Ditɔnɔmii 20:1-20
20 “Te la kuɛ pɛ yaamɔɔwaa nyaa chɔulabaa nduyɛ mi la cha maa suaa ndaa, nyɛm ndaŋ nyaanaŋ suaa naŋndoŋ, a puaa ndaa chɔuwa cho tau ma hiau nya, la yɔŋ isiooŋ le nda le. Kanifuule, Chɛhowa Mɛlɛka nyaa, o soli nya o lɛŋnde Ichipi leŋ niŋndo cho a nya latulu.
2 Te waŋnda wa pɛ kɔlaŋ o chɔuwo, wana soliaa lasalaa nɔ mbo kɔ soo o nda lo.
3 O nɔ mbo dimul nda aa, ‘Nya waŋnda Isɔluɛi, la yaŋ nilaŋ. La cho kɔlaŋ yaamɔɔwaa nyaa chɔulabaa. Lelaŋ, la nɔ mi la laasiaŋ lakɔl te. La yɔŋ isiooŋ le nda mi la nyiiya le.
4 Kanifuule, Chɛhowa Mɛlɛka nyaa cho nya kɔlaŋ lachi, le mbo chɔulaba yaamɔɔwaa nyaa nduyɛ mbo piŋi nya.’
5 “Wanaa cho puaa chɔuwa bolleŋ nda bɛɛ nɔ ma nyuna waŋnda aa, ‘O nɛɛnɛ taŋgullɛ chiɛiyo sɛnɛi, kɛ o lueiyɔ leniŋ te? Wana koŋ miiŋgu o ndu lo bɛɛ, yɔŋii nda kɔ dii ndu o chɔuwo mi wana cheleŋ luɛi o ndu lo chiɛiniŋ.
6 O nɛɛnɛ nɔ yɛ kpeloo, kɛ o kendu wɔ nyɛm o tɔl o kpele koŋ niŋndoŋ dioo le? Wana koŋ miiŋgu o ndu lo bɛɛ, yɔŋii nda kɔ dii ndu o chɔuwo mi wana cheleŋ wa nyɛm cho o kpele koŋ niŋndoŋ dioo.
7 Nduyɛ, o nɛɛnɛ dɔu yɛ wana lanɔɔ fulu, kɛ o chue wɔ ndu o nɔɔ niŋ te? Wana koŋ miiŋgu o ndu lo bɛɛ, yɔŋii nda kɔ dii ndu o chɔuwo, mi wana cheleŋ chua chua koŋ o nɔɔ niŋ.’
8 Wanaa cho puaa chɔuwa bolleŋ nda nɔ vɛlɛ ma nyuna waŋnda aa, ‘O nɛɛnɛ siooŋnde cho yɛ, nduyɛ mi kɔllo wa ndu pulaŋ pulaŋ? Wana koŋ o miiŋgu o ndu lo bɛɛ, yɔŋii o tosa mi kɔltaŋ la yɔŋnuŋ puaapiliaa nduaa pulaŋ pulaŋ maa ndu.’
9 Te wanaa cho puaa chɔuwa bolleŋ nda chii pɛ suɛi o waŋnda lo, a nɔ ma hɛli wanaa cho puaa chɔuwa chilaŋ nda, le ma sim waŋnda lachi.
10 “Te la balu pɛ chioo le ndu delɔɔ choo a sɔŋgɔɔ, la dimul nda fɛŋ maa le kɔl nyuloo nya hiŋ ni.
11 Te a mulul nya pɛ o kɔl nyulu niŋ nduyɛ ma chɛl nyɛ nya dimul nda wo, mɛɛ wanaa cho o chiee koŋ niŋnda kpou cho wa nya o ba bɛŋgu, nduyɛ ma wa nya walta lechɛ laŋ tosallo.
12 Kɛ te a kɛɛ pɛ le kɔl nyuloo tosaa a nya nduyɛ ma simul nya le chɔuwo, mɛɛ la luei chioo o piŋndo niŋ.
13 Chɛhowa Mɛlɛka nyaa cho nya ndu malɔɔ o ba, nduyɛ mi la diu puaa kaasoŋaa cho loŋ nda kpou a muɛi faŋnde.
14 Kɛ la biu biu waŋ laanduaa, chuaambuaa, chɔluaa, a nyɛ o nyɛ cho o chiee koŋ niŋ le nyapila. Nduyɛ nyɛm yaamɔɔwaa nyaa, ŋ Chɛhowa Mɛlɛka nyaa ke nya woŋ nya cho wa dioo ni.
15 “Lende nya nɔ ni mi la tosa a chieeŋ bɛnduŋ cho nya landaŋ landaŋ ndoŋ. Kɛ chieeŋ bɛnduŋ cho nya kpɛɛluŋ ndoŋ, la tosa lende a muŋ te.
16 Waŋnda haa chieeŋ ndaŋ bɛnduŋ Chɛhowa Mɛlɛka nyaa cho nya kioo le miŋ wa nyɛm kɛŋ nya woŋ, nyɛ o nyɛ yoomaa cho loŋ, la mɛi ndu yoomu le.
17 La nɔ mi la diu wanaa cho loŋ nda kpou a mɛɛ Chɛhowa Mɛlɛka nyaa dimul nya yɛ. Nda cho ni: Hitaitiiya, Amɔluaitiiya, Kenanaitiiya, Pɛluisaitiiya, Hivaitiiya, a Chɛbusaitiiya.
18 Keŋ cho tosa, a pɛɛku nya sɔɔŋ wɔɔŋ ndaa tosa le mɛlɛkaa ndaa woŋ, mi la tol muŋ kɔɔli, nduyɛ mi la tosa hakioo a Chɛhowa Mɛlɛka nyaa le.
19 “Te la luei pɛ chioo o piŋndo niŋ le ndu biyɔɔ, okoŋ mi la sɔŋga a ndu le palɛi bɔɔbɔɔ nduyɛ mi la bii ndu, la kiaŋ yɔmii cho loŋ nde a chooŋ mi la tɛɛmbuu ndi le. La nɔla mi la de komɔɔla yɔmii keŋ, kɛ la kiaŋ ndi le. Kanifuule, waŋnda chieeya nya luei o piŋndo niŋ ni, o cho yɔmnde le.
20 Yɔmii wana di komɔɔ ndɔɔ le ve kinɛi, la nɔla mi la tɛɛmbuu ndi. La nɔla mi la keŋ ndi, mi la soliŋ ndi kpeku le chioo lueiyo o piŋndo niŋ haaa mi la tɛɛmbuu ndu.
