Ditɔnɔmii 26:1-19
26 “Te la luɛi pɛ o lɛŋnde Chɛhowa Mɛlɛka nyaa cho nya kioo le mi le wa nyɛm kɛŋ nya leŋ niŋ, mi la bii leŋ okoŋ mi la chal leniŋ,
2 wana o wana nɔ mbo chua tɔlɔɔla* taselaŋ la tiŋ, la o cho kendi o lɛŋnde Chɛhowa Mɛlɛka nyaa cho nya kioo leŋ niŋndaŋ, mbo wou laŋ o kambɛiyo niŋ, mbo kuɛ a laŋ o fondaŋ Chɛhowa Mɛlɛka nyaa hɛli le mi diola ndɔlaŋ la wa loŋ ndo.
3 O nɔ mbo kuɛ o wana soliaa lasala cho wa wallo a teleŋ koŋ ndo lo mbo dimul ndu aa, ‘I hiŋ hau le Chɛhowa Mɛlɛka naa dimullo maa I fuuluu o lɛŋnde Chɛhowa chuel finyaa naa mamaa buŋgɛi le naa kioo leŋ niŋ.’
4 “Wana soliaa lasalaa cho ndu kambɛiyo biyɔɔ o ba, mbo kɛsi ndu bandu luamaa lasala Chɛhowa Mɛlɛka nyaa lachi.
5 Okoŋ mi wana koŋ sim Chɛhowa Mɛlɛka ndɔɔ o hɔl, mbo dimi aa, ‘Aluameeniaŋnɔ ndoo nɔ naa chalaa le wo* finya nuu wa ni, mbo kɔ simnuŋ miallo Ichipi, nduyɛ ndoo nɔ wanaa bɔɔ o ndu lo chiɛiniŋ te. Kɛ o lo loŋ mbo simnuŋ kaale bɛndu, wana kpaaya bɛndu, nduyɛ mbo kui tau tau.
6 Mi Ichipiaŋnda bii naa biyɔɔ wɔɔŋndo, ma tusi naa saŋgaa choo, nduyɛ ma baŋ naa le wali lechɛ kala kalaa tosaa.
7 Le hei, miŋ kandu chaŋndo o Chɛhowa, Mɛlɛka finyaa naa mamaa lo. Nduyɛ mi Chɛhowa yaŋ naa nilaŋ, mbo cha saŋga naŋ wa niŋndo, a nyɛpalaa nda wa naa tusioo choo wo.
8 O mɛɛlulaŋ, mi Chɛhowa soliŋ kpaaya ndɔ bɛndoo, sɔɔŋ ŋsiooŋndoŋ, sɔɔŋ kɔndɔfilloŋ, a kaamaalaŋ kpeku le naa solioo o lɛŋnde Ichipi leŋ niŋ.
9 Okoŋ, mbo huŋ a naa o fondaa hoo mbo ke naa lɛŋndeŋ ndeŋ, lɛŋnde milikiiyaŋ* a liaaŋ ma cho taaliaa leniŋ ndeŋ.
10 Lelaŋ, I hiŋ a komɔɔla tasela ya sɔla o lɛŋnde Chɛhowa ke ya leŋ niŋ.’
“O nɔ mbo kɔ kɛsi laŋ Chɛhowa Mɛlɛka ndɔɔ lachi, nduyɛ mbo beŋ Chɛhowa Mɛlɛka ndɔɔ wulaŋ.
11 O nɔ niko mbo dɔɔnuŋ nyaale le sɔɔŋ kɛndɛŋ Chɛhowa Mɛlɛka ndɔɔ tosal ndu, yuŋgu ndɔɔ, Livaiya, a mialaa cho nya tɛɛŋ nda kpou.
