Ditɔnɔmii 1:1-46
1 Diomndaŋ ndaŋ Muuse dimul Isɔluɛiya kpou ni o tanda Chɔɔdaŋ ndo o pollo niŋ, o lɛŋnde dɛŋgbɛleŋ Sɔfi hɔlndɔ, Paluaŋ tɛɛŋ a Tofɛɛ, Lebaŋ, Hasɛlɔti, a Disahabi.
2 Wana keeku pɛ o nɛi kuɛ o tanda ŋpemboo Sɛyaa wo, chɔŋ Holuɛɛbi kɔ Kedɛsi-baniaa, o wa le tiŋ kɔla palɛi 11.
3 O wɔsi 40 niŋ, paale taseleŋ o paŋgii 11 niŋ Muuse dimul Isɔluɛiya diomnda Chɛhowa dimul ndu laŋ kpou ni.
4 Hei yɔŋnuŋ mɛɛ o yem Saihɔŋ, masa Amɔluaitiiya, o wa ichali Hɛsibɔŋ ndo, a Ɔku, masaa le Baasiaŋ, o wa ichali Asitalɔɔ wo, o Ɛdului niŋ.
5 O tanda Chɔɔdaŋ ndo o lɛŋnde Mowaabi leŋ niŋ Muuse tɛɛsial nda sawalaŋ ndaŋ ni. Mbo dimul nda aa:
6 “Mi Chɛhowa Mɛlɛka naa dimul naa o tanda Holuɛɛbi wo niŋ aa, ‘La viou niŋ bɔɔ o tanda ŋpemboo hoo niŋ.
7 La muliŋ mi la kuɛ o tanda ŋpembu Amɔluaitiiya, a fondaŋnda balu nda laŋ kpou, Aluaba, fondaŋ ŋpemboo, Sifila,* Nɛkɛbi,* kɔŋgɔ pee mɛŋma ihɛllo, lɛŋnde Kenanaitiiya, Lebanɔŋ, haaa o pee bɛndoo Yufiluaati.
8 Le nya lɛŋndeŋ ndeŋ le cho ni, la kɔ mi la kɔ chal loŋ. Lɛŋndeŋ ndeŋ ya Chɛhowa chuel finyaa nyaa mamaa, Ebilaham, Aase, a Chekɔpu buŋgɛi le nda a chuauwaa ndaa mamaa kioo ni.’
9 “Nduyɛ, mi dimul nya teleŋ koŋ aa, ‘I tiuba mi kuɛ a nya yapilɛ le.
10 Chɛhowa Mɛlɛka nyaa tosa mi la kui tau, nduyɛ la simnuŋ niŋ hau mɛɛ looŋ cho nuaa o choo choo niŋ yɛ.
11 Maa Chɛhowa, Mɛlɛka finyaa nyaa mamaa tosa mi la kui o waalaŋ niŋ mbo hiou mɛɛ nya cho nuaa yɛ fɔ. Nduyɛ maa o dɔu nya sala a mɛɛ o chuel nya buŋgɛi yɛ fɔ.
12 I tiuba mi biunuŋ bahawɛila nyalaŋ, kalaŋnda nyalaŋ, a ŋɔɔchiaŋnda nyalaŋ kpou yapilɛ le.
13 O kaale kɛ kɛ choo, la hɛli puaa nɔ taasioo, kɔl kaloo, a sinapɛŋgoo wa, nduyɛ mi yulu nda iso le ma wa nya chilaŋ.’
14 Mi la mulul la aa, ‘Nyɛ ŋ dimul naa le tosaa wo o bɛnda.’
15 Okoŋ, mi hɛli puaa nɔ taasioo a sinapɛŋgoo wa o kayii nyɛi choo mi yulu nda iso le ma wa nya chilaŋ. Okoŋ, mi handu nda masaa nya choo. Masaa apum waŋnda waapilɛ wa nda o ba bɛŋgu ni, apum waŋnda kɛmɛ, apum waŋnda beleŋuɛɛnu, apum ŋwaŋ tɔ. Apum yɛ, le ma wa waŋ bɛnduaa o kaala nyalaŋ niŋ.
16 “A teleŋ koŋ, mi dimul wanaa nyaa kialaa ŋyamaa aa, ‘Te suɛi keekaŋ pɛ puaapiliaa nyaa tɛɛŋ mi la chal o suɛi keŋ choo, la nɔ mi la kelu yamɛi o nɛi sakpoo choo, o wa nyapila Isɔluɛiya tɛɛŋ, ɔɔ Isɔluɛinɔɔ a mialaa cho nya tɛɛŋ nda.
