Ditɔnɔmii 11:1-32
11 “La nɔ mi la kaala Chɛhowa Mɛlɛka nyaa, nduyɛ teleŋ o teleŋ mi la tosa nyɛ cho nya kuee le tosaa wo, mi la bii sawala ndɔlaŋ, a nyɛ o nyɛ o dimul nya.
2 La sina pɛŋgu maa o nya lo ya cho hau suɛi ni, kɛ o cho o puaa nyaa lo le. Kanifuule, nyɛpalaa Chɛhowa Mɛlɛka nyaa tusi waŋnda choo wo, tɔɔmayɛi nduɛi, a kpaaya ndɔ bɛndoo, puaa nyaa sina a hei okɔɔ ɔɔ ma che ndi o yɔŋnɔŋndo le.
3 A chi sɔɔŋ kɔndɔfilloŋ, a nyɛ o tosal Felo masaa le Ichipi, a waŋnda o lɛŋnde ndɔleŋ niŋ kpou wo le.
4 Teleŋ puaa chɔuwa Ichipi, suaa Felo wa, a nyɛm nyaanaŋ suaa naŋndoŋ wa nya kiltaŋ kɔɔli wo, mi Chɛhowa tosa mi Pee Siaŋa Mɛŋma Ihɛllo kumbu nda kpu, nduyɛ mbo tɛɛmbuu nda o lepilɛ niŋ kpe wo, a chi le.
5 Haaa mi la fuuluu o fondaa hoo, a chi nyɛ o tosal nya o pollo niŋndo le.
6 A chi vɛlɛ nyɛ o tosal Detaŋ a Abailuam, puaa Ɛliaabi wa, a fula o pulale Lubɛŋ ndeŋ choo wa le. Mɛɛ lɛŋndeŋ le kumbiŋ mi le mial nda latulu a yuŋgula ndalaŋ, tɛndiila ndalaŋ, wana o wana wa nda tooloo, a chɔluaa ndaa kpou Isɔluɛiya o hɔl, a chi le.
7 Kɛ nya nya, sɔɔŋ kɔndɔfiliŋ bɛnduŋ Chɛhowa tosa muŋ ndoŋ kpou, mi la cha muŋ a lehɔl pɛɛŋ.
8 “Lelaŋ, sawala ya cho nya hau kioo laŋ kpou, la nɔ mi la tosa nyɛ la dimi wo, le halikpeŋ mi la wa wanaa dialuŋ kala, nduyɛ mi la taŋ o lɛŋnde nya cho kɔlaŋ challe leŋ niŋ.
9 Koŋ cho tosa mi la viou achal o lɛŋnde Chɛhowa chuel finyaa nyaa mamaa, a nya chuauwaa ndaa mamaa* buŋgɛi leŋ niŋ, lɛŋnde milikiiyaŋ,* a liaaŋ ma cho taaliaa leniŋ ndeŋ.
10 “Lɛŋnde nya cho kɔlaŋ challe niŋ ndeŋ, le cho maa lɛŋnde Ichipi leŋ, naa nya fula wa le. Kanifuule, loŋ ndu nyɛ o nyɛ nyaa tɔl pɛ, mɛɛ mi nyaa yɔkpa yɔkpaa pila le ndu pɔɔliaa, mɛɛ nda pɔɔliaa nuaa kpelela pɔmbɔlaŋ yɛ.
11 Kɛ lɛŋnde nya cho hunɔɔ taŋɔɔ le kɔlaŋ challe niŋ ndeŋ, lɛŋnde nɔ pemboŋ a dɛŋgbɛlaŋ ndeŋ le cho ni. Nduyɛ, piɔɔ sia wo pɔɔliaa leŋ ni.
12 Lɛŋnde Chɛhowa Mɛlɛka nyaa cho mandaa leŋ le cho ni. Nduyɛ, chɔŋ o wɔsioo kandɔŋndo haaa kɔ o wɔsioo mɛɛlulaŋ, hɔlte Chɛhowa Mɛlɛka nyaa cho leŋ choo teleŋ o teleŋ.
13 “Te la diikuŋ pɛ sawala ya cho nya kioo paale hauleŋ ndeŋ ndaŋ, mi la kaala Chɛhowa Mɛlɛka nyaa, nduyɛ mi la piɛi ndu a kɔl nyaa kpou vɛlɛ a yoomu* nyaa kpou,
14 o* cho tosa mi piɔɔ wa siaa o lɛŋnde nyaleŋ niŋ a teleŋ o nɔ le siaa wo, chɔŋ a piɔɔ tasoo haaa kɔ a piɔɔ mɛɛlaa. Nduyɛ la cho wa kulloŋ sɔlaa, muɛima sɛnɛiyaŋ, vɛlɛ a chuɛiyaŋ.
15 O cho tosa mi billo wa puiyo o yondola nyalaŋ niŋ le chɔluaa nyaa, nduyɛ la cho wa dioo mi la pum cha.
16 La mandaŋ, yɔŋii kɔlta nyalaŋ la muliŋ o mɛlɛkaa cheleŋnda lo, mi la beŋ nda wulaŋ le nda sooluuwo.
17 Te o cho koŋ te, Chɛhowa cho dɔɔnɔŋ tumbe a nya tau, mbo tosa piɔɔ se lɛ o lɛŋndeŋ choo mi tɔlɔɔla nyalaŋ la naŋ te. Okoŋ, mi la keleŋa piɔmndo sɔla o lɛŋnde kɛndɛle Chɛhowa cho nya kioo leŋ niŋ.
