Daaniɛɛ 6:1-28
6 Mi Daaliɔɔ cha maa o bɛnda mbo yulu ŋwaŋ 120 iso le ma wa hɔlte masaa o masale ndɔleŋ bɛŋgu kpou.
2 Laŋgbaa kalla a yaa wa nda bolleŋ ni, nduyɛ Daaniɛɛ wa waŋndo o pilɛ. Wanaa wa hɔlte masaa wa ndaa nɔ ma dɔɔnuŋ kona o nda lo, le halikpeŋ nyɛsɔlaa masaa ndoo laasiaŋ te.
3 Daaniɛɛ wa teŋgeŋ a laŋgbaa kalaa ŋiɔɔŋnda haa vɛlɛ a wanaa wa hɔlte masaa wa, kanifuule ndoo nɔ kɔl kalu teŋgeŋndo. Le hei, mi masaa kɛɛsiaa le mbo ke ndu foofo bɛndoo o masale ndɔleŋ niŋ kpou.
4 A boondii keŋ, mi laŋgbaa kalla a wanaa wa hɔlte masaa wa kandu nɛilaŋ nuuviaa le Daaniɛɛ suɛi holɔɔ a sɔɔŋ lemasaŋ okɔɔ. Kɛ a seeluŋ nɛi o nɛi le ndu isɔɔ holɔɔ le, kɛlɛŋgaa niŋ te ma saaluŋ ndu balaŋ o kafalaŋ niŋ. Kanifuule, o wa wana wana nɔla ma tiindaŋ. Ndoo pisul a wali ndɔɔ le, nduyɛ bala ndɔla ve o lakafa niŋ te.
5 Mi puaa haa dimi aa: “Ŋ nɔla miŋ saaluŋ nɛi o nɛi le Daaniɛɛ isɔɔ holɔɔ le, mɛɛ dɔɔ miŋ chiŋalaŋ ndu a sawala Mɛlɛka ndɔɔ.”
6 Mi laŋgbaa kalla haa a wanaa cho hɔlte masaa wa diinuŋ kunda, ma kua naa masaa chua. Ma kɔ dimul ndu aa: “Oo Masaa Daaliɔɔ, maa viou naa choo fɔ!
7 Laŋgbaa kalla o masaleŋ niŋ kpou, wanaa bɛnduaa, wanaa cho hɔlte masaa wa, wanaa ndaa bɛnduaa, a masaa ŋbuŋgaa kpou chɛlaŋ le ma dɔu sawaa nduyɛ ma kindila ndu maa le palɛi 30, wana o wana piɛi mɛlɛka o mɛlɛka cheleŋ ɔɔ wana o wana cheleŋ o num kɔɔli pɛ fallo masaa, a nɔ ma wou wana koŋ o sooŋ kpɔkuŋnda* niŋ.
8 Lelaŋ fallo masaa, dɔu sawaa ma pila suei, le halikpeŋ o siŋgaŋ te. Kanifuule, sawa Midiaŋnda a Paasiaŋnda siŋgaŋ te.”
9 Okoŋ, mi Masaa Daaliɔɔ pila suei o sawa dɔɔnuŋ hoo wo choo.
10 Dimioo nuaa mi Daaniɛɛ sina maa masaa pila suei o sawaa hoo choo, mbo kua o chiɛi ndɔɔ. Nduyɛ lumui wa o chiɛiyo choo wo ndoo nɔ wundɛilaŋ* la kumbiaa kpeŋgii Chulusalɛm nde. Bɛmbɔɔ le yaa ndoo baŋ wulaŋ o paaleŋ niŋ ni, mbo piɛi, nduyɛ mbo saŋgala Mɛlɛka ndɔɔ, mɛɛ ndoo tosa paandu tuupa ma duau sawaa hoo yɛ.
11 A boondii keŋ, mi laŋgbaa haa luɛi Daaniɛɛ choo wolo wolo, ma komal ndu Mɛlɛka ndɔɔ piɛiyo, a ndu nyɔɔloo le mbo tuiinuŋ ndu inyiɛɛ.
12 Okoŋ ma kua naa masaa chua, ma kɔ yiyalaŋ ndu a sawa o dɔu wo okɔɔ aa: “Fallo masaa, num te pila suei o sawaa maa le palɛi 30, wana o wana piɛi mɛlɛka o mɛlɛka cheleŋ ɔɔ wana o wana cheleŋ o num kɔɔli pɛ, a nɔ ma wou ndu o sooŋ kpɔkuŋnda niŋ te?” Mi masaa dimi aa: “Sawaa chuu niŋ handɔŋ a hei okɔɔ, nduyɛ o siŋgaŋ te, a mɛɛ sawa Midiaŋnda a Paasiaŋnda cho yɛ.”
13 Ma dimul masaa o lepilɛ niŋ kpe aa: “Daaniɛɛ nda hiŋ o biyɔɔ niŋ fulaa Chuda wo, o nɔ lebɛɛ le num te fallo masaa, kɛlɛŋgaa niŋ te mbo nɔ bɛɛleŋ le sawa ŋ pila hoo suei yo. Le yaa kpulukuu o piɛi Mɛlɛka ndɔɔ o paaleŋ niŋ ni.”
14 Dimioo nuaa masaa tuei a hei okɔɔ, mbo tambu kɔl tau tau. Nduyɛ, mbo kindiŋ le yiyaŋndo nɛi o tiuba mbo piŋi Daaniɛɛ wo. Haaa mi paaleŋ le del, o wa kindiŋndo o nɛi o nɛi niŋ le ndu piŋioo.
