Ditɔnɔmii 19:1-21
19 “Te Chɛhowa Mɛlɛka nyaa tɛɛmbuu pɛ kaala cho o lɛŋnde Chɛhowa Mɛlɛka nyaa cho nya kioo leŋ niŋndaŋ, nduyɛ mi la hɛlu nda leŋ o ba, mi la chal o chieeŋ ndaŋ bɛndoŋ niŋ a o chiɛila ndalaŋ niŋ,
2 la nɔ mi la hɛli chieeŋ bɛndoŋ ŋgaa o lɛŋnde Chɛhowa Mɛlɛka nyaa cho nya kioo leŋ niŋ.
3 La nɔ mi la piɔu tanda lɛŋnde Chɛhowa Mɛlɛka nyaa ke nya leŋ sala yaa, mi la bɛɛndiaa nɛila kuɛ o chiooŋ muŋ ndaŋ nyɛkɛndɛi, le mi wana sulɛi hɛluŋ mbo dii wanachioo wo nyaanuŋ o chiooŋ muŋ niŋ i pilɛ.
4 “Te sulɛi hɛluŋ pɛ waŋndo, nyɛ o nɔ mbo tosa le mbo wa yoomu wo cho hoo ni: Te o ve kɔl te mbo dii waŋndo, nduyɛ maa ndoo tul ndu leyɛ o paandoo niŋ te, o nɔ mbo nyaanuŋ loŋ.
5 Ŋ dimi wɔ maa a kuɛ yɔmnde tiŋgɔɔ nda chaaŋ ndɔ yondoo niŋ, mbo lo yɔmndo lɔwaa mi chuei bɛŋiŋ, mi i kɔ viɔ chaaŋ ndɔ mbo wu. O nɔ mbo nyaanuŋ o chieeŋ bɛnduŋ muŋ niŋ i pilɛ le mbo wa yoomu.
6 Kɛ te tiŋndo hiu pɛ bandei le kɔlaŋ o chiee koŋ, wana miŋgiaa maa* nɔla mbo nyaanɔŋ ndu kɔɔli a kɔl tuu koŋ mbo bii ndu nduyɛ mbo dii ndu, mi che bɛɛ ndoo nɔ mbo sɔla piɔm te. Kanifuule, ndoo tul chaaŋ ndɔ leyɛ le.
7 Le sabu koŋ ya dimul nya ni aa, ‘La hɛli chieeŋ bɛndoŋ ŋgaa.’
8 “Chɛhowa Mɛlɛka nyaa cho tanda nyaa chɔɔlu a mɛɛ o chuel finyaa nyaa mamaa buŋgɛi yɛ, nduyɛ mbo ke nya lɛŋnde o chuel finyaa nyaa mamaa buŋgɛi leŋ kpou.
9 Le mi hei yɔŋnuŋ, la nɔ mi la bii sawala ya cho nya kioo paale hauleŋ ndeŋ ndaŋ kpou, mi la kaala Chɛhowa Mɛlɛka nyaa, nduyɛ mi la wa kɔlaŋ o nɛila ndɔlaŋ choo teleŋ o teleŋ. Okoŋ te la chɔɔlu pɛ tandaa sɔla, la hɛli vɛlɛ chieeŋ bɛnduŋ cheleŋ ŋgaa.
10 Te la tosa lende pɛ, wana tɛɛmbuu isɔɔ le wo sɔla niŋ piɔmndo o lɛŋnde Chɛhowa Mɛlɛka nyaa cho nya kioo, le mi le simnuŋ nyɛm kɛŋ nya leŋ niŋ te, nduyɛ tɔɔyaŋ piɔm wana o wana ve nya choo le.
11 “Kɛ te waŋndo tul pɛ chaaŋ ndɔ leyɛ nduyɛ mbo wa nɛilaŋ nuuviaa le ndu chiŋalaŋndo, okoŋ mbo boli ndu tau mbo vi, te wana koŋ nyaanuŋ pɛ o chieeŋ nyaŋ bɛndoŋ niŋ i pilɛ,
12 waŋ banaa cho o chiee koŋ niŋnda nɔ ma mal ndu wana miŋgiaa maa* o ba, le mbo dii ndu.
13 La* nɔ mi la tuiinuŋ ndu inyiɛɛ le, nduyɛ la nɔ mi la faŋa tɔɔyaŋ piɔm wana tɛɛmbuu isɔɔ o isɔɔ le wo o Isɔluɛi niŋ. Okoŋ, nyɛ o nyɛ cho wa o kɛndɛ a nya.
14 “Te la fuuluu pɛ o lɛŋnde Chɛhowa Mɛlɛka nyaa cho nya kioo leŋ niŋ mi wana o wana sɔla buŋgɛi nduɛi nyɛm kiɔɔŋ, faŋa pɛŋgula finyaa nyaa mamaa kɛsi nya wana nya chiɛɛliaŋndo tɛɛŋ ma hivi laŋ naa cheleŋ te.
15 “Wana pilɛ nɔ mbo timbi seileŋ le dɛnɛ wɔɔŋ ɔɔ haki waŋndo tosa wo le. Mɛɛ mi wanaa ŋiɔɔŋ ɔɔ a yaa timbi seileŋ le sinaa te tonya suɛi keŋ cho ni.
16 Te waŋndo tul pɛ chaaŋ ndɔ leyɛ okoŋ mbo tɛndal ndu seile lakafaleŋ,
17 wanaa ŋiɔɔŋaa kaŋ nɔ ma kɔ sim wanaa soliaa lasalaa, wanaa kialaa ŋyamaa cho wa o palɛi keŋ niŋnda, a Chɛhowa lachi.
18 Wanaa kialaa ŋyamaa nɔ ma yaasiaa suɛi keŋ nyɛkɛndɛi, nduyɛ te o wa pɛ maa seile lakafaleŋ o tɛndal puaapilɛnɔ ndɔɔ ni nduyɛ mbo hɛɛnduu ndu sɔɔŋ choo,
19 la nɔ mi la tosal ndu nyɛ ndoo tuunuŋ o kɔl le puaapilɛnɔ ndɔɔ tosallo wo. La nɔ mi la faŋa wana dɛnɛ wɔɔŋndo nya tɛɛŋ.
20 Te wanaa cheleŋ tuei pɛ a ndi o kɔɔ, siooŋnde cho nda biyɔɔ nduyɛ fɛɛŋ bɛɛ a tosa lɛ suɛi wɔɔŋ waa lende nya tɛɛŋ te.
21 La* nɔ mi la tuiinuŋ ndu inyiɛɛ le. La nɔ mi la yɔŋgu yoomoo le yoomoo, hɔlteŋ le hɔlteŋ, chiŋnde le chiŋnde, baa le baa, pelei le pelei.
Tɛɛsiaalaŋ
^ Ɔɔ “wana nda diiyo wanayɛi nduɛi.”
^ Ɔɔ “wana nda diiyo wanayɛi nduɛi.”
^ Hibuluiye, “Hɔlta nyalaŋ.”
^ Hibuluiye, “Hɔlta nyalaŋ.”
