Ditɔnɔmii 3:1-29
3 “Okoŋ, miŋ muliŋ miŋ kua ba Baasiaŋ ndo. Nduyɛ mi Ɔku, masaa le Baasiaŋ huŋ a puaa nduaa chɔuwa kpou le naa chiŋalaŋndo a sɔŋgɔɔ Ɛdului.
2 Mi Chɛhowa dimul la aa, ‘La yɔŋ isiooŋ le ndu le. I cho nya ndu malɔɔ o ba, a puaa nduaa chɔuwa kpou, vɛlɛ a lɛŋnde ndɔleŋ. Nduyɛ, mɛɛ nya tosal Saihɔŋ, masa Amɔluaitiiya o wa ichali Hɛsibɔŋ ndo yɛ, lende nya cho ndu tosal ni.’
3 Mi Chɛhowa Mɛlɛka naa mal naa vɛlɛ Ɔku, masaa le Baasiaŋ, a puaa nduaa chɔuwa kpou o ba. Miŋ lo nda diuwo haaa wana pilɛ bɛɛ lo yoomu le.
4 Miŋ bii chieeŋ ndɔŋ bɛndoŋ kpou, chieeŋ bɛnduŋ 60 wa o tanda Akɔbi wo niŋndoŋ kpou. Ɔku, masaa le Baasiaŋ ndoo nɔ muŋ ni.
5 Chiooŋ muŋ kpou wa ŋ taŋgulaa a kpakila kala kalalaŋ, diola ŋchiliŋ ndaŋ, a koŋjiiyoŋ, nduyɛ muŋ nɔ sɔndɔkɔltaŋ tau.
6 A koŋ kpou, miŋ tɛɛmbuu muŋ mɛɛ naŋ tosa a Saihɔŋ, masaa le Hɛsibɔŋ yɛ. Miŋ tɛɛmbuu chieeŋ ndɔŋ bɛndoŋ kpou, kɔ bii a puaa, waŋ laanduaa, a chuaambuaa.
7 Miŋ bii chɔluaa ndaa kpou, nduyɛ miŋ chua nyɛm sɔvɛŋ wa o chieeŋ muŋ niŋndoŋ le naapila.
8 “A teleŋ koŋ, miŋ bii lɛŋnde masaa ŋiɔɔŋaa Amɔluaitiiya, a wa o tanda Chɔɔdaŋ ndo niŋnda, chɔŋ o Kpoloŋndo Anɔŋ* haaa mbo kua o Pembii Hɛmɔŋ Nde.
9 Pembei hei Saidoniaŋnda ndaa veelu ni aa Siliyɔŋ, nduyɛ mi Amɔluaitiiya ndaa veelu ndi aa Sɛniɛɛ.
10 Chieeŋ bɛndoŋ o pemboŋ choo* kpou, muŋ Kiliaadi kpou, a muŋ Baasiaŋ kpou, haaa kɔ bii Salɛkaa a Ɛdului. Chiooŋ muŋ kpou, Ɔku masaa le Baasiaŋ ndoo nɔ muŋ ni.
11 Ɔku, masaa le Baasiaŋ wa wana mɛɛlaa le Luɛfemnda ni. Kɔfiŋ* nda kumbu ndu niŋndo, a chiliŋndoŋ* nda toosiaa ndu ni. Nduyɛ, o cho wɔ Luaba o chiee Amɔluaitiiya niŋ. Kɔfiŋndo hoo, bandii nduɛi wa nɛiyo tɔ a le yaa a tɛndaa tɛɛŋ,* nduyɛ toŋgii nduɛi wa nɛiyo le ŋɔmpum.
12 A teleŋ koŋ, lɛŋnde naŋ bii leŋ le cho leŋ ni: Aloya, o cho o Kpoloŋndo Anɔŋ* ikɛiyo, a tanda ŋpemboo Kiliaadi tɛndaa tɛɛŋ. Nduyɛ chieeŋ bɛnduŋ wa o tandala laŋ niŋndoŋ, mi ke kaale Lubɛŋ ndeŋ a kaale Kaadi leŋ.
13 Kiliaadi kumbuei pilɛi a Baasiaŋ kpou, o wa masaa Ɔku o ba bɛŋgu wo, mi ke kaale Manaasɛ leŋ tɛndaa tɛɛŋ. Tanda Akɔbi wo kpou, o wa o Baasiaŋ niŋndo, waŋnda ndaa chua ndu maa lɛŋnde Luɛfem nda o wa ni.
14 “Mi Chaa, po Manaasɛ wo chua tanda Akɔbi wo kpou, haaa kɔ bii o pɛŋgula Kɛsiɔluaitiiya a Maakataitiiya. Mbo ke sɔndɔkɔlta wa laŋ o Baasiaŋ niŋndaŋ diola ndɔlaŋ Havɔti-chayɛɛ.* Haaa huŋ bii a paale hauleŋ ndeŋ, lende nda veelu sɔndɔkɔltaŋ ndaŋ ni.
15 Nduyɛ, mi ke Makaya Kiliaadi.
16 Kaale Lubɛŋ ndeŋ a kaale Kaadi leŋ, mi ke nda chɔŋ Kiliaadi haaa kɔ o Kpoloŋndo Anɔŋ.* Kpoloŋ koŋ tɛndaa tɛɛŋ cho pɛŋgula ndalaŋ ni haaa kɔ Chabɔki, o kpoloŋ cho o pɛŋgula Amɔnaitiiya wo.
