Daaniɛɛ 8:1-27
8 Wɔsi yaa ndɔ Masaa Bɛlsiaasa wa o masaleŋ choo wo, mi ya Daaniɛɛ cha vɛlɛ yilaŋnde, o i tasii ya che ve kɔɔli.
2 Mi cha o yilaŋnde niŋ maa I wa o chiɛi lemasaa niŋ Susaŋ,* o cho o tanda Ɛlam ndo niŋndo, nduyɛ mi cha maa I wa o pioo Yulai ikɛi.
3 Mɛɛ ya heelu hɔlla, mi cha saa kondoo isisi o pioo hoo ikɛi, ndoo nɔ leelaŋ la tiɔɔŋ. Leelaŋ ndaŋ la wa la vilɛi, kɛ o pilɔɔ ndoo hiou bandu a o pilɔɔ. O ndoo hiou hoo bandu wo mɛɛlu wulɔɔ ni.
4 Mi cha saa hoo nyaanɔŋndo ba paaleŋ le del lo, ba luaŋ ndo, a ba tou wo le sɔŋgɔɔ. Kɛ visi yondo kɛ kɛ ndoo nɔla mbo simul ndu le. Wana o wana ndoo nɔla mbo piŋi nda ndu o ba le. Nyɛ o nyɛ ndoo yeema pɛ, ndu o tosa ni, nduyɛ mbo saŋgalaŋ.
5 Mɛɛ ya hiou lachi a tofaa, mi cha chuiŋ tooyoo fulaa ba paaleŋ le del lo mbo kialu chieeŋndo tɛɛŋ kpali a kiltaŋ, peloŋ ve lɛŋndeŋ pilaŋ te. Lee bɛndu bɛndoo wa chuiŋndo hoo o hɔltaŋ tɛɛŋ.
6 O wa hunɔɔ saa kondo ya che isisi o pioo ikɛi a leelaŋ la tiɔɔŋ ndo o hɔl saatata a kiltaŋ o kɔl tuu bɛndu bɛndoo niŋ.
7 Mi cha ndu mbo sɔɔŋguu saa kondoo hoo ikɛi, o wa a kɔl tuuwo ŋama ŋama a ndu. Okoŋ mbo kundu ndu, mbo yam ndu leela ndɔla tiɔɔŋndaŋ. Saa kondoo hoo nɔla mbo simul ndu le, kanifuule ndoo nɔ lɛ kpaaya le. Mbo viɔl saa kondoo hoo lɛŋ kpɔl, mbo niɔu niɔu ndu. Wana o wana ndoo nɔla mbo piŋi saa hoo ndu o ba le.
8 Mi chuiŋ tooyoo hoo tosa sɔɔŋ o yoŋga bɛndoo niŋ. Kɛ dimioo nuaa mbo sɔla kpaayaa tau, mi lee bɛndoo hoo yom. Okoŋ, mi leela bɛndulaŋ la hiɔɔlu la fula o foofo ndɔɔ, mi la muli hɔlla o kpeŋguŋ hiɔɔluŋ hueiye fula o choo choo niŋndoŋ.
9 Mi lee pɔmbɔ cheleŋ wul o leelaŋ ndaŋ o pilɛ niŋ, nduyɛ mbo simnuŋ o bɛndu bɛndu kpeŋgii ba tou ve, ba paaleŋ le chaŋ ndo, a kpeŋgii Lɛŋnde Kɛndɛleŋ.
10 Lioo hoo lo hindɔɔ haaa mbo fuuluu naa puaa chɔuwa o choo choo niŋ* cho wa di. Okoŋ mbo tosa mi puaa chɔuwa apum a looŋ ŋpum del o lɛŋndeŋ choo, mbo niɔu niɔu nda a looŋ latulu.
11 Masa cho puaa chɔuwa bolleŋ ndo bɛɛ, mbo simul ndu o yoŋga bɛndoo niŋ. Mbo faŋa sala nda soli ndu lachi teleŋ o teleŋ ndo, nduyɛ mbo pesi pesi fondaŋ ndɔ diandaa.
12 Ma mal ndu puaa chɔuwa o ba, latulu a sala nda soli ndu lachi teleŋ o teleŋ ndo, le haki tosaŋ ndo. Mbo hiau lachi a tonyaa viouwɔɔ lɛŋ, nduyɛ mbo sɔla batiuwaa o hei tosaa niŋ.
13 Okoŋ, mi tuɛi wana diandaa suɛi. Mi wana diandaa cheleŋ nyuna wana diandaa wa suɛiyo aa: “Yilaŋii cho hei a sala nda soli ndu lachi teleŋ o teleŋ ndo, haki cho tosaŋndo mbo wa kpundɛlaŋ mɛlioo wo, fondaŋ diandaa, vɛlɛ a nyɛm puaa chɔuwaa nda cho niɔu niɔu wo ve, le vɛɛ kpɛ i cho yɛ viouwɔɔ?”
