Ditɔnɔmii 14:1-29
14 “Nya cho chuauwaa Chɛhowa Mɛlɛka nyaa ni. La tɛɛndiaa dialuŋ nyaŋ ɔɔ mi la sendi yiiŋii lahɔlle* le wana vilɛiyo le.
2 Kanifuule, wanaa diandaa nya cho le Chɛhowa Mɛlɛka nyaa ni, nduyɛ Chɛhowa hɛli nya le mi la wa wanaa ndɔ. O wanaa cho o chieeŋndo choo wa tɛɛŋ kpou, nya o hɛli ni le mi la wa nyɛm kɛŋ ndɔŋ teŋgeŋndoŋ.*
3 “Nyɛ o nyɛ cho pɛ o nɔɔlɛi, la nɔ mi la de ndu le.
4 Visiaa nya nɔ mi la de wa cho haa ni: nauwo, saa, chuiŋndo,
5 kiallo, puuwɔɔ, kialaa suu cheleŋ, chuiŋ bandilaa, visi velaŋ a kiallo wo, saa wa yondoo niŋnda, a haa o pemboŋ choo.
6 Visi o visi nɔ pɛ buukoo o tɛndaa kpala, nduyɛ mbo kpukula nyɛdiaa, la dia ndu.
7 Kɛ, visiaa nya nɔ mi la de le wa cho haa ni, mi che bɛɛ ma kpukula nyɛdiaa, ɔɔ ma nɔ buukoo o tɛndaa: nyɔɔmiɔɔ, saŋ bandilaa, a saŋndo. Kanifuule, ma kpukula nyɛdiaa, kɛ buukula ndalaŋ la cho la tɛndaa le. Visiaa nɔɔlɛiya nda cho le nya ni.
8 Peuwo ndu, o nɔ buukoo o tɛndaa kpala, kɛ o kpukula nyɛdiaa le. Visi nɔɔlɛiyo o cho le nya ni. La nɔ mi la de visiŋ ndaŋ te. Nduyɛ te a vi pɛ, la pilaŋ nda le.
9 “Nyɛ o nyɛ yoomaa cho o peelo, a nya nɔ mi la de wa cho haa ni: Nyɛ o nyɛ nɔ pɛɛpɔŋ a kɛkɛulaŋ, la dia.
10 Kɛ nyɛ o nyɛ nɔ ŋpɛɛpɛ a lakɛkɛu le, la nɔ mi la de ndu le. Nyɛ nɔɔlɛiyo o cho le nya ni.
11 “You o you cho o diandaa, la dia.
12 Kɛ a nya nɔ mi la de le wa cho haa ni: kowɔɔ, you biyaa, duaa tiŋioo,
13 siaaŋ bɔɔla siaŋaa, siaaŋ bɔɔla tiŋioo, a siaaŋaa suu o suu,
14 basabasakuende suu o suu,
15 ɔsiluichiiyo, huoo, koyaŋndo, siŋgbi suu o suu,
16 huaa pɔmbuaa, huaa nila vilɛiya, suaŋnda,
17 pɛlikaŋnda, duaa, hɔlɔhɔlɔɔ,
18 sitɔkiiya, hɛlɔŋaa suu o suu, hupuaa, a tasaa.
19 Nyaa yoomaa nɔ bɔɔlaŋ nduyɛ ma balu kunda wa bɛɛ, nyaa nɔɔlɛiya nda cho le nya ni. La nɔ mi la de nda le.
20 Nyaa yoomaa balu o choo choo niŋ nduyɛ ma wa a diandaa wa, la dia nda.
21 “La dia visi vi o ba choo wo le. La ke mialaa cho nya tɛɛŋ o chieeŋ nyaŋ bɛndoŋ* niŋnda ma de, ɔɔ mi la pisi nda o ba. Kanifuule, nya cho wanaa diandaa le Chɛhowa Mɛlɛka nyaa ni.
“La yau chuiŋ chuaa o mɛɛma kala ndɔ waŋ niŋ te.
22 “Iwɔsi o iwɔsi, te tɔlɔɔla nyalaŋ la kom pɛ o chiɔɔŋ nyaŋ niŋ, la nɔ mi la yɔŋgu o tɔ ndɔɔ.
23 La nɔ mi la de o tɔ ndɔɔ o kuluŋ nyaŋ choo, muɛima nyama sɛnɛiyaŋ, chuɛima nyaŋ, kɔmnde taseleŋ o chɔluaa nyaa choo Chɛhowa Mɛlɛka nyaa lachi, o fondaŋ o hɛli le mi diola ndɔlaŋ la wa wo, le halikpeŋ mi la nɔ siooŋnde teleŋ o teleŋ le Chɛhowa Mɛlɛka nyaa.
24 “Kɛ te tiŋndo hiu pɛ bandei le nya, nduyɛ maa la tiuba mi la kuɛ a ndu o fondaŋ Chɛhowa Mɛlɛka nyaa hɛli wo, le mɛɛ tiŋndo bandu a nya yɛ le, kanifuule Chɛhowa Mɛlɛka nyaa dɔu nya sala,
25 la pisi nyɛm muŋ mi la kuɛ a kaniŋ muŋ o fondaŋ Chɛhowa Mɛlɛka nyaa hɛli wo.
26 La soliŋ kaniŋ muŋ kpeku mi la pendu nauwa, saa, chuiŋnda, muɛiyaŋ, a muɛima suu o suu cheleŋ. Nyɛ o nyɛ nya yeema pɛ, la piandu. Nduyɛ nyɛ o nyɛ nya yeema pɛ, la dia ndu loŋ nya yuŋgula nyalaŋ latulu, mi la dɔɔnuŋ nyaale Chɛhowa Mɛlɛka nyaa lachi.
27 Nduyɛ, la puɛɛnuŋ a Livaiyaa cho o chieeŋ nyaŋ bɛndoŋ niŋnda okɔɔ le, kanifuule a sɔla nyɛm kɛ le.
28 “O wɔsila yaa kɛ kɛ mɛɛlulaŋ, la nɔ mi la hiŋ a o tɔ ndɔɔ o komɔɔla nyalaŋ tɛɛŋ le wɔsi koŋ, mi la kɛsi ndu o chieeŋ nyaŋ bɛndoŋ niŋ.
29 Okoŋ Livaiyaa sɔla kaŋ nyɛm kɛ le wa, mialla, chuaambuaa nɔ ŋfinya le wa,* a waŋ laanduaa vii piaanduaa ma wa o chieeŋ nyaŋ bɛndoŋ niŋnda cho hunɔɔ, ma de nyɛm muŋ ma hini kɔl. Le halikpeŋ mi Chɛhowa Mɛlɛka nyaa dɔu nya sala o nyɛ o nyɛ niŋ nya tosa.
Tɛɛsiaalaŋ
^ Hibuluiye, “yiiŋii cho o kooŋgolaŋ choo ve.”
^ Ɔɔ “nyɛm kɛŋ ndɔŋ sɔvɛ sɔviɔŋ.”
^ Hibuluiye, “diola kpakilaŋ.”
^ Ɔɔ “viiya.”