17 Mi pɛŋgula ndalaŋ la kua Aluaba, Chɔɔdaŋ a pɛŋgula ndɔlaŋ, mi la chaŋ Kinɛluɛti mi la kua haaa o Pee Mɛŋma Ihɛllo Aluaba, pee mɛŋma ihɛl nyɛ yoomaa cho le niŋ te wo, o cho o lɛŋnde holnuŋ Pembei Pisika wo, ba paaleŋ le chaŋ ndo.
18 “Okoŋ mi dimul nya aa, ‘Chɛhowa Mɛlɛka nyaa chii nya lɛŋndeŋ ndeŋ ke le mi la wa leniŋ. Kɛ puaa nyaa nɔ kɔl simulaa wa kpou nɔ ma chua nyɛm ndaŋ chɔuwoŋ, ma taŋ puaapiliaa nyaa Isɔluɛiyaa tuaa lachi.
19 Laandaa nyaa, chuauwaa nyaa, a chɔluaa nyaa kinɛi cho pɔɔ lo o chieeŋ ya ke nya woŋ niŋ ni, (kanifuule I sina maa la nɔ chɔluaa tau tau),
20 haaa mi Chɛhowa ke puaapiliaa nyaa fonda pɛŋgiaa mɛɛ o ke nya yɛ. Nduyɛ, ma chal o lɛŋnde Chɛhowa Mɛlɛka nyaa cho nda kioo Chɔɔdaŋ leeloo leŋ niŋ. Okoŋ, mi wana o wana miiŋgu niko mbo huŋ chal o fondaŋ ndɔ ya ke ndu wo.’
21 “A teleŋ koŋ, mi dimul Chɔɔsuaa aa: ‘Numpila che a lehɔl pɛɛŋ nyɛ Chɛhowa Mɛlɛka nyaa tosa a masaa ŋiɔɔŋnda haa wo. Lende koni Chɛhowa cho tosa a masɛi cho naa nya cho taŋɔɔ wa ni.
22 La yɔŋ isiooŋ le nda le, kanifuule Chɛhowa Mɛlɛka nyaa cho sɔŋgɔɔ le nya ni.’
23 “A teleŋ koŋ, mi nyɔɔlu Chɛhowa, mi dimul ndu aa,
24 ‘Oo Chɛhowa, Mɛlɛka Kpuluŋguma Bɛndoo, a kandu niŋ buɛi numndo chɔmndo mɛɛ ŋ cho wana bɛndu yɛ, a mɛɛ ŋ cho wana kpaaya yɛ. Kanifuule, mɛlɛka o mɛlɛka cho o choo choo niŋ a o lɛŋndeŋ choo mbo tosa sɔɔŋ kpaayaŋ bɛnduŋ waa nuaa maa num te.
25 Yandii chɛl la mi taŋ mi kɔ chɔ lɛŋnde kɛndɛle cho leŋ Chɔɔdaŋ leeloo leŋ, lɛŋnde kɛndɛleŋ o tanda ŋpemboo niŋ a Lebanɔŋ.’
26 Kɛ Chɛhowa ndoo tuulu wɔ kɔl a ya le sabu nyaa, nduyɛ o yeŋ ndɛ ya lani le. Mi Chɛhowa dimul la pɛŋ aa, ‘I tuɛi lɛ num hau le dɛ! Suaa lɛ o ya lo a hei okɔɔ le.
27 Hel o Pembii Pisika Ve bolleŋ, ma mɛɛndaŋ ba paaleŋ le del lo, ba tou wo, ba luaŋ ndo, a ba paaleŋ le chaŋ ndo, ma che lɛŋnde leŋ a lehɔl pɛɛŋ, kɛ a cho Chɔɔdaŋ ndaŋ maŋ taŋɔɔ le.
28 Yulu Chɔɔsuaa iso, ma dɛɛniaa ndu, nduyɛ ma luei ndu yoomuaŋ. Kanifuule, ndu cho lasisi waŋnda haa lachi ni ma taŋ Chɔɔdaŋ leeloo. Nduyɛ, ndu cho tosa ni ma sɔla lɛŋnde ŋ cho leŋ lakɔ chɔ leŋ.’
29 Teleŋ naŋ wa ichali o kpoloŋndo Bɛti-piɔɔ hɔlndɔ wo sɔɔŋ muŋ kpou yɔŋnuŋ ni.
Tɛɛsiaalaŋ
^ Ɔɔ “fondaŋ mɛŋndaŋ ma piɔl o pollo niŋ Anɔŋ ndo.”
^ Ɔɔ “lɛŋnde dɛŋgbɛleŋ o pembei choo.”
^ Ɔɔ “kesu.”
^ Ɔɔ naapum, “pou tiŋioo.”
^ Tofa Tɛɛsiaa B14.
^ Ɔɔ “fondaŋ mɛŋndaŋ ma piɔl o pollo niŋ Anɔŋ ndo.”
^ O sim, “Sɔndɔkɔlta Chayɛɛ Laŋ.”
^ Ɔɔ “fondaŋ mɛŋndaŋ ma piɔl o pollo niŋ Anɔŋ ndo.”