18 “La kɛsiŋ diomnda ya dimul nya laŋ ndaŋ o kɔl, nduyɛ mi la tosa nyɛ la dimi wo o yoomu* nyaa niŋ. La yiinuŋ ndaŋ o laba le mi la loonuŋ a laŋ okɔɔ, nduyɛ mi la yiinuŋ ndaŋ o ŋtendu maa tamasi.
19 La pɛɛku chuauwaa nyaa laŋ, nduyɛ mi la wa suɛi o nda lo a laŋ okɔɔ, te la wa ichali o la nya lo chiɛiniŋ pɛ, te la wa kɔlaŋ o nɛi pɛ, te la wa hinilaŋ pɛ, nduyɛ te la chɛŋ pɛ.
20 La poonyiaa laŋ o keedeŋ diola chiɛila nyalaŋ, a o diola kpakila nyalaŋ.
21 Okoŋ, mi nya a chuauwaa nyaa viou achal o lɛŋnde Chɛhowa chuel finyaa nyaa mamaa buŋgɛi le nda kioo leŋ niŋ, mɛɛ choo choo cho nuaa o landaŋ o lɛŋndeŋ choo le fɛɛŋ a fɛɛŋ yɛ.
22 “Te la diikuŋ pɛ sawala ya cho nya kioo laŋ nyɛkɛndɛi, nduyɛ mi la tosa nyɛ la dimi wo, mi la kaala Chɛhowa Mɛlɛka nyaa, mi la kuɛ o nɛila ndɔlaŋ choo kpou, nduyɛ mi la holnuŋ ndu pɛ,
23 Chɛhowa cho kaalaŋ ndaŋ kpou touwɔɔ nya lachi, mbo tosa mi la hɛlu lɛŋii nɔ kpaayaa, nduyɛ mi i nɔ waŋnda faŋga bɛndoo mi i hiau nya ve.
24 Fondaŋ kɛ kɛ nya nɛi pɛ o lɛŋnde leŋ niŋ, le nya o cho wa ni. Pɛŋgula nyalaŋ la cho wa chɔŋ o pollo niŋ kɔ Lebanɔŋ, vɛlɛ a chɔŋ o pioo Yufiluaati kɔ o pee mɛŋma ihɛllo ba paaleŋ le del lo.*
25 Wana o wana nɔla niŋ mbo simul nya le. Nduyɛ, Chɛhowa Mɛlɛka nyaa cho tosa mi siooŋii bɛnduei bii waŋnda le nya, o lɛŋnde nya cho kɔlaŋ ndeŋ niŋ kpou, a mɛɛ o chuel nya buŋgɛi yɛ.
26 “La yaŋ nilaŋ. Paale hauleŋ ndeŋ, I kɛsi nya salaa a sendioo lachi:
27 salaa cho nya wa choo, te la diikuŋ pɛ sawala Chɛhowa Mɛlɛka nyaa, la ya cho nya hau kioo laŋ.
28 Nduyɛ sendioo cho nya wa choo, te la kɛɛ pɛ le sawala Chɛhowa Mɛlɛka nyaa diikɔŋndo, mi la faŋaŋ o nɛi ya cho nya hoo hau chɔmndo wo choo, okoŋ mi la muliŋ mɛlɛkaa nya sina le wa tolɔɔ kɔɔli.
29 “Te Chɛhowa Mɛlɛka nyaa kuɛ pɛ a nya o lɛŋnde nya nɔ le challe leŋ niŋ, la nɔ mi la sim o pembei Kɛluisim mi la dɔu waŋnda sala, nduyɛ mi la sim o pembei Ɛba mi la handu waŋnda sendioo choo.
30 Chɔɔdaŋ ndaŋ leeloo ba paaleŋ le del lo pemboŋ muŋ cho ni, o lɛŋnde Kenanaitiiya niŋ, a cho ichali o tanda Aluaba wo niŋnda, ba Kikaa wo, o yɔmii bɛnduei Moluɛɛ ikɛi.
31 Kanifuule, la cho hunɔɔ Chɔɔdaŋ ndaŋ taŋɔɔ le kɔlaŋ challe o lɛŋnde Chɛhowa Mɛlɛka nyaa cho nya kioo leŋ niŋ. Te la bii pɛ leŋ mi la chal leniŋ,
32 la nɔ mi la wa yekeŋ nduyɛ mi la tosa nyɛ o nyɛ sawala ya cho nya hau kioo laŋ la dimi wo.
Tɛɛsiaalaŋ
^ Hibuluiye, “kulle.”
^ Ɔɔ “nɔnɔɔ.”
^ Tofa Tɛɛsiaa.
^ Hibuluiye, “I,” o sim le Mɛlɛka o sɔɔŋ 14 a 15 niŋ.
^ Tofa Tɛɛsiaa.
^ Koŋ cho ni, Pee Bɛndu Mɛŋma Ihɛllo, Mɛditalueeniaa.
