiaa ndɔɔ cho hoo ni: MƐNƐ, Mɛlɛka chɔm palɛi masale numndeŋ, nduyɛ le fuuluu o mɛɛlulaŋ.
27 “TIKƐL, Mɛlɛka handu num o sekeleiyo* choo le lusul numndo sinaa, kɛ a lusul lende le.
28 “PƐLUƐƐSI, a piɔu masale numndeŋ tɛɛŋ, ma ke Midiaŋnda a Paasiaŋnda.”
29 Okoŋ, mi Bɛlsiaasa dimi le ma wou Daaniɛɛ nyɛla yim yim ndaŋ, a yɔlɔŋ nda toosiaa a kooliiye woŋ o labolo. Nduyɛ, ma yonda a ndu okɔɔ maa ndu nɔ le simnɔŋndo wana yaa ndɔɔ o masaleŋ niŋ ni.
30 Ichɔl koŋ kpeekpei nda dii Bɛlsiaasa, masa Kaadiaŋnda ni.
31 Okoŋ, mi Daaliɔɔ fulaa Midiaa sɔla masaleŋ, nduyɛ o wa wɔsilaŋ 62.
Tɛɛsiaalaŋ
^ Ɔɔ “kapaa.”
^ Koŋ cho ni, kunda wanaa chaa walta nyinaa wɔɔŋnda wa a wanaa pɛɛku a looŋ okɔɔ wa.
^ Hibuluiye, “masa laandoo.”
^ Ɔɔ “Po taasi.”
^ Koŋ cho ni, kunda wanaa chaa walta nyinaa wɔɔŋnda wa a wanaa pɛɛku a looŋ okɔɔ wa.
^ Hibuluiye, “nyɛm cho ŋ yiyaa poŋ ndoŋ tiimbuuwo.”
^ Hibuluiye, “nyɛm cho ŋ yiyaa poŋ ndoŋ tiimbuuwo.”
^ Ɔɔ “kpɛŋɛ.”
^ Ɔɔ “kiloo.”