17 La sim wana kɔɔli o yamɛi kiolɔɔ niŋ te. Chuaambɔ ni, bɛndu ni, la nɔ mi la bii nda kpeŋkpeŋ. La yɔŋ isiooŋ le wana o wana le, kanifuule le Mɛlɛka nya cho yamɛi kiolɔɔ ni. Isɔɔ o isɔɔ wa pɛ ikala le nya, la huŋ a ndi naa ya chua mi dimi ndi.’
18 A teleŋ koŋ, mi dimul nya nyɛ o nyɛ nya nɔ mi la tosa.
19 “Okoŋ, miŋ faŋaŋ Holuɛɛbi, miŋ keeku o lɛŋnde polte wɔɔŋnde bɛnduleŋ niŋ, le nya che o nɛi kuɛ o tanda ŋpembu Amɔluaitiiya wo, miŋ fuuluu Kedɛsi-baniaa, mɛɛ Chɛhowa Mɛlɛka naa dimul naa yɛ.
20 Mi dimul nya aa, ‘La fuuluu o fondaŋ ŋpembu Amɔluaitiiya, fondaŋ Chɛhowa Mɛlɛka naa cho naa kioo wo.
21 Chɛhowa Mɛlɛka nyaa chii nya lɛŋndeŋ ndeŋ ke. La kɔ mi la kɔ chal loŋ a mɛɛ Chɛhowa, Mɛlɛka finyaa nyaa mamaa dimul nya yɛ. La yɔŋ isiooŋ te.’
22 “Kɛ mi nya kpou huŋ naa ya chua mi la dimi aa, ‘La ŋ viomnuŋ ndɔ fɛŋ puaa le ma kɔ tofa lɛŋnde naŋ nɔ le kɔlaŋ ndeŋ, okoŋ ma huŋ dounuŋ naa kona, le sinaa nɛi naŋ nɔ miŋ keeku wo a chieeŋ naŋ nɔ miŋ komal loŋ.’
23 Mi cha maa kɛɛsiaa kɛndɔɔ pila nyaa kɛɛsiaa ni. Le hei, mi hɛli puaa 12 nya tɛɛŋ. Lekaa o lekaa, wana pilɛ.
24 Okoŋ ma chaŋ, ma kua o fondaŋ ŋpemboo, ma fuuluu o Kpoloŋndo* Ɛsikɔɔ, ma kɔ mɛɛndaŋ ndu.
25 Ma chua nyɛm kuamaŋ ŋpum o lɛŋnde leŋ niŋ, ma huŋ a muŋ naa naa chua. Ma dimul naa aa, ‘Lɛŋnde Chɛhowa Mɛlɛka naa cho naa kioo leŋ, le naŋ bɔɔ.’
26 Kɛ mi la kɛɛ le kɔlaŋ loŋ, nduyɛ la tosa nyɛ Chɛhowa Mɛlɛka nyaa dimul nya wo le.
27 Mi la hiau lachi a ŋɔɔchiaŋndo o tɛndiila nyalaŋ niŋ, mi la wa dimioo aa, ‘Le mɛɛ Chɛhowa tul naa leyɛ yɛ o soli naa o lɛŋnde Ichipi leŋ niŋ ni, le mbo huŋ mal naa Amɔluaitiiya o ba, ma diu diu naa kpou.
28 Kuɛɛnɛ kpeekpei naŋ cho yɛ laŋ? Puaapiliaa naa tosa mi kɔltaŋ la laasiaŋ naa niŋ mɛɛ nda dimi aa, “Wanaa cho loŋ nda hiou naa kpaayaa, nduyɛ a bandu a hiou naa poloŋ. Chieeŋ ndaŋ cho ŋ bɛndu, nduyɛ ŋ nɔ kpakila kala kalalaŋ la fuulaa o halaa niŋ di. Nduyɛ, miŋ cha puaa Anakimnda loŋ.”’
29 “Lelaŋ mi dimul nya aa, ‘La laasiaŋ kɔltaŋ ɔɔ mi siooŋii bii nya le nda le.
