Ditɔnɔmii 27:1-26
27 Okoŋ, mi Muuse a waŋ banaa Isɔluɛi dimul waŋnda aa: “La diikuŋ sawala ya cho nya kioo paale hauleŋ ndeŋ ndaŋ kpou.
2 Paale nya cho Chɔɔdaŋ ndaŋ taŋɔɔ mi la luɛi o lɛŋnde Chɛhowa Mɛlɛka nyaa cho nya kioo leŋ niŋ, la dii pouta bɛndulaŋ bemboo mi la yikpa laŋ.*
3 Okoŋ, mi la poonyiaa Sawala ya ke nya laŋ lechoo, le halikpeŋ mi la luɛi o lɛŋnde Chɛhowa Mɛlɛka nyaa cho nya kioo leŋ niŋ, lɛŋnde milikiiyaŋ* a liaaŋ ma cho taaliaa leniŋ ndeŋ, a mɛɛ Chɛhowa, Mɛlɛka finyaa nyaa mamaa chuel nya buŋgɛi yɛ.
4 Te la taŋ pɛ Chɔɔdaŋ ndaŋ, la nɔ mi la dii poutaŋ ndaŋ o Pembii Ɛba Ve choo, okoŋ mi la yikpa laŋ* mɛɛ ya cho nya hau dimullo yɛ.
5 La nɔ vɛlɛ mi la teŋgul Chɛhowa Mɛlɛka nyaa bandu luamaa lasalaa loŋ a poutaŋ. La nɔ mi la soliŋ chiliŋndoŋ kpeku le ndu taŋgullo le.
6 A pouta kpulukuu laŋ nya nɔ ni mi la teŋgul Chɛhowa Mɛlɛka nyaa bandu luamaa lasalaa, nduyɛ mi la soli salala luamaa laŋ lechoo o Chɛhowa Mɛlɛka nyaa lo.
7 La nɔ mi la soli salala kɔl nyulu laŋ, mi la de laŋ ndoŋ, nduyɛ mi la dɔɔnuŋ nyaale Chɛhowa Mɛlɛka nyaa lachi.
8 Okoŋ, mi la poonyiaa nyɛ o nyɛ sawalaŋ ndaŋ la dimi o pouta laŋ choo nyɛkɛndɛi.”
9 Mi Muuse a wanaa soliaa lasalaa fula o pulale Livai leŋ choo wa dimul Isɔluɛiya kpou aa: “Nya waŋnda Isɔluɛi, la meiyɔ mi la yaŋ nilaŋ. La simnuŋ hau wanaa cho le Chɛhowa Mɛlɛka nyaa wa.
10 La nɔ mi la yaŋ Chɛhowa Mɛlɛka nyaa nilaŋ, nduyɛ mi la bii sawala ndɔla ya cho nya kioo paale hauleŋ ndeŋ ndaŋ a nyɛ o nyɛ o dimul nya le tosaa.”
11 Mi Muuse dimul waŋnda o paale leŋ choo aa:
12 “Te la taŋ pɛ Chɔɔdaŋ ndaŋ, kaala nɔ mi la sim o Pembii Kɛluisim Nde choo le waŋnda salaa dɔwɔɔ laŋ la cho laŋ ni: Simiɔŋ, Livai, Chuda, Isaka, Choosɛ, a Bɛŋjamiŋ.
13 Nduyɛ, kaala nɔ mi la sim o Pembii Ɛba Ve choo le waŋnda sendioo handɔɔ choo laŋ la cho laŋ ni: Lubɛŋ, Kaadi, Asia, Sɛbulɔŋ, Daŋ, a Nafitalii.
14 Okoŋ, mi Livaiya dimul waŋnda Isɔluɛi choo choo kpeleŋ aa:
15 “‘Wana o wana toosiaa pɛ piɔmndo, o wa a yɔmndo ɔɔ a chiliŋnde,* nyɛm wanaa chaa nyɔɔŋ a laba wa* toosiaa woŋ, nyɛ Chɛhowa tul leyɛ wo mbo viaŋ ndu inɛ, sendioo cho ndu choo.’ (Okoŋ, mi waŋnda kpou dimi aa, ‘Amiina!’*)
16 “‘Wana o wana bii pɛ finya ndɔ ɔɔ kala ndɔ biyɔɔ wɔɔŋndo, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
17 “‘Wana o wana faŋa pɛ pɛŋgulaŋ nda wana nda chiɛɛliaŋndo tɛɛŋ, mbo hivi laŋ lachi, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
18 “‘Wana o wana tosa pɛ mi wana sumɛiyo bendu nɛiyo, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
19 “‘Wana o wana kilul pɛ mialaa cho nya tɛɛŋ nda, chuaambuaa nɔ ŋfinya le wa,* a waŋ laanduaa vii piaanduaa wa yamɛi lakafɛi, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
20 “‘Wana o wana tosa pɛ hiniei a lanɔɔ finya ndɔ, sendioo cho ndu choo. Kanifuule, o tɛɛmbuu finya ndɔ labɛɛ.’* (Okoŋ, mi waŋnda kpou dimi aa, ‘Amiina!’)
21 “‘Wana o wana tosa pɛ hiniei a chɔloo, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
22 “‘Wana o wana tosa pɛ hiniei a yema ndɔ, o wa chua finya ndɔ wo ɔɔ chua kala ndɔ wo, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
23 “‘Wana o wana tosa pɛ hiniei a lefu ndɔ laandoo, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
24 “‘Wana o wana veŋnuŋ pɛ mbo dii chaaŋ ndɔ, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
25 “‘Wana o wana bii pɛ luɛiyɔɔ niŋndo le wana tɛɛmbuu isɔɔ le wo diyɔɔ, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
26 “‘Wana o wana bii sawalaŋ ndaŋ nduyɛ mbo tosa nyɛ la dimi wo le, sendioo cho ndu choo.’ (Okoŋ, mi waŋnda kpou dimi aa, ‘Amiina!’)
Tɛɛsiaalaŋ
^ Ɔɔ “yikpa laŋ a pɔu humboo.”
^ Ɔɔ “nɔnɔɔ.”
^ Ɔɔ “yikpa laŋ a pɔu humboo.”
^ Ɔɔ “chiliŋii teeŋgiɛi.”
^ Ɔɔ “wanaa tosa wallo a yɔmnde vɛlɛ a chiliŋndoŋ nda.”
^ Ɔɔ “I yɔŋnuŋ lende fɔ!”
^ Ɔɔ “viiya.”
^ Hibuluiye, “o soli finya ndɔ sipoo lekɔɔ.”