15 O mɛɛlulaŋ kpɔŋ, mi laŋgbaa haa diinuŋ kunda, ma kua naa masaa chua. Ma kɔ dimul ndu aa: “Kɛsiŋ hei o kɔl fallo masaa. Sawa Midiaŋnda a Paasiaŋnda dimi maa sawa o sawa masaa dɔu pɛ, o siŋgaŋ te.”
16 Okoŋ, mi masaa dimul nda le ma kɔ wou Daaniɛɛ o sooŋ kpɔkuŋnda niŋ. Mi masaa dimul Daaniɛɛ aa: “Mɛlɛka num ŋ cho hiouwɔɔ lachi a piɛiyo wo cho num piŋi.”
17 Okoŋ ma huŋ a pouwo, ma huŋ handu ndu o sooŋ koŋ sondoo. Nduyɛ, mi masaa handu tamasi kelɛi nduɛi a kelɛi laŋgbaa nduaa kalla o pouwo hoo choo, le halikpeŋ nyɛ o nyɛ siŋgaŋ a Daaniɛɛ okɔɔ le.
18 Mi masaa miiŋgu o chiɛi ndɔ lemasaa niŋ. Mbo bii sumndo ichɔl koŋ, mbo kɛɛ yelelaŋ kɛ kɛ,* nduyɛ o nɔla luaŋ ichɔl koŋ te.*
19 O mɛɛlulaŋ kpɔŋ, dimioo nuaa mi paaleŋ le sia, mi masaa chaŋ nya, mbo kua chɔ chɔ o sooŋ kpɔkuŋnda.
20 Mɛɛ o sɔɔŋguu o sooŋndo ikɛi, mbo veelu Daaniɛɛ o mɔnɛi bɛnduei niŋ, mbo nyuna ndu aa: “Oo Daaniɛɛ, buɛi Mɛlɛka cho yoomu wo, baa Mɛlɛka num ŋ cho hiouwɔɔ lachi a piɛiyo wo nɔla pa num piŋi kpɔkuŋnda o ba?”
21 Mi Daaniɛɛ dimul masaa o lepilɛ niŋ kpe aa: “Oo fallo masaa, maa viou naa choo fɔ!
22 Mɛlɛka nuu yɔŋ maalikɛinɔ ndɔɔ mbo kinda kpɔkuŋnda sondolaŋ, a yɔŋ ya nyɛ o nyɛ le. Kanifuule, o che maa I tɛɛmbuu isɔɔ o isɔɔ a ndu le, kɛlɛŋgaa niŋ te mi tosal num suɛi wɔɔŋnde fallo masaa.”
23 Mi masaa duaunuŋ nyaale tau, mbo dimi le ma soli Daaniɛɛ o sooŋndo niŋ. Mɛɛ nda soli Daaniɛɛ, nyɛ o nyɛ yɔŋnuŋ ndu le. Kanifuule, mbo duau tiindaŋndo o Mɛlɛka ndɔɔ niŋ.
24 Okoŋ mi masaa viam waŋnda, ma kɔ huŋ a laŋgbaa handu Daaniɛɛ suɛi choo wa. Ma wou nda o sooŋ kpɔkuŋnda niŋ, latulu a chuauwaa ndaa, vɛlɛ a laandaa ndaa. A fuuluu bɛɛ o sooŋndo niŋ te, mi kpɔkuŋnda del nda choo, ma pesi pesi paala ndalaŋ kpou.
25 Okoŋ mi Masaa Daaliɔɔ poonyial waŋnda o lɛŋndeŋ choo kpou, lekaa o lekaa, vɛlɛ a isɔɔ o isɔɔ maŋgalaa aa: “Maa la wa o kɔl nyulu bɛndoo niŋ fɔ!
26 I cho sawaa dɔwɔɔ maa wana o wana cho o masale nileŋ bɛŋgu, o nɔ mbo nɔ siooŋnde vɛlɛ a bɛɛleŋ le Mɛlɛka Daaniɛɛ wo. Kanifuule ndu cho Mɛlɛka cho yoomu, nduyɛ mbo wa le fɛɛŋ a fɛɛŋ ndo ni. Fɛɛŋ bɛɛ masale ndɔleŋ le tembu le,* nduyɛ o cho wa masaa le fɛɛŋ a fɛɛŋ.
27 Mbo chiindiaa, mbo piŋi, nduyɛ mbo tosa sɔɔŋ kaamaŋ a sɔɔŋ kɔndɔfilloŋ o choo choo niŋ a o lɛŋndeŋ choo. Kanifuule, ndu piŋi Daaniɛɛ kpɔkuŋnda o sondo* ni.”
28 Mi Daaniɛɛ sɔla dɛnɛ kɛndɔɔ tau o masale Daaliɔɔ leŋ niŋ, a o masale Sailɔɔ fula Paasiaa wo niŋ.
Tɛɛsiaalaŋ
^ Ɔɔ “yalakanaa.”
^ Ɔɔ “finɛtelelaŋ.”
^ Ɔɔ naapum, “a hiŋ a wana nyɛchaa kɛ kɛ naa ndu chua le.”
^ Hibuluiye, “mi lɔma nduaŋ ma nyaanuŋ ndu.”
^ Ɔɔ “kpuluŋgumayɛi nduɛi tembu le.”
^ Hibuluiye, “o ba.”