12 “Te wana o wana chii pɛ o tɔ ndɔɔ faŋa o tɔlɔɔla ndɔlaŋ choo o wɔsi yaa ndɔɔ niŋ, o chua o tɔ ndɔ koŋ mbo ke Livaiya, mialaa cho nya tɛɛŋ nda, chuaambuaa nɔ ŋfinya le wa,* a wanaa vii piaanduaa o chieeŋ nyaŋ bɛndoŋ* niŋnda, le ma de ma pim cha.
13 Wana koŋ nɔ mbo dimi Chɛhowa Mɛlɛka ndɔɔ lachi aa, ‘I chii soli nyɛm diandaŋ cho le Mɛlɛka woŋ o chiɛi nuu niŋ, mi ke Livaiya, mialaa cho naa tɛɛŋ nda, chuaambuaa nɔ ŋfinya le wa, a wanaa vii piaanduaa wa, a mɛɛ ŋ dimul la le tosaa yɛ. I feŋaŋ o sawala numndaŋ choo, ɔɔ mi kɛɛ le nyɛ ŋ dimul la wo tosaa le.
14 A teleŋ ya wa mɔnɛi biyɔɔ wo, I feŋa nyɛ o nyɛ lechoo mi de le. Nduyɛ a teleŋ ya wa o nɔɔlɛiyo bɛɛ, I feŋa nyɛ o nyɛ lechoo ɔɔ mi yɔŋgu ndu le ŋwaŋ vilɛi le. I diikuŋ Chɛhowa Mɛlɛka nuu nduyɛ mi tosa nyɛ o nyɛ o dimul la.
15 Lo o fondaŋ num diandaa ŋ cho choo choo wo ma mɛɛndaŋ naa, ma dɔu wanaa numnda Isɔluɛi a lɛŋnde ŋ ke naa leŋ sala, lɛŋnde milikiiyaŋ a liaaŋ ma cho taaliaa leniŋ ndeŋ, a mɛɛ ŋ chuel finyaa naa mamaa buŋgɛi yɛ.’
16 “Paale hauleŋ ndeŋ, Chɛhowa Mɛlɛka nyaa cho nya dimullo le mi la bii sawala ndɔlaŋ ndaŋ, a nyɛ o nyɛ o dimul nya. La nɔ mi la bii laŋ, nduyɛ mi la tosa nyɛ la dimi wo a kɔl nyaa kpou vɛlɛ a yoomu* nyaa kpou.
17 La tuei hau mi Chɛhowa dimi maa o cho simnɔŋ Mɛlɛka nyaa, te la kela pɛ o nɛila ndɔlaŋ choo, mi la tosa nyɛ o dimi wo, mi la bii sawala ndɔlaŋ, nduyɛ mi la tuei ndu diom.
18 Lelaŋ hau, Chɛhowa tuei nyɛ nya dimi maa la cho sawala ndɔlaŋ kpou biyɔɔ, mi la simnuŋ wanaa nduaa a nyɛm kɛŋ ndɔŋ teŋgeŋndoŋ ndo,* a mɛɛ o chuel nya buŋgɛi yɛ.
19 Te la chɔm pɛ maa wanaa diandaa nya cho Chɛhowa Mɛlɛka nyaa o hɔl ni, o cho nya heelu tema mbo hiou kayii cheleŋnde kpou, mbo tosa mi waŋnda saŋgala nya, mbo soli nya tɔɔ, nduyɛ mbo tosa mi waŋnda ke nya bɛɛleŋ, a mɛɛ o chuel nya buŋgɛi yɛ.”
Tɛɛsiaalaŋ
^ Hibuluiye, “komɔɔlaŋ.”
^ Ɔɔ naapum, “luusiaŋ ndo.”
^ Ɔɔ “nɔnɔɔ.”
^ Ɔɔ “viiya.”
^ Hibuluiye, “diola kpakilaŋ.”
^ Tofa Tɛɛsiaa.
^ Ɔɔ “nyɛm kɛŋ ndɔŋ sɔvɛ sɔviɔŋ.”