14 Okoŋ mbo dimul la aa: “I cho wa lende haaa paaleŋ a nyumndaŋ 2,300. Okoŋ kɔɔli, fondaŋ diandaa cho miiŋgu nyɛ kɛndɛ kɛndɛ mɛɛ o wa paandu yɛ.”
15 Ya Daaniɛɛ, mɛɛ ya wa yilaŋnde hei tofaa mi wa kindiŋndo le mi bii ndi bila, o lepilɛ niŋ kpe, mi cha waŋndo isisi ya o hɔl maa wana pɔnɔ.
16 Okoŋ, mi tuɛi diom waŋndo hoo o pioo Yulai tɛɛŋ, mbo veelu choo choo aa: “Keebilɛɛ, tɛɛsial ndu nyɛ o che wo mbo bii bila.”
17 Okoŋ, mbo sɔɔŋguu ya ikɛi naa ya wa isisi wa. Kɛ mɛɛ o hiŋ, mi siooŋnde bii ya, mi del a hɔlla a kuumbaa lɛŋ. Mbo dimul la aa, “Po wanachioo, I yeema num ma bii bila maa le palɛi mɛɛlɛi yilaŋnde hei cho ni.”
18 Kɛ o lo suɛi lende o ya lo, mi hiaunuŋ o luaŋ a hɔlaa niaa a kuumbaa lɛŋ. Okoŋ mbo pilaŋ ya, mbo tosa mi chaŋ mi sim naa ya wa isisi wa.
19 Mbo dimul la aa: “I cho tosa ma bii bila nyɛ nɔ le yɔŋnɔŋndo o mɛɛlula paale kɔl tuu bɛnduleŋ choo wo. Kanifuule, le mɛɛlula teleŋ Mɛlɛka kɛɛsiaa wo hei cho ni.
20 “Leela tiɔɔŋnda saa kondo ŋ che laŋ, la sim le masaa Midiaa a Paasiaa.
21 Chuiŋ tooye ŋ che a yiiŋnde wusiaa wusiaa wo sim le masaa Kilisi. Lee bɛndu wa ndu o hɔltaŋ tɛɛŋ ndo sim le masa tasoo.
22 Kɛ lee yom mi leela hiɔɔlula cheleŋ la wul o foofo ndɔɔ wo, masɛi i hiɔɔlu cho chɔnɔŋ o lɛŋnde ndɔleŋ niŋ, kɛ o ve niŋ a kpaaya ndɔ le.
23 “O masale ndaleŋ mɛɛlulaŋ, a teleŋ sɔɔŋ wanaa dɛnɛ wɔɔŋnda tosa woŋ cho fuuluu o mɛɛlulaŋ ndo, masa kɔl vesɛi bɛndoo, o bii sɔɔŋ kaŋgalaŋ bila wo cho chɔnɔŋ.
24 O cho simnɔŋ wana kpaaya bɛndu, kɛ o cho a ba ndɔ le o cho simnɔŋ wana kpaaya le. O cho hunɔɔ nyɛm bɔɔbɔɔ tɛɛmbuu, mi kɔndɔfillo bii waŋnda tau. O cho batiuwaa sɔla o nyɛ o cho wa tosaa wo niŋ. O cho wanaa kpaayaa bɛnduaa vɛlɛ a wanaa diandaa tɛɛmbuu.
25 O cho waŋnda hui o kaŋgala ndɔɔ niŋ, le mbo sɔla batiuwaa. O cho wa yoŋgaa kiolɔɔ o kɔl ndɔɔ niŋ. Teleŋ waŋnda cho wa hɛnɛkɛ wo, o tɛɛmbuu niŋ wanaa bɔɔbɔɔ. O cho vɛlɛ Masa hiou masaa kpou wo simul, okoŋ mbo sɔla tambei, kɛ o ve niŋ a ba wanachiee le.
26 “Nyɛ dimiŋ o yilaŋnde niŋ a nyumndaŋ vɛlɛ a paaleŋ okɔɔ wo cho tonya. Kɛ a nɔ ma kɛsiŋ yilaŋnde hei o kɔl kpiŋ. Kanifuule, palɛi bɔɔbɔɔ nɔ le hiouwɔɔ tuupa mi teleŋ ndɔɔ fuuluu.”
27 Kɛ ya Daaniɛɛ, mi saŋga tau, nduyɛ le palɛi bɔɔbɔɔ I wa a naa. Okoŋ kɔɔli, mi chaŋ mi hiau lachi a wali masaa tosaa. Kɛ I wa o kɔndɔfili bɛndoo niŋ a nyɛ ya che wo, nduyɛ wana o wana ndoo bii yilaŋnde hei bila le.
Tɛɛsiaalaŋ
^ Ɔɔ “Susa.”
^ O Baabuiyo niŋ, diomndaŋ ndaŋ la nɔla mi la sim le nyɛm Mɛlɛka toosiaa o choo choo niŋndoŋ, mɛɛ looŋ cho nuaa yɛ, ɔɔ maalikɛiya, ɔɔ waŋnda chieeya.