30 Chɛhowa Mɛlɛka nyaa cho nya lakɔ lachi, nduyɛ mbo sɔŋga le nya, mɛɛ o tosa nya o hɔl Ichipi yɛ.
31 Nduyɛ mi la cha o pollo niŋ mɛɛ Chɛhowa Mɛlɛka nyaa kuɛ a nya, mɛɛ finyaa kua nuaa a po ndɔɔ yɛ. Ba o ba nya keeku, o wa a nya latulu haaa mi la fuuluu o fondaa hoo naŋ.’
32 Kɛ a sɔɔŋ Chɛhowa Mɛlɛka nyaa tosa muŋ ndoŋ kpou, la dou laalaŋndo o ndu niŋ te.
33 Ndu wa nya kɔlaŋ lachi ni le mbo mɛɛndaŋ fondaŋ nya nɔ le dɔɔŋgɔɔ kilaa wo. Ichɔl, mi ndoo chɔm a yiŋndeŋ maa o cho a nya latulu, nduyɛ ipala, mi ndoo chɔm a yumbu yumbu ikpuŋgbaa maa o cho a nya latulu, le halikpeŋ mbo chɔm nya nɛi nya nɔ mi la kuɛ choo wo.
34 “A teleŋnda laŋ kpou, mi Chɛhowa tuɛi nyɛ o nyɛ nya wa dimioo. Nduyɛ mbo duaunuŋ tumbe o kala kala, mbo mɛnaŋ aa,
35 ‘Puaa dɛnɛ wɔɔŋnda haa kinɛi, wana pilɛ bɛɛ o chi lɛŋnde ya chuel finyaa nyaa mamaa buŋgɛi le nda kioo leŋ te,
36 mɛɛ Kelɛbi po Chɛfunɛ wo. Ndu ndu, o cho leŋ chɔ. Nduyɛ lɛŋnde kɛ kɛ o kela choo, I cho ndu leŋ ke nda chuauwaa nduaa. Kanifuule, mbo tual Chɛhowa kɔɔli a kɔllo kpou.
37 (Mi Chɛhowa duaunuŋ pɛŋ tumbe a ya le sabu nyaa. Mbo dimi aa, “Num bɛɛ a luei loŋ te.
38 Chɔɔsuaa po Nuŋ ndo, o sim num koŋ lachi wo, ndu cho luɛiyɔɔ o lɛŋnde leŋ niŋ ni. Luei ndu yoomuaŋ, kanifuule ndu cho tosa ni mi Isɔluɛiya bii leŋ.”)
39 O fulawɔ okoŋ kɔɔli, chuauwaa nya dimi maa a cho lakɔŋnɔŋ a nda wa, a sina haa ikɛndɛi a iwɔɔŋnde le wa, nda cho luɛiyɔɔ o lɛŋnde leŋ niŋ ni, nduyɛ mi ke nda leŋ mi le wa nyɛ nda.
40 Kɛ nya nya, la muliŋ mi la kuɛ o pollo niŋ a nɛi keeku o Pee Siaŋa Mɛŋma Ihɛllo wo.’
41 “Okoŋ, mi la dimul la aa, ‘Ŋ tosa hakioo a Chɛhowa. Ŋ cho lakɔ miŋ sɔŋga a mɛɛ Chɛhowa Mɛlɛka naa dimul naa yɛ!’ Lelaŋ, mi wana o wana chua nyɛm ndɔŋ chɔuwoŋ, nduyɛ mi la yiyaŋ maa i cho wa bɛɛŋ bɛɛŋ le kɔlaŋ o pembei choo.
42 Kɛ mi Chɛhowa suaa o ya lo aa, ‘Dimul nda aa: “La kua mi la kɔ sɔŋga a nda le. Kanifuule, I cho wa a nya latulu le. Te la kuɛ pɛ, yaamɔɔwaa nyaa cho nya lakɔ yomɔɔ.”’
43 Okoŋ mi dimul nya, kɛ la yeŋ lani le. Mi la kɛɛ nyɛ Chɛhowa dimi wo tosaa, mi la chaŋ kɔlaŋ o pembei choo a yoŋgaa.
44 Mi Amɔluaitiiyaa wa o pembei choo wa hinul nya maa ŋlɛ, ma tisa nya kɔɔli, mi la saŋnuŋ Sɛyaa haaa Hɔɔma.
45 Okoŋ, mi la miiŋgu o Chɛhowa lo a chaŋndo. Kɛ Chɛhowa yeŋ nya lani le, nduyɛ o mulul nya le.
46 Le sabu koŋ kpeekpei nya wa Kedɛsi le teleŋ vilɛi ni.
